Ñanj kartâ nânj huin gachrûn Apóstol Pablo riñan nej
FILIPENSES
Gaꞌnḯn Pablo nuguanꞌ ni̱ꞌña̱nj an riñan nej dinï̂nt nne ruhuâ yumanꞌ snàꞌànj Filipos
1
Pablo ngà Timoteo,
huin si-musû Ma̱ꞌan Jesucristo,
ni̱ gaꞌnḯn nej ñûnj ñanj karta nânj hua riñan daranꞌ nej sôꞌ huin obispo ngà nej diákono,
ni̱ka̱j su̱n riñan nej dinï̂nt huin gè nìkòꞌ rukû Ma̱ꞌan Jesús nne ruhuâ yumanꞌ Filipos.
2 Ma̱ꞌan Reꞌ Ñaꞌanj an ngà Ma̱ꞌan Señor Jesucristo.
Gi̱ꞌhiaj ga̱ dïnꞌïnj ruhuâ nej suj ni̱ ga̱ su̱nu̱j u riñan nej suj.
Gachín ni̱ꞌhiaj Pablo rayiꞌî nej sôꞌ guyumân ruhuâ
3 Daranꞌ diû nga gananun ruhuâj niꞌín nej suj,
ni gaꞌhuí si guruhuâ Ma̱ꞌan Daꞌan rayiꞌî nej suj.
4 Daranꞌ diû nga gaꞌmînj ngà Ma̱ꞌan Ñaꞌanj an ni̱ nda nìhiàꞌ chre hua ruhuâj nga gachín nìꞌhia rayiꞌî nej suj,
5 dadinꞌ guruguñuꞌunj nej suj ñùnj àsìj gui si̱nï̱n nga giniꞌin nej suj nuguanꞌ gi̱ꞌhiaj ga̱na̱ni̱n nej suj ni̱ huê danj na̱nj ni̱ka̱j duguiꞌ nêꞌ nda gui hia̱j;
6 ni̱ guyumân ruhuâ nej ñûnj,
si Ma̱ꞌan Ñaꞌanj an gàyìꞌì giꞌhiaj sun ngà nej suj,
ni̱ ga̱ꞌhue gi̱ꞌhiaj hueꞌê nej suj doj si-su̱n Ma̱ꞌan nda gui ga̱ꞌna̱ꞌ ñûn Ma̱ꞌan Jesucristo;
7 ni̱ hua̱ ni̱ka̱ ruhuâj niꞌín nej suj,
ni̱ nne nej suj ruhuâ nimânj;
ni̱ nga gatû dukuâ gaꞌa ni̱ guruguñuꞌunj nej suj ñùnj ni̱ dunaꞌhuej nùguànꞌàn nêꞌ,
ni̱ nagiꞌhiaj yìtï̀nj nêꞌ nuguanꞌ gi̱ꞌhiaj ga̱na̱ni̱n nej guiì riñan nej sí ni̱ka̱j suun huê danj ni̱ ganahuin ràꞌa daranꞌ nêꞌ si-su̱nu̱j Ma̱ꞌan Ñaꞌanj an.
8 Dadinꞌ Ma̱ꞌan Ñaꞌanj an huin sa niꞌin si yàngàꞌ hia,
ni̱ ꞌì ruhuâj niꞌín daranꞌ nej suj nga sa nìko xi ꞌì ruhuâ Ma̱ꞌan Jesucristo niꞌin nej suj.
9 Ni̱ huê danj na̱nj gachín nìꞌhia rayiꞌî nej suj,
si ga̱huin nìko sa ꞌì ruhuâ nej suj daꞌ ñùn,
ni̱ ga̱huin chru̱nꞌ nï̀nꞌ ruhuâ nej suj ni̱ ga̱ra̱n daꞌnga hueꞌê ruhuâ nej suj,
10 daꞌnga ni̱ gaꞌhue gi̱ꞌhiaj nej suj sa hua̱ hueꞌê doj,
ni̱ gahuin nej suj sí yìtï̀nj ïn ni̱ sí ni̱ka̱a nda gui gùyùmàn Ma̱ꞌan Cristo.
11 Ni̱ Ma̱ꞌan Jesucristo gi̱ꞌhiaj ni̱ ûta gùrùguìꞌ sa ni̱ka̱a gi̱ꞌhiaj nej suj,
ni̱ ga̱na̱huin nìhiàꞌ ruhuâ ni̱ ga̱ꞌmi̱n hueꞌê nej guiì rayiꞌî Ma̱ꞌan Jesucristo.
Nga hua̱ nìꞌnàj ni̱ garanꞌ ruhuâj da̱gahuin riñan Ma̱ꞌan Cristo
12 Ruhuâj si gi̱ni̱ꞌin nej suj di̱nï̂nj,
si nej sañun guyumân riñânj,
ni̱ giꞌhia si gàyàꞌnï̀n nuguanꞌ gi̱ꞌhiaj ga̱na̱ni̱n nej guiì gaꞌan ni̱ gi̱yi̱ꞌna̱nj nej guiì gu̱nïn si-nùguànꞌ Ma̱ꞌan Ñaꞌanj an,
13 ni̱ nga gatû dukuâ gaꞌa ni̱ giniꞌin daranꞌ nej sí ni̱ka̱j su̱n riñan dukuâ sun nne hiuj dânj,
ni̱ huê danj na̱nj giniꞌin aꞌngô nej guiì.
14 Ni̱ ûta gàꞌì nej dinï̂nt ni̱ dànanj ganariꞌ ruhuâ nej sôꞌ guendâ gané dukuâ gaꞌa,
ni̱ ganataꞌ nej sôꞌ si-nùguànꞌ Ma̱ꞌan Ñaꞌanj an riñan nej guiì ni̱ nitaj si guyuꞌhuiꞌ nej sôꞌ,
ni̱ hua̱ ruhuâ nej sôꞌ gi̱ranꞌ sa̱ñu̱n nej sôꞌ rayiꞌî si-nùguànꞌ Ma̱ꞌan Ñaꞌanj an.
15 Yàngàꞌ hia,
ni̱ hua̱ da̱ꞌa̱j nej sôꞌ ganataꞌ si-nùguànꞌ Ma̱ꞌan Ñaꞌanj an,
guendâ yìkòj ruhuâ nej sôꞌ ni̱ guendâ garán nej sôꞌ riñânj;
sani̱ hua̱ aꞌngô da̱ꞌa̱j nej sôꞌ ganataꞌ si-nùguànꞌ Ma̱ꞌan Ñaꞌanj an guendâ ꞌì ruhuâ nej sôꞌ niꞌin nej sôꞌ Ma̱ꞌan Ñaꞌanj an.
16 Da̱ꞌa̱j nej sôꞌ gananï̂n rayiꞌî Ma̱ꞌan Cristo guendâ garán nej sôꞌ riñânj,
sani̱ sê si̱ gaꞌmin nej sôꞌ nuguanꞌ yàngàꞌa mánj,
man si ruhuâ nej sôꞌ gi̱ꞌhiaj nej sôꞌ si gi̱ranꞌ sàñùnj doj nga nné ruhuâ dukuâ gaꞌ na̱nj ánj.
17 Sani̱ aꞌngô da̱ꞌa̱j nej sôꞌ gananï̂n si-nùguànꞌ Ma̱ꞌan Ñaꞌanj an guendâ ꞌì yàngàꞌ ruhuâ nej sôꞌ niꞌin nej sôꞌ Ma̱ꞌan Cristo,
dadinꞌ niꞌin nej sôꞌ si yàngàꞌ hia dunaꞌhuê rayiꞌî nuguanꞌ gi̱ꞌhiaj ga̱na̱ni̱n nej guiì.
18 Sani̱ nitaj si ganahuî ruhuâj mánj.
Dadinꞌ ga̱ꞌhue si man si gaꞌmin nej sij guendâ gìrìꞌ nej sij sa ga̱chru̱n nej sij nej si gaꞌmin nej sij nuguanꞌ yàngàꞌa,
sa ña̱ꞌa̱n huin si gananï̂n nej sij rayiꞌî Ma̱ꞌan Cristo;
ni̱ ganahuin nìhiàꞌ ruhuâj rayiꞌî sa giꞌhiaj nej sij,
ni̱ dànanj ga̱na̱huin nìhiàꞌ ruhuâj doj gàꞌ na̱nj ánj.
19 Dadinꞌ niꞌín si rayiꞌî guendâ gachín nìꞌhiaj nej suj ni̱ huê danj ni̱ gu̱ru̱gûñuꞌunj Si-Espíritu Ma̱ꞌan Jesucristo ni̱ râꞌñanj ga̱hui̱ ruhuâ dukuâ gaꞌa.
20 Sa huin ruhuâj huin,
ni̱ ànàꞌhuì si nitaj gàꞌ si ꞌngo̱ sinàꞌàj gitàj riñânj,
ni̱ dàj rûnꞌ guyumân ruhuâj daranꞌ diû,
ni̱ si nne nìꞌnàj ni̱ si giranꞌ sàñùnj ni̱ si gàhuìj,
ni̱ rayiꞌî danj ni̱ gaꞌmin hueꞌê nej guiì rayiꞌî Ma̱ꞌan Cristo.
21 Dadinꞌ si nne nìꞌnàj ni̱ nné guendâ Ma̱ꞌan Cristo,
ni̱ si gàhuìj ni̱ gàhuìj guendâ Ma̱ꞌan Cristo.
22 Sani̱ si nga hua nìꞌnàꞌ nneè ku ni̱ dànanj huaj ga̱ꞌhue gi̱ꞌhiaj sûnj si-su̱n Ma̱ꞌan Ñaꞌanj an,
hiôꞌ ni̱ nun niꞌín ahuin sa gànàguìj mánj.
23 Dadinꞌ ganï̂n ruhuâj niꞌín guñan ngue sani̱ ûta chìꞌ ꞌhia gànàguìj ahuin goꞌngo̱ ngue gi̱daꞌaj,
sani̱ huin ruhuâj gàhuìj ni̱ gùchìj gané ngà Ma̱ꞌan Cristo;
ni̱ nânj huin sa ûta hueꞌê hua doj gàꞌ na̱nj ánj;
24 sani̱ si ga̱né doj riñan hioꞌó nânj ni̱ dànanj dùgùnàj huaj guendâ gàꞌhue gu̱ru̱gûñuꞌun doj rukû nej suj.
25 Ni̱ gàꞌ niꞌín,
si ga̱né doj ngà daranꞌ nej suj,
guendâ gu̱ru̱gûñuꞌun ni̱ ga̱huin nùkuaj ruhuâ nej suj ni̱ ganahuin nìhiàꞌ ruhuâ nej suj ni̱ gùyùmàn doj ruhuâ nej suj ngà si-nùguànꞌ Ma̱ꞌan Ñaꞌanj an,
26 daꞌnga ni̱ ga̱huin nìko sa ga̱na̱huin nìhiàꞌ ruhuâ nej suj niꞌin nej suj ñùnj rayiꞌî Ma̱ꞌan Cristo dadinꞌ gùchìꞌ ñûn siganï̂nj nej suj.
27 Sa gachín nìꞌhia riñan nej suj huin,
si du̱guꞌnïnꞌ nej suj da̱gahuin nej suj dàj rûnꞌ taj nuguanꞌ gi̱ꞌhiaj ga̱na̱ni̱n nej suj huin nuguanꞌ gidigân Ma̱ꞌan Cristo,
ni̱ asàꞌ ga̱ꞌhue guchí ñan màn nej suj,
nej si nné nda gànꞌ,
ni̱ ga̱na̱huin nìhiàꞌ ruhuâj nga gu̱nḯn si ni̱kï̱nꞌ ran nej suj ni̱ gu̱ña̱n hua ruhuâ nej suj,
ni̱ duguꞌnïnꞌ nej suj gananï̂n nej suj nuguanꞌ giꞌhiaj ga̱na̱ni̱n nej guiì ni̱ giꞌhiaj nej suj si guyumân ruhuâ nej guiì.
28 Si̱ guyuꞌhuiꞌ nej suj niꞌin nej suj nej guiì gata rùhuà niꞌin nej suj mánj,
dadinꞌ hua̱j ninj ga̱ꞌa̱nj niꞌhia̱ ninj,
sani̱ ga̱na̱ni̱n nej suj,
gi̱ꞌhiaj Ma̱ꞌan Ñaꞌanj an.
29 Ni̱ sê man si gùyùmàn ruhuâ nej suj niꞌin nej suj Ma̱ꞌan Cristo mánj,
dadinꞌ hua̱ ni̱ña̱n si gi̱ranꞌ sa̱ñu̱n nej suj rayiꞌî Ma̱ꞌan,
30 ni̱ huê dàj rûnꞌ giranꞌ sàñùnj ni̱ huê danj giranꞌ sa̱ñu̱n nej suj,
ni̱ gàꞌ niꞌin nej suj si giranꞌ sàñùnj ni̱ hua na̱nj giranꞌ sàñùnj doj na̱nj ánj.