Nagiꞌhiaj ninaj Cristo Ma̱ꞌan sani̱ huin ꞌngo̱ sa nìko xi
2
Huê danj,
ni̱ si Ma̱ꞌan Cristo rikî si nàgàꞌhuìꞌ nej suj chrej nùkuaj rûhua riñan nej duguiꞌ nej suj,
ni̱ si sa ꞌì ruhuâ nej suj dânj giꞌhiaj ni̱ nagaꞌhuiꞌ nej suj chrej nùkuaj rûhua riñan aꞌngô nej duguiꞌ nej suj,
ni̱ si daranꞌ nej suj guyumân ruhuâ niꞌin Ma̱ꞌan Espíritu Santo,
ni̱ si daranꞌ nej suj gurugûñuꞌunj aꞌngô nej duguiꞌ.
2 Ni̱ gi̱ꞌhiaj nej suj si ga̱na̱huin nìhiàꞌ ruhuâj,
ni̱ gu̱ña̱n ga̱huin ruhuâ nej suj,
ni̱ gu̱ña̱n ga ꞌì ruhuâ nej suj,
ni̱ gu̱ña̱n ga̱ ruhuâ nej suj,
ni̱ gu̱ña̱n ga̱nï̱n ruhuâ nej suj.
3 Ni̱ si̱ garán riñan duguiꞌ nej suj ni̱ si̱ giꞌhiaj nej suj si ûta huin nej suj doj;
ni̱ gi̱ꞌhiaj nej suj si huin nej suj sí ninaj doj,
ni̱ gi̱ꞌhiaj nej suj si dànanj huin doj aꞌngô nej duguiꞌ nej suj gàꞌ daꞌ nej suj;
4 ni̱ si̱ ganï̂n ruhuâ nej suj man rayiꞌî sa ga̱ riñan nej ma̱ꞌan nej suj mánj,
ga̱nï̱n ruhuâ nej suj rayiꞌî sa ga̱ riñan aꞌngô nej duguiꞌ nej suj na̱nj ánj.
5 Ni̱ ga̱nï̱n ruhuâ nej suj dàj rûnꞌ ganï̂n ruhuâ Ma̱ꞌan Cristo.
6 Dadinꞌ Ñaꞌanj an huin Ma̱ꞌan Cristo sani̱ nun gi̱ꞌhia si gu̱ña̱n ga̱huin ngà Maꞌan Ñaꞌanj an mánj,
ni̱ huê danj na̱nj nun gi̱ꞌhiaj guesaj si gu̱ña̱n huin ngà Ma̱ꞌan Ñaꞌanj an ni̱ nun ga̱ nìchràj ruhuaj mánj,
7 sa giꞌhia huin si guduna sun yàkàn ginika yàtàꞌa,
ni̱ gahuin dàj rûnꞌ huin ꞌngo̱ sí giꞌnïnj giꞌhiaj sun chre,
ni̱ huaj dàj rûnꞌ hua nej síi;
8 ni̱ nga gahuin síi,
ni̱ giꞌhiaj nina doj Ma̱ꞌan,
ni̱ dagahuin riñan Ma̱ꞌan Ñaꞌanj an nda gui gahuij,
ni̱ godokoꞌ nej sij Ma̱ꞌan riñan rugutsìi ni̱ gahuij.
9 Ni̱ huê rayiꞌî dan ni̱ ganachinikaj Ma̱ꞌan Ñaꞌanj an Ma̱ꞌan ni̱ nagaꞌhuij sun yàkàn xi ginikaj su̱n Ma̱ꞌan,
ni̱ dugûꞌna Jesús siyu̱gui Ma̱ꞌan Jesús ni̱ huin sa nìko doj riñan siyu̱gui aꞌngô nej guiì,
10 ni̱ riñan Ma̱ꞌan Jesús ga̱nikïnꞌ rúdàkòj daranꞌ nej sa màn yàtàꞌa,
nej sa màn riñan hioꞌóo,
ni̱ nej sa màn riki hioꞌóo;
11 ni̱ daranꞌ nej guiì ganataꞌ duꞌhua si Ma̱ꞌan Jesucristo huin Ma̱ꞌan Señor,
ni̱ gaꞌmin hueꞌê ninj riñan Ma̱ꞌan Ñaꞌanj huin Rêj ninj.
Nej guiì nìkòꞌ rukû Ma̱ꞌan Cristo ni̱ huin ninj sa yigï̀ïn ruhuâ yumiguìi
12 Huê danj ni̱,
ni̱ dàj rûnꞌ dagahuin nìgànj nej suj riñan Ma̱ꞌan Ñaꞌanj an,
ni̱ huê danj da̱gahuin nej suj,
nùnj huin si nuhuí nne siganï̂nj nej suj,
ni̱ gi̱nun yuꞌhuiꞌ ruhuâ nej suj ni̱ si̱ giꞌhiaj nej suj gakï̱nꞌïn ni̱ du̱gumîn nej suj ma̱ꞌan nej suj daꞌnga ni̱ si̱ gaꞌanj ni̱ꞌhia̱ nej suj mánj,
13 dadinꞌ Ma̱ꞌan Ñaꞌanj an huin si giꞌhiaj ni̱ rayiꞌî dan ni̱ da̱gahuin nej suj ni̱ giꞌhiaj nej suj sa sàꞌa,
ni̱ huê dan huin sa sàꞌ garanꞌ ruhuâj gi̱ꞌhiaj nej suj.
14 Gi̱ꞌhiaj sun nej suj sani̱ si̱ gaꞌmin nej suj rayiꞌî nej duguiꞌ suj ni̱ si̱ garán ri̱ña̱n duguiꞌ nej suj.
15 Daꞌnga ni̱ ga̱ꞌhue ga̱huin nej suj sí ni̱ka̱a ni̱ sí gèe siganï̂nj yiꞌnïnꞌ kï̱j hua nânj,
ni̱ ga̱huin nej suj sí ninaj doj daꞌnga ni̱ gaꞌhue ga̱huin nej suj daꞌní Ma̱ꞌan Ñaꞌanj an ni̱ huê danj na̱nj ga̱huin nej suj sa gu̱du̱guun ruhuâ yimiguì nânj;
16 ni̱ si̱ gudunâj nej suj guendâ gùyùmàn ruhuâ nej suj ni̱ ga̱ ran ruhuâ nej suj ngà nuguanꞌ gi̱ꞌhiaj gà nìꞌnàꞌ nej suj,
ni̱ nga ga̱ꞌna̱ꞌ ñûn Ma̱ꞌan Cristo hiôꞌ ni̱ giniꞌín si sê si̱ giꞌhiaj sun chré ngà nej suj,
ni̱ sê si̱ guchiꞌ chré ñan màn nej suj mánj.
17 Nùnj huin si gàhuìj sani̱ ga̱huín dàj rûnꞌ huin ꞌngo̱ ofrenda,
rayiꞌî guendâ gùyùmàn ruhuâ nej suj,
sani̱ ga̱na̱huin nìhiàꞌ ruhuâj,
ni̱ huê danj na̱nj ga̱na̱huin nìhiàꞌ ruhuâ nej suj nej na̱nj ánj.
18 Ni̱ huê danj na̱nj ga̱na̱huin nìhiàꞌ ruhuâ nej suj ngàj nej na̱nj ánj.
Timoteo ngà Epafrodito
19 Gànàꞌhuì si gu̱ru̱gûñuꞌunj Ma̱ꞌan Señor ni̱ raꞌñanj gàꞌnï̀n gùchìꞌ Timoteo ñan màn nej suj,
ni̱ ga̱na̱huin nìhiàꞌ ruhuâj nga gunḯn dàj hua mân nej suj;
20 dadinꞌ nitaj aꞌngô sí ûta ganahuij ruhuâ niꞌin nej suj dàj rûnꞌ ganahuij ruhuâ Timoteo niꞌin sôꞌ nej suj,
dadinꞌ ꞌì ruhuâ sôꞌ niꞌin sôꞌ nej suj dàj rûnꞌ ꞌì ruhuâj niꞌín nej suj.
21 Dadinꞌ daranꞌ nej sôꞌ ganahuij ruhuâ niꞌin ma̱ꞌan,
ni̱ nitaj si ganahuij ruhuâ nej sôꞌ niꞌin nej sôꞌ sa garanꞌ ruhuâ Ma̱ꞌan Cristo Jesús mánj.
22 Sani̱ gàꞌ niꞌin nej suj si ûta hueꞌê dagahuin Timoteo,
ni̱ gàꞌ niꞌin nej suj si guruguñuꞌunj sôꞌ ñùnj ni̱ giꞌhiaj sôꞌ dàj rûnꞌ giꞌhiaj daꞌnî ni̱ gu̱ña̱n gaché gananï̂n nguèj ñûnj nuguanꞌ gi̱ꞌhiaj ga̱na̱ni̱n nej guiì.
23 Gànàꞌhuì si sôꞌ nânj gàꞌnï̀n gùchìꞌ ñan màn nej suj,
sani̱ gàꞌ si̱nï̱n gi̱ni̱ꞌhia dàj gi̱ꞌhia gi̱ranꞌán.
24 Gi̱nun ñânj ni̱ gànàꞌhuì si Ma̱ꞌan Señor gu̱ru̱gûñuꞌunj ni̱ raꞌña̱nj gùchìj ñan màn nej suj.
25 Sani̱ giniꞌhia si ûta ña̱ꞌa̱n huaj ni̱ rayiꞌî dan ni̱ gaꞌnï̂n guchiꞌ dinï̂nt Epafrodito ñan màn nej suj,
dadinꞌ huê sôꞌ giꞌhiaj sun ngàj ni̱ huin sôꞌ sí ni̱ka̱j duguiꞌ ngàj ni̱ huin nej ñûnj si-stadû Ma̱ꞌan Ñaꞌanj an,
dadinꞌ huê sôꞌ gaꞌnḯn nej suj gaꞌnaꞌ riñânj,
ni̱ sôꞌ guruguñuꞌunj nej sa gachin riñânj;
26 dadinꞌ ûta huin ruhuâ sij gi̱ni̱ꞌin sij nej suj,
ni̱ ûta huin ruhuâ sij dadinꞌ niꞌin sij si gunïn nej suj si gaꞌnanꞌ sij.
27 Yàngàꞌ hia ni̱ gaꞌnanꞌ sij,
ni̱ gàꞌ doj sînj huaj ni̱ gàhuìꞌ sij;
sani̱ Ma̱ꞌan Ñaꞌanj an guruguñuꞌunj sij,
ni̱ sê man ꞌngo̱ rïn sij guruguñuꞌun dadinꞌ huê danj na̱nj gurugûñuꞌunj ñùnj,
dadinꞌ si nu̱n gahuiꞌ sij ni̱ ûta gananï̂n hia ruhuâj.
28 Huê danj ni̱ ûta raꞌñan gàꞌnï̀n gùchìꞌ sij riñan nej suj,
ni̱ nga gi̱ni̱ꞌin ñûn nej suj riñan sij,
ni̱ ga̱na̱huin nìhiàꞌ ruhuâ nej suj,
huê danj ni̱ si̱ gananï̂n nìko ruhuâj gàꞌ mánj.
29 Ngà siyu̱gui Ma̱ꞌan Señor,
ni̱ nda nìhiàꞌ chre ga̱ ruhuâ nej suj ni̱ ga̱na̱huin ràꞌa nej suj sôꞌ,
ni̱ gi̱nikaj chrej nej suj ngà nej dinï̂nt giꞌhiaj dàj rûnꞌ giꞌhiaj sôꞌ.
30 Dadinꞌ do̱j huaj ni̱ gàhuìꞌ sij rayiꞌî guendâ gunânj gi̱tsi sij si-su̱n Ma̱ꞌan Cristo,
ni̱ nùnj huin sij ûta ha̱i̱ huaj riñan sij,
ni̱ doj huaj gàhuìꞌ sij,
rayiꞌî guendâ gunânj gi̱tsi sij rayiꞌî sun nun ga̱ꞌhue gi̱ꞌhiaj nej suj.