Ñanj kartâ nânj huin gachrûn Apóstol Pablo riñan nej
COLOSENSES
Gaꞌnḯn Pablo nuguanꞌ ni̱ꞌña̱nj an riñan nej dinï̂nt nne ruhuâ yumanꞌ snàꞌànj Colosa
1
Pablo,
huin sí gaꞌanj gi̱di̱gân si̱nï̱n si-nùguànꞌ Ma̱ꞌan Jesucristo,
ni̱ Ma̱ꞌan Ñaꞌanj an huin sa garanꞌ ruhuâ si gu̱na̱nj gitsî nguèj sij dinï̂nt Timoteo riñanj,
2 Ñanj karta nânj gaꞌnḯn sij huaj riñan nej dinï̂nt dugumîn ma̱ꞌan riñan gakï̱nꞌïn ni̱ nej dinï̂nt hueꞌê dagahuin riñan Ma̱ꞌan Cristo,
ni̱ nne nej sôꞌ ruhuâ yumanꞌ snàꞌànj Colosa:
Ga̱ dïnꞌïnj ruhuâ nej suj ni̱ ga̱ si-su̱nu̱j Ma̱ꞌan Ñaꞌanj an riñan nej suj,
dadinꞌ huin nej suj daꞌní Ma̱ꞌan Reꞌ Ñaꞌanj an ni̱ ngà Ma̱ꞌan Señor Jesucristo.
Gachín nìꞌhiaj Pablo si gàꞌhuìꞌ Ma̱ꞌan Ñaꞌanj an sa ga̱huin chru̱n nej sôꞌ guyumân ruhuâ
3 Daranꞌ diû gachín nìꞌhiaj nej ñûnj rayiꞌî nej suj,
ni̱ gaꞌhuiꞌ nej ñûnj si guruhuâ Ma̱ꞌan Ñaꞌanj huin Rej Ma̱ꞌan Señor Jesucristo rayiꞌî nej suj,
4 ni̱ gunïn nej ñûnj si guyumân ruhuâ nej suj niꞌin nej suj Ma̱ꞌan Cristo Jesús,
ni̱ huê danj na̱nj gunïn nej ñûnj si ꞌì ruhuâ nej suj niꞌin nej suj daranꞌ nej dinï̂nt dugumîn ma̱ꞌan riñan gakï̱nꞌïn,
5 ni̱ àsìj nga gunïn nej suj nuguanꞌ yàngàꞌ gi̱ꞌhiaj ga̱na̱ni̱n nej suj ni̱ gàꞌ niꞌin nej suj si hua̱ yu̱gui sa ri̱ki̱ Maꞌan Ñaꞌanj an ga̱na̱huin ràꞌa nej suj,
nej gui ꞌna̱ꞌ neꞌ ñaan,
6 dadinꞌ guchiꞌ si-nùguànꞌ Ma̱ꞌan Ñaꞌanj an nda ñan màn nej suj,
dàj rûnꞌ gayaꞌnïnj gaꞌan nï̀nꞌ gàchràꞌ riñan hioꞌó ni̱ka̱j ñuꞌunj nej sí romano,
ni̱ guyumân yàngàꞌ ruhuâ nej suj niꞌin nej suj si-nùguànꞌ Ma̱ꞌan Ñaꞌanj an,
ni̱ àsìj gui gunïn nej suj ni̱ giniꞌin nej suj si-su̱nu̱j Ma̱ꞌan Ñaꞌanj an,
ni̱ daꞌ gui ni̱ daꞌ gui ni̱ ga̱chi̱j nej suj ngà nuguanꞌ yàngàꞌa,
7 ni̱ nuguanꞌ nânj gidigân dinï̂nt Epafras riñan nej suj,
dadinꞌ sôꞌ huin sí giꞌhiaj sun ngà nej ñûnj ni̱ ûta ꞌì ruhuâ nej ñûnj niꞌin nej ñûnj sôꞌ,
ni̱ sôꞌ guchiꞌ riñan nej suj ni̱ sàꞌ dagahuin sôꞌ riñan Ma̱ꞌan Cristo.
8 Ni̱ huê sôꞌ ganataꞌ riñan nej ñûnj dàj giꞌhiaj nej suj,
ni̱ dàj gidigân Ma̱ꞌan Espíritu Santo riñan nej suj ni̱ dàj ga ꞌì ruhuâ nej suj niꞌin nej suj nej duguiꞌ nej suj.
9 Huê rayiꞌî dan,
ni̱ àsìj gui nga gunïn nej ñûnj rayiꞌî nej suj,
ni̱ nitaj àmàn gaꞌnïnꞌ ruhuâ nej ñûnj si gu̱nu̱na̱ nej ñûnj rayiꞌî nej suj riñan Ma̱ꞌan Ñaꞌanj an,
ni̱ gachín nìꞌhiaj nej ñûnj si gi̱ni̱ꞌin nï̀nꞌ ruhuâ nej suj ni̱ gi̱ni̱ꞌin nej suj ahuin sa garanꞌ ruhuâ Ma̱ꞌan Ñaꞌanj an gi̱ꞌhiaj nej suj ni̱ ga̱huin chru̱n nï̀nꞌ ruhuâ nej suj ni̱ hiô ga̱ra̱n daꞌngaꞌ ruhuâ nej suj gi̱ꞌhiaj Ma̱ꞌan Espíritu Santo.
10 Daꞌnga ni̱ gaꞌhue dagahuin hueꞌê nej suj dàj rûnꞌ garanꞌ ruhuâ Ma̱ꞌan Señor,
ni̱ ngà daranꞌ nej sun giꞌhiaj nej suj ni̱ gùrùguìꞌ si huin nej suj guiì nàkàa,
ni̱ daꞌ ñùn ni̱ daꞌ ñùn ni̱ ga̱huin nìko sa gi̱ni̱ꞌin nej suj rayiꞌî Ma̱ꞌan Ñaꞌanj an.
11 Nga sun ni̱ka̱j Ma̱ꞌan Ñaꞌanj an gi̱ꞌhiaj ni̱ ganahuin nùkuaj nej suj,
dàj rûnꞌ nùkuaj nï̀nꞌ ruhuaj ni̱ na̱giꞌhiaj sàꞌaj nej suj,
ni̱ ga̱ꞌhue ga̱na̱huin nùkuaj ruhuâ nej suj ni̱ ga̱ nìchràj ruhuâ nej suj,
12 ni̱ ga̱ nìhiàꞌ ruhuâ nej suj ni̱ gàꞌhuìꞌ nej suj si guruhuâ Ma̱ꞌan Reꞌ Ñaꞌanj an dadinꞌ huej huin sa giꞌhiaj hua yu̱gui nej suj ni̱ ga̱ne nùguànꞌan nej suj gui ꞌna̱ꞌ neꞌ ñaan ngà nej dinï̂nt dugumîn ma̱ꞌan riñan gakï̱nꞌïn dadinꞌ gàꞌ garânj daꞌnga ruhuâ nej sôꞌ.
13 Dadinꞌ huê Ma̱ꞌan giꞌhiaj gananin nêꞌ riñan sa nùkuaj ni̱ka̱j su̱n riñan gakï̱nꞌïn,
ni̱ ginika gaꞌan ñùnꞌ ñan ni̱ka̱j su̱n Ma̱ꞌan Daꞌnin Jesús sa ꞌì ruhuaj,
14 ni̱ huê Ma̱ꞌan huin sa girânj ñùnꞌ ngà tun ni̱ gananinꞌ giꞌhia,
ni̱ ginika nimân nìko rayiꞌî nej si-ga̱kïnꞌ.
Rayiꞌî guendâ gahuiꞌ Ma̱ꞌan Jesús ni̱ ganaꞌmin nej guiì ngà Ma̱ꞌan Ñaꞌanj an
15 Ni̱ huê Ma̱ꞌan Jesús huin ñan du̱ꞌhua Ma̱ꞌan Ñaꞌanj an dadinꞌ nitaj si huaj gi̱ni̱ꞌinꞌ ri̱ña̱n Ma̱ꞌan Ñaꞌanj an,
ni̱ Jesús huin Daꞌní yàhuàꞌ Ma̱ꞌan Ñaꞌanj an,
sani̱ gàꞌ huaj nga nï̀nꞌ gàchin gi̱ꞌhiaj Ma̱ꞌan Ñaꞌanj an daranꞌ nej sa màn giniꞌhioꞌ.
16 Dadinꞌ giꞌhiaj sun Ma̱ꞌan Cristo ngà Ma̱ꞌan Ñaꞌanj an rayiꞌî dan gaꞌhue giꞌhiaj Ma̱ꞌan Ñaꞌanj an daranꞌ nej sa màn giniꞌhioꞌ,
neꞌ yàtàꞌa ni̱ riñan hioꞌóo,
nej sa guruguiꞌ giniꞌhioꞌ ni̱ nej sa nitaj si guruguiꞌ giniꞌhioꞌ;
ni̱ huej huin sa giꞌhiaj nej sí ni̱ka̱j sun nne riñan chrun yîla,
ni̱ nej sí aꞌnïnꞌ riñan yumiguìi,
ni̱ nej sí huin ña̱n doj,
nej sa nùkuaj;
ni̱ huê Ma̱ꞌan Cristo huin sa giꞌhiaj daranꞌ nej nânj,
ni̱ guendâ Ma̱ꞌan gahuin daranꞌ nej nânj.
17 Ni̱ gàꞌ si̱nï̱n Ma̱ꞌan Cristo huin gàꞌ daꞌ daranꞌ nej rasu̱un,
ni̱ daranꞌ nej rasu̱n nânj hua nùkuaj giꞌhiaj Ma̱ꞌan Cristo.
18 Ni̱ Ma̱ꞌan Cristo huin sa aꞌnïnꞌ riñan nneè ku huin nej dinï̂nt nìkòꞌ rukû Ma̱ꞌan,
dadinꞌ huê Ma̱ꞌan huin sa si̱nï̱n nï̀nꞌïn,
ni̱ gàꞌ si̱nïnj huin sa ganaꞌnï̂nj siganï̂nj nej nîman,
ni̱ gi̱ni̱kaj sunj riñan aꞌngô nej sí ni̱ka̱j suun;
19 dadinꞌ garanꞌ ruhuâ Ma̱ꞌan Reꞌ Ñaꞌanj an si Ma̱ꞌan Jesús gahuin Ma̱ꞌan Ñaꞌanj an ni̱ ginikaj sun riñan daranꞌanj,
20 ni̱ Ma̱ꞌan Cristo giꞌhiaj ni̱ ga̱ꞌhue ga̱na̱ꞌmi̱n Ma̱ꞌan Ñaꞌanj an ngà daranꞌ nej sa màn nï̀nꞌ gàchràꞌ riñan hioꞌóo ni̱ nej sa màn yàtàꞌa,
ni̱ gahuin nìn giꞌhiaj tun Ma̱ꞌan Jesús sa gañanj riñan rugutsìi.
21 Ni̱ àsìj ni̱ gahuin nej suj guiì gane anêj riñan Ma̱ꞌan Ñaꞌanj an,
ni̱ gahuin nej suj sí gunïnꞌ ngà Ma̱ꞌan Ñaꞌanj an rayiꞌî nej sa kï̱j gimân ruhuâ daꞌnga nej suj,
dadinꞌ giꞌhiaj nej suj sa kï̱j huaa,
sani̱ hia̱j ni̱ ganaꞌmin Ma̱ꞌan Ñaꞌanj an ngà nej suj,
22 dadinꞌ giranꞌ sa̱ñu̱n Ma̱ꞌan Jesús ngà nneè ku ni̱ gahuij,
ni̱ giꞌhia sisi̱ si̱ ga gakï̱nꞌïn riñan nej suj ni̱ ga̱huin nej suj guiì gèe ni̱ guiì ni̱ka̱a riñan Ma̱ꞌan,
23 si yàngàꞌ ganikïnꞌ ran nej suj ni̱ guyumân hia ruhuâ nej suj,
ni̱ du̱guꞌnïnꞌ nej suj ni̱ ga̱huin nej suj sí gi̱di̱gân chrej hua̱ hueꞌê ni̱ si̱ nadunâ nej suj aꞌngô sa ga̱nï̱n ruhuâ nej suj rayiꞌî nuguanꞌ guyumân ruhuâ nej suj ni̱ rayiꞌî nuguanꞌ gunïn nej suj ni̱ nuguanꞌ gi̱ꞌhiaj ga̱na̱huin hueꞌê daranꞌanj,
nuguanꞌ gananï̂n nej sij nï̀nꞌ gàchràꞌ gaꞌanj riñan hioꞌóo;
ni̱ gachrûn su̱n Ma̱ꞌan Ñaꞌanj an ñùnj guendâ gànàtàj riñan nej guiì rayiꞌî si-nùguànꞌanj.
Gachrûn su̱n Ma̱ꞌan Ñaꞌanj an Pablo guendâ gu̱na̱nj gi̱tsî sij riñan nej sí nàsìnùnj un
24 Hia̱j ni̱ ganahuin nìhiàꞌ ruhuâj guendâ giranꞌ sàñùnj rayiꞌî nej suj,
dadinꞌ hua̱ ni̱ña̱n si gi̱ranꞌ sàñùnj ngà nneè ku dadinꞌ huê dànanj giranꞌ sa̱ñu̱n Ma̱ꞌan Cristo rayiꞌî nej sôꞌ ginikòꞌ rukû Ma̱ꞌan ni̱ nej sôꞌ huin nneè ku.
25 Ni̱ Ma̱ꞌan Ñaꞌanj an huin sa giꞌhiaj si gahuín sí gu̱na̱nj gi̱tsi riñan si-nùhuì Ma̱ꞌan,
ni̱ si sàꞌ ma̱ꞌan nej suj huin si rikij si-sunj riñânj,
ni̱ rayiꞌî dan ni̱ ûta hio ganatá si-nùguànꞌ Ma̱ꞌan riñan nej suj,
26 ni̱ huin ꞌngo̱ nuguanꞌ hua̱ huìi ni̱ giꞌnïnj huij ûta gàꞌì sientu hioꞌo ni̱ huin ꞌngo̱ nuguanꞌ ûta gata hioꞌo,
sani̱ hia̱j ni̱ gaꞌmin Ma̱ꞌan Ñaꞌanj an ni̱ nadiganj riñan nej sí gè gunânj gi̱tsi riñanj.
27 Ni̱ huê riñan nej sôꞌ huin sa garanꞌ ruhuâ Ma̱ꞌan Ñaꞌanj an gaꞌhuij nuguanꞌ giꞌnïnj huì,
ni̱ nuguanꞌ nânj huin sa daꞌhui gùchìꞌ riñan nej guiì màn nï̀nꞌ gàchràꞌ ruhuâ yimiguìi,
ni̱ hua̱ huì nuguanꞌ gananï̂n rayiꞌî Ma̱ꞌan Cristo riñan ûta gàꞌì nej guiì,
ni̱ huê Ma̱ꞌan huin sa ganaꞌhuìj darûnꞌ ni̱ huej huin sa na̱gi̱ꞌhiaj hueꞌê ñùnꞌ nga gùyùmàn gui gi̱ni̱kaj sunj,
28 ni̱ huê rayiꞌî Ma̱ꞌan Cristo huin sa gananï̂n nej ñûnj,
ni̱ dunaꞌnga nej ñûnj riñan nej guiì,
ni̱ gidigân nej ñûnj riñan daranꞌ nej guiì nuguanꞌ ga̱huin chru̱n nï̀nꞌ ruhuâ ninj,
ni̱ ga̱huin ninj guiì ni̱ka̱ nï̀nꞌïn gi̱ꞌhiaj Ma̱ꞌan Cristo.
29 Huê rayiꞌî dan giꞌhiaj sûnj,
ngà daranꞌ guesâ nùkuaj hua̱ riñânj dadinꞌ Ma̱ꞌan Cristo,
huin sa rikî guesâ dânj riñânj.