Ñanj kartâ si̱nï̱n nânj huin gachrûn Apóstol Pablo riñan nej
TESALONICENSES
Gaꞌnḯn Pablo nuguanꞌ ni̱ꞌña̱nj an riñan nej dinï̂nt nne ruhuâ yumanꞌ snàꞌànj Tesalónica
1
Ñùnj huin Pablo,
ni̱ giꞌhiaj sun Silvano ngà Timoteo ngàj,
ni̱ gaꞌnḯn nej ñûnj ñanj karta nan hua riñan nej suj nej dinï̂nt huin si-nùhuì Ma̱ꞌan Jesús nne riñan hioꞌó Tesalónica,
dadinꞌ nìkòꞌ nej suj Ma̱ꞌan Ñaꞌanj huin Rej nêꞌ ni̱ huê danj na̱nj nìkòꞌ nej suj Ma̱ꞌan Señor Jesucristo:
Ga̱ dïnꞌïnj ruhuâ nej suj ni̱ ga̱ si-su̱nu̱j Ma̱ꞌan Ñaꞌanj an riñan nej suj,
dadinꞌ huin nej suj daꞌní Ma̱ꞌan Reꞌ Ñaꞌanj an ni̱ ngà Ma̱ꞌan Señor Jesucristo.
Guruguiꞌ si ûta hueꞌê giꞌhiaj nej sôꞌ màn Tesalónica
2 Daranꞌ diû gaꞌhuiꞌ nej ñûnj si guruhuâ Ma̱ꞌan Ñaꞌanj an rayiꞌî daranꞌ nej suj,
ni̱ nga gaꞌmin nej ñûnj ngà Ma̱ꞌan Ñaꞌanj an ni̱ gananun ruhuâ nej ñûnj niꞌin nej ñûnj nej suj ni̱ gachín nìꞌhiaj nej ñûnj riñan Ma̱ꞌan Ñaꞌanj an rayiꞌî nej suj,
3 ni̱ nikòꞌ huaj gananun ruhuâ nej ñûnj niꞌin nej ñûnj nej suj riñan Ma̱ꞌan Ñaꞌanj huin Rej nêꞌ.
ni̱ rayiꞌî guendâ guyumân ruhuâ nej suj ni̱ ga ruhuâ nej suj giꞌhiaj sun nej suj si-su̱n Ma̱ꞌan Ñaꞌanj an,
huê danj ni̱ ruguiꞌ si ꞌì ruhuâ nej suj ni̱ ga nùkuaj ruhuâ nej suj rayiꞌî sañun giranꞌ nej suj ni̱ ganaꞌhuìj nej suj si gu̱ru̱gûñuꞌunj Ma̱ꞌan Señor Jesucristo nej suj.
4 Dadinꞌ niꞌin nej ñûnj,
si ꞌì ruhuâ Ma̱ꞌan Ñaꞌanj an niꞌin nej suj,
ni̱ Ma̱ꞌan huin si ganagui nej suj guendâ gu̱na̱nj gitsî nej suj riñanj.
5 Nga gaꞌmin nej ñûnj riñan nej suj nuguanꞌ gi̱ꞌhiaj ga̱na̱ni̱n nej suj,
ni̱ sê si-nùguànꞌ nej ma̱ꞌan nej ñûnj huin sa gaꞌmin nej ñûnj riñan nej suj mánj,
dadinꞌ gaꞌmin nej ñûnj nuguanꞌ nùkuaj rikî Ma̱ꞌan Ñaꞌanj an,
ni̱ guruguiꞌ si giꞌhiaj sun Ma̱ꞌan Espíritu Santo ngà nej ñûnj riñan nej suj,
ni̱ nda hueꞌê chre hua yìtï̀nj ruhuâ nej suj,
dadinꞌ gàꞌ niꞌin nej suj si ꞌì ruhuâ nej ñûnj niꞌin nej ñûnj nej suj.
6 Ni̱ huê dàj rûnꞌ giꞌhiaj nej ñûnj ni̱ dàj rûnꞌ giꞌhiaj Ma̱ꞌan Señor ni̱ huê danj giꞌhiaj nej suj,
ni̱ ganahuin ràꞌa nej suj si-nùguànꞌ Ma̱ꞌan Ñaꞌanj an riki ꞌngo̱ diû sañuun ni̱ ûta giranꞌ sa̱ñu̱n nej suj,
sani̱ ûta ga nìhiàꞌ ruhuâ nej suj giꞌhiaj Ma̱ꞌan Espíritu Santo,
7 ni̱ hueꞌê giꞌhiaj nej suj ni̱ gutaꞌ nej suj chrej e neꞌ ña̱an ni̱ huê danj na̱nj hueꞌê giꞌhiaj nej dinï̂nt guyumân ruhuâ niꞌin Ma̱ꞌan Jesús,
nej sôꞌ màn riñan hioꞌó Macedonia ngà riñan hioꞌó Acaya.
8 Nej suj huin sa giniꞌin si̱nï̱n si-nùguànꞌ Ma̱ꞌan Señor,
ni̱ huê danj na̱nj duyaꞌnï̀n nej suj gaꞌanj si-nùguànꞌanj,
ni̱ sê man ꞌngo̱ rïn riñan hioꞌó Macedonia ngà riñan hioꞌó Acaya guchij mánj,
gayaꞌnïnj gaꞌan nï̀nꞌ gàchràꞌ,
ni̱ niꞌin daranꞌ nej sôꞌ si guyumân ruhuâ nej suj niꞌin nej suj Ma̱ꞌan Ñaꞌanj an,
hiôꞌ ni̱ rayiꞌî dan ni̱ nitaj aꞌngô sa ga̱ta̱j nej ñûnj gu̱nïn nej suj gàꞌ mánj;
9 dadinꞌ daranꞌ nej sôꞌ gataj si ûta hueꞌê ganahuin ràꞌa nej suj nej ñûnj,
ni̱ ganataꞌ nej sôꞌ gu̱nïn nej ñûnj sa giꞌhiaj nej suj dadinꞌ nga giniꞌin nej suj nuguanꞌ gi̱ꞌhiaj ga̱na̱ni̱n nej suj,
ni̱ gudunâj nej suj ñaꞌanj giꞌhiaj ra̱ꞌa nej síi ni̱ ginikòꞌ nej suj rukû Ma̱ꞌan Ñaꞌanj an yàngàꞌa,
ni̱ gunânj gi̱tsi nej suj riñan Ma̱ꞌan Ñaꞌanj hua̱ nìꞌnàꞌa,
10 ni̱ niꞌin nej sôꞌ si nne nej suj ganaꞌhuìj nej suj si nànìkàj ñûn Ma̱ꞌan Jesús ga̱ꞌnaj neꞌ yàtàꞌa,
ni̱ Ma̱ꞌan Ñaꞌanj an huin sa giꞌhiaj ganaꞌnï̂nj Ma̱ꞌan Jesús siganï̂nj nej nîman,
ni̱ huê Ma̱ꞌan Jesús huin sa giꞌhiaj ni̱ ga̱na̱ni̱n nêꞌ riñan sañun xi ꞌna̱ꞌ riñan nej guiì gakï̱nꞌïn.