Sun gaꞌhuiꞌ Ma̱ꞌan Ñaꞌanj an riñan Pablo nga gane sôꞌ yumanꞌ snàꞌànj Tesalónica
2
Dadinꞌ gàꞌ niꞌin nej suj si nga guchiꞌ nej ñûnj ñan màn nej suj,
ni̱ sê si̱ guchiꞌ chre nej ñûnj man di̱nï̂n;
2 dadinꞌ gàꞌ niꞌin nej suj si giranꞌ sa̱ñu̱n si̱nï̱n nej ñûnj,
ni̱ nun gi̱ni̱nj hueꞌê nej ñûnj riñan nej sôꞌ màn ruhuâ yumanꞌ Filipos,
sani̱ riki Ma̱ꞌan Ñaꞌanj an guesâ riñan nej ñûnj ni̱ giriꞌ ruhuâ nej ñûnj ni̱ ganataꞌ nej ñûnj nuguanꞌ gi̱ꞌhiaj ga̱na̱ni̱n nej suj,
ni̱ yàngàꞌ ni̱ ûta gata rùhuà nej sôꞌ nej ñûnj.
3 Dadinꞌ nga dunaꞌnga nej ñûnj riñan nej suj ni̱ nun ga̱che̱j ruhuâ nej ñûnj ni̱ nun ga̱nï̱n yìꞌì ruhuâ nej ñûnj,
ni̱ nun gi̱di̱gañuꞌunj nej ñûnj nej suj mánj,
4 ni̱ Ma̱ꞌan Ñaꞌanj an huin sa gaꞌnḯn ni̱ duguta sunj si ga̱na̱nï̱n nej ñûnj nuguanꞌ gi̱ꞌhiaj ga̱na̱ni̱n nej suj,
ni̱ gaꞌmin nej ñûnj sani̱ sê si̱ gaꞌmin nej ñûnj guendâ gùnàj hueꞌê nej ñûnj ngà nej síi mánj,
sa duguꞌnïnꞌ nej ñûnj giꞌhiaj nej ñûnj huin si gùnàj hueꞌê nej ñûnj ngà Ma̱ꞌan Ñaꞌanj an,
dadinꞌ huê Ma̱ꞌan huin sa ganakaj guendâ dàj hua nimân nej ñûnj.
5 Dadinꞌ gàꞌ niꞌin nej suj si nitaj àmàn garânj sun nej ñûnj nuguanꞌ nna̱j chre,
nga gaꞌmin nej ñûnj ngà nej suj,
ni̱ nun ga̱chri̱ huì nej ñùnj si gàꞌ hua̱j doj sanꞌanj an riñan nej ñûnj guendâ ruhuâ nej ñûnj ga̱ꞌne̱ nej ñûnj si-sànꞌànj nej suj;
ni̱ Ma̱ꞌan Ñaꞌanj an huin sa niꞌin si nitaj si giꞌhiaj nej ñûnj dànanj mánj.
6 Ni̱ nitaj si naꞌhuiꞌ nej ñûnj si ga̱ꞌmi̱n hueꞌê nej síi rayiꞌî nej ñûnj,
ni̱ huê danj na̱nj nitaj si naꞌhuiꞌ nej ñûnj si ga̱ꞌmi̱n hueꞌê nej suj rayiꞌî nej ñûnj,
ni̱ gàꞌ nitaj si naꞌhuiꞌ nej ñûnj si ga̱ꞌmi̱n hueꞌê aꞌngô nej síi rayiꞌî nej ñûnj.
Nùnj si ga̱ꞌhue̱j ni̱ñanj si gàchìnj nej ñûnj si gu̱ru̱gûñuꞌunj nej suj riñan nej ñûnj dadinꞌ huin nej ñûnj si gaꞌanj gi̱di̱gân si̱nï̱n si-nùguànꞌ Ma̱ꞌan Jesucristo riñan nej suj sani̱ nun gàchìnj nej ñûnj riñan nej suj mánj.
7 Sani̱ nga guchiꞌ nej ñûnj ñan màn nej suj ni̱ ûta ni̱ꞌña̱nj gaꞌmin nej ñûnj ngà nej suj,
ni̱ giꞌhiaj nej ñûnj dàj rûnꞌ ni̱ꞌña̱nj giꞌhiaj ꞌngo̱ siyànà dugumîn daꞌní aꞌngô guiì.
8 Ûta ꞌì ruhuâ nej ñûnj niꞌin nej ñûnj nej suj,
ni̱ sê man ꞌngo̱ nuguanꞌ gi̱ꞌhiaj ga̱na̱ni̱n nej suj ganï̂n ruhuâ nej ñûnj na̱ri̱ki̱ nej ñûnj riñan nej suj dadinꞌ hua̱ ruhuâ nej ñûnj gàhuìꞌ nej ñûnj rayiꞌî nej suj,
dadinꞌ ûta garanꞌ ruhuâ nej ñûnj sa giꞌhiaj nej suj.
9 Di̱nï̂nj,
ni̱ ga̱na̱nun ruhuâ nej suj si nga ganataꞌ nej ñûnj nuguanꞌ gi̱ꞌhiaj ga̱na̱ni̱n nej suj,
ni̱ nda gininaj nej ñûnj giꞌhiaj sun nej ñûnj;
ni̱ giꞌhiaj sun nej ñûnj neꞌ ñànꞌan ni̱ neꞌ gui,
guendâ nun ga̱ra̱nꞌ ruhuâ nej ñûnj ga̱chra su̱n nej ñûnj riñan gàꞌ si ꞌngo̱ nej suj.
10 Nej suj huin sa gàꞌ niꞌin,
ni̱ huê danj na̱nj gàꞌ niꞌin Ma̱ꞌan Ñaꞌanj an dàj giꞌhiaj nej ñûnj,
ni̱ ga gu̱dadû nej ñûnj ni̱ nun gi̱ꞌhiaj nej ñûnj gakï̱nꞌïn siganï̂nj nej suj ni̱ gahuin nej ñûnj sí ni̱ka̱a ngà nej suj guyumân ruhuâ niꞌin Ma̱ꞌan Jesús.
11 Ni̱ gàꞌ niꞌin nej suj dàj giꞌhiaj nej ñûnj,
dadinꞌ giꞌhiaj nej ñûnj dàj rûnꞌ giꞌhiaj ꞌngo̱ sí hua̱ daꞌní ni̱ nagiꞌhiaj yìtï̀nj nej ñûnj ni̱ narikî nej ñûnj chrej nùkuaj ruhuâ riñan daꞌ goꞌngo̱ nej suj.
12 Ni̱ duguta su̱n nej ñûnj si ga̱che̱ hueꞌê nej suj ni̱ gi̱ꞌhiaj hueꞌê nej suj dàj rûnꞌ garanꞌ ruhuâ Ma̱ꞌan Ñaꞌanj an,
dadinꞌ gakḯn Ma̱ꞌan si ga̱ꞌna̱ꞌ nej suj ni̱ ga̱tu̱ nej suj giꞌnïnj nej suj riki ñan ni̱ka̱j su̱n Ma̱ꞌan Cristo ni̱ gùrùguìꞌ si ni̱ka̱j duguiꞌ nej suj ngà Ma̱ꞌan Ñaꞌanj an.
13 Huê danj ni̱ nitaj àmàn giyichinꞌ ruhuâ nej ñûnj si gàꞌhuìꞌ nej ñûnj si guruhuâ Ma̱ꞌan Ñaꞌanj an rayiꞌî nej suj,
dadinꞌ nga gunïn nej suj si-nùguànꞌ Ma̱ꞌan Ñaꞌanj an nga ganataꞌ nej ñûnj riñan nej suj,
ni̱ ganahuin ràꞌa nej suj ni̱ nun gi̱ꞌhiaj nej suj si ga̱huin si-nùguànꞌ síi,
ni̱ garânj yina nej suj si gahuin nuguanꞌ yàngàꞌa,
ni̱ huin si-nùguànꞌ Ma̱ꞌan Ñaꞌanj an,
ni̱ guyumân ruhuâ nej suj giꞌhiaj nuguanꞌ dânj si ganadunâ nej suj ma̱ꞌan nej suj.
14 Dadinꞌ giꞌhiaj nej suj dàj rûnꞌ giꞌhiaj nej dinï̂nt huin si-nùhuì Ma̱ꞌan Ñaꞌanj nne riñan hioꞌó Judea;
dadinꞌ giranꞌ sa̱ñu̱n nej suj giꞌhiaj nej sí huin yiñán ma̱ꞌan nej suj dadinꞌ huê danj na̱nj giranꞌ sa̱ñu̱n nej sôꞌ giꞌhiaj nej ma̱ꞌan nej dùguìꞌ nej judío.
15 Dadinꞌ huê nej sôꞌ dagahuiꞌ Ma̱ꞌan Señor Jesús,
ni̱ huê danj na̱nj dagahuiꞌ nej sôꞌ nej si-profeta nej sôꞌ,
ni̱ huê danj na̱nj girinïn nej sôꞌ gaꞌanj nej ñûnj,
ni̱ nitaj si giꞌhiaj nej sôꞌ sa garanꞌ ruhuâ Ma̱ꞌan Ñaꞌanj an,
ni̱ gata rùhuà nej sôꞌ daranꞌ nej síi,
16 ni̱ garanꞌ ñuꞌunj nej sôꞌ si ga̱ꞌmi̱n nej ñûnj riñan nej sí nàsìnùnj un si-nùguànꞌ Ma̱ꞌan Ñaꞌanj an guendâ ga̱na̱ni̱n nej sí dânj;
ni̱ dagahuin nej sôꞌ sa garanꞌ ruhuâ si-ga̱kïnꞌ nej sôꞌ,
huê danj ni̱ ûta ginaꞌan ruhuâ Ma̱ꞌan Ñaꞌanj an niꞌin nej sôꞌ.
Ganï̂n ruhuâ Pablo ga̱ꞌa̱nj gi̱ni̱ꞌhiaj sôꞌ nej dinï̂nt
17 Gahuin anêj nej ñûnj ꞌngo̱ diû lij riñan nej suj na̱nj di̱nï̂nj,
sani̱ daranꞌ diû ni̱ gananun ruhuâ nej ñûnj niꞌin nej ñûnj nej suj dadinꞌ ꞌì ruhuâ nej ñûnj niꞌin nej ñûnj nej suj ni̱ ûta huin ruhuâ nej ñûnj gùchìꞌ nej ñûnj ni̱ gi̱ni̱ꞌin nej ñûnj riñan nej suj.
18 Ni̱ ganï̂n ruhuâ nej ñûnj gùchìꞌ nej ñûnj ñan màn nej suj,
ni̱ ñùnj huin Pablo ni̱ gàꞌì ganï̂n ruhuâj gùchìj ñan màn nej suj,
sani̱ garanꞌ ñuꞌunj sichre rayiꞌî dan ni̱ nun ga̱ꞌhue gùchìj ñan nej suj mánj.
19 Dadinꞌ,
ahuin si gànàꞌhuìj nej ñûnj,
ni̱ ahuin ràyìꞌì Korona gahuin nìhiàꞌ ruhuâ nej ñùnj gi̱ni̱ꞌin nej ñûnj,
nga ga̱ꞌna̱ꞌ ñûn Ma̱ꞌan Señor Jesucristo ràꞌaj.
Sê rayiꞌî nej suj huin ràꞌ saj ûnꞌ.
20 Ni̱ ûta gahuin nne̱ nej ñûnj rayiꞌî nej suj ni̱ ûta gahuin nìhiàꞌ ruhuâ nej ñûnj niꞌin nej ñûnj nej suj.