3
Rayiꞌî dan,
ni̱ nun gàꞌhue gùnùkuaj nej ñûnj guendâ ruhuâ nej ñûnj gi̱ni̱ꞌin nej ñûnj nej suj,
ni̱ gaꞌnïnꞌ ruhuâ nej ñûnj ni̱ gunâj nej ñûnj ruhuâ yumanꞌ snàꞌànj Atenas.
2 Huê danj ni̱ gaꞌnḯn nej ñûnj huaj dinï̂nt Timoteo riñan nej suj,
sôꞌ huin sí unânj gi̱tsi nùguànꞌan ngà nej ñûnj riñan Ma̱ꞌan Ñaꞌanj an,
ni̱ nej ñûnj huin nej sí gananï̂n nuguanꞌ gi̱ꞌhiaj ga̱na̱ni̱n nej guiì ni̱ danj huin si nùguànꞌ Ma̱ꞌan Cristo,
ni̱ hua̱j sij guendâ nagiꞌhiaj yìtï̀nj sij ni̱ du̱naꞌnga sij riñan nej suj na̱nj ánj.
3 Daꞌnga ni̱ si̱ guyuꞌhuiꞌ nej suj nga ga̱ta̱ ràꞌa nej síi nej suj rayiꞌî si-nùguànꞌ Ma̱ꞌan Ñaꞌanj an;
dadinꞌ gàꞌ niꞌin nej suj si hua̱ ni̱ña̱n si huê danj gi̱ranꞌ nêꞌ na̱nj ánj.
4 Dadinꞌ nga gane nej ñûnj siganï̂nj nej suj,
ni̱ gàꞌ gataj nej ñûnj gu̱nïn nej suj si hua̱ ꞌngo̱ gui ni̱ ga̱ta̱ ràꞌa nej sij nej ñûnj,
ni̱ gàꞌ giniꞌin nej suj si huê danj gahuin na̱nj ánj.
5 Huê rayiꞌî dânj ni̱ ñùnj,
ni̱ nun ga̱ꞌhue gùnùkua doj,
ni̱ gaꞌnï̂n guchiꞌ gàchìnj naꞌanj nej dinï̂nt dàj ꞌhiaj nej suj mân nej suj,
dadinꞌ yuꞌhuí si gi̱ni̱nj nej suj riñan gakï̱nꞌ du̱guaneꞌ sí ni̱ka̱j mañan guendâ gi̱di̱gañuꞌunj sôꞌ nej guiì.
6 Sani̱ hia̱j ni̱ gàꞌ nanikàj Timoteo,
ni̱ gunumân sôꞌ ñan màn nej ñùnj,
nga guchiꞌ sôꞌ yumanꞌ snàꞌànj Tesalónica,
ni̱ ganataꞌ sôꞌ si hua̱ na̱nj guyumân ruhuâ nej suj ni̱ ꞌì ruhuâ nej suj niꞌin nej suj Ma̱ꞌan Ñaꞌanj an.
Ni̱ ganataꞌ sôꞌ gu̱nïn nej ñûnj si daranꞌ diû ni̱ gananun ruhuâ nej suj niꞌin nej suj nej ñûnj ni̱ ûta ꞌì ruhuâ nej suj niꞌin nej suj nej ñûnj,
ni̱ ûta huin ruhuâ nej suj niꞌin nej suj nej ñûnj dàj rûnꞌ huin ruhuâ nej ñûnj niꞌin nej suj,
7 di̱nï̂nj,
ni̱ ûta chìꞌ giranꞌ hia nej ñûnj,
ni̱ ûta giranꞌ sa̱ñu̱n nej ñûnj,
sani̱ nga gunïn nej ñûnj dàj ganï̂n ruhuâ nej suj ni̱ ganahuin nùkuaj ruhuâ nej ñûnj nga gunïn nej ñûnj si hua̱ na̱nj ni̱kï̱nꞌ ran nej suj ni̱ hua̱ na̱nj guyumân ruhuâ nej suj.
8 Nga gunïn nej ñûnj si ni̱kï̱nꞌ ranꞌ nej suj ngà si-nùguànꞌ Ma̱ꞌan Señor ni̱ ganahuin ran ruhuâ nej ñûnj na̱nj ánj.
9 Rayiꞌî dan ni̱ dàj gi̱ꞌhiaj nej ñûnj ga̱ꞌhue gàꞌhuìꞌ nej ñûnj ûta nìko si guruhuâ Ma̱ꞌan Ñaꞌanj an rayiꞌî nej suj ràꞌaj,
dadinꞌ rayiꞌî nej suj ni̱ ûta ganahuin nìhiàꞌ ruhuâ nej ñûnj riñan Ma̱ꞌan Ñaꞌanj an,
10 ni̱ ûta nìchràj ruhuâ nej ñûnj gachín nìꞌhiaj nej ñûnj neꞌ gui ni̱ neꞌ ñànꞌan riñan Ma̱ꞌan Ñaꞌanj an rayiꞌî nej suj,
dadinꞌ ruhuâ nej ñûnj gi̱ni̱ꞌin ri̱ña̱n nej ñûnj riñan nej suj,
ni̱ gi̱di̱gân nej ñûnj dàj nìko ga̱ꞌhue gùyùmàn ruhuâ nej suj.
11 Ni̱ ruhuâ nej ñûnj si Ma̱ꞌan Ñaꞌanj huin Rej nêꞌ,
ni̱ Ma̱ꞌan Señor Jesucristo,
gu̱ru̱gûñuꞌunj ni̱ ga̱ꞌhue gìrìꞌ nej ñûnj gùchìꞌ nej ñûnj ñan màn nej suj.
12 Ni̱ Ma̱ꞌan Señor gi̱ꞌhiaj ni̱ ga̱chi̱j nej suj ngà si-nùguànꞌ Ma̱ꞌan Ñaꞌanj an,
ni̱ ga̱ ꞌì doj ruhuâ nej suj niꞌin nej suj ꞌngo̱ ni̱ aꞌngô nej duguiꞌ nej suj ni̱ huê danj gi̱ꞌhiaj nej suj ngà daranꞌ nej guiì,
dàj rûnꞌ ꞌì ruhuâ nej ñûnj niꞌin nej ñûnj nej suj,
13 daꞌnga ni̱ gaꞌhue gi̱ꞌhiaj yìtï̀nj nej suj nimân nej suj,
ni̱ ga̱huin nej suj sí ni̱ka̱a ni̱ ga̱ꞌhue gùchìꞌ nej suj ga̱huin nej suj sí gèe riñan Ma̱ꞌan Ñaꞌanj huin Rej nêꞌ,
ni̱ ga yu̱gui nej suj ga̱ne nej suj nga ga̱ꞌna̱ꞌ Ma̱ꞌan Señor Jesús ngà daranꞌ nej sôꞌ gè ginikòꞌ rukuj na̱nj ánj.