Dàj garanꞌ ruhuâ Ma̱ꞌan Ñaꞌanj an da̱gahuin nej guiì
4
Hia̱j ruꞌhuaj di̱nï̂n,
ni̱ gachín nìꞌhiaj staꞌu nej ñûnj riñan nej suj ni̱ nga siyu̱gui Ma̱ꞌan Señor Jesús ni̱ dunaꞌnga nej ñûnj riñan nej suj,
ni̱ gidigân nej ñûnj dàj garanꞌ ruhuâ Ma̱ꞌan Señor da̱gahuin nej suj ni̱ huê danj da̱gahuin nej suj daꞌ gui,
daꞌnga ni̱ gaꞌhue gi̱ꞌhiaj nej suj dàj garanꞌ ruhuâ Ma̱ꞌan Señor.
2 Dadinꞌ gàꞌ niꞌin nej suj dàj hua sun gaꞌnïnꞌ nej ñûnj riñan nej suj giꞌhiaj Ma̱ꞌan Señor Jesús.
3 Sa garanꞌ ruhuâ Ma̱ꞌan Ñaꞌanj an huin si gi̱ꞌhiaj anêj nej suj ma̱ꞌan nej suj riñan gakï̱nꞌïn;
ni̱ gu̱xu̱n nej suj ma̱ꞌan nej suj riñan gakï̱nꞌ aché sìgìchràꞌ;
4 ni̱ daꞌ goꞌngo̱ nej suj daꞌhui gi̱nikaj chre̱j ngà nika ni̱ ga̱na̱ka̱j guendâ nej suj dàj nìko hua si-su̱n ninj;
5 ni̱ si̱ ganahuij ruhuâ nej suj gi̱ꞌhiaj nej suj ahuin na̱nj gakï̱nꞌ ûta huin ruhuâ nneè kú nej suj gi̱ꞌhia,
ni̱ si̱ giꞌhiaj nej suj dàj rûnꞌ giꞌhiaj nej sí nun niꞌin Ma̱ꞌan Ñaꞌanj an mánj;
6 ni̱ si̱ ranꞌ nej suj nej duguiꞌ nej suj ni̱ si̱ gidigañuꞌunj nej suj dinḯn nej suj,
dadinꞌ Ma̱ꞌan Señor ni̱ si̱ gi̱niꞌñunj gàꞌ si ꞌngo̱ sa yìꞌì giꞌhiaj nej suj mánj,
dadinꞌ gàꞌ gataj nej ñûnj ni̱ ganataꞌ nej ñûnj gu̱nïn nej suj rayiꞌî nej nânj.
7 Dadinꞌ nun gàkï̀nj Ma̱ꞌan Ñaꞌanj an ga̱ꞌna̱ꞌ nêꞌ guendâ du̱guꞌnïnꞌ gi̱ꞌhiôꞌ gakï̱nꞌïn mánj,
gakḯn Ma̱ꞌan gaꞌnôꞌ guendâ gi̱ꞌhiaj anêꞌ muꞌûnꞌ riñan gakï̱nꞌïn.
8 Huê danj ni̱,
nej sí naꞌhuej gi̱daꞌa nej nuguanꞌ nânj ni̱ sê ngà nej síi gunâj aꞌnanꞌ nej sôꞌ mánj,
ngà Ma̱ꞌan Ñaꞌanj an huin sa gunâj aꞌnanꞌ nej sôꞌ,
dadinꞌ Ma̱ꞌan Ñaꞌanj an rikî Ma̱ꞌan Espíritu Santo riñan nêꞌ.
9 Sani̱ rayiꞌî guendâ dàj ga̱ ꞌì ruhuâ nej suj niꞌin nej suj nej dinḯn nej suj ni̱ nitaj si gi̱ꞌhia gàchrùnj riñan nej suj,
dadinꞌ gàꞌ gahuin chru̱n nej suj dàj ga̱ ꞌì ruhuâ nej suj niꞌin nej suj daꞌ goꞌngo̱ nej suj giꞌhiaj Ma̱ꞌan Ñaꞌanj an;
10 ni̱ huê danj giꞌhiaj nej suj ngà daranꞌ nej dinï̂nt màn nï̀nꞌ gàchràꞌ riñan hioꞌó Macedonia.
Sani̱ gachín nìꞌhiaj nej ñûnj riñan nej suj di̱nï̂nj,
si du̱guꞌnïnꞌ nej suj ni̱ ga̱ ꞌì doj ruhuâ nej suj niꞌin nej suj nej dinï̂nt;
11 ni̱ duguꞌnïnꞌ nej suj ni̱ ga̱ dïnꞌïnj ruhuâ nej suj,
ni̱ gi̱nun ña̱ꞌa̱n ruhuâ nej suj niꞌin nej suj si-su̱n nej suj,
ni̱ gi̱ꞌhiaj sun nej suj ngà raꞌa nej suj dàj rûnꞌ gaꞌnïnꞌ nej ñûnj suun riñan nej suj,
12 daꞌnga ni̱ gi̱nikaj chrej nej guiì nitaj si nìkòꞌ rukû Ma̱ꞌan Ñaꞌanj an riñan nej suj,
hiôꞌ ni̱ nitaj si gi̱ꞌhiaj nej suj gi̱nun ñan nej suj aꞌngôꞌ nej guiì mánj.
Ga̱ꞌna̱ꞌ ñûn Ma̱ꞌan Señor
13 Huê danj a̱ra̱nꞌ ruhuâ nej ñûnj si giniꞌin nej suj dàj giranꞌ nej guiì gàꞌ gahuiꞌ,
daꞌnga ni̱ si gananï̂n ruhuâ nej suj,
dàj rûnꞌ gananï̂n ruhuâ aꞌngô nej sôꞌ nitaj si guyumân ruhuâ niꞌin Ma̱ꞌan Ñaꞌanj an.
14 Dadinꞌ si guyumân ruhuâ nêꞌ si gahuiꞌ Ma̱ꞌan Jesús ni̱ ganaꞌnïn siganï̂nj nej nîman,
ni̱ huê danj gi̱ꞌhiaj Ma̱ꞌan Jesús si gànàꞌnï̀nj nej sôꞌ guyumân ruhuâ niꞌin Ma̱ꞌan.
15 Huê rayiꞌî dânj ni̱ gataj nej ñûnj gu̱nïn nej suj dàj rûnꞌ gidigân Ma̱ꞌan Señor riñan nej ñûnj:
Si nêꞌ nï̀nꞌ nne nìꞌnàꞌ gui nga gaꞌna ñûn Ma̱ꞌan Señor,
ni̱ si̱ gaꞌhue gànàrìꞌ duguiꞌ si̱nï̱nꞌ ngà Ma̱ꞌan dadinꞌ gàꞌ si̱nï̱n gànàꞌnï̀nj nej nimân guyumân ruhuâ niꞌin Ma̱ꞌan ni̱ gànàrìꞌ duguiꞌ ninj nngaj ni̱ nda neꞌ rùkù ni̱ gànàrìꞌ duguiꞌ nêꞌ ngà Ma̱ꞌan.
16 Dadin dàj rûnꞌ ga̱ꞌmi̱n nùkuaj ꞌngo̱ sí ni̱ka̱j sun nìko xi huê danj ga̱ꞌmi̱n nùkuaj Ma̱ꞌan Señor nga gi̱nin ga̱ꞌnaj neꞌ yàtàꞌa,
ni̱ huê danj na̱nj nùkuaj ga̱ꞌmi̱n si-arcángel Ma̱ꞌan Ñaꞌanj an,
ni̱ gu̱nïnꞌ ga̱ꞌña̱nj nùkua chrún âꞌñanj an gi̱ꞌhiaj Ma̱ꞌan Ñaꞌanj an;
ni̱ gàꞌ si̱nï̱n gànàꞌnï̀nj nej nimân guyumân ruhuâ niꞌin Ma̱ꞌan Cristo.
17 Huê danj ni̱ nêꞌ gunâj ni̱ nêꞌ hua̱ nìꞌnàꞌ ni̱ neꞌ rùkù doj,
ni̱ ga̱na̱chinikaj Ma̱ꞌan Ñaꞌanj an ñùnꞌ ni̱ gu̱nꞌ ngà nej sôꞌ gàꞌ gaꞌanj ni̱ gànàrìꞌ duguîꞌ ngà nej sôꞌ riñan nnga,
ni̱ gànàrìꞌ duguîꞌ ngà Ma̱ꞌan Señor riñan nanèe,
ni̱ nìgànj chre ga̱neꞌ ngà Ma̱ꞌan Señor.
18 Huê danj ni̱,
gàꞌhuìꞌ nej suj chrej nùkuaj rûhua riñan ꞌngo̱ ni̱ aꞌngô nej duguiꞌ nej suj nga nuguanꞌ nânj.