Ñanj kartâ huìj nânj huin gachrûn Apóstol Pablo riñan nej
TESALONICENSES
Gaꞌnḯn Pablo nuguanꞌ ni̱ꞌña̱nj an riñan nej dinï̂nt nne ruhuâ yumanꞌ snàꞌànj Tesalónica
1
Pablo ngà Silvano ni̱ Timoteo,
gaꞌnḯn ꞌngo̱ ñanj karta nânj hua riñan nej suj dinï̂nt nìkòꞌ rukû Ma̱ꞌan Jesús nne riñan hioꞌó Tesalónica ni̱ ngà siyu̱gui Ma̱ꞌan Ñaꞌanj huin Rej nêꞌ ni̱ Rej Ma̱ꞌan Señor Jesucristo:
2 Ma̱ꞌan Ñaꞌanj an ri̱ki̱ su̱nu̱j u ni̱ gi̱ꞌhia si ga̱ dïnꞌïnj ruhuâ nej suj dadinꞌ huê Ma̱ꞌan huin Rej nêꞌ ni̱ huej huin Rej Ma̱ꞌan Señor Jesucristo.
Nga ga̱ꞌna̱ꞌ Ma̱ꞌan Cristo ni̱ na̱gi̱ꞌhiaj Ma̱ꞌan Ñaꞌanj an guendâ ngà nej guiì
3 Ni̱ daranꞌ diû ni̱ gaꞌhuiꞌ nej ñûnj si guruhuâ Ma̱ꞌan Ñaꞌanj an rayiꞌî nej suj,
na̱nj di̱nï̂nj,
dadinꞌ hua̱ ni̱ña̱n si huê danj daꞌhui nej ñûnj gi̱ꞌhiaj hueꞌê nej ñûnj,
ni̱ huê danj na̱nj daꞌ gui ni̱ guyumân nìko ruhuâ nej suj niꞌin nej suj Ma̱ꞌan Ñaꞌanj an ni̱ daꞌ gachîn nej gui ni̱ dànanj ꞌì doj ruhuâ nej suj niꞌin nej suj aꞌngô nej duguiꞌ nej suj;
4 ni̱ gaꞌmin hueꞌê nej ñûnj rayiꞌî nej suj riñan nej si-nùhuì Ma̱ꞌan Ñaꞌanj an,
dadinꞌ hua̱ nùkuaj ruhuâ nej suj ni̱ guyumân ruhuâ nej suj niꞌin nej suj Ma̱ꞌan Ñaꞌanj an,
nùnj huin sij nìkòꞌ nej síi gi̱daꞌa nej sôꞌ nej suj ni̱ gata ràꞌa nej sôꞌ nej suj ni̱ ga̱ nùkuaj ruhuâ nej suj.
5 Ni̱ nânj huin ꞌngo̱ daꞌngaꞌa si sa ni̱ka̱a huin sa giꞌhiaj Ma̱ꞌan Ñaꞌanj an nga na̱nikïnꞌ nej suj riñanj,
ni̱ gìrìꞌ nìꞌhiaj nej suj ga̱tu̱ nej suj ñan ni̱ka̱j su̱n Ma̱ꞌan Ñaꞌanj nne yàtàꞌa,
rayiꞌî sañun giranꞌ nej suj.
6 Dadinꞌ ña̱ꞌa̱n huaj si gi̱ranꞌ sa̱ñu̱n nej sí dânj giꞌhiaj Ma̱ꞌan Ñaꞌanj an rayiꞌî guendâ giꞌhiaj nej sôꞌ giranꞌ sa̱ñu̱n nej suj.
7 Ni̱ nej suj giranꞌ sa̱ñu̱n,
ni̱ ga̱na̱ra̱n ruhuâ nej suj dàj rûnꞌ ganarânj ruhuâ nej ñûnj.
Ni̱ huê dànanj ga̱huin gui nga ga̱ꞌna̱ꞌ Ma̱ꞌan Jesús neꞌ yàtàꞌa ngà nej ángel ni̱ka̱j sun nìko siganï̂nj ñaꞌan nayumàan.
8 Guendâ gi̱ꞌhia gi̱ran sa̱ñu̱n daranꞌ nej guiì nun gi̱ni̱ꞌin Ma̱ꞌan Ñaꞌanj an ni̱ huê danj na̱nj gi̱ranꞌ sa̱ñu̱n nej guiì nun ga̱ꞌhue da̱gahuin nuguanꞌ gi̱ꞌhiaj ga̱na̱ni̱n ninj ni̱ huê dânj huin si-nùguànꞌ Ma̱ꞌan Señor Jesucristo;
9 ni̱ ga̱ꞌa̱nj ni̱ꞌhia̱ nej guiì nânj ni̱ ûta gi̱ranꞌ sa̱ñu̱n nìgànj ninj,
ni̱ ga̱huin anêj ninj ñan nìko nikaj su̱n Ma̱ꞌan Ñaꞌanj an,
10 ni̱ huê dànanj ga̱huin nga nànìkàj ñûn Ma̱ꞌan Señor Jesucristo ga̱ꞌnaj ni̱ ga̱ꞌmi̱n hueꞌê nej guiì huin yiñan rayiꞌij,
ni̱ ûta ga̱ranꞌ ruhuâ daranꞌ ninj niꞌin ninj Ma̱ꞌan ni̱ nej guiì dânj huin nej suj dadinꞌ guyumân ruhuâ nej suj niꞌin nej suj nuguanꞌ gananï̂n nej ñûnj riñan nej suj.
11 Huê rayiꞌî dan ni̱ daranꞌ diû gachín nìꞌhiaj nej ñûnj riñan Ma̱ꞌan Ñaꞌanj an rayiꞌî nej suj,
si hua̱ ni̱ña̱n si gànàkï̀nj Ma̱ꞌan nej suj,
ni̱ da̱gahuin sa ganï̂n ruhuaj ngà nej suj ni̱ gu̱ru̱gûñuꞌun nej suj ngà sa nùkuaj hua̱ riñânj daꞌnga ni̱ gaꞌhue gi̱ꞌhiaj sun,
nej suj si-su̱n Ma̱ꞌan dàj rûnꞌ guyumân ruhuâ nej suj;
12 daꞌnga ni̱ gaꞌmin hueꞌê nej guiì yiꞌî siyu̱gui Ma̱ꞌan Señor Jesucristo gi̱ꞌhiaj nej suj,
ni̱ huê danj na̱nj ga̱ꞌmi̱n hueꞌê Ma̱ꞌan rayiꞌî nej suj,
ngà si-su̱nu̱j Ma̱ꞌan Daꞌanj nêꞌ ni̱ ngà si-su̱nu̱j Ma̱ꞌan Señor Jesucristo.