Nga gi̱digân sí giꞌhiaj gakï̱nꞌïn Ma̱ꞌan sôꞌ
2
Sani̱ rayiꞌî gui nga ga̱ꞌna̱ꞌ Ma̱ꞌan Señor Jesucristo,
ni̱ nga gànàrìꞌ duguîꞌ ngà Ma̱ꞌan,
ni̱ gachín nìꞌhiaj nej ñûnj riñan nej suj di̱nï̂nj,
2 ni̱ si̱ gachej ruhuâ nej suj ngà sa ganï̂n ruhuâ nej suj,
ni̱ si̱ guyuꞌhuiꞌ nej suj,
dadinꞌ nùnj huin si gataj ꞌngo̱ síi si ganahuin ràꞌa sôꞌ nuguanꞌan gi̱ꞌhiaj Ma̱ꞌan Espíritu,
ni̱ nùnj huin si gataj nej sôꞌ si ganahuin ràꞌa nej sôꞌ ꞌngo̱ ñanj karta gaꞌnḯn nej ñûnj guchiꞌ riñan nej sôꞌ,
ni̱ ga̱ta̱j nej sôꞌ si gàꞌ gahuin nichrunꞌ diû gùyùmàn Ma̱ꞌan Señor sani̱ sê danj huin mánj.
3 Ni̱ si̱ gaꞌnï̂nj nej suj si gi̱di̱gañuꞌunj gàꞌ si ꞌngo̱ nej síi nej suj;
dadinꞌ si̱ gaꞌnaꞌ Ma̱ꞌan Jesús dadinꞌ gàꞌ si̱nï̱n gimàn nej sí gànànìkàj rukû ni si̱ da̱gahuin nej sôꞌ daranꞌ sa gataj Ma̱ꞌan Ñaꞌanj an,
ni̱ huê danj na̱nj ga̱ꞌna̱ꞌ sí ga̱ta̱j si huê sôꞌ huin Señor Jesús sí gàꞌ giriꞌ nìꞌhiaj gaꞌanj nìꞌhia.
4 Ni̱ ga̱na̱chinikaj sí nânj ma̱ꞌan sôꞌ ni̱ gu̱nï̱nꞌ sôꞌ ngà Ma̱ꞌan Ñaꞌanj an ni̱ huê danj na̱nj gu̱nïnꞌ sôꞌ ngà aꞌngô nej sa huin daꞌanj nej guiì,
ni̱ gaꞌanj ga̱ne sôꞌ guendâ gi̱nikaj su̱n sôꞌ ruhuâ hueꞌ nuhuî nìko nne Jerusalén,
ni̱ ga̱ta̱j sôꞌ si ñaꞌanj an huin sôꞌ.
5 Nitaj si gananun ruhuâ nej suj si nga gané ngà nej suj,
ni̱ gàꞌ gata rayiꞌî nej nânj ràꞌ saj ûnꞌ.
6 Ni̱ gàꞌ niꞌin nej suj ahuin sa garán,
ni̱ rayiꞌî dan ni̱ hua̱ nânj nitaj sôꞌ gùyùmàn.
7 Dadinꞌ gàꞌ hua̱ yu̱gui guendâ ga̱ꞌna̱ꞌ sí kï̱j hua dânj sani̱ ꞌnï̱nj huì sôꞌ;
dadinꞌ hua̱ ꞌngo̱ sa garán ni̱ rayiꞌî dan ni̱ nitaj si ganakaj su̱n sôꞌ,
sani̱ nga gu̱xu̱n sa ni̱kï̱nꞌ garán dânj Ma̱ꞌan.
8 Hiôꞌ ni̱ ga̱na̱di̱gân sí ga̱ninï̀nꞌ hua danj ma̱ꞌan sôꞌ riñan nej guiì,
sani̱ da̱gahuiꞌ Ma̱ꞌan Señor sí dânj nga nanè ga̱hui ruhuâ duꞌhua,
ni̱ gi̱ꞌhiaj ga̱nan Ma̱ꞌan Señor sí dânj ngà sa giràn xi gu̱du̱gunj nga ga̱ꞌnaj;
9 ni̱ gùyùmàn sí dânj gi̱ꞌhiaj sichre,
ni̱ ûta nìko gi̱nikaj su̱n sôꞌ ni̱ gi̱ꞌhiaj sôꞌ ûta gàꞌì nej daꞌngaꞌa,
ni̱ nda nanè chre ga̱na̱huin nej guiì gi̱ꞌhiaj sôꞌ hue danj ni̱ ûta gi̱di̱gañuꞌunj sôꞌ nej guiì,
10 ni̱ ga̱ra̱n sun sôꞌ ûta gàꞌì nej sa kï̱j huaa guendâ gi̱di̱gañuꞌunj sôꞌ nej guiì gàꞌ ga̱ꞌa̱nj nìꞌhia,
guendâ nun ga̱ꞌhue̱j ninj ga̱na̱huin ràꞌa ninj ni̱ nun gàꞌhuej ninj da̱gahuin ninj nuguanꞌ yàngàꞌa guendâ ga̱na̱ni̱n ninj.
11 Rayiꞌî dan ni̱ gaꞌnï̂nj Ma̱ꞌan Ñaꞌanj an si ga̱ꞌna̱ꞌ sí gi̱di̱gañuꞌunj ni̱ gùyùmàn ruhuâ ninj niꞌin ninj nuguanꞌ gaꞌmin gidigañuꞌunj sôꞌ,
12 huê danj ni̱ gi̱ranꞌ sa̱ñu̱n daranꞌ nej guiì nun gùyùmàn ruhuâ niꞌin sa yàngàꞌa,
dadinꞌ dànanj gininj hueꞌê gakï̱nꞌïn riñan ninj gàꞌ daꞌ si-nùguànꞌ Ma̱ꞌan Ñaꞌanj an.
Guendâ dagahuin nej sij ni̱ ganagui Ma̱ꞌan Ñaꞌanj an nej sij ni̱ giꞌhia ga̱na̱ni̱n nej sij
13 Sani̱ daꞌhui ni̱ña̱n nej ñûnj ni̱ gàꞌhuìꞌ nej ñûnj si guruhuâ Ma̱ꞌan Ñaꞌanj an rayiꞌî nej suj,
dadinꞌ ꞌì ruhuâ nej ñûnj niꞌin nej ñûnj nej suj na̱nj di̱nï̂nj,
dadinꞌ gàꞌ si̱nï̱n nej suj ganagui Ma̱ꞌan Ñaꞌanj an guendâ ga̱na̱ni̱n nej suj,
rayiꞌî guendâ gàꞌ nagiꞌhiaj sàꞌ Ma̱ꞌan Espíritu Santo nej suj dadinꞌ guyumân ruhuâ nej suj niꞌin nej suj nuguanꞌ yàngàꞌa,
14 rayiꞌî nan gakḯn Ma̱ꞌan Ñaꞌanj an nej suj nga gidaꞌa nej suj nuguan gananï̂n nej ñûnj riñan nej suj,
ni̱ huêj huin nuguanꞌ gi̱ꞌhiaj ga̱na̱ni̱n nej suj.
15 Di̱nï̂nj,
huê danj ni̱ ga̱nikïnꞌ ran nej suj,
ni̱ si̱ gaꞌnḯn raꞌa nej suj nej yìꞌnï̀nꞌ nej nuguanꞌ gahuin chru̱n nej suj giꞌhiaj nej ñûnj,
ni̱ ga̱ꞌhue si gahuin nuguanꞌ du̱ꞌhua nej si huin nuguanꞌ nnùn riñanj ñanj karta gaꞌnḯn nej ñûnj guchiꞌ riñan nej suj.
16 Ni̱ huê gè Ma̱ꞌan Señor Jesucristo,
ni̱ Ma̱ꞌan Rej nêꞌ Ñaꞌanj an,
Ma̱ꞌan huin sa ga ꞌì ruhuâ niꞌin ñùnꞌ ni̱ giꞌhia si gànàrìꞌ ruhuôꞌ ni̱ ga̱ne nìgùnꞌ ni̱ giꞌhia si ga̱huin chru̱n gànàꞌhuìꞌ ngà si-su̱nu.
17 Ni̱ Ma̱ꞌan huin si na̱gi̱ꞌhiaj ran ruhuâ nimân nej suj,
ni̱ na̱giꞌhiaj yìtïn ruhuâ nej suj,
daꞌnga ni̱ gaꞌhue ga̱ꞌmi̱n nej suj nuguanꞌ sàꞌa ni̱ gi̱ꞌhiaj nej suj sa sàꞌa na̱nj ánj.