Gàchìnj nìꞌhiaj nej suj rayiꞌî nej ñûnj
3
Aꞌngô sa gi̱ꞌhiaj nej suj huin di̱nï̂nj,
si gàchìnj nìꞌhiaj nej suj rayiꞌî nej ñûnj daꞌnga ni̱ gaꞌhue ga̱ꞌa̱nj gàꞌhuìꞌ râꞌñanj nej ñûnj si-nùguànꞌ Ma̱ꞌan Ñaꞌanj an riñan aꞌngô nej hioꞌóo ni̱ ga̱ꞌmi̱n hueꞌê nej guiì rayiꞌî si-nùguànꞌ Ma̱ꞌan Ñaꞌanj an,
dàj rûnꞌ hio guchij riñan nej suj,
2 daꞌnga ni̱ gananin nej ñûnj riñan nej sí kï̱j huaa ni̱ nej sí giꞌhiaj gakï̱nꞌïn;
dadinꞌ sê daranꞌ nej sí dânj guyumân ruhuâ niꞌin Ma̱ꞌan Jesús mánj.
3 Sani̱ hueꞌê dagahuin Ma̱ꞌan Señor,
ni̱ gi̱ꞌhiaj yìtïn ruhuâ nej suj ni̱ du̱guminj nej suj riñan sa yìꞌìi.
4 Ni̱ hua̱ yìtï̀nj ruhuâ nej ñûnj niꞌin nej ñûnj nej suj ngà Ma̱ꞌan Señor,
ni̱ niꞌin nej ñûnj si da̱gahuin nej suj sun gaꞌnïnꞌ su̱n nej ñûnj riñan nej suj.
5 Ni̱ Ma̱ꞌan Señor gi̱di̱gân si ga̱huin chru̱n nimân nej suj ga̱ ꞌì ruhuâj dàj rûnꞌ ꞌì ruhuâ Ma̱ꞌan Ñaꞌanj an,
ni̱ Ma̱ꞌan Cristo gi̱ꞌhiaj ga̱huin nùkuaj ruhuâ nej suj.
Daꞌhuîꞌ gi̱ꞌhiaj sunꞌ
6 Di̱nï̂nj ni̱ gaꞌnïnꞌ nej ñûnj suun riñan nej suj ngà siyu̱gui Ma̱ꞌan Señor,
si gi̱ꞌhiaj anêj nej suj ma̱ꞌan nej suj riñan daranꞌ nej sí gataj si huin nej sôꞌ dinï̂nt sani̱ nitaj si dagahuin nej sôꞌ,
dàj rûnꞌ gidigân nej ñûnj riñan nej suj mánj.
7 Dadinꞌ gàꞌ niꞌin nej suj si daꞌhui nej suj gi̱ꞌhiaj nej suj dàj rûnꞌ giꞌhiaj nej ñûnj nga gane nej ñûnj siganï̂nj nej suj;
dadinꞌ nun gi̱nikaj duguiꞌ nej ñûnj ngà nej sí gataj si huin nej sôꞌ dinï̂nt sani̱ nitaj si dagahuin nej sôꞌ,
8 ni̱ nun ya̱ chre nej ñûnj si-ràchrùnj gàꞌ si ꞌngo̱ nej guiì,
dadinꞌ ûta ganahuij ruhuâ nej ñûnj giꞌhiaj sun nej ñûnj,
ni̱ nda gininaj nej ñûnj giꞌhiaj sun nej ñûnj neꞌ gui ngà neꞌ ñànꞌan,
guendâ nun ga̱ranꞌ ruhuâ nej ñûnj si gutïnꞌ gàꞌ si ꞌngo̱ nej suj sanꞌanj an rayiꞌî nej ñûnj;
9 yàngà hia ni̱ hua̱ ni̱ña̱n si daꞌhui nej ñûnj gàchìnj nej ñûnj si gu̱ru̱gûñuꞌunj nej suj nej ñûnj,
sani̱ giꞌhiaj sun nej ñûnj guendâ ruhuâ nej ñûnj si gi̱ꞌhiaj nej suj dàj rûnꞌ giꞌhiaj nej ñûnj.
10 Dadinꞌ nga gane nej ñûnj siganï̂nj nej suj,
ni̱ huê dànanj gaꞌnïnꞌ nej ñûnj suun riñan nej suj:
Ni̱ si hua̱ ꞌngo̱ nej suj rùmìn giꞌhiaj sun ni̱ huê danj na̱nj si̱ yâ nej suj gataj nej ñûnj mánj.
11 Dadinꞌ gunïn nej ñûnj si hua̱ da̱ꞌa̱j nej sí màn siganï̂nj nej suj ni̱ gataj nej sôꞌ si huin nej sôꞌ dinï̂nt sani̱ nitaj si dagahuin nej sôꞌ,
ni̱ gàꞌ doj sînj nitaj si giꞌhiaj sun nej sôꞌ,
ni̱ gaꞌanj nej sôꞌ hueꞌ ñan nun gàkï̀nj nej guiì nej sôꞌ.
12 Ni̱ riñan nej sôꞌ huin si gaꞌnïnꞌ su̱n nej ñûnj ni̱ dugunïn gàꞌì nej ñûnj ngà siyu̱gui Ma̱ꞌan Señor nej sôꞌ,
si ga̱ dïnꞌïnj ruhuâ nej sôꞌ ni̱ du̱guꞌnïnꞌ nej sôꞌ giꞌhiaj sun nej sôꞌ,
ni̱ ya̱ nej sôꞌ rachrún giꞌhiaj ga̱nan nej sôꞌ ngà nihià nej sôꞌ.
13 Ni̱ si̱ gininaj ruhuâ nej suj,
guendâ gi̱ꞌhiaj nej suj sa sàꞌa man di̱nï̂nj.
14 Ni̱ si hua̱ ꞌngo̱ sí gunïn dàj taj riñanj ñanj karta nânj ni̱ naꞌhuej sôꞌ da̱gahuin sôꞌ nuguanꞌ gataj nej ñûnj,
ni̱ sí dânj gàꞌnï̀nj ñan nej suj,
ni̱ si̱ gidaꞌa duguiꞌ nej suj ngà sôꞌ daꞌnga ni̱ gìrìꞌ sôꞌ sinaꞌàj a na̱nj ánj.
15 Sani̱ si̱ giꞌhiaj nej suj si ga̱huin sôꞌ sí gu̱nï̱nꞌ ngà nej suj,
sa giꞌhiaj nej suj huin si du̱gunïn gàꞌì nej suj sôꞌ dàj rûnꞌ ꞌhiôꞌ ngà ꞌngo̱ dinï̂nt.
Ganahui gachrûn sij ni̱ gataj sij si ga̱ꞌna̱ꞌ sa hueꞌê riñan nej dinï̂nt
16 Ni̱ huê gè Ma̱ꞌan Señor ꞌhiaj hua dïnꞌïnj ruhuôꞌ ri̱ki̱ sa ga̱ dïnꞌïnj riñan nej suj daranꞌ diû.
Ni̱ Ma̱ꞌan Señor ga̱ne ngà daranꞌ nej suj.