Ñanj kartâ si̱nï̱n nânj huin gachrûn Apóstol Pablo riñan
TIMOTEO
Gaꞌnḯn Pablo nuguanꞌ ni̱ꞌña̱nj an riñan Timoteo
1
Ñùnj huin Pablo,
ni̱ huín sí gaꞌanj gi̱di̱gân si̱nï̱n ni̱ Ma̱ꞌan Señor Jesucristo huin sa ni̱ka̱j su̱n riñânj,
ni̱ Ma̱ꞌan Ñaꞌanj an ni̱ Ma̱ꞌan Jesucristo huin sa gi̱ꞌhiaj ga̱na̱ni̱n nêꞌ ni̱ huê Ma̱ꞌan huin sa gànàꞌhuìj nêꞌ ni̱ gaꞌnïn si gàtà nuguanꞌ nânj riñanꞌ.
2 Ni̱ gaꞌnï̂n nuguanꞌ ni̱ꞌña̱nj an huaj riñanꞌ raj Timoteo,
ni̱ huînꞌ daꞌní yàngàj guendâ guyumân ruhuâꞌ nga gaꞌmînj si-nùguànꞌ Ma̱ꞌan Ñaꞌanj an riñanꞌ,
ni̱ huînꞌ sí dagahuin yàngàꞌ:
Ni̱ gi̱ꞌhiaj Ma̱ꞌan Ñaꞌanj an sunuj u ni̱ gu̱ru̱gûñuꞌun ni̱ gi̱ꞌhia si ga̱ dïnꞌïnj riñanꞌ,
ni̱ huê Ma̱ꞌan huin Rej nêꞌ ngà Rej Ma̱ꞌan Señor Jesucristo huin si-Seño nêꞌ.
Guchruj su̱n Pablo si ga̱ gu̱dadûꞌ ngà nej sí gidigân nuguanꞌ digaꞌñuꞌunj un
3 Ni̱ gachín nìꞌhia si gùnàjꞌ ruhuâ yumanꞌ snàꞌànj Efeso,
nga gaꞌân Macedonia ni̱ gatâ gu̱nïnꞌ sisi̱ si̱ gaꞌnï̂nj si gi̱di̱gân aꞌngô nej síi nej yìꞌnï̀nꞌ nej nuguanꞌ gidigañuꞌunj un riñan nej dinï̂nt,
4 ga̱ta̱j gunïn nej sij ni̱ si̱ gaꞌnḯn nej sij rakïj nej sij nej ñanj nnùn ûta nìko si-guèntù nej síi,
ni̱ huê danj na̱nj si̱ girëꞌ nej sij diû guendâ na̱di̱giꞌñûn nej sij ahuin si huin yi nej sij ni̱ dàj nikòꞌ duguiꞌ nej daꞌní nej sôꞌ,
dadinꞌ ûta gi̱ꞌhiaj yìꞌij ni̱ garán riñan duguiꞌ nej suj giꞌhia ni̱ nitaj si nagiꞌhiaj nùkua ruhuâ nej suj,
ni̱ nitaj si gaꞌnïn dàj ga̱ꞌhue gi̱ni̱ꞌin nej suj sa nìko niꞌin Ma̱ꞌan Ñaꞌanj an,
dadinꞌ nun niꞌînꞌ dàj giꞌhiaj Ma̱ꞌan Ñaꞌanj an sani̱ daꞌhuîꞌ gùyùmàn ruhuôꞌ ni̱ huê dànanj gaꞌnïnꞌ sùnj riñanꞌ.
5 Ni̱ sa ganï̂n ruhuâj nga gaꞌnïnꞌ sùnj huin si gà ꞌì ruhuôꞌ si yàngàꞌ hia gàꞌ ganahuin sàꞌ nimûnꞌ,
ni̱ ganahuin sàꞌ daꞌngaꞌ nu̱n ruhuâ nimûnꞌ dadinꞌ sê si man si gi̱ꞌhiôꞌ si guyumân ruhuôꞌ mánj.
6 Ni̱ rayiꞌî nej nuguanꞌ nânj gahuin anêj da̱ꞌa̱j nej sôꞌ,
dadinꞌ ûta gunïnꞌ nej sôꞌ rayiꞌî nej nuguanꞌ nitaj si hua̱ niꞌñanj an.
7 Naꞌhue ga̱ra̱n daꞌngaꞌ ruhuâ nej sôꞌ ni̱ ganï̂n ruhuâ nej sôꞌ si huin nej sôꞌ maestrû chru̱n si-nùguànꞌ Ma̱ꞌan Ñaꞌanj an,
sani̱ gàꞌ nitaj si garânj daꞌngaꞌ ruhuâ nej sôꞌ rayiꞌî sa gaꞌmin nej sôꞌ ni̱ rayiꞌî nuguanꞌ nagiꞌhiaj yìtï̀nj nej sôꞌ.
8 Sani̱ niꞌînꞌ si si-ley Ma̱ꞌan Ñaꞌanj an ni̱ huin sa sàꞌaj,
si ga̱ra̱n sunꞌ ley dânj dàj rûnꞌ garanꞌ ruhuâ Ma̱ꞌan sa giri rà ley.
9 Ña̱ꞌa̱n huaj si gi̱ni̱ꞌin nej suj,
dadinꞌ si-ley Ma̱ꞌan Ñaꞌanj an ni̱ nun ga̱ꞌnaj riñan nej guiì giꞌhiaj sa ni̱ka̱a mánj,
gaꞌnaj riñan nej guiì nitaj si dagahuin ni̱ nej guiì ûta ra̱kïj,
ni̱ riñan nej guiì nitaj si guyumân ruhuâ niꞌin Ma̱ꞌan Ñaꞌanj an,
ni̱ nej guiì giꞌhiaj gakï̱nꞌïn,
ni̱ huin guendâ nej sí kï̱j gaꞌmin ni̱ nej sí garanꞌ ruhuâ nej gakï̱nꞌ rikî yumiguìi,
ni̱ nej sí dagahuiꞌ rej,
ni̱ sí dagahuiꞌ nni,
ni̱ sí dagahuiꞌ guiì,
10 ni̱ huin guendâ nej sí nne sìgìchràꞌ,
nej sí yànàa,
nej sí guneꞌ nìnï̀nꞌ nej guiì guendâ ga̱ꞌne̱ nej sôꞌ sanꞌanj an,
nej sí gidigañuꞌunj,
ni̱ nej sí nagaꞌhuiꞌ duguiꞌ,
ni̱ nej sí naꞌhuej ga̱na̱huin ra̱ꞌa nej yìꞌnï̀nꞌ nej nuguanꞌ gidigân Ma̱ꞌan Jesús.
11 Ni̱ nânj huin sa ña̱ꞌa̱n gidigân nuguanꞌ gi̱ꞌhiaj ga̱na̱ni̱nꞌ huin si-nùguànꞌ Ma̱ꞌan Ñaꞌanj ûta hueꞌê giꞌhiaj,
dadinꞌ huê dànanj duguta su̱n Ma̱ꞌan ñùnj.
Sun giꞌhiaj Pablo
12 Gaꞌhuí si guruhuâ Ma̱ꞌan Cristo Jesús huin si-Seño nêꞌ,
dadinꞌ nagiꞌhiaj nùkua ñùnj,
dadinꞌ niꞌín si hueꞌê dagahuín riñanj,
ni̱ gachrûn sunj si gi̱ꞌhiaj sûnj si-sunj.
13 Àsìj ni̱ gahuín ꞌngo̱ sí gaꞌmin kï̱j,
ni̱ gahuín ꞌngo̱ sí ginikòꞌ gata ràꞌa nej dinï̂nt,
ni̱ gachînj nuguanꞌ riñan nej sôꞌ,
sani̱ ganahuin ràꞌa Ma̱ꞌan Ñaꞌanj an ni̱ guruguñuꞌunj Ma̱ꞌan ñùnj dadinꞌ nun gi̱ni̱ꞌin daꞌngá sa giꞌhia,
dadinꞌ hua̱ nï̀nꞌ gàchin gùyùmàn ruhuaj.
14 Sani̱ dànanj ûta nìko hua sunuj u rikî Ma̱ꞌan si-Seño nêꞌ riñânj,
ni̱ guruhuâ Ma̱ꞌan Cristo Jesús sa giꞌhia ngàj dadinꞌ giꞌhia si guyumân ruhuâj ni̱ giꞌhia si ga ꞌì ruhuâj.
15 Nuguanꞌ yàngàꞌa ni̱ nuguanꞌ hua̱ hueꞌê daꞌhuîꞌ darûnꞌ ganahuin ro̱ꞌôꞌ huin nânj:
Dadinꞌ gaꞌnaꞌ Ma̱ꞌan Cristo Jesús ruhuâ yumiguìi guendâ gi̱ꞌhia si ga̱na̱ni̱n nej guiì gakï̱nꞌïn,
ni̱ huê goꞌngo̱ nej sí gakï̱nꞌ dânj gahuín.
16 Sani̱ Ma̱ꞌan Ñaꞌanj an huin sa gurugûñuꞌunj ñùnj,
ni̱ huê danj na̱nj gidigân Ma̱ꞌan Jesucristo daranꞌ sa nùkuaj giꞌhia riñânj.
Ni̱ nga guyumân ruhuâj ni̱ gutá chrej e neꞌ ña̱an,
huê danj ni̱ guyumân ruhuâ aꞌngô nej guiì niꞌin ninj Ma̱ꞌan Cristo ni̱ ga̱ꞌhue ga̱ne nìgànj ninj ngà Ma̱ꞌan Ñaꞌanj an.
17 Huê danj ni̱ ga̱na̱ka̱j guendâ nêꞌ ni̱ ga̱ꞌmi̱n hueꞌê nêꞌ rayiꞌî Ma̱ꞌan Rey ni̱ka̱j su̱n nìgànj chre,
dadinꞌ nitaj àmàn huaj ga̱huij,
ni̱ si̱ gaꞌhue gi̱ni̱ꞌînꞌ dàj huaj,
ni̱ ꞌngo̱ rïn huin Ma̱ꞌan Ñaꞌanj chru̱n nï̀nꞌ ruhuâ.
Ni̱ huê danj huaj rûꞌhuaj na̱nj ánj.
18 Timoteo,
sòꞌ huin daꞌnî,
ni̱ duguta sùnj sòꞌ si ûta hueꞌê du̱naꞌhuej rayiꞌî si-nùguànꞌ Ma̱ꞌan Ñaꞌanj an dàj rûnꞌ gi̱ꞌhiaj ꞌngo̱ stâdu,
dadinꞌ huê danj gàꞌ guyumân nej nuguanꞌ gataj dàj ga̱huin rayiꞌîꞌ ni̱ dàj gi̱ꞌhiâꞌ,
19 du̱naꞌhuej rayiꞌî nuguanꞌ guyumân ruhuâꞌ ni̱ hueꞌê da̱gahuînꞌ dàj rûnꞌ hua daꞌnga nu̱n ruhuâ nimânꞌ giꞌhiaj Ma̱ꞌan Ñaꞌanj an,
dadinꞌ si gu̱du̱nâj ni̱ ga̱ꞌa̱nj niꞌhiaꞌ na̱nj ánj.
20 Dadinꞌ huê dànanj giꞌhiaj Himeneo ngà Alejandro ni̱ rayiꞌî dan ni̱ nun gàꞌnï̀n si giꞌnïnj nguèj sij siganï̂nj nej sôꞌ nìkòꞌ rukû Ma̱ꞌan Jesús gàꞌ mánj,
hiôꞌ ni̱ ga̱ꞌhue gi̱ꞌhiaj Sichre dàj garanꞌ ruhuâj ngà nguèj sij,
daꞌnga ni̱ ga̱huin chru̱n nguèj sij ni̱ si̱ gaꞌmin kï̱j nguèj sij riñan Ma̱ꞌan Ñaꞌanj an mánj.