Ñanj kartâ huìj nânj huin gachrûn Apóstol Pablo riñan
TIMOTEO
Gaꞌnḯn Pablo nuguanꞌ ni̱ꞌña̱nj an riñan Timoteo
1
Ñùnj huin Pablo,
ni̱ garanꞌ ruhuâ Ma̱ꞌan Ñaꞌanj an si ga̱huin sí ga̱ꞌa̱nj gidigân si̱nï̱n si-nùguànꞌ Ma̱ꞌan Jesucristo,
ni̱ garanꞌ ruhuâ Ma̱ꞌan Ñaꞌanj an sa giꞌhiâ,
ni̱ garanꞌ ruhuâ Ma̱ꞌan Cristo Jesús gi̱ꞌhia si ga̱na̱huin nìꞌnàꞌ nej guiì:
2 Ñanj nan gaꞌnï̂n huaj riñan daꞌní Timoteo,
ni̱ ûta ꞌì ruhuâj niꞌín sôꞌ:
Ni̱ Ma̱ꞌan Ñaꞌanj an huin Rej nêꞌ ngà Rej Ma̱ꞌan Señor Jesucristo,
ni̱ giꞌhia sunuj u,
ni̱ gurugûñuꞌun ni̱ gi̱ꞌhia si ga̱ dïnꞌïnj ruhuâ sôꞌ.
Ga̱na̱nï̱n rayiꞌî Ma̱ꞌan Cristo
3 Nga gananun ruhuâj niꞌín sòꞌ,
ni̱ gachín nìꞌhia rayiꞌîꞌ neꞌ gui ngà neꞌ ñànꞌan riñan Ma̱ꞌan Ñaꞌanj an,
huê danj na̱nj gaꞌhuí si guruhuâ Ma̱ꞌan Ñaꞌanj an,
ni̱ hua̱ sàꞌ daꞌngaꞌ gaꞌnḯn Ma̱ꞌan Ñaꞌanj an ruhuâ nimânj ni̱ rayiꞌî dan gaꞌhue gunânj gi̱tsí riñanj,
dàj rûnꞌ gunânj gi̱tsi nej duguiꞌí gimân àsìj nâ.
4 Gananun ruhuâj nga dugueꞌeꞌ,
ni̱ ruhuâj gànàrìꞌ duguiꞌ ñún ngàꞌ ni̱ ga̱na̱huin nìhiàꞌ ruhuâj niꞌín sòꞌ;
5 dadinꞌ gananun ruhuâj si guyumân yàngàꞌ ruhuâꞌ dàj rûnꞌ guyumân ruhuâ yuguanꞌân Loida,
ngà nît Eunice,
ni̱ niꞌín si huê danj na̱nj guyumân yìtï̀nj ruhuâꞌ.
6 Ni̱ huê rayiꞌî dan ni̱ na̱rikîj chrej nùkuaj ruhuâ riñanꞌ,
dadinꞌ nga gutá raꞌá ahuîꞌ ni̱ ganariꞌ ꞌngo̱ suun gi̱nikajꞌ giꞌhiaj Ma̱ꞌan Ñaꞌanj an,
ni̱ gi̱ni̱ꞌhiaj ni̱ si̱ ganagaꞌ sa ña̱ꞌan nun ruhuâ nimânt,
dadinꞌ si nuhuij ni̱ ga̱na̱huin nu̱huîꞌ na̱nj ánj.
7 Dadinꞌ nun ri̱ki̱ Ma̱ꞌan Ñaꞌanj an ꞌngo̱ espíritu guendâ gu̱yuꞌhuîꞌ mánj,
rikî Ma̱ꞌan Ñaꞌanj an ꞌngo̱ espíritu guendâ gu̱nu̱kuôꞌ gi̱ꞌhiaj ga̱nunꞌ,
guendâ ga̱ ꞌì ruhuôꞌ,
guendâ gu̱nu̱kuôꞌ du̱gumînꞌ muꞌûnꞌ.
8 Huê danj ni̱,
si̱ girîꞌ sinàꞌaj a ga̱na̱nï̱nꞌ rayiꞌî Ma̱ꞌan Señor ngà rayiꞌí,
dadinꞌ huê rayiꞌî Ma̱ꞌan Señor giꞌnï̂n dukuâ gaꞌa.
Sa si̱nï̱n gi̱ꞌhiâꞌ huin ni̱ ngà guesâ rikî Ma̱ꞌan Ñaꞌanj an riñanꞌ,
ni̱ ga̱ ruhuâ gi̱ranꞌ sañunꞌ rayiꞌî nuguanꞌ gi̱ꞌhiaj ga̱na̱ni̱n nej guiì,
9 dadinꞌ huej huin sa giꞌhiaj gananinꞌ ni̱ gakïn gaꞌnôꞌ guendâ ga̱huînꞌ ꞌngo̱ yumanꞌ gèe,
sani̱ gakïn ñûnꞌ sani̱ se rayiꞌî guendâ ganahuij ruhuôꞌ giꞌhiôꞌ sa sàꞌa mánj,
gakïn ñùnꞌ dadinꞌ guyumân ruhuôꞌ niꞌînꞌ Ma̱ꞌan Cristo Jesús,
dadinꞌ huê danj ganï̂n ruhuaj niꞌin ñùnꞌ àsìj diû nâ ni̱ rayiꞌî dan ni̱ rikij sunuj u riñunꞌ,
10 sani̱ gananï̂n Ma̱ꞌan Ñaꞌanj an nuguanꞌ nânj,
dadinꞌ hia̱j ni̱ gàꞌ gaꞌnaꞌ gi̱di̱gân Jesús Ma̱ꞌan si huej huin sa gi̱ꞌhiaj ga̱na̱ni̱nꞌ,
ni̱ gudurëꞌëj sa gi̱ꞌhiaj gàhuìꞌ,
ni̱ nga nuguanꞌ gi̱ꞌhiaj ga̱na̱ni̱nꞌ ni̱ giꞌhia si ga̱ra̱n daꞌngaꞌ ruhuôꞌ si huaj ga̱ne nìgùnꞌ.
11 Ni̱ Ma̱ꞌan Ñaꞌanj an huin sa duguta su̱n ñùnj guendâ gahuín sí gànàtàꞌ ni̱ gahuín sí ga̱ꞌa̱nj gidigán si̱nï̱n si-nùguànꞌanj,
ni̱ gahuín maestrû riñan nej sí nàsìnùnj un.
12 Ni̱ huê rayiꞌî dan ni̱ hua̱ ruhuâj ganahuin raꞌá daranꞌ sañuun.
Sani̱ nitaj si giriꞌí sinaꞌàj a mánj,
dadinꞌ gàꞌ niꞌín ahuin sa ri̱ña̱n guyumân ruhuâj,
ni̱ niꞌín si ûta nùkua ni̱ rayiꞌî dan ni̱ nitaj si guyuꞌhuí dadinꞌ ga̱ꞌhue gu̱ru̱gûñuꞌun ñùnj,
ni̱ ga̱ꞌhue du̱gumîn hueꞌê nuguanꞌ sàꞌ ganahuin raꞌá nda ga̱na̱hui si-sùnj riñan hioꞌó nânj.
13 Gànàꞌnï̀nj sàꞌ daranꞌ nej nuguanꞌ sàꞌ gunïnꞌ gaꞌmînj,
ni̱ gùyùmàn ruhuâꞌ ni̱ ga̱ ꞌì ruhuâꞌ dàj rûnꞌ gidigân Ma̱ꞌan Cristo Jesús.
14 Ni̱ Ma̱ꞌan Espíritu Santo nne ruhuâ nimânꞌ gu̱ru̱gûñuꞌunj sòꞌ ni̱ ga̱ꞌhue du̱gumîn hueꞌêꞌ daranꞌ nuguanꞌ sàꞌ ganahuin raꞌâꞌ.
15 Gàꞌ niꞌînꞌ,
si gudunâj daranꞌ nej sôꞌ màn riñan hioꞌó Asia ñùnj,
ni̱ nej sôꞌ dânj huin Figelo ngà Hermógenes.
16 Ni̱ gi̱ꞌhiaj Ma̱ꞌan Señor sunuj u ni̱ guruguñuꞌun nej dùguìꞌ Onesíforo,
dadinꞌ ûta gàꞌì ni̱ rikî sôꞌ chre nùkuaj rûhua riñânj ni̱ rikî sôꞌ sa yaj,
ni̱ nun gìrìꞌ sôꞌ sinaꞌàj a nga giniꞌin sôꞌ si a̱nu̱min agaꞌ kadena ñùnj nga giꞌnï̂n dukuâ gaꞌa mánj,
17 dadinꞌ nga guchiꞌ sôꞌ Roma,
ni̱ nda nanè chre nanaꞌhuiꞌ sôꞌ ñùnj,
nda ganariꞌ sôꞌ ñùnj.
18 Ni̱ gànàꞌhuì si gu̱ru̱gûñuꞌunj Ma̱ꞌan Señor rukû sôꞌ nga gùyùmàn gui dânj.
Ni̱ gàꞌ niꞌînꞌ dàj nìko gurugûñuꞌunj sij rukû nêꞌ nga ganeꞌ ruhuâ yumanꞌ snàꞌànj Efeso.