Stadû giꞌhiaj sun hueꞌê riñan Ma̱ꞌan Jesucristo
2
Sòꞌ huînꞌ daꞌnî Timoteo,
ni̱ gi̱ꞌhiaj guesâꞌ sòꞌ ma̱ꞌanꞌ ngà sunuj rikî Ma̱ꞌan Cristo Jesús riñanꞌ.
2 Dàj gunï̂nꞌ gatâ nga gidigán riñan ûta gàꞌì nej guiì giniꞌin,
ni̱ huê dânj du̱guta su̱nꞌ riñan aꞌngô nej sí hueꞌê dagahuin ni̱ nej sí hua̱ yugui guendâ gi̱digân nej sôꞌ riñan aꞌngô nej guiì.
3 Ga̱ ruhuâ sòꞌ,
gi̱ranꞌ sa̱ñu̱nꞌ ni̱ ga̱na̱huin ràꞌa kastîgu,
dàj rûnꞌ giranꞌ ꞌngo̱ stâdu ûta hueꞌê gunânj gi̱tsi riñan Ma̱ꞌan Jesús.
4 Gàꞌ si ꞌngo̱ stadû ꞌnï̱nj giꞌhiaj sun riñan gobierno ni̱ si̱ gaꞌhue gi̱daꞌa sij aꞌngô suun gi̱ꞌhiaj sunj sij,
dadinꞌ daꞌhui sij da̱gahuin hueꞌê sij riñan sí aꞌnïnꞌ riñan sij.
5 Huê danj na̱nj sí guduku rumin,
ni̱ si̱ gaꞌhue ga̱na̱huin raꞌa sôꞌ sa gi̱ꞌhiaj ga̱nan sôꞌ,
sisi̱ si̱ dagahuin sôꞌ dàj taj riñan ñanj ni̱ka̱j ñuꞌunj dàj daꞌhui nej sôꞌ gu̱duku nej sôꞌ mánj.
6 Sí gunuun ni̱ guendâ gìrìꞌ sôꞌ sa ya̱ sôꞌ,
ni̱ gàꞌ si̱nï̱n daꞌhui sôꞌ gi̱ꞌhiaj sun sôꞌ.
7 Na̱di̱giꞌñûn sòꞌ sa gatâ,
ni̱ Ma̱ꞌan Señor huin sa gi̱ꞌhiaj ni̱ ga̱ꞌhue ga̱ra̱n daꞌnga ruhuâꞌ daranꞌanj.
8 Ga̱na̱nun ruhuâ sòꞌ niꞌînꞌ Ma̱ꞌan Jesucristo,
dadinꞌ gahuin nej duguiꞌ David,
ni̱ gàꞌ ganaꞌnïn siganï̂nj nej nîman,
dàj rûnꞌ gananï̂n ni̱ gidigân nuguanꞌ gi̱ꞌhiaj ga̱na̱ni̱n nej guiì,
9 rayiꞌî dan ni̱ dàj rûnꞌ giranꞌ sí giꞌhiaj gakï̱nꞌïn giranꞌán ni̱ gatû dukuâ gaꞌa,
sani̱ si-nùguànꞌ Ma̱ꞌan Ñaꞌanj an ni̱ nitaj si nne ni̱nïnj mánj.
10 Rayiꞌî dan,
ni̱ ga nùkuaj ruhuâj giranꞌ sàñùnj rayiꞌî nej sôꞌ gàꞌ ganagui Ma̱ꞌan Ñaꞌanj an guendâ dagahuin nej sôꞌ,
ni̱ ga̱na̱huin ràꞌa nej sôꞌ Ma̱ꞌan sa gi̱ꞌhiaj ga̱na̱ni̱n nej sôꞌ ni̱ gìrìꞌ nej sôꞌ ñan ga̱ne nìgànj nej sôꞌ ngà Ma̱ꞌan Cristo Jesús ni̱ gi̱niꞌin nej guiì si hueꞌê giꞌhiaj nej sôꞌ.
11 Nuguanꞌ yàngàꞌa huin nânj:
Ni̱ si gàhuìꞌ ngà Ma̱ꞌan Jesús,
ni̱ huê danj na̱nj ga̱ne nìgùnꞌ ngà Ma̱ꞌan;
12 ni̱ si gi̱ranꞌ sañunꞌ,
ni̱ huê danj na̱nj gi̱nikaj sunꞌ ngà Ma̱ꞌan;
ni̱ si ga̱to̱ꞌ si nun niꞌînꞌ Ma̱ꞌan,
ni̱ huê danj na̱nj ga̱ta si nun niꞌin ñùnꞌ.
13 Ni̱ si huînꞌ si nitaj si dagahuin,
sani̱ Ma̱ꞌan Ñaꞌanj an ni̱ hueꞌê dagahuin sa gata;
ni̱ nitaj si nanikàj rùkuj ngà si-nùguànꞌanj mánj.
Sí giꞌhiaj sun hueꞌê ni̱ gininj hueꞌê sôꞌ riñan si-yi̱ruꞌhue sôꞌ
14 Du̱nanun sòꞌ nuguanꞌ nânj ruhuâ nej sij,
dadinꞌ gàꞌ niꞌin Ma̱ꞌan Señor si dunaꞌngaꞌ riñan nej sij,
ni̱ gataj sisi̱ si̱ garán riñan duguiꞌ nej sij ngà ahuin na̱nj nuguanꞌ dadinꞌ sê si̱ niꞌñan si gu̱nï̱nꞌ nej suj ngà nej sij,
dadinꞌ dànanj ga̱ꞌa̱nj ni̱ꞌhia̱ nej guiì gunïn si gunïnꞌ nej suj ngà nej sij na̱nj ánj.
15 Ûta hio du̱guꞌnïnꞌ sòꞌ ni̱ gi̱di̱gânꞌ ma̱ꞌânꞌ riñan Ma̱ꞌan Ñaꞌanj an si huînꞌ sí gàꞌ gananin,
ni̱ huînꞌ ꞌngo̱ sí ûta hueꞌê giꞌhiaj sun ni̱ nitaj sinàꞌaj a hua riñanꞌ,
dadinꞌ gidigân hueꞌêꞌ nuguanꞌ yàngàꞌa.
16 Niꞌhiaj ni̱ si̱ giꞌhiâꞌ dàj rûnꞌ giꞌhiaj nej guiì màn ruhuâ yumiguìi,
ni̱ si̱ gaꞌminꞌ nej nuguanꞌ gaꞌmin ninj dadinꞌ sê nuguanꞌ niꞌñanj an huin gaꞌmin ninj mánj,
dadinꞌ sa gi̱ꞌhia huin si gi̱nika ga̱ꞌan sòꞌ ni̱ daꞌ ñùn ni̱ daꞌ ñùn,
ni̱ si̱ guyumân ruhuâꞌ niꞌînꞌ Ma̱ꞌan Ñaꞌanj an gi̱ꞌhia mánj.
17 Ni̱ nuguanꞌ yìꞌì dânj ni̱ daꞌ ñùn,
ni̱ daꞌ ñùn ni̱ gàꞌhuìꞌ yiꞌîj sôꞌ dàj rûnꞌ giꞌhiaj yiꞌì giriꞌhiuj,
huê danj giꞌhiaj Himeneo ngà Fileto,
18 nga gahuin anêj nguèj sôꞌ riñan nuguanꞌ yàngàꞌa,
dadinꞌ gataj nej sôꞌ si gàꞌ ganaꞌnï̂nj nej nîman,
huê danj ni̱ gachej ruhuâ da̱ꞌa̱j nej guiì ngà nuguanꞌ guyumân ruhuâ ninj giꞌhiaj nej sôꞌ.
19 Sani̱ nuguanꞌ gidigân Ma̱ꞌan Ñaꞌanj an riñunꞌ ni̱ hua̱ ran man dàj rûnꞌ hua ran ñan taj yiꞌî ꞌngo̱ hueꞌe,
ni̱ guendâ dugumînꞌ muꞌûnꞌ riñan gakï̱nꞌïn ni̱ dânj huin ꞌngo̱ daꞌngaꞌ ni̱ko̱ꞌ giꞌhiaj Ma̱ꞌan Ñaꞌanj an:
“Rayiꞌî dan ni̱ gàꞌ niꞌin Ma̱ꞌan Ñaꞌanj an ahuin nej guiì huin daꞌnin”,
ni̱:
“Gu̱xu̱n daranꞌ nej guiì gaꞌmin àko ngà Ma̱ꞌan Cristo ma̱ꞌan ninj riñan nej sa kï̱j ï.”
20 Sani̱ ruhuâ ꞌngo̱ hueꞌ nìko,
ni̱ sê man ꞌngo̱ rïn agaꞌ oro ngà agaꞌ plata mân mánj,
màn chrun,
ni̱ màn rasu̱n huin hioꞌó bârru;
ni̱ hua̱ da̱ꞌa ni̱ ga̱ra̱n sunꞌ nga gùchìꞌ ꞌngo̱ sí ni̱ka̱j sun nìko ñan nneꞌ,
sani̱ hua̱ aꞌngô da̱ꞌa̱j nej rasu̱n dânj ni̱ garânj sunꞌ daranꞌ nej gui.
21 Huê danj ni̱,
si nagiꞌhiaj sòꞌ muꞌûnꞌ,
ni̱ gàꞌ hua yu̱guiꞌ guendâ ga̱ra̱n sun Ma̱ꞌan Señor ñùnꞌ riki si-sunj,
si hua̱ ruhuôꞌ gi̱ꞌhiôꞌ daranꞌ nej sa sàꞌa na̱nj ánj.
22 Gu̱xu̱nꞌ ma̱ꞌânꞌ riñan nej sa aꞌnanꞌ giꞌhiaj nej sí ña̱an,
ni̱ gi̱ꞌhiáꞌ sa ni̱ka̱a,
ni̱ gùyùmàn ruhuâ niꞌînꞌ Ma̱ꞌan Ñaꞌanj an,
ni̱ ga̱ ꞌì ruhuâꞌ,
ni̱ ga̱na̱ka̱j duguîꞌ ngà nej sí hua̱ dïnꞌïnj ruhuâ,
nej sí hua̱ sàꞌ ruhuâ nimân,
ni̱ ngà nej sí ganahuij ruhuâ gaꞌmin àko ngà Ma̱ꞌan Señor.
23 Sani̱ gi̱ꞌhiaj anêj sòꞌ ma̱ꞌanꞌ riñanꞌ sun unïnꞌïn,
dadinꞌ sê sa niꞌñanj an huin dadinꞌ huê danj giꞌhiaj nej sí nitaj si chru̱n ga̱ya̱ka̱j guendâ,
ni̱ sa gi̱ꞌhia huin si man si ga̱rán riñan duguiꞌ nej sôꞌ gi̱ꞌhia.
24 Dadinꞌ si-musû Ma̱ꞌan Señor ni̱ nun daꞌhui sôꞌ ga̱huin sôꞌ sí gu̱nï̱nꞌ ngà nej guiì mánj,
daꞌhui sôꞌ ga̱huin sôꞌ sí ga̱ ni̱ꞌña̱nj ruhuâ ngà daranꞌ nej guiì,
ni̱ huê danj na̱nj daꞌhui sôꞌ ga̱ yu̱gui sôꞌ guendâ gi̱di̱gân sôꞌ,
ni̱ ga̱ ruhuâ sôꞌ gi̱ranꞌ sa̱ñu̱n sôꞌ.
25 Ni̱ si ruhuâ sôꞌ na̱gi̱ꞌhiaj ni̱ka̱ sôꞌ nej sí naꞌhuej da̱gahuin ni̱ daꞌhui sôꞌ ga̱huin sôꞌ sí nìin,
si nàsìnùnj ga̱ra̱n yina Ma̱ꞌan Ñaꞌanj an ni̱ gi̱ꞌhia si nànìkàj ruhuâ sí dânj,
daꞌnga ni̱ gaꞌhue gi̱ni̱ꞌin sôꞌ nuguanꞌ yàngàꞌa,
26 ni̱ gu̱na̱nj nej sôꞌ riñan si-yi̱nu̱ sa nàsàꞌa,
dadinꞌ dàj rûnꞌ ranꞌ sí ꞌnïnj dukuâ gaꞌa huê danj ꞌnïnj ni̱nï̱nꞌ nej sôꞌ riñan sa nàsàꞌa,
ni̱ giꞌhiaj nej sôꞌ sa garanꞌ ruhuâ sa nàsàꞌà.