Ñanj kartâ nânj huin gachrûn Apóstol Pablo riñan
TITO
Gaꞌnḯn Pablo nuguanꞌ ni̱ꞌña̱nj an riñan Tito
1
Ñùnj huin Pablo,
ni̱ gaꞌnï̂n ñanj karta nan hua riñanꞌ huînꞌ Tito,
ni̱ ñùnj huin sí giꞌhiaj sun chré si-su̱n Ma̱ꞌan Ñaꞌanj an ni̱ huín sí gaꞌanj gidigân si̱nï̱n si-nùguànꞌ Ma̱ꞌan Señor Jesucristo,
ni̱ dàj rûnꞌ guyumân ruhuâ nej guiì gàꞌ hua̱ yu̱gui ni̱ dagahuin ninj ni̱ huin ninj daꞌní Ma̱ꞌan Ñaꞌanj an,
ni̱ garânj daꞌngaꞌ ruhuâ ninj niꞌin ninj nuguanꞌ yàngàꞌa ni̱ gunânj gi̱ꞌtsi ninj riñan si-su̱n Ma̱ꞌan Ñaꞌanj an,
2 ni̱ guyumân ruhuâ ninj si ga̱ne nìgànj ninj,
dadinꞌ huê danj gataj Ma̱ꞌan Ñaꞌanj an,
ni̱ nitaj si chru̱n Ma̱ꞌan gi̱di̱gañuꞌun,
ni̱ gàꞌ giꞌhiaj yu̱gui nuguanꞌ nânj àsìj nga giꞌhia yumiguìi,
3 hia̱j ni̱ gàꞌ gisîj diû ni̱ gaꞌnïnꞌ Ma̱ꞌan Ñaꞌanj an suun riñânj ni̱ duguta sunj ñùnj ni̱ ûta niꞌnï̱nj hua si-nùguànꞌanj ganatá riñan nej suj si huê Ma̱ꞌan huin sa gi̱ꞌhiaj ga̱na̱ni̱nꞌ,
4 ni̱ ñanj karta nânj gaꞌnï̂n huaj riñanꞌ huînꞌ Tito,
ni̱ dàj rûnꞌ huin daꞌní yàngàj huînꞌ dadinꞌ gu̱ña̱n guyumân ruhuâ nêꞌ:
Ni̱ Ma̱ꞌan Ñaꞌanj an huin Rej nêꞌ ni̱ huej huin Rej Ma̱ꞌan Señor Jesucristo,
ni̱ gi̱ꞌhia sunuj u,
ni̱ gu̱ru̱gûñuꞌun ni̱ gi̱ꞌhia si ga̱ dïnꞌïnj ruhuâꞌ.
Dàj daꞌhui ga̱ sí ga̱huin neꞌ ña̱an ni̱ sí ga̱huin si-obispo Ma̱ꞌan Ñaꞌanj an
5 Ni̱ rayiꞌî dan gudunâ sòꞌ riñan hioꞌó Creta,
guendâ na̱gi̱ꞌhiaj ni̱ka̱ꞌ nuguanꞌ gunâj nîꞌnï̀nj ni̱ ga̱chru̱n su̱nꞌ gàꞌì nej dinï̂nt ga̱nikïnꞌ neꞌ ña̱an,
riñan nej dinï̂nt nìkòꞌ rukû Ma̱ꞌan Jesús,
màn ruhuâ yumanꞌ snàꞌànj dânj,
ni̱ ruhuâj si gi̱ꞌhiáꞌ dàj rûnꞌ gatâ gu̱nïnꞌ.
6 ꞌNgo̱ sí gi̱nikaj su̱n riñan nej dinï̂nt daꞌhui ga̱huin sí gi̱ꞌhiaj sa ni̱ka̱a,
ni̱ daꞌhui sôꞌ ga̱ ꞌngo̱ rïn nika sôꞌ,
ni̱ ña̱ꞌa̱n huaj si gùyùmàn ruhuâ nej daꞌní sôꞌ niꞌin nej sôꞌ Ma̱ꞌan Ñaꞌanj an,
ni̱ si̱ ga̱huin nej sôꞌ sí ràyìꞌì ga̱ta̱j nej guiì si ûta ganahuij ruhuâ nej sôꞌ gi̱ꞌhiaj nej sôꞌ gakï̱nꞌïn,
ni̱ daꞌhui nej sôꞌ gùyùmàn ruhuâ nej sôꞌ sun gaꞌnïnꞌ rej nej sôꞌ riñan nej sôꞌ.
7 Dadinꞌ ña̱ꞌa̱n huaj si sí ni̱kï̱nꞌ ni̱ka̱j ñuꞌunj riñan nej dinï̂nt nìkòꞌ rukû Ma̱ꞌan Jesús,
ni̱ daꞌhui sôꞌ gi̱ꞌhiaj sôꞌ sa ni̱ka̱a,
dadinꞌ huin sôꞌ sí ni̱ka̱j ñuꞌunj riñan si-su̱n Ma̱ꞌan Ñaꞌanj an;
ni̱ si̱ ganï̂n ruhuâ sôꞌ si ûta huin sôꞌ,
ni̱ si̱ gahuin sôꞌ si sa huê chre dânj,
ni̱ si̱ gahuin sôꞌ sí goꞌo nne bino,
ni̱ si̱ ganahuij ruhuâ sôꞌ gu̱nï̱nꞌ sôꞌ,
ni̱ si̱ ganï̂n ruhuâ sôꞌ si ûta ga̱chri̱ duꞌhue sôꞌ nej rasu̱un guendâ gìrìꞌ sôꞌ nìko rasu̱un ga̱ riñan sôꞌ,
8 ga̱ ruhuâ sôꞌ gàꞌhuìꞌ sôꞌ ñan gùnàj nej guiì nitaj ñan gùnàj,
ni̱ daranꞌ diû ga̱ ruhuâ sôꞌ gi̱ꞌhiaj sôꞌ sa sàꞌa,
ni̱ daꞌngaꞌ hueꞌê ga̱ sa gi̱ꞌhiaj sôꞌ,
ni̱ gi̱ꞌhiaj sôꞌ sa ni̱ka̱a,
ni̱ du̱gumîn sôꞌ ma̱ꞌan sôꞌ riñan gakï̱nꞌïn,
ni̱ gi̱nikaj su̱n sôꞌ riñan ma̱ꞌan sôꞌ,
9 ni̱ ga̱ sìkàꞌ raa̱ sôꞌ ni̱ hueꞌê du̱gumîn sôꞌ dàj rûnꞌ gahuin chru̱n sôꞌ,
daꞌnga ni̱ gaꞌhue dunaꞌnga sôꞌ ni̱ hueꞌê gi̱di̱gan sôꞌ ni̱ gùnùkuaj sôꞌ na̱du̱na̱ sa ganï̂n ruhuâ aꞌngô nej sí naꞌhuej ga̱ra̱n yina.
10 Dadinꞌ ûta man nej sí nitaj si guyumân ruhuâ,
ni̱ taj nej sôꞌ si ûta huin nej sôꞌ ni̱ ûta chru̱n nej sôꞌ gi̱di̱gañuꞌunj nej sôꞌ,
nej sí giꞌhiaj dànanj huin nej sí yuman ruhuâ si ña̱ꞌa̱n huaj si gàꞌnèꞌ nej síi nnïnj garán raa̱ nne nàꞌàj nej síi,
11 nej sí giꞌhiaj dànanj ni̱ ña̱ꞌa̱n huaj si si̱ gaꞌnï̂nꞌ ga̱ꞌmi̱n nej sij;
dadinꞌ giꞌhiaj nej sij si ga̱che̱j ruhuâ nej guiì màn ruhuâ ꞌngo̱ hueꞌe,
ni̱ dugu̱ꞌna gidigân nej sij guendâ ruhuâ nej sij gi̱ꞌhiaj ga̱nan chre nej sij sanꞌanj an.
12 ꞌNgo̱ si-profeta nej sij gataj:
“Ni̱ nej guiì màn yumanꞌ Creta ni̱ huin ninj guiì gidigañuꞌunj,
ni̱ dàj rûnꞌ huin nej yuku kï̱j huaa huin ninj,
ûta kï̱j ya ninj,
ni̱ huin ninj guiì rùmìn chre.”
13 Nuguanꞌ ganatá ni̱ huin nuguanꞌ yàngàꞌa:
Rayiꞌî dan ni̱ nùkuaj du̱gunïn gàꞌìꞌ nej sij,
daꞌnga ni̱ ganahuin nìkà nej sij ni̱ gùyùmàn yìtï̀nj ruhuâ nej sij niꞌin nej sij Ma̱ꞌan Ñaꞌanj an,
14 daꞌnga ni̱ si̱ garânj yina nej sij nej guentû giri rà nej sí judío,
ni̱ huê danj na̱nj si̱ garânj yina nej sij nej nuguanꞌ giri rà nej sí guxun ma̱ꞌan riñan nuguanꞌ yàngàꞌa.
15 Daranꞌ nej guiì dagahuin yàngàꞌ riñan Ma̱ꞌan Jesús,
ni̱ guyumân ruhuâ ninj si daranꞌanj huin sa sàꞌa,
sani̱ nej guiì kï̱j huaa ni̱ nej guiì naꞌhuej gùyùmàn ruhuâ ni̱ ganï̂n ruhuâ ninj si daranꞌanj huin sa aꞌnanꞌan;
nda daꞌngaꞌ ninj ngà daꞌngaꞌ nu̱n ruhuâ nimân ninj ganahuin kï̱j.
16 Gataj ninj si niꞌin ninj Ma̱ꞌan Ñaꞌanj an,
sani̱ ngà nej sa giꞌhiaj ninj ni̱ gidigân ninj si nitaj si niꞌin ninj Ma̱ꞌan Ñaꞌanj an,
dadinꞌ huin ninj guiì nitaj si guyumân ruhuâ ni̱ rayiꞌî dan ni̱ nitaj si gininj hueꞌê hia ninj riñan Ma̱ꞌan Ñaꞌanj an,
ni̱ gaꞌanj ni̱ꞌhia ninj ni̱ nitaj si niꞌñanj ninj gi̱ꞌhiaj ninj sa sàꞌa mánj.