Gànàtàꞌ si-nùguànꞌ Ma̱ꞌan Ñaꞌanj an
4
Ma̱ꞌan Ñaꞌanj an ngà Ma̱ꞌan Señor Jesucristo huin sa niꞌin si duguta sùnj sôꞌ si-sunj,
dadinꞌ huej huin sa ga̱na̱ka̱j guendâ dàj giꞌhiaj nej guiì hua̱ nìꞌnàꞌa ngà nej guiì gàꞌ gahuiꞌi,
nga ga̱ꞌna̱ꞌ gi̱ni̱kaj sunj.
2 Rayiꞌî dan ni̱ gachín nìꞌhia riñanꞌ si ña̱ꞌa̱n huaj si gànàtàꞌ si-nùguànꞌ Ma̱ꞌan Ñaꞌanj an riñan nej guiì;
ngà hua diû ni̱ nga hua nìn ni̱ huê danj na̱nj gànàtàꞌ nga nitaj diû hua ni̱ nga nitaj si hua̱ nìn;
ni̱ du̱naꞌhuej rayiꞌî si-nùguànꞌ Ma̱ꞌan Ñaꞌanj an,
ni̱ dugunïn gàꞌì ni̱ ga̱ nùkuaj ruhuâꞌ ni̱ du̱naꞌngaꞌ ni̱ gi̱di̱gânꞌ nej yìꞌnï̀nꞌ si-nùguànꞌ Ma̱ꞌan Ñaꞌanj an riñan nej guiì.
3 Dadinꞌ gùyùmàn diû ni̱ si̱ garanꞌ ruhuâ nej guiì gu̱nïn ninj nuguanꞌ yàngàꞌ gidigân Ma̱ꞌan Jesucristo;
sa gi̱ꞌhiaj ninj huin si ûta ga̱huin ruhuâ ninj nànàꞌhuìꞌ ninj nej sí maestrû gi̱di̱gân nuguanꞌ ninaj doj,
daꞌnga ni̱ gaꞌhue gi̱ꞌhiaj ninj ahuin na̱nj gakï̱nꞌ garanꞌ ruhuâ nneè kú ninj.
4 Ni̱ gu̱xu̱n ninj ma̱ꞌan ninj ñan gidigân nej sôꞌ nuguanꞌ yàngàꞌ gidigân Ma̱ꞌan Jesucristo,
ni̱ dànanj ga̱ranꞌ ruhuâ ninj gu̱nïn ninj si-guèntù nej síi.
5 Sani̱ daꞌngaꞌ hueꞌê gè gi̱ꞌhiâ sòꞌ daranꞌanj,
ni̱ ga̱ nùkuaj ruhuâꞌ ngà nej sañun gùyùmàn riñanꞌ,
ni̱ du̱guꞌnïnꞌ ni̱ ga̱na̱nï̱nꞌ nuguanꞌ gi̱ꞌhiaj ga̱na̱ni̱n nej guiì,
ni̱ da̱gahuînꞌ sun chru̱nꞌ gi̱ꞌhiáꞌ.
6 Dadinꞌ ñùnj ni̱ doj huaj gàhuìj ni̱ ga̱huín dàj rûnꞌ huin ꞌngo̱ ofrenda riñan Ma̱ꞌan Ñaꞌanj an,
diû gàꞌàn ni̱ gàꞌ gahuin ni̱chrunj.
7 Gàꞌ gunukuâ giꞌhiaj ga̱nânj,
dàj rûnꞌ giꞌhiaj nej stâdu nga gunùkuaj nej sôꞌ giꞌhiaj ga̱nan nej sôꞌ,
riñan nej sí gutaꞌ ngà nej sôꞌ,
ni̱ gàꞌ giꞌhiaj ga̱nanj guyumânj ñan daꞌhuí gùyùmànj,
ni̱ dugumîn hueꞌé nuguanꞌ ganahuin raꞌá giꞌhiaj Ma̱ꞌan Ñaꞌanj an.
8 Huê danj na̱nj gàꞌ hua yu̱gui,
ꞌngo̱ korona nìhiàꞌ huaa na̱ri̱ki̱ Ma̱ꞌan Señor gi̱nun ahuí,
guendâ giꞌhiâ sa ni̱ka̱ garanꞌ ruhuaj,
dadinꞌ huej huin guesì giꞌhiaj sa ni̱ka̱ nï̀nꞌïn,
ni̱ nga gùyùmàn gui dânj,
ni̱ sê riñan ꞌngo̱ rḯn na̱ri̱kij korona dânj mánj,
huê danj na̱nj nàgàꞌhuij riñan daranꞌ nej guiì ꞌì ruhuâ yàngàꞌ hia niꞌin ninj Ma̱ꞌan,
ni̱ nne ninj ganaꞌhuìj ninj gui nànìkàj ñûn Ma̱ꞌan ga̱ꞌnaj.
Gaꞌnïnꞌ su̱n dàj gi̱ꞌhiaj daꞌ goꞌngo̱ nej guiì
9 Du̱guꞌnïnꞌ sòꞌ ga̱ꞌna̱ꞌ gi̱niꞌhiaj rânꞌñanj ñùnj,
10 dadinꞌ gudunâj Demas ñùnj,
ni̱ gahuin ꞌì ruhuâ sôꞌ niꞌin sôꞌ nej sa màn ruhuâ yumiguì nânj,
ni̱ gaꞌanj sôꞌ ruhuâ yumanꞌ snàꞌànj Tesalónica,
ni̱ Crecente gaꞌanj riñan yumanꞌ snàꞌànj Galacia,
ni̱ Tito gaꞌanj Dalmacia.
11 Man aꞌngô rïn Lucas gunâj nne ngàj.
Ni̱ nga ga̱ꞌna̱ꞌ ni̱ gi̱ni̱kaj Marcos ga̱ꞌna̱ꞌ sij ngàꞌ,
dadinꞌ gi̱niꞌñan si gu̱na̱nj gi̱tsi sij riñan si-su̱n Ma̱ꞌan Ñaꞌanj an.
12 Ni̱ Tíkiko gaꞌnï̂n gaꞌanj yumanꞌ snàꞌànj Efeso.
13 Nga ga̱ꞌna̱ꞌ ni̱ gi̱ni̱kajꞌ atsîj garán ma̱ꞌán nga amanꞌ,
dadinꞌ guna giꞌhiâ dukuâ Karpos sôꞌ nne ruhuâ yumanꞌ Troas,
giꞌhia ni̱ huê danj na̱nj gi̱nikajꞌ nej librû ga̱ꞌna̱ꞌ sani̱ ña̱ꞌa̱n doj huaj si gi̱nikaj nej nnïnj nnùn letra gùꞌnàj pergamino ga̱ꞌna̱ꞌ raj.
14 Alejandro sí ganachrâj agaꞌa,
ûta giꞌhiaj yìꞌì ñùnj;
sani̱ Ma̱ꞌan Señor huin sa gi̱ꞌhiaj kastîgu sij rayiꞌî sa giꞌhiaj sij ngàj.
15 Ga̱ gu̱dadûꞌ ngà sij,
dadinꞌ ûta gata rùhuà sij nêꞌ rayiꞌî nuguanꞌ gidigûnꞌ riñan nej guiì.
16 Nga dunaꞌhuê rayiꞌí riñan nej sí ni̱ka̱j suun,
ni̱ gàꞌ si ꞌngo̱ nej dinï̂nt nun gu̱ru̱gûñuꞌunj rukú,
dadinꞌ gudunâj daranꞌ nej sij ñùnj ni̱ gaꞌanj nej sij,
ni̱ gànàꞌhuì sisi̱ si̱ gayakaj guendâ Ma̱ꞌan Ñaꞌanj an sa giꞌhiaj nej sij ngàj.
17 Sani̱ nun gu̱du̱nâj ꞌngo̱ rïn Ma̱ꞌan Señor ñùnj,
dadinꞌ rikij si-guesaj riñânj,
ni̱ rayiꞌî dan ni̱ ganatá riñan daranꞌ nej guiì nàsìnùnj un nuguanꞌ gi̱ꞌhiaj ga̱na̱ni̱n ninj.
Ni̱ giꞌhiaj Ma̱ꞌan Señor gananînj riñan nej sí hu̱e,
dàj rûnꞌ gananin ꞌngo̱ síi nga nun ya̱ sigeꞌej sôꞌ.
18 Ni̱ Ma̱ꞌan Señor huin sa du̱nanin ñùnj riñan daranꞌ nej sa aꞌnanꞌan,
nga nï̂nꞌ gané riñan hioꞌó nânj nda gùyùmàn gui gi̱nika ga̱ꞌan ñùnj ñan nne Ma̱ꞌan.
Ni̱ huê Ma̱ꞌan huin sa nìko nìgànj nï̀nꞌ.
Ni̱ huê danj huin rûꞌhuaj na̱nj ánj.
Gaꞌhuiꞌ Timoteo nuguanꞌ ni̱ꞌñanj an riñan nej dinï̂nt
19 Gi̱nikaj sòꞌ nuguanꞌ niꞌñanj an nàgàꞌhuìꞌ riñan Prisca ngà riñan Aquila,
ni̱ huê danj na̱nj nàgàꞌhuìꞌ nuguanꞌ niꞌñanj an riñan nej dùguìꞌ Onesíforo.
20 Ni̱ Erasto gunâj yumanꞌ snàꞌànj Corinto,
ni̱ Trófimo gudunâ yumanꞌ Mileto dadinꞌ si̱ aꞌnanꞌ sôꞌ.
21 Du̱guꞌnïnꞌ sòꞌ ni̱ gaꞌnaꞌ nga nï̀nꞌ ga̱chin gùyùmàn diû gahiu ꞌhueꞌe,
ni̱ huê danj na̱nj gaꞌnḯn Eubulo,
Pudente,
Lino,
Claudia,
ni̱ daranꞌ nej dinï̂nt nuguanꞌ ni̱ꞌñanj an huaj riñanꞌ.
22 Ni̱ Ma̱ꞌan Señor ga̱ne ngà nanè nimânt,
ni̱ si-su̱nu̱j Ma̱ꞌan ga̱ne ngà nej suj.
Ni̱ huê danj huin rûꞌhuaj.