Dàj gi̱ꞌhiaj nej sí gimàn diû neꞌ ñaan
3
Huê danj na̱nj daꞌhuîꞌ gi̱ni̱ꞌînꞌ nej nânj:
Si nej gui ꞌna̱ꞌ neꞌ ña̱an ni̱ gùyùmàn diû ûta ha̱i̱ hua.
2 Dadinꞌ gimàn sí ga̱ ꞌì ruhuâ niꞌin ma̱ꞌan,
sí gàhuin staꞌu ruhuâ guendâ gaj doj riñan,
sí ûta nne̱,
sí ûta huin doj ruhuâ,
sí gaꞌmin kï̱j staꞌu,
sí nitaj si dagahuin sa gataj rej,
sí nitaj si chru̱n nàgàꞌhuìꞌ si guruhuâ rayiꞌî sa ganahuin ra̱ꞌa,
sí nitaj si guyumân ruhuâ niꞌin Ma̱ꞌan Ñaꞌanj an,
3 sí nitaj si ꞌì ruhuâ niꞌin nej duguiꞌ,
sí si̱ ginikaj nimân nìko,
sí ganachinikaj nuguanꞌ digaꞌñuꞌunj un,
sí ûta hue,
sí ûta ga̱ninï̀nꞌ hua,
sí nitaj si gi̱ni̱nj hueꞌê sa sàꞌa riñan,
4 Sí nàgàꞌhuìꞌ duguiꞌ,
sí nitaj si ganakaj guendâ dàj ga̱ꞌmi̱n,
sí nitaj si hua̱ niꞌñanj sa giꞌhiaj,
sí ꞌì ruhuâ ni̱ garanꞌ ruhuâ niꞌin doj nej sa màn ruhuâ yumiguì nânj gàꞌ daꞌ Ma̱ꞌan Ñaꞌanj an,
5 gimàn nej sí man si gi̱ꞌhiaj si gunânj gi̱tsi riñan si-su̱n Ma̱ꞌan Ñaꞌanj an,
sani̱ ngà sa giꞌhiaj nej sij ni̱ gi̱di̱gân nej sij si nitaj si guyumân ruhuâ nej sij niꞌin nej sij Ma̱ꞌan Ñaꞌanj an.
Ni̱ ga̱ gudadûꞌ ngà nej sí giꞌhiaj dànanj.
6 Dadinꞌ nej sí giꞌhiaj dànanj huin sa gatûj ruhuâ dukuâ nej siyànà,
nitaj si ni̱kï̱nꞌ ran riñan si-nùguànꞌ Ma̱ꞌan Ñaꞌanj an,
dadinꞌ ûta nìhiàꞌ ruhuâ ninj gi̱ꞌhiaj ninj ahuin na̱nj gakï̱nꞌ garanꞌ ruhuâ nné kú ninj.
7 Ni̱ ûta huin ruhuâ ninj ga̱huin chru̱n ninj doj,
sani̱ nitaj àmàn gahuin chru̱n ninj nuguanꞌ yàngàꞌa mánj.
8 Ni̱ huê dàj rûnꞌ giꞌhiaj Janes ngà Jambres nga nun ga̱ꞌhue̱j nguèj sôꞌ gi̱daꞌa nguèj sôꞌ si-nùguànꞌ Moisés,
huê danj na̱nj giꞌhiaj nej sij ni̱ nun ga̱ꞌhuej nej sij ga̱na̱huin ràꞌa nej sij nuguanꞌ yàngàꞌa;
ni̱ dagahuin nej sij riñan gakï̱nꞌïn ni̱ rayiꞌî dan ni̱ naꞌhue ga̱ra̱n daꞌngaꞌ ruhuâ nej sij,
ni̱ nitaj si niꞌñanj nej sij gi̱ꞌhiaj nej sij sa sàꞌa,
dadinꞌ nitaj si guyumân ruhuâ nej sij niꞌin nej sij Ma̱ꞌan Ñaꞌanj an mánj.
9 Sani̱ si̱ gaꞌhue ga̱ꞌa̱nj nej sij doj neꞌ ña̱an;
dadinꞌ guruguiꞌ si nitaj si niꞌñanj sa giꞌhiaj nej sij ni̱ gi̱ni̱ꞌin daranꞌ nej guiì,
dàj rûnꞌ giranꞌ nguèj sí nun ga̱ꞌhue̱j dagahuin riñan Moisés.
Aꞌngô rïn nuguanꞌ duguta su̱n Pablo Timoteo
10 Sani̱ sòꞌ ni̱ dugumînꞌ nej yìꞌnï̀nꞌ nuguanꞌ gidigán,
ni̱ gàꞌ niꞌînꞌ dàj hueꞌê giꞌhia,
ni̱ dàj ganï̂n ruhuâj gi̱ꞌhia,
dàj guyumân ruhuâj gi̱ꞌhia,
dàj nìchràj ruhuâj,
dàj ꞌì ruhuâj,
dàj nùkuaj ruhuâj,
11 dàj nikòꞌ nej sij gi̱daꞌa nej sij ñùnj,
ni̱ dàj giranꞌ sàñùnj,
ngà gané Antioquía,
Iconio,
Listra,
guendâ hia ni̱ ûta nikòꞌ nej sij gi̱daꞌa nej sij ñùnj ni̱ ûta giranꞌ sàñùnj,
sani̱ dunanin Ma̱ꞌan Señor ñùnj riñan daranꞌ nej sañun nânj na̱nj ánj:
12 Ni̱ huê danj na̱nj daranꞌ nej sí ruhuâ da̱gahuin riñan Ma̱ꞌan Cristo,
ni̱ naꞌhuej ruhuâ nej sôꞌ gi̱ꞌhiaj nej sôꞌ gakï̱nꞌïn ni̱ hua̱ ni̱ña̱n si ga̱ta̱ ra̱ꞌa nej sij nej sôꞌ;
13 sani̱ nej sí ga̱ninï̀nꞌ huaa ngà nej sí gidigañuꞌunj ni̱ dànanj nìko gùyùmàn sa aꞌnanꞌan riñan nej sôꞌ;
ni̱ gi̱di̱gañuꞌunj nej sôꞌ aꞌngô nej guiì sani̱ huê danj na̱nj gi̱di̱gañuꞌunj aꞌngô nej guiì nej sôꞌ na̱nj ánj.
14 Sani̱ ga̱ nìchràj ruhuâ sòꞌ ngà nuguanꞌ yàngàꞌ gahuin chru̱nꞌ,
ni̱ gùyùmàn yìtï̀nj ruhuâꞌ,
dadinꞌ gàꞌ niꞌînꞌ ahuin sa gidigân sòꞌ;
15 ni̱ si àsìj hua liꞌ giniꞌînꞌ si-nùguànꞌ Ma̱ꞌan Ñaꞌanj an,
ni̱ huej huin sa gi̱di̱gân sòꞌ ni̱ gi̱ꞌhia ga̱na̱ni̱nꞌ si gùyùmàn ruhuâꞌ niꞌînꞌ Ma̱ꞌan Cristo Jesús.
16 Daranꞌ nuguanꞌ nnùn riñan ñanj si-nùguànꞌ Ñaꞌanj an huin nuguanꞌ gataj Ma̱ꞌan Ñaꞌanj an,
ni̱ niꞌñan guendâ gi̱di̱gûnꞌ nej guiì,
ni̱ ga̱ra̱n sunꞌ man nga du̱naꞌhueꞌ rayiꞌij,
ga̱ra̱n sunꞌ man nga na̱gi̱ꞌhiaj ni̱ko̱ꞌ sa aꞌnanꞌ giꞌhiaj nej guiì,
ni̱ niꞌñanj man ga̱ra̱nꞌ sunꞌ guendâ gi̱ꞌhiaj yu̱guîꞌ nej guiì,
dàj daꞌhui ninj gi̱ꞌhiaj ninj sa ni̱ka̱a,
17 daꞌnga ni̱ ga̱na̱huin ni̱ka̱ nï̀nꞌ nej sí huin daꞌní Ma̱ꞌan Ñaꞌanj an,
ni̱ ga̱ yu̱gui nej sij guendâ gi̱ꞌhiaj nej sij daranꞌ sa hueꞌê.