Ñanj kartâ nânj huin gachrûn Apóstol Pablo riñan
FILEMÓN
Gaꞌnḯn Pablo nuguanꞌ ni̱ꞌña̱nj an riñan Filemón
1
Ñùnj huin Pablo,
ni̱ ꞌnï̀n dukuâ gaꞌa rayiꞌî Ma̱ꞌan Cristo,
ni̱ gaꞌnḯn nguèj ñûnj,
Timoteo ñanj karta nan hua riñan sòꞌ huînꞌ Filemón sí giꞌhiaj sun nùguànꞌàn ngà nguèj ñûnj ni̱ ꞌì ruhuâ nguèj ñûnj niꞌin nguèj ñûnj sòꞌ,
2 ni̱ huê danj na̱nj gaꞌnḯn nguèj ñûnj nuguanꞌ ni̱ꞌñanj an hua riñan nej dinï̂nt nìkòꞌ rukû Ma̱ꞌan Cristo màn dukuât,
ni̱ huê danj na̱nj gaꞌnḯn nguèj ñûnj nuguanꞌ niꞌñanj an hua riñan yuguet Apia ngà dinï̂nt Arquipo,
sôꞌ ganahuij ruhuâ giꞌhiaj sun nùguànꞌàn ngà nej ñûnj:
3 Ni̱ si-su̱nu̱j ni̱ sa hua̱ dïnꞌïnj ruhuâ Ma̱ꞌan Reꞌ Ñaꞌanj an ngà Ma̱ꞌan Señor Jesucristo ga̱na̱huin ràꞌa nej suj.
Guyumân ruhuâ Filemón ni̱ ꞌì ruhuâ sôꞌ
4 Gaꞌhuí si guruhuâ Ma̱ꞌan Ñaꞌanj an,
ni̱ nga gaꞌmînj ngà Ma̱ꞌan ni̱ daranꞌ diû gananun ruhuâj niꞌín sòꞌ,
5 dadinꞌ gunḯn si ꞌì ruhuâꞌ ni̱ guyumân ruhuâꞌ niꞌînꞌ Ma̱ꞌan Señor Jesús,
ni̱ huê danj na̱nj giꞌhiâꞌ ngà daranꞌ nej sôꞌ dugumîn ma̱ꞌan riñan gakï̱nꞌïn;
6 ni̱ si guyumân ruhuâꞌ ni̱ ûta hueꞌê ga̱ꞌhue giꞌhiaj sun nùgùnꞌùnꞌ dadinꞌ niꞌînꞌ gi̱ꞌhiaj sun hueꞌêꞌ si-su̱n Ma̱ꞌan Cristo Jesús.
7 Ûta nìhiàꞌ hua ruhuâ nej ñûnj ni̱ ganariꞌ ruhuâ nej ñûnj niꞌin nej ñûnj sòꞌ di̱nï̂nj,
dadinꞌ gunïn nej ñûnj si ꞌì ruhuâꞌ niꞌînꞌ nej dinï̂nt,
ni̱ na̱gi̱ꞌhiaj ranꞌ nimân nej sôꞌ dugumîn ma̱ꞌan riñan gakï̱nꞌïn.
Gachín ni̱ꞌhiaj Pablo rayiꞌî Onésimo
8 Huê danj ni̱,
ga̱ꞌhue si ngà siyu̱gui Ma̱ꞌan Cristo ni̱ ga̱ꞌhue gàꞌnï̀nj suun riñanꞌ,
dàj rûnꞌ garanꞌ ruhuâj gi̱ꞌhiâꞌ,
9 sani̱ ꞌì ruhuâj niꞌín sòꞌ ni̱ rayiꞌî dan ni̱ gachín nìꞌhia riñanꞌ,
dadinꞌ gàꞌ achî,
ni̱ huê danj na̱nj ꞌnï̀n dukuâ gaꞌa rayiꞌî Ma̱ꞌan Jesucristo;
10 ni̱ gachín nìꞌhia riñanꞌ rayiꞌî daꞌní Onésimo,
dadinꞌ ruhuâ dukuâ gaꞌa huin gaꞌmînj si-nùguànꞌ Ma̱ꞌan Ñaꞌanj an riñan sôꞌ.
11 Aꞌngô diû ni̱ gahuin sij sí nitaj si niꞌñanj riñanꞌ,
sani̱ hia̱j ni̱ gu̱ña̱n niꞌñanj sij riñan nguèj nêꞌ,
12 ni̱ gaꞌnḯn ñûn huaj sij riñanꞌ;
ni̱ ga̱na̱huin ra̱ꞌâꞌ sij,
ni̱ ga̱huin ruhuâꞌ si ñùnj ganahuin ra̱ꞌâꞌ.
13 Ruhuâj si ga̱ne sij doj ngàj,
dadinꞌ nné dukuâ gaꞌa rayiꞌî nuguanꞌ gi̱ꞌhiaj ga̱na̱ni̱n nej guiì,
ni̱ gu̱na̱nj gi̱tsi sij riñânj dàj rûnꞌ gunânj gi̱tsîꞌ riñânj;
14 sani̱ ñan nun ri̱ki̱ꞌ si-nùguànꞌ si ga̱ne sij doj ngàj,
ni̱ rayiꞌî dan ni̱ nun gi̱ꞌhia sa garanꞌ ruhuâj mánj.
Daꞌnga ni̱ sunuj gi̱ꞌhiâꞌ ni̱ si̱ gahuin sa gi̱ꞌhiâꞌ nda guesâ chre dadinꞌ sa ña̱ꞌa̱n huin si ga̱ ruhuâ si ga̱ne sij doj ngàj.
15 Dadinꞌ si gu̱ru̱huaj ni̱ huê rayiꞌî nan huin dan gahuin anêj sij doj riñanꞌ ꞌngo̱ diû,
sani̱ gùyùmàn ꞌngo̱ gui ni̱ ga̱ne nìgànj sij ngàꞌ na̱nj ánj;
16 sani̱ si̱ gahuin sij ꞌngo̱ sí giꞌnïnj gi̱ꞌhiaj sun chre riñanꞌ gàꞌ mánj,
ga̱na̱huin ra̱ꞌaꞌ sòꞌ sij dàj rûnꞌ ganahuin ro̱ꞌôꞌ ꞌngo̱ dinï̂nt ꞌì ruhuôꞌ,
dadinꞌ ñùnj ni̱ ûta ꞌì ruhuâj niꞌín sij,
sani̱ sòꞌ ni̱ daꞌhuîꞌ ûta nìko doj ga̱ ꞌì ruhuâꞌ niꞌînꞌ sij,
sani̱ sê man dàj rûnꞌ ꞌì ruhuâꞌ niꞌînꞌ ꞌngo̱ guiì ga̱ ꞌì ruhuâꞌ niꞌînꞌ sij mánj,
gà ꞌì ruhuâ sôꞌ niꞌînꞌ sij dàj rûnꞌ ꞌì ruhuâꞌ niꞌînꞌ nej dinï̂nt ni̱ka̱j duguiꞌ ngà Ma̱ꞌan Señor.
17 Huê danj ni̱ si huínꞌ sí ni̱ka̱j duguiꞌ ngàj,
ni̱ ga̱na̱huin ra̱ꞌâ sòꞌ sij dàj rûnꞌ ganahuin ra̱ꞌâꞌ ñùnj.
18 Ni̱ si hua̱ ꞌngo̱ sa yìꞌì giꞌhiaj sij ngàꞌ,
nej si hua̱ sa daꞌhui sij riñanꞌ,
ni̱ ga̱ꞌmi̱n gakï̱nꞌ sòꞌ riñânj ni̱ ga̱ꞌhue na̱ru̱ꞌhuej sa daꞌhui sij riñanꞌ.
19 Ñùnj huin Pablo ni̱ ngà raꞌá gachrûnj nej nuguanꞌ nânj huaj riñanꞌ,
ni̱ hua̱ ruhuâj na̱ruꞌhuêj daranꞌ sa daꞌhui sij riñanꞌ,
sani̱ yàngàꞌ hia ni̱ nitaj si huaj ga̱ꞌne̱ꞌ gàꞌ si doj sînj sa daꞌhuí riñanꞌ dadinꞌ ñùnj ganataꞌ ni̱ rayiꞌî dan ni̱ giniꞌînꞌ si-nùguànꞌ Ma̱ꞌan Ñaꞌanj an.
20 Huê danj huaj na̱nj di̱nï̂nj,
sani̱ ruhuâj si gi̱ꞌhiâ sòꞌ sunuj nânj sani̱ sê riñânj huin sa gi̱ꞌhiáꞌ mánj,
ni̱ si ꞌì ruhuâꞌ niꞌînꞌ Ma̱ꞌan Señor ni̱ huê riñanj huin sa gi̱ꞌhiáꞌ sunuj nânj,
ni̱ ruhuâj si gi̱ꞌhiá sòꞌ si ga̱na̱huin nùkuaj nimânj na̱nj di̱nï̂nj.
21 Gachrûnj dànanj riñanꞌ ni̱ niꞌín si da̱gahuînꞌ nuguanꞌ gatâ gu̱nïnꞌ,
ni̱ niꞌín si dànanj nìko doj da̱gahuînꞌ gàꞌ daꞌ sa gachîn riñanꞌ.
22 Aꞌngô sa ruhuâj gàchin riñanꞌ huin si gi̱ꞌhiáꞌ sòꞌ sunuj u,
ni̱ gi̱ꞌhiaj yu̱guîꞌ ñan gu̱na̱ dadinꞌ si gachín niꞌhiaj nej suj rayiꞌí riñan Ma̱ꞌan Ñaꞌanj an ni̱ ga̱ꞌhue ni̱ ri̱ki̱ Ma̱ꞌan permisu ni̱ gùchìj ñan màn nej suj.
Duguta su̱n sij si nàgàꞌhuìꞌ nej sôꞌ nuguanꞌ ni̱ꞌñanj an riñan nej dinï̂nt
23 Ni̱ gaꞌnḯn Epafras nuguanꞌ niꞌñanj an huaj riñanꞌ,
ni̱ nne nguèj ñûnj dukuâ gaꞌa,
rayiꞌî Ma̱ꞌan Cristo Jesús,
24 Ni̱ nej sôꞌ huin sa giꞌhiaj sun nùguànꞌàn ngàj ni̱ gaꞌnḯn nej sôꞌ nuguanꞌ ni̱ꞌña̱nj an hua riñan nej suj,
ni̱ huê danj na̱nj gaꞌnḯn Marcos,
Aristarco,
Demas,
ngà Lucas nuguanꞌ ni̱ꞌña̱nj an huaj riñan nej suj.
25 Ni̱ si-su̱nu̱j Ma̱ꞌan Señor Jesucristo ga̱ne ngà nanè nimân nej suj.
Ni̱ huê danj huin rûꞌhuaj na̱nj ánj.