Si-su̱nu̱j Ma̱ꞌan Ñaꞌanj an giꞌhiaj ni̱ ginikaj Ma̱ꞌan nimân nìko rayiꞌîꞌ
3
Du̱nanun sòꞌ ruhuâ nej sij si ña̱ꞌa̱n huaj si da̱gahuin nej sij riñan nej sí ni̱ka̱j sun nìko,
ngà riñan nej sí ni̱ka̱j su̱n riñan yumanꞌan,
ni̱ ga̱ ruhuâ nej sij gi̱ꞌhiaj nej sij daranꞌ sa sàꞌaj.
2 Si̱ gutaꞌ chre nej sij gakï̱nꞌïn yichrá aꞌngô nej guiì,
ni̱ si̱ ganahuij ruhuâ nej sij gu̱nï̱nꞌ nej sij,
ni̱ sàꞌ ga̱ ruhuâ nej sij,
ni̱ gidigân nej sij si huin nej sij sí ûta nìn giꞌhiaj ngà daranꞌ nej guiì.
3 Dadinꞌ huê danj na̱nj nej ñûnj ni̱ aꞌngô diû ni̱ gahuin nej ñûnj sí ûta hio giniꞌñûn,
ni̱ nitaj si guyumân ruhuâ nej ñûnj,
ni̱ gudunâ nej ñûnj chrej gaꞌanj nej ñûnj,
ni̱ gahuin nej ñûnj si dagahuin riñan sa garanꞌ ruhuâ nneè kú,
ni̱ ûta gahuin ruhuâ nej ñûnj gi̱ꞌhiaj nej ñûnj ahuin na̱nj gakï̱nꞌ,
gahuin nej ñûnj sí yìꞌì chre,
ni̱ gahuin yìkòj ruhuâ nej ñûnj,
ni̱ nun gi̱ni̱nj hueꞌê hia nej ñûnj riñan nej guiì,
ni̱ huê danj na̱nj nun gi̱ni̱nj hueꞌê ꞌngo̱ ni̱ aꞌngô nej duguiꞌ nej ñûnj riñan nej ñûnj.
4 Sani̱ hia̱j ni̱ ûta nîꞌnï̀nj guruguiꞌ si guruguñuꞌunj Ma̱ꞌan Ñaꞌanj an ni̱ giꞌhiaj si ga̱na̱ni̱nꞌ nêꞌ,
ni̱ huê danj na̱nj ga ꞌì ruhuaj niꞌin nej guiì màn ruhuâ yumiguìi,
5 giꞌhia gananinꞌ,
sani̱ sê rayiꞌî nej sun ni̱ka̱ giꞌhiôꞌ huin mánj,
gananinꞌ rayiꞌî guendâ guruguñuꞌun ñùnꞌ dadinꞌ gàꞌ ganahuin hueꞌê nimûnꞌ,
ni̱ ganahuin nàkòꞌ giꞌhiaj Ma̱ꞌan Espíritu Santo,
6 ni̱ Ma̱ꞌan Jesucristo huin sa giꞌhiaj gananinꞌ ni̱ rikij ûta nìko Ma̱ꞌan Espíritu Santo riñunꞌ,
7 ni̱ si-su̱nu̱j Ma̱ꞌan Jesucristo giꞌhiaj ni̱ nitaj gakï̱nꞌïn tá yichrôꞌ rayiꞌî dan ni̱ ga̱ꞌhue ga̱na̱huin ro̱ꞌôꞌ naniꞌhiôꞌ ni̱ ga̱ne nìgùnꞌ ngà Ma̱ꞌan Ñaꞌanj an.
8 Nuguanꞌ yàngàꞌa huin nânj,
ni̱ ruhuâj si rayiꞌî nej nânj huin si ga̱ yìtï̀nj ruhuâꞌ ni̱ ga nìchràj ruhuâꞌ,
daꞌnga ni̱ nej guiì guyumân ruhuâ niꞌin Ma̱ꞌan Ñaꞌanj an ni̱ du̱guꞌnïnꞌ ninj gi̱ꞌhiaj ninj sa sàꞌaj.
Nej nânj huin sa sàꞌa ni̱ sa niꞌñanj an.
9 Sani̱ gu̱dunâj sòꞌ sun gu̱nï̱nꞌïn,
ni̱ si̱ gayakaj guendâꞌ rayiꞌî ahuin si huin yi nej sij ni̱ dàj nikòꞌ duguiꞌ nej daꞌní nej sôꞌ,
ni̱ si̱ gunïnꞌ nej suj rayiꞌî ley,
dadinꞌ nitaj nùnj gue̱nda̱ niꞌñanj nej nuguanꞌ nânj ni̱ nitaj si ûta hua sa gi̱ri̱ꞌ gi̱ꞌhia mánj.
10 Ni̱ sí guchraꞌ da̱ꞌa̱j ni̱ si gàꞌ gataj nej suj,
ꞌngo̱ ni̱ huìj sisi̱ si̱ guchraꞌ da̱ꞌa̱j nej sôꞌ nej guiì nìkòꞌ rukû Ma̱ꞌan Jesús,
ni̱ si nitaj si guyumân ruhuâ sôꞌ ni̱ gi̱ri̱ nej suj ga̱ꞌa̱nj sí dânj siganï̂nj nej sôꞌ nìkoꞌ rukû Ma̱ꞌan Jesús,
11 gàꞌ niꞌin nej suj si sí duguachej ruhuâ nej guiì,
ni̱ gàꞌ giꞌhiaj sôꞌ gakï̱nꞌïn ni̱ rayiꞌî si-ga̱kïnꞌ sôꞌ ni̱ gaꞌanj ni̱ꞌhia̱ sôꞌ ni̱ gi̱ranꞌ sa̱ñu̱n sôꞌ.
Gaꞌnïnꞌ suun dàj gi̱ꞌhiaj daꞌ goꞌngo̱ nej guiì
12 Nga gaꞌnï̂n gùchìꞌ Artemas ni̱ nga gaꞌnï̀n gùchìꞌ Tíkiko riñanꞌ,
ni̱ nga guchiꞌ ahuin goꞌngo̱ ma̱ꞌan nguèj sij ni̱ hio du̱guꞌnïnꞌ ga̱ꞌna̱ꞌ,
ñan nné ruhuâ yumanꞌ Nicópolis,
dadinꞌ ganï̂n ruhuâj si ga̱né hiuj nânj nda ga̱na̱huij diû gahiu ꞌhueꞌe.
13 Ni̱ ûta gu̱dadû,
gi̱digânꞌ chrej e ga̱ꞌa̱nj Apolos ngà Zenas sí ganataꞌ si-ley Ma̱ꞌan Ñaꞌanj an,
gi̱niꞌhiaj ni̱ si̱ gachin gàꞌ si ꞌngo̱ rasu̱un riñan nguèj sij mánj.
14 Ni̱ ga̱huin chru̱n nej sôꞌ ni̱ka̱j duguiꞌ ngà nêꞌ gi̱ꞌhiaj nej sôꞌ sa sàꞌaj ni̱ nga hua sa ga̱chin riñan nej dinï̂nt,
ni̱ ga̱huin chru̱n nej sôꞌ gu̱ru̱gûñuꞌunj nej sôꞌ,
daꞌnga ni̱ gaꞌhue ga̱ra̱n sun Ma̱ꞌan Ñaꞌanj an nej sôꞌ.
Duguta su̱n sij si nàgàꞌhuìꞌ Tito nuguanꞌ ni̱ꞌñanj an riñan nej dinï̂nt
15 Ni̱ gaꞌnḯn daranꞌ nej sôꞌ nne ngàj nuguanꞌ niꞌñanj an huaj riñanꞌ.
Ni̱ nàgàꞌhuìꞌ sòꞌ nuguanꞌ niꞌñanj an riñan nej dinï̂nt guyumân ruhuâ,
ni̱ ꞌì ruhuâ nej sôꞌ niꞌin nej sôꞌ nêꞌ.
Ni̱ si-su̱nu̱j Ma̱ꞌan Ñaꞌanj an ga̱ne ngà daranꞌ nej suj.
Ni̱ huê danj huin rûꞌhuaj na̱nj ánj.