Gidigân nej yìꞌnï̀nꞌ nuguanꞌ hua sàꞌa
2
Sani̱ sòꞌ ni̱ daꞌhuîꞌ gi̱di̱gânꞌ dàj rûnꞌ hua nej yìꞌnï̀nꞌ nuguanꞌ gidigân Ma̱ꞌan Jesús.
2 Nej sôꞌ ni̱ka̱j su̱n riñan nej dinï̂nt ni̱ daꞌngaꞌ hueꞌê daꞌhui nej sôꞌ gi̱ꞌhiaj nej sôꞌ,
ni̱ daꞌhui nej sôꞌ ni̱ achij gi̱ꞌhiaj nej sôꞌ,
ni̱ ûta sàꞌ ga̱ya̱ka̱j guendâ nej sôꞌ ni̱ gùyùmàn hueꞌê ruhuâ nej sôꞌ,
ni̱ ga ꞌì ruhuâ nej sôꞌ ni̱ ga̱ nùkuaj ruhuâ nej sôꞌ.
3 Nej siyànà huin ña̱n riñan nej yugueꞌ ni̱ daꞌhui ninj ga̱huin chru̱n ninj ni̱ gi̱nikaj chrej ninj riñan nej duguiꞌ ninj,
ni̱ si̱ gaꞌhue gùtàꞌ chre ninj gakï̱nꞌïn duguiꞌ ninj,
ni̱ si̱ ga̱huin ninj guiì go̱ꞌo̱ nne bino,
ni̱ ga̱huin ninj siyànà chru̱n gi̱di̱gan hueꞌê;
4 ni̱ ga̱huin chru̱n ninj gi̱di̱gan ninj ni̱ nàgàꞌhuìꞌ ninj chrej e dàj ga̱ ꞌì ruhuâ nej siyànà hua̱ lij niꞌin ninj nika ninj,
ni̱ dàj ga̱ ꞌì ruhuâ ninj niꞌin ninj nej daꞌní ninj,
5 ni̱ ûta hueꞌé ga̱ya̱ka̱j guendâ ninj,
ni̱ si̱ giꞌhiaj ninj gakï̱nꞌïn,
ni̱ du̱gumîn hueꞌê ninj dukuâ ninj,
ga̱huin ninj guiì sàꞌaj,
ni̱ gi̱nikaj chre̱j ninj riñan nika ninj daꞌnga ni̱ si̱ gaꞌmin kï̱j nej guiì rayiꞌî si-nùguànꞌ Ma̱ꞌan Ñaꞌanj an.
6 Du̱naꞌnga sòꞌ riñan nej sí ña̱an si hueꞌê ga̱ya̱ka̱j guendâ nej sij dàj gi̱ꞌhiaj nej sij;
7 gùtàꞌ sòꞌ chrej e neꞌ ña̱an si dagahuînꞌ daranꞌanj ni̱ huê danj na̱nj giꞌhiâꞌ sa sàꞌa;
ni̱ nga gi̱di̱gânꞌ ni̱ ña̱ꞌa̱n huaj sisi̱ si̱ gachej gi̱di̱gânꞌ,
ni̱ ga̱huînꞌ sí giꞌhiaj achij ma̱ꞌan,
8 ni̱ ga̱ꞌmi̱nꞌ nuguanꞌ hua̱ hueꞌê ni̱ si̱ giꞌhiâꞌ gakï̱nꞌïn,
hiôꞌ ni̱ gìrìꞌ sí unïnꞌ ꞌngàꞌ sinaꞌàj a,
huê danj ni̱ si̱ giriꞌ sôꞌ nuguanꞌ yìꞌìi ga̱ꞌmi̱n sôꞌ riñan nej suj gàꞌ mánj.
9 Du̱naꞌnga sòꞌ riñan nej musu giꞌhiaj sun chre si da̱gahuin nej sij riñan si-yi̱ruꞌhue nej sij,
ni̱ gi̱ꞌhiaj nej sij si ga̱ranꞌ ruhuâ si-yi̱ruꞌhue nej sij rayiꞌî daranꞌ nej sun gi̱ꞌhiaj nej sij,
ni̱ si̱ gaꞌhue du̱nanikàj nej sij nuguanꞌan riñan si-yi̱ruꞌhue nej sij mánj;
10 si̱ gi̱di̱gañuꞌunj nej sij,
ni̱ gi̱di̱gan nej sij ngà nej yìꞌnï̀nꞌ nuguanꞌ hua̱ hueꞌê si huin nej sij sí hueꞌê dagahuin riñan daranꞌ sun giyiꞌnïnꞌ su̱n giꞌhiaj si-yi̱ruꞌhue nej sij,
daꞌnga ni̱ ga̱ꞌmi̱n hueꞌê nej guiì yiꞌî Ma̱ꞌan Ñaꞌanj gi̱ꞌhiaj ga̱na̱ni̱nꞌ.
11 Dadinꞌ si-su̱nu̱j Ma̱ꞌan Ñaꞌanj an guruguiꞌ guendâ gi̱ꞌhia ga̱na̱ni̱n daranꞌ nej guiì màn ruhuâ yumiguìi,
12 ni̱ gi̱di̱gunꞌ riñan mu̱ꞌunꞌ,
si ña̱ꞌa̱n huaj si daꞌhuîꞌ gu̱du̱nôꞌ sa kï̱j huaa ni̱ gu̱du̱nôꞌ nej gakï̱nꞌ duguaneꞌ yumiguìi riñunꞌ,
ni̱ ga̱neꞌ riñan hioꞌó nânj sani̱ daꞌhuîꞌ gi̱ꞌhiôꞌ daꞌngaꞌ hueꞌê,
ni̱ gi̱ꞌhiôꞌ sa ni̱ka̱a ni̱ gi̱nikaj chre̱ꞌ riñan Ma̱ꞌan Ñaꞌanj an.
13 Ni̱ ga̱neꞌ gànàꞌhuìꞌ ni̱ ga̱ nìhiàꞌ ruhuôꞌ ni̱ gùyùmàn yìtï̀nj ruhuôꞌ nda gui ga̱ꞌna̱ꞌ ñûn Ma̱ꞌan Jesús huin,
Duꞌunꞌ dadinꞌ huej huin sa gi̱ꞌhiaj gananinꞌ ni̱ huê danj na̱nj ga̱na̱ka̱j guendâ nej guiì ni̱ ga̱ꞌmi̱n hueꞌê ninj rayiꞌî Ma̱ꞌan,
14 ga ruhuâ Ma̱ꞌan Señor gahuij rayiꞌîꞌ ni̱ giran ñùnꞌ riñan gakï̱nꞌïn ni̱ nagiꞌhiaj sàꞌaj ñùnꞌ guendâ ga̱huînꞌ nej guiì gi̱nikòꞌ rukuj,
ni̱ rayiꞌî dan ni̱ du̱gumînꞌ mu̱ꞌunꞌ riñan gakï̱nꞌïn ni̱ gi̱ꞌhiôꞌ sa sàꞌaj na̱nj ánj.
15 Huê dànanj ga̱ꞌmi̱nꞌ,
ni̱ dunaꞌngaꞌ ni̱ du̱gunïn gàꞌì nej sij dadinꞌ ni̱ka̱j su̱nꞌ riñan nej sij.
Niꞌhiaj ni̱ si̱ giꞌhiaj nej sij si ga̱huînꞌ sí ninaj doj mánj.