Ñanj kartâ nânj gaꞌanj riñan nej
HEBREOS
Garânj sun Ma̱ꞌan Ñaꞌanj an si ga̱ꞌmi̱n Daꞌnî Jesús rayiꞌij
1
Ûta gàꞌì gaꞌmin Ma̱ꞌan Ñaꞌanj an,
riñan nej sachij gimân àsìj diû nâ,
ni̱ garânj sunj nej sôꞌ gataj dàj ga̱huin ni̱ ûta gàꞌì chrej e nanaꞌhuiꞌ nej sôꞌ dàj gaꞌmin nej sôꞌ riñan nej sachij gimân nga diû dânj,
2 sani̱ nej diû ꞌna̱ꞌ ga̱na̱huij nânj ni̱ gaꞌnḯn Ma̱ꞌan Ñaꞌanj an gaꞌnaꞌ Ma̱ꞌan Daꞌnin Jesús,
ni̱ gaꞌmin riñan nêꞌ ni̱ Ma̱ꞌan Ñaꞌanj an giꞌhiaj yumiguìi ngà Ma̱ꞌan Señor Jesús,
ni̱ giꞌhiaj Ma̱ꞌan Ñaꞌanj an si gi̱nikaj su̱n Ma̱ꞌan Señor Jesús riñan daranꞌ nej rasu̱un;
3 ni̱ Ma̱ꞌan Jesús huin sa gidigân dàj ûta nùkuaj ni̱ dàj ûta nìko staꞌu hua Ma̱ꞌan Ñaꞌanj an,
ni̱ huej huin ñan du̱ꞌhua Ma̱ꞌan Ñaꞌanj an ni̱ dàj hua Ma̱ꞌan Ñaꞌanj an,
ni̱ ngà nuguanꞌ nùkuaj ni̱ka̱j Ma̱ꞌan Jesús ni̱ ginikaj sunj riñan daranꞌ nej sa màn guruguiꞌ giniꞌhioꞌ,
ni̱ nga gisîj ganûn sa ganï̂n ruhuaj ni̱ giꞌhia si gànàrùguìꞌ si-ga̱kï̂nt,
ni̱ gaꞌan neꞌ yàtàꞌa ni̱ gaꞌanj ga̱ne neꞌ huàꞌ Ma̱ꞌan Ñaꞌanj ni̱ka̱j sun riñan daranꞌanj.
Dànanj aꞌnïnꞌ Ma̱ꞌan Jesús riñan nej ángel
4 Ni̱ dànanj ginikaj su̱n Ma̱ꞌan Jesús sun yàkàan riñan daranꞌ nej ángel,
ni̱ ga̱na̱huin ràꞌa nanìꞌhia dadinꞌ ûta nìko hua siyu̱gui gàꞌ daꞌ nej ángel.
5 Dadinꞌ gàꞌ si ꞌngo̱ riñan nej ángel nun ga̱ta̱j Ma̱ꞌan Ñaꞌanj an dànanj:
Sòꞌ huin Daꞌnî,
ni̱ hia̱j guruguiꞌ giꞌhia,
ni̱ nun ga̱ta̱j Ma̱ꞌan Ñaꞌanj an dànanj riñan aꞌngô nej ángel:
Ñùnj ga̱huin Reꞌ,
ni̱ sòꞌ ga̱huin daꞌni.
Sani̱ riñan Ma̱ꞌan Jesús ni̱ gataj Ma̱ꞌan Ñaꞌanj an si huin Daꞌní Ma̱ꞌan Ñaꞌanj an;
6 Sani̱ nga gaꞌnḯn Ma̱ꞌan Ñaꞌanj an gaꞌnaꞌ daꞌní Yàhuaj ruhuâ yumiguì nânj,
ni̱ gata gu̱nïn nej ángel:
Ginùn ña̱ꞌa̱nj daranꞌ nej suj huin si-ángel riñan Daꞌní yàhuàj.
7 Ni̱ gataj Ma̱ꞌan Ñaꞌanj an rayiꞌî nej ángel:
Ni̱ giꞌhiâ si nej ángel ni̱ gahuin ninj dàj rûnꞌ huin nanèe,
ni̱ giꞌhiâ si nej sôꞌ gunânj gi̱tsi riñânj ni̱ gahuin nej sôꞌ dàj rûnꞌ huin ñaꞌaan.
8 Sani̱ gataj Ma̱ꞌan Ñaꞌanj an rayiꞌî Daꞌnin:
Ñaꞌanj an huin Daꞌní ni̱ nìgànj ginikaj sunj,
ni̱ gu̱ña̱n chre gi̱nikaj sunj riñan daranꞌ nej guiì.
9 Ni̱ ꞌì ruhuâꞌ niꞌînꞌ sa sàꞌa ngà sa nìkàa ni̱ gininj ꞌì sa kï̱j huaa riñanꞌ,
rayiꞌî dan ni̱ gachrî gasîti sòꞌ ni̱ nda nìhiàꞌ chre hua ruhuâj ni̱ gachrûn sùnj sòꞌ,
ni̱ dànanj ꞌì doj ruhuâj niꞌín sòꞌ gàꞌ daꞌ aꞌngô nej sôꞌ ni̱ka̱j duguiꞌ ngàꞌ,
ni̱ ñùnj huin Daꞌanj na̱nj ánj.
10 Ni̱ huê danj taj riñanj ñanj:
Señor,
àsìj si̱nï̱ïn ni̱ sòꞌ giꞌhiaj hioꞌóo,
ni̱ ngà raꞌâꞌ giꞌhiâꞌ nej yàtàꞌa.
11 Ga̱na̱huij nej nânj,
sani̱ sòꞌ ni̱ si̱ ganahuîꞌ;
ni̱ ga̱huin reꞌë̀ daranꞌ nej nânj ni̱ gùyùtù ninj dàj rûnꞌ guyutù atsîj i,
12 ni̱ dàj rûnꞌ naguꞌnûnꞌ atsîj i ni̱ huê danj na̱guꞌnunj nej nânj,
ni̱ na̱du̱na nej nânj dàj rûnꞌ giꞌhiôꞌ nga nadunôꞌ sigûnꞌ;
sani̱ Ma̱ꞌan Ñaꞌanj an ni̱ nitaj si nadunâ si hua̱ Ma̱ꞌan
ni̱ huê danj na̱nj nitaj si guruguiꞌ si gachi nej mánj.
13 Ni̱ gàꞌ si ꞌngo̱ riñan nej ángel nun ga̱ta̱j Ma̱ꞌan Ñaꞌanj an dànanj mánj:
Ga̱ne sòꞌ raꞌá neꞌ huàꞌàj,
nda gùnùkua gùchrù nej sí gunïnꞌ ngàꞌ riki dakót.
14 Ni̱ sê daranꞌ nej ángel huin sa gaꞌnḯn Ma̱ꞌan Ñaꞌanj an gaꞌnaꞌ,
guendâ gu̱na̱nj gi̱tsî ninj riñan nej sôꞌ gàꞌ gananin ni̱ gu̱ru̱gûñuꞌunj ninj ga̱na̱huin ràꞌa nej sôꞌ nanìꞌhiaj nej sôꞌ ràꞌ saj ûnꞌ.