Ga̱ gu̱dadûꞌ muꞌûnꞌ daꞌnga ni̱ si̱ gaꞌanj ni̱ꞌhia̱ ñûnꞌ
2
Rayiꞌî dan ni̱,
ûta ña̱ꞌa̱n huaj si ûta hio da̱gahuin nêꞌ nuguanꞌ gu̱nïn nêꞌ,
dadinꞌ si nuhuij ni̱ gu̱du̱no̱ꞌ chrej gu̱nꞌ.
2 Dadinꞌ gàꞌ niꞌînꞌ si gahuin yìtï̀nj nej nuguanꞌ gaꞌmin nej ángel,
sani̱ nun da̱gahuin nej guiì sun giyiꞌnïnꞌ riñan ninj ni̱ giꞌhiaj ninj gakï̱nꞌïn,
ni̱ ni̱ka̱ huaj si ga̱na̱huin ràꞌa ninj kastîgu rayiꞌî gakï̱nꞌ giꞌhiaj ninj.
3 Dàj gi̱ꞌhiôꞌ ga̱ꞌhue gu̱nu̱nꞌ riñan si kastîgu Ma̱ꞌan Ñaꞌanj an,
si gi̱ni̱ꞌñu̱nꞌ dàj ûta nìko ni̱ dàj ûta hueꞌê hua sa gàꞌ hua̱ yu̱gui giꞌhiaj Ma̱ꞌan Ñaꞌanj an ga̱na̱huin ro̱ꞌôꞌ ràꞌaj.
Dadinꞌ gàꞌ si̱nï̱n Ma̱ꞌan Señor huin sa gananï̂n nuguanꞌ gi̱ꞌhiaj ga̱na̱ni̱nꞌ,
riñan aꞌngôꞌ nej sôꞌ ni̱ nej sôꞌ dânj huin si ganataꞌ si huê danj hua hia.
4 Aꞌngô sa giꞌhiaj Ma̱ꞌan Ñaꞌanj an huin si ganataj si huê danj hua hia ni̱ gidiganj nej daꞌngaꞌa,
ni̱ gahuin ña̱ꞌanj ruhuôꞌ dàj hua nej sa giꞌhia,
dadinꞌ giꞌhia si nda nanè chre ganahuin nej guiì ngà gàꞌì yìꞌnï̀nꞌ nej yiꞌì àràꞌhuèꞌ ninj,
ni̱ huê danj na̱nj gaꞌhuij Espíritu Santo riñan gàꞌì nej guiì garanꞌ ruhuâj.
Ma̱ꞌan Jesús huin ꞌngo̱ sa gi̱ꞌhiaj ga̱ꞌhue ga̱na̱ni̱nꞌ
5 Dadinꞌ nun ga̱ꞌnï̱n Ma̱ꞌan Ñaꞌanj an si gi̱nikaj su̱n nej ángel riñan yumiguì ga̱ꞌna̱ꞌ neꞌ ña̱n ràyìꞌì gaꞌmin nej ñûnj mánj;
6 sani̱ gataj ꞌngo̱ sí gachrûn riñan ñanj si-nùguànꞌ Ma̱ꞌan Ñaꞌanj an:
Hiôꞌ ni̱ huin síi doj dadinꞌ gananun ruhuâ Ma̱ꞌân rèꞌ niꞌîn rèꞌ sij na̱nj nîꞌ.
Ni̱ huin sij doj rayiꞌî dan ni̱ gaꞌna gi̱ni̱ꞌhiaj Ma̱ꞌân rèꞌ ñan nne sij na̱nj nîꞌ.
7 Ni̱ giꞌhiaj Ma̱ꞌân rèꞌ si ga̱huin sij sa ninaj doj gàꞌ daꞌ nej ángel.
Sani̱ nagiꞌhiaj nìko Ma̱ꞌan rèꞌ sij ni̱ giꞌhiá rèꞌ si gi̱nikaj chre̱j nej rasu̱n giꞌhiaj Ma̱ꞌân rèꞌ riñan sij,
ni̱ huê danj na̱nj giꞌhiá rèꞌ si gi̱nikaj su̱n sij riñan daranꞌ nej rasu̱n giꞌhiaj Ma̱ꞌân rèꞌ na̱nj nînꞌ.
8 Ni̱ gi̱ꞌhiaj Ma̱ꞌân rèꞌ si gùtàꞌ sij dakó sij yichrá daranꞌ nej rasu̱un.
Ni̱ gàꞌ giꞌhiaj Ma̱ꞌan Ñaꞌanj an si gu̱ta̱ꞌ Ma̱ꞌan Jesús dako yichrá daranꞌ nej rasu̱n giꞌhia,
sani̱ niꞌînꞌ si hua̱ nï̀nꞌ gàchin da̱gahuin daranꞌ nej rasu̱un riñan Ma̱ꞌan Jesús.
9 Sani̱ niꞌînꞌ si giꞌhiaj Ma̱ꞌan Ñaꞌanj an si gahuin Ma̱ꞌan Jesús sa ninaj doj gàꞌ daꞌ nej ángel,
ni̱ rayiꞌî guendâ ûta giranꞌ sa̱ñunj ni̱ gahuij ni̱ ganaka sun nìko ni̱ gi̱nikaj chre̱j nej guiì riñanj,
ni̱ guendâ ꞌì ruhuâ Ma̱ꞌan Ñaꞌanj an niꞌin nêꞌ ni̱ gaꞌnïnꞌ ruhuaj gahuiꞌ Ma̱ꞌan Jesús rayiꞌî darûnꞌ.
10 Daranꞌ nej rasu̱n nânj giꞌhiaj Ma̱ꞌan Ñaꞌanj an guendâ Ma̱ꞌan ni̱ huej huin sa giꞌhiaj hua daranꞌ nej rasu̱n nânj,
ni̱ huê Ma̱ꞌan giꞌhiaj hua nùkuaj daranꞌ nej rasu̱n nânj,
ni̱ garanꞌ ruhuâ Ma̱ꞌan gi̱nika ga̱ꞌa̱nj daranꞌ nej daꞌnin ga̱ne ninj ñan nne si dagahuin ninj riñanj,
ni̱ giꞌhiaj Ma̱ꞌan Ñaꞌanj an si gi̱ranꞌ sa̱ñu̱n Ma̱ꞌan Jesús ni̱ ganahuin ni̱ka̱ nï̀nꞌïnj daꞌnga ni̱ ga̱ꞌhue gi̱ꞌhia ga̱na̱ni̱n nej guiì.
11 Dadinꞌ Ma̱ꞌan huin sa giꞌhiaj ganaruhui si-ga̱kïnꞌ nej guiì,
ni̱ nej guiì gàꞌ ganaruhui si-ga̱kïnꞌ ni̱ ꞌngo̱ rïn Ma̱ꞌan Ñaꞌanj an huin Rej daranꞌ ninj;
rayiꞌî dan ni̱ nitaj si giriꞌ Ma̱ꞌan Jesús sinàꞌàj a si gata si dinïn huin nej guiì dânj mánj,
12 ni̱ gata:
Du̱yingá riñan nej dinï̂n siyu̱gui Ma̱ꞌan rèꞌ,
ni̱ ga̱ꞌmi̱n hueꞌê rayiꞌî Ma̱ꞌân rèꞌ da̱nï̱n ñan naraꞌhuiꞌ nej sij.
13 Ni̱ gata aꞌngô ñûn:
Ginûn ñânj Ma̱ꞌan Ñaꞌanj an.
Ni̱ aꞌngô ñûn gata:
Ni̱ rikî Ma̱ꞌan Ñaꞌanj an nej daꞌnin riñânj ni̱ nné ngà ninj.
14 Nneè ngà tun huin ninj ni̱ rayiꞌî dan ni̱ ña̱ꞌa̱n huaj si ga̱huin Ma̱ꞌan Jesús tun ngà nneè daꞌnga ni̱ gaꞌhue ga̱huij dàj rûnꞌ gahuiꞌ nej guiì,
ni̱ huê danj giꞌhia ni̱ gunùkua gaꞌne sun ginikaj sa nàsàꞌa dadinꞌ àsìj nâ ni̱ giꞌhiaj sa nàsàꞌa si gahuiꞌ daranꞌ nej guiì,
15 ni̱ giꞌhia si ga̱na̱ni̱n nej sôꞌ ꞌnï̱nj giꞌhiaj sun chre riñan gakï̱nꞌïn dadinꞌ ginun yuꞌhuiꞌ ruhuâ nej sôꞌ gàhuìꞌ nej sôꞌ;
16 dadinꞌ yàngàꞌ hia ni̱ nun ga̱ꞌna̱ꞌ Ma̱ꞌan Jesús guendâ gu̱ru̱gûñuꞌun rukû nej ángel mánj,
gaꞌnaj guendâ gu̱ru̱gûñuꞌun rukû nej guiì huin dan sachij Abraham.
17 Ni̱ gaꞌnaj ni̱ daꞌhui gaj dàj rûnꞌ hua nej dinï̂n,
daꞌnga ni̱ gaꞌhue ga̱na̱nï̱n àko ruhuaj ni̱ ga̱huin ꞌngo̱ rej yàngàꞌ huin ña̱n nï̀nꞌïn,
guendâ gu̱na̱nj gi̱tsi riñan Ma̱ꞌan Ñaꞌanj an,
daꞌnga ni̱ gaꞌhue na̱ru̱ꞌhue Ma̱ꞌan rayiꞌî si-ga̱kïnꞌ daranꞌ ninj.
18 Ni̱ giranꞌ sa̱ñunj ni̱ duguaneꞌ sichre gakï̱nꞌïn riñanj sani̱ nun gi̱ꞌhia gakï̱nꞌïn,
ni̱ ûta nùkua guendâ gu̱ru̱gûñuꞌun nej guiì ri̱ña̱n duguaneꞌ sichre gakï̱nꞌïn na̱nj ánj.