Dànanj aꞌnïnꞌ Ma̱ꞌan Jesús riñan Moisés
3
Hia̱j ruꞌhuaj di̱nï̂nj,
nej suj gàꞌ ganaruhui si-ga̱kïnꞌ,
ni̱ gakḯn Ma̱ꞌan Ñaꞌanj an gaꞌnaꞌ nej suj guendâ ga̱huin nej suj daꞌnin,
ni̱ ga̱na̱ka̱j guendâ nej suj rayiꞌî Ma̱ꞌan Cristo Ma̱ꞌan sa gaꞌanj gidigân si̱nï̱n si-nùguànꞌ Ma̱ꞌan Ñaꞌanj an,
dadinꞌ huej huin rej huin ña̱n nï̀nꞌïn riñan nêꞌ ni̱ huej huin sa gidigân dàj daꞌhuiꞌ da̱gahuînꞌ.
2 Ma̱ꞌan Ñaꞌanj an gachrûn su̱n Jesús ni̱ hueꞌê dagahuin riñan Ma̱ꞌan Ñaꞌanj an,
dàj rûnꞌ dagahuin hueꞌê Moisés riñan Ma̱ꞌan Ñaꞌanj an nga gachrûn sunj si gi̱nikaj su̱n sij riñan nej israelita.
3 Sani̱ dànanj nìko ginikaj chre̱j Ma̱ꞌan Ñaꞌanj an riñan Ma̱ꞌan Jesús gàꞌ daꞌ riñan Moisés,
ni̱ hue danj na̱nj ginikaj chre̱j nej guiì riñan sí giꞌhiaj ꞌngo̱ hueꞌe gàꞌ daꞌ hueꞌ gisîj giꞌhiaj sí dânj.
4 Ni̱ daranꞌ hueꞌe ni̱ hua̱ ni̱ña̱n ꞌngo̱ sí giꞌhiaj;
ni̱ huê danj na̱nj daranꞌ nej rasu̱n màn guruguiꞌ giniꞌhioꞌ ni̱ Ma̱ꞌan Ñaꞌanj an huin sa giꞌhiaj daranꞌ nej rasu̱n dânj.
5 Yàngàꞌ hia ni̱ ûta hueꞌê dagahuin Moisés riñan nej israelita ni̱ gahuin sij si-musû Ma̱ꞌan Ñaꞌanj an,
ni̱ gataj sij gu̱nïn nej sôꞌ dàj ga̱huin diû ꞌna̱ꞌ neꞌ ña̱an.
6 Sani̱ Ma̱ꞌan Cristo huin sa ni̱ka̱j su̱n riñan yiñan,
ni̱ yiñan huin nêꞌ nìkòꞌ rukuj si dugumînꞌ mu̱ꞌunꞌ ni̱ hua̱ yìtï̀nj ruhuôꞌ ni̱ ni̱kï̱nꞌ runꞌ nda gui gàhuìꞌ,
ni̱ huê danj na̱nj ginûn ñunꞌ Ma̱ꞌan ni̱ gaꞌmin hueꞌêꞌ ni̱ guyumân ruhuôꞌ niꞌînꞌ Ma̱ꞌan.
Ganariꞌ yiñán Ma̱ꞌan Ñaꞌanj an ñan ganarânj ruhuaj
7 Rayiꞌî dan,
ni̱ dàj rûnꞌ gataj Ma̱ꞌan Espíritu Santo:
Ni̱ si gu̱nïn nej suj gaꞌmin Ma̱ꞌan Ñaꞌanj an gui hia̱j,
8 ni̱ si̱ nagiꞌhiaj tsì nej suj ruhuâ nimân nej suj,
dàj rûnꞌ giꞌhiaj rej nej suj nga nun ga̱ra̱n yina nej sôꞌ da̱gahuin nej sôꞌ nga gaꞌmin Ma̱ꞌan Ñaꞌanj an riñan nej sôꞌ,
dadinꞌ garânj huè nej sôꞌ Ma̱ꞌan Ñaꞌanj an riñan hioꞌó nàkòo.
9 Ni̱ hiuj dânj gayakaj rej nej suj daꞌngaꞌa ngà Maꞌán;
ni̱ garânj huè nej sij ñùnj,
sani̱ giniꞌin nej sij sa nìko staꞌu giꞌhiâ ngà nej sij riki huìj xia hioꞌo.
10 Ni̱ rayiꞌî sa giꞌhiaj nej sij ni̱ ginaꞌan ruhuâj niꞌín yiꞌnïnꞌ gimân nga diû dânj,
ni̱ gatâ:
“Ni̱ daranꞌ diû gudunâ nej suj chrej gaché nej suj ni̱ giꞌhiaj nej suj sa garanꞌ ruhuâ nimân nej suj,
ni̱ nun gi̱ni̱ꞌin nej suj chrej garanꞌ ruhuâj ga̱che̱ nej suj mánj.”
11 Huê danj ni̱ ginaꞌan ruhuâj niꞌín nej sij ni̱ gata gu̱nïn nej sij,
yàngàꞌ hia:
Ni̱ si̱ gaꞌhue ga̱tu̱ nej suj ga̱ne nej suj ñan nné ganarânj ruhuâj mánj.
12 Gi̱ni̱ꞌhiaj nej suj siganï̂nj nej suj di̱nï̂nj,
si nitaj ga gàꞌ si ꞌngo̱ nej suj hua gakï̱nꞌïn ruhuâ nimân ni̱ nitaj si guyumân ruhuâ nej suj niꞌin nej suj Ma̱ꞌan Ñaꞌanj an,
dadinꞌ hua̱ ruhuâ nej suj gu̱xu̱n nej suj ma̱ꞌan nej suj riñan Ma̱ꞌan Ñaꞌanj nìꞌnàꞌa na̱nj ánj;
13 sa si̱nï̱n gi̱ꞌhiaj nej suj huin si du̱naꞌnga nej suj riñan ꞌngo̱ ni̱ aꞌngô nej duguiꞌ nej suj daꞌ gui,
nga nï̀nꞌ huaj ga̱ꞌhue ga̱ꞌmi̱nꞌ:
Gui hia̱j;
daꞌnga ni̱ si̱ gidigañuꞌunj gakï̱nꞌïn nej suj ni̱ si̱ ga̱na̱huin tsì ruhuâ nimân nej suj mánj.
14 Dadinꞌ ga̱ꞌhue gi̱nikaj duguiꞌ Ma̱ꞌan Cristo ngà nêꞌ,
si dugumîn nêꞌ Ma̱ꞌan nêꞌ ni̱ si hua̱ yìtï̀nj ruhuôꞌ dàj rûnꞌ giꞌhiôꞌ gui si̱nï̱n nga giniꞌînꞌ Ma̱ꞌan,
ni̱ si ni̱kï̱nꞌ runꞌ nda gui hia̱j ni̱ ga̱na̱ka̱j Ma̱ꞌan ñûnꞌ.
15 Dadinꞌ huê danj taj riñan ñanj si-nùguànꞌ Ma̱ꞌan Ñaꞌanj an:
Ni̱ si gu̱nïn nej suj sa gataj Ma̱ꞌan Ñaꞌanj an gui hia̱j,
ni̱ si̱ nagiꞌhiaj tsì nej suj ruhuâ nimân nej suj,
dàj rûnꞌ giꞌhiaj rej nej suj nga nun gùyùmàn ruhuâ nej sôꞌ mánj.
16 Ahuin nej guiì huin sa gunïn,
ni̱ nun ga̱ꞌhue̱j ninj da̱gahuin ninj ràꞌaj.
Sê daranꞌ nej israelita giri sachij Moisés riñan hioꞌó Egipto huin ràꞌ saj ûnꞌ.
17 Ni̱ ahuin ngà nej guiì ginaꞌan ruhuâ Ma̱ꞌan Ñaꞌanj an huìj xia hioꞌo ràꞌaj.
Sê ngà nej guiì giꞌhiaj gakï̱nꞌïn huin ràꞌ saj ûnꞌ,
ni̱ rayiꞌî dan ni̱ gahuiꞌ ninj ni̱ gunâj nneè kú ninj riñan hioꞌó nàkòo ràꞌ saj ûnꞌ.
18 Ahuin riñan nej guiì giꞌhiaj yìtï̀nj Ma̱ꞌan Ñaꞌanj an si-nùguànꞌanj ni̱ gata:
Nitaj àmàn huaj ga̱tu̱ nej suj ñan nné ga̱na̱ran ruhuâj mánj.
Sê riñan nej guiì nun ga̱ꞌhue̱j da̱gahuin si-nùguànꞌanj huin sa gata dànanj ràꞌ saj ûnꞌ.
19 Ni̱ giniꞌînꞌ si nun ga̱ꞌhue ga̱tu̱ ninj rayiꞌî guendâ nun gùyùmàn ruhuâ ninj niꞌin ninj Ma̱ꞌan Ñaꞌanj an mánj.