Ñânj kartâ nânj huin gachrûn Apóstol
SANTIAGO
Gaꞌnḯn Santiago nuguanꞌ ni̱ꞌña̱nj an riñan nej dinï̂nt nìkòꞌ Ma̱ꞌan Ñaꞌanj an
1
Ñùnj huin Santiago,
ni̱ gunânj gi̱ꞌtsí riñan Ma̱ꞌan Ñaꞌanj an ni̱ huê danj na̱nj gunânj gi̱tsí riñan Ma̱ꞌan Señor Jesucristo,
ni̱ gaꞌnï̂n ñanj nan hua riñan nej yùhuìj Estado nej israelita gayaꞌnï̀n gaꞌanj nï̀nꞌ gàchràꞌ ruhuâ yumiguìi.
Rikî Ma̱ꞌan Ñaꞌanj an nuguanꞌ chru̱n nï̀nꞌ ruhuâ
2 Di̱nï̂nj ma̱ꞌanj,
ga̱na̱huin nìhiàꞌ ruhuâ nej suj,
nga gùyùmàn gàꞌì sañuun riñan nej suj,
3 ni̱ gi̱ni̱ꞌin nej suj si guendâ guyumân ruhuâ nej suj,
ni̱ dànanj ga̱na̱huin nùkuaj ruhuâ nej suj nga guyumân sañuun riñan nej suj.
4 Ni̱ nga gahuin chru̱n nej suj ga̱ nùkuaj ruhuâ nej suj,
hiôꞌ ni̱ ga̱huin nej suj guiì gi̱ꞌhiaj sa ni̱ka̱a,
ni̱ guiì achij giꞌhiaj,
ni̱ nitaj nùnj ga̱chin riñan nej suj ga̱ꞌ mánj.
5 Ni̱ si hua̱ goꞌngo̱ nej suj naꞌhue ga̱huin chru̱n nï̀nꞌ ruhuâ,
ni̱ gàchìnj nej suj riñan Ma̱ꞌan Ñaꞌanj an,
dadinꞌ ga̱ꞌhue gi̱ꞌhia si̱ ga̱huin chru̱n nï̀nꞌ ruhuâ nej suj gachín riñanj ni̱ nitaj si giꞌhiaj chij mánj.
6 Sani̱ nga gàchìnj nej suj ni̱ gùyùmàn yìtï̀nj ruhuâ nej suj,
ni̱ si̱ ganï̂n huàꞌ ruhuâ nej suj rayiꞌî sa gachín nej suj;
dadinꞌ nej guiì ganï̂n huàꞌ ruhuâ ni̱ huin ninj dàj rûn huin nne ña̱ꞌa̱nj dadinꞌ nitaj si nu̱n dïnꞌïn,
dadinꞌ rânj nanèe ni̱ nagunanꞌ nanèe ni̱ huaꞌan dànèꞌ garanꞌ ruhuâ nanèe na̱nj ánj.
7 Ni̱ si̱ ganï̂n ruhuâ nej suj si guiì gi̱ꞌhiaj dànanj,
ni̱ hua̱ sa ga̱na̱huin ra̱ꞌa ninj gi̱ꞌhiaj Ma̱ꞌan Señor.
8 Ni̱ guiì ganï̂n huàꞌ ruhuâ ni̱ huin ninj guiì nitaj si ni̱kï̱nꞌ ran nga daranꞌ sa giꞌhiaj ninj.
9 Ni̱ si hua̱ ꞌngo̱ nej suj dinï̂nt ranꞌ àko ni̱ ga̱na̱huin nìhiàꞌ ruhuâ nej suj,
dadinꞌ riñan nej guiì ni̱ nitaj nùnj huin nej suj sani̱ riñan Ma̱ꞌan Ñaꞌanj an ni̱ huin nej suj sí du̱ꞌhue̱e na̱nj ánj;
10 sani̱ guiì hua̱ yi̱ruꞌhue,
ni̱ ga̱na̱ka̱j ninj sinàꞌaj a dadinꞌ gi̱ꞌhiaj Ma̱ꞌan Ñaꞌanj an;
si gi̱ranꞌ ninj dàj rûnꞌ giranꞌ hiaj tàj raa̱ koj o.
11 Dadinꞌ nga gisîj gui ni̱ ûta gahuin ña̱ꞌan,
ni̱ ganakò koj dânj ni̱ nùnj huin si ûta nìhiàꞌ hua hiaj gitá raj sani̱ gi̱nin;
ni̱ huê danj gi̱ranꞌ sí yiruꞌhuee ni̱ ga̱na̱huij sôꞌ ngà nej rasu̱n du̱ꞌhue̱ hua̱ riñan sôꞌ.
Ga̱ nùkuaj ruhuâ ngà nej sañun guyumân riñan
12 Ga̱na̱huin nìhiàꞌ ruhuâ nej guiì gunùkuaj gachîn riñan sañuun,
dadinꞌ nga gunùkuaj ninj gachîn ninj riñan sañuun ni̱ ga̱na̱huin ra̱ꞌa ninj ꞌngo̱ korona nìhiàꞌ huaa gi̱nun ahui ninj,
ni̱ huê danj na̱nj ga̱ nìꞌnàꞌ ninj gi̱ꞌhiaj Ma̱ꞌan Ñaꞌanj an,
dadinꞌ gàꞌ gataj Ma̱ꞌan Ñaꞌanj an si hua̱ ni̱ña̱n si ga̱ꞌhuij raꞌa nej guiì ꞌì ruhuâj ꞌngo̱ korona.
13 Si hua̱ ꞌngo̱ guiì ni̱ guyumân gakï̱nꞌïn riñan ninj,
ni̱ si̱ gaꞌhue ga̱ta̱j ninj si Ma̱ꞌan Ñaꞌanj an huin sa gaꞌnḯn gaꞌnaꞌ gakï̱nꞌ dan riñan ninj mánj;
dadinꞌ Ma̱ꞌan Ñaꞌanj an ni̱ nitaj si giꞌhia gakï̱nꞌïn,
ni̱ ga̱ꞌ nitaj si duguanej gakï̱nꞌïn riñan nej guiì mánj;
14 dadinꞌ si nneè kú nej guiì huin ruhuâ gi̱ꞌhiaj ninj gakï̱nꞌïn,
huê danj ni̱ gàyìꞌì sichre ni̱ duguanej gakï̱nꞌ huin ruhuâ ninj gi̱ꞌhiaj ninj,
ni̱ gunùkuaj gakï̱nꞌ dânj giꞌhiaj ga̱nanj ninj na̱nj ánj.
15 Ni̱ nga ganï̂n ruhuâ ninj,
giꞌhiaj ninj ahuin na̱nj gakï̱nꞌ garanꞌ ruhuâ nneè kú ninj,
ni̱ nga giꞌhiaj ninj gakï̱nꞌïn;
ni̱ ganûn gakï̱nꞌ gahuin ruhuâ ninj gi̱ꞌhiaj ninj,
huê danj ni̱ gahuiꞌ ninj giꞌhiaj gakï̱nꞌ dânj.
16 Huê danj ni̱ si̱ gachej ruhuâ nej suj,
man di̱nï̂nj.
17 Daranꞌ sa sàꞌa,
ni̱ daranꞌ sa ni̱ka̱a ni̱ Ma̱ꞌan Ñaꞌanj nne yàtàꞌa huin sa gaꞌnḯn gaꞌnaj ni̱ huê Ma̱ꞌan huin sa giꞌhiaj gaꞌhue garânj daꞌngaꞌ ruhuôꞌ,
ni̱ nitaj si ganadunaj dàj rûnꞌ ganadunâ nej atïꞌï màn yàtàꞌa ni̱ nitaj si gisikij dàj rûnꞌ gisikiꞌ gaxùꞌun mánj.
18 Ni̱ Ma̱ꞌan garanꞌ ruhuâ,
ni̱ giꞌhia si ga̱na̱huin nàkà nimân nêꞌ ngà nuguanꞌ yàngàꞌa,
ni̱ gahuînꞌ dàj runꞌ huin ꞌngo̱ chruj tsìꞌ si̱nï̱n gahiu raa̱ ꞌngo̱ chrun dadinꞌ ganahuînꞌ daꞌní Ma̱ꞌan Ñaꞌanj an.
Da̱gahuin nej nuguanꞌ gunïn
19 Ni̱ ꞌì ruhuâj niꞌín nej suj di̱nï̂nj.
Rayiꞌî dan ni̱ ga̱ hio nej suj guendâ gu̱nïn nej suj,
sani̱ si̱ ga hio nej suj guendâ ga̱ꞌmi̱n nej suj mánj,
ni̱ si̱ ginaꞌan hio ruhuâ nej suj mánj.
20 Dadinꞌ si ginaꞌan ruhuâ nej suj ni̱ nitaj si gi̱ꞌhiaj nej suj sa ni̱ka̱ garanꞌ ruhuâ Ma̱ꞌan Ñaꞌanj an mánj.
21 Huê danj,
ni̱ gu̱dunâj nej suj daranꞌ nej sa kï̱j huaa ni̱ sa yìꞌì chre hua̱ riñan nej suj,
ni̱ dàj rûnꞌ ganahuin ra̱ꞌa nej guiì ranꞌ àko ꞌngo̱ rasu̱un huê danj ga̱na̱huin ra̱ꞌa nej suj si-nùguànꞌ Ma̱ꞌan Ñaꞌanj an dadinꞌ nuguanꞌ nânj huin sa gi̱ꞌhiaj ga̱na̱ni̱n ma̱ꞌan nimân nej suj.
22 Ni̱ si̱ gi̱ꞌhiaj nej suj si man si gunïn nej suj si-nùguànꞌ Ma̱ꞌan Ñaꞌanj an mánj,
sa gi̱ꞌhiaj nej suj huin si da̱gahuin yàngàꞌ nej suj nuguanꞌ gunïn nej suj,
ni̱ si̱ gidigañuꞌunj nej suj ma̱ꞌan nej suj mánj.
23 Dadinꞌ si hua̱ ꞌngo̱ nej suj gunïn si-nùguànꞌ Ma̱ꞌan Ñaꞌanj an sani̱ nitaj si dagahuin nej suj,
ni̱ huin nej suj dàj rûnꞌ huin ꞌngo̱ sí giniꞌhiaj riñan nne gunïnꞌïn dàj hua riñan sôꞌ.
24 Ni̱ giniꞌin sôꞌ dàj hua riñan sôꞌ,
ni̱ neꞌ rùkù ni̱ gaꞌanj sôꞌ,
sani̱ orâ chre ni̱ giniꞌñûn sôꞌ dàj hua riñan sôꞌ.
25 Sani̱ sí ûta hueꞌê giniꞌhiaj ni̱ ganaꞌnï̂n sàꞌ sôꞌ nuguanꞌ ni̱ka̱ gunïn sôꞌ ni̱ niꞌin sôꞌ si nuguanꞌ nânj gi̱ꞌhiaj gi̱yi̱ꞌnï̱n riñan sôꞌ,
ni̱ ganikïnꞌ ran sôꞌ ni̱ dagahuin sôꞌ nuguanꞌ dânj,
ni̱ nitaj si giniꞌñûn sôꞌ nuguanꞌ dânj ni̱ ga̱ nìhiàꞌ ruhuâ sôꞌ rayiꞌî sa giꞌhiaj sôꞌ.
26 Ni̱ si hua̱ ꞌngo̱ sí gataj si nìkòꞌ sôꞌ Ma̱ꞌan Ñaꞌanj an siganï̂nj nej suj,
sani̱ nitaj si hua̱ gu̱dadû sôꞌ ngà nej nuguanꞌ gaꞌmin sôꞌ riñan nej duguiꞌ sôꞌ,
ni̱ gidigañuꞌunj sôꞌ ma̱ꞌan sôꞌ ni̱ nitaj nùnj guendâ niꞌñanj si gataj sôꞌ si niꞌin sôꞌ Ma̱ꞌan Ñaꞌanj an mánj.
27 Yiꞌnïnꞌ nej guiì gèe ni̱ yiꞌnïnꞌ nej guiì nitaj si giꞌhiaj gakï̱nꞌïn riñan Ma̱ꞌan Ñaꞌanj an huin nej guiì giꞌhiaj dànanj:
Ni̱ huaꞌanj niꞌhiaj ninj ni̱ gu̱ru̱gûñuꞌunj ninj nej silíj nitaj rej ngà nni ni̱ huê danj na̱nj gu̱ru̱gûñuꞌunj ninj nej siyànà minj giranꞌ sa̱ñu̱n,
ni̱ dugumîn ninj ma̱ꞌan ninj riñan nej gakï̱nꞌ hua̱ ruhuâ yumiguìi.