Sa daꞌhui nej sôꞌ nìkòꞌ rukû Ma̱ꞌan Jesús da̱gahuin nej sôꞌ
13
Du̱guꞌnïnꞌ ga̱ ꞌì ruhuôꞌ niꞌînꞌ nej dinï̂nt.
2 Si̱ giniꞌñun nej suj guendâ ga̱na̱huin raꞌa hueꞌê nej suj nej guiì guchiꞌ ñan nne nej suj,
dadinꞌ rayiꞌî nânj ni̱ hua̱ da̱ꞌa̱j nej sôꞌ,
ni̱ nun gi̱ni̱ꞌin nej sôꞌ,
sani̱ ganahuin ra̱ꞌa nej sôꞌ nej ángel.
3 Ga̱na̱nun ruhuâ nej suj niꞌin nej suj nej sôꞌ ꞌnï̱nj dukuâ gaꞌa,
ni̱ ga̱huin ruhuâ nej suj si ꞌnï̱nj nej suj dukuâ gaꞌa ngà nej sôꞌ;
ni̱ ga̱na̱nun ruhuâ nej suj niꞌin nej suj nej guiì nitaj si nne hueꞌê,
dadinꞌ ga̱ꞌhue si huê danj gi̱ranꞌ nej suj aꞌngo̱ gui.
4 Ginikaj chre̱j daranꞌ nej sôꞌ nne garan ra̱ꞌa ngà nika nej sôꞌ,
ni̱ si̱ gi̱nikaj nej sôꞌ nika duguiꞌ nej sôꞌ mánj;
sani̱ nej sí nne sìgìchràꞌ ni̱ nej sí ni̱ka̱j nika duguiꞌ ni̱ Ma̱ꞌan Ñaꞌanj an huin sa na̱gi̱ꞌhiaj guenda ngà nej sôꞌ.
5 Si̱ gahuin staꞌu ruhuâ nej suj guendâ ga̱ doj sanꞌanj an riñan nej suj mánj,
ga̱ nìhiàꞌ ruhuâ nej suj ngà nej sa hua̱ riñan nej suj hia̱j;
Dadinꞌ gataj Ma̱ꞌan Ñaꞌanj an:
“Ni̱ si̱ gaꞌnḯn ra̱ꞌa sòꞌ ni̱ si̱ gu̱dunâ sòꞌ mánj.”
6 Hiôꞌ ni̱ yìtï̀nj chrej huaj ga̱to̱ꞌ:
Ma̱ꞌan Señor huin sa gu̱ru̱gûñuꞌunj ñùnj;
ni̱ si̱ guyuꞌhuí sa gi̱ꞌhiaj nej guiì ngàj mánj.
7 Ga̱na̱nun ruhuâ nej suj niꞌin nej suj nej sôꞌ ganikïnꞌ dugumîn nej suj,
dadinꞌ gaꞌmin nej sôꞌ si-nùguànꞌ Ma̱ꞌan Ñaꞌanj an riñan nej suj;
Ga̱na̱ka̱j guendâ nej suj dàj giꞌhiaj nej sôꞌ,
ni̱ si hua̱ hueꞌê sa giꞌhiaj nej sôꞌ ni̱ gidaꞌa nej suj chrej hua̱ hueꞌê giꞌhiaj nej sôꞌ ni̱ dàj guyumân ruhuâ nej sôꞌ na̱nj ánj.
8 Ni̱ huê Ma̱ꞌan Jesús huin gukï,
ni̱ huê Ma̱ꞌan Jesús huin hia̱j,
ni̱ huê Ma̱ꞌan Jesús huin daranꞌ nej diû.
9 Ni̱ si̱ guyumân ruhuâ nej suj ngà nej yìꞌnï̀nꞌ nuguanꞌ digañuꞌunj gidigán nej síi;
dadinꞌ dànanj dùgùnàj huaj si ga̱na̱huin nùkuaj ruhuâ nej suj ngà nuguanꞌ su̱nu̱j rikî Ma̱ꞌan Ñaꞌanj an riñan nej suj,
gàꞌ daꞌ nej yìꞌnï̀nꞌ nej nuguanꞌ aꞌnïnꞌ rayiꞌî guendâ sa yâ nej suj;
dadinꞌ nitaj nùnj gue̱nda̱ niꞌñanj nej yìꞌnï̀nꞌ nuguanꞌ gidigân nej síi mánj.
10 Ni̱ Ma̱ꞌan Cristo huin si-na nêꞌ dadinꞌ huin dàj rûnꞌ gahuin si-na ñaꞌanj ri̱ña̱n dagahuiꞌ nej sij nej yuku àsìj nâ,
huê danj ni̱ nitaj guèndà nej sôꞌ dagahuin si-ley Moisés gu̱na̱nj gitsî nej sôꞌ riñan Ma̱ꞌan Jesús mánj.
11 Dadinꞌ àsìj nâ ni̱ gidaꞌa rej huin ña̱n nï̀nꞌïn tun nej yuku ni̱ ni̱ka̱j sôꞌ huaꞌanj sôꞌ neꞌ rùhuà lugâ gèe,
ni̱ huin ꞌngo̱ ofrenda guendâ ga̱ꞌne si-ga̱kïnꞌ nej guiì,
sani̱ nneè nej yuku ni̱ gachrîj ñaꞌan sij neꞌ yèꞌ ñan màn nej guiì.
12 Huê danj na̱nj,
giranꞌ sa̱ñu̱n Ma̱ꞌan Jesús ni̱ gahuij neꞌ ye̱ꞌ yumanꞌ snàꞌànj Jerusalén,
ni̱ ngà tun ni̱ ga̱ꞌhue nagiꞌhiaj sàꞌaj nej guiì riñan nej gakï̱nꞌ giꞌhiaj ninj na̱nj ánj.
13 Gi̱nikòꞌ nêꞌ rukû Ma̱ꞌan Jesús,
ni̱ ga̱ ruhuâ nêꞌ gi̱ranꞌ sa̱ñu̱nꞌ nêꞌ dàj rûnꞌ giranꞌ sa̱ñu̱n Ma̱ꞌan na̱nj ánj;
14 dadinꞌ nitaj si hua̱ nìgànj ꞌngo̱ yumanꞌ snàꞌànj an ruhuâ yumiguì nânj gìrìꞌ ga̱neꞌ mánj,
gànàꞌhuìꞌ ꞌngo̱ yumanꞌ snàꞌànj an ñan gìrìꞌ ga̱neꞌ gui ꞌna̱ꞌ neꞌ ña̱an.
15 Huê danj ni̱,
daranꞌ diû ga̱ꞌmi̱n hueꞌê nêꞌ riñan Ma̱ꞌan Ñaꞌanj an,
ni̱ Ma̱ꞌan Jesucristo gu̱ru̱gûñuꞌunj rukû nêꞌ,
ni̱ ga̱ꞌhue ga̱chro̱ꞌ chraꞌa riñan Ma̱ꞌan Ñaꞌanj an,
ni̱ gànàtàꞌ duꞌhuôꞌ siyu̱gui Ma̱ꞌan Jesús.
16 Ni̱ si̱ giniꞌñûn nej suj guendâ gi̱ꞌhiaj nej suj sa sàꞌa ni̱ si̱ giniꞌñûn nej suj guendâ gu̱ru̱gûñuꞌunj nej suj sa gàchin riñan nej duguiꞌ nej suj mánj;
dadinꞌ huê nej nânj huin sa garanꞌ ruhuâ Ma̱ꞌan Ñaꞌanj an na̱nj ánj.
17 Da̱gahuin nej suj sun gaꞌnïnꞌ nej sôꞌ rikî si-nùguànꞌ Ma̱ꞌan Ñaꞌanj an riñan nej suj,
ni̱ gi̱nikaj chre̱j nej suj ngà nuguanꞌ ga̱ta̱j nej sôꞌ gu̱nïn nej suj;
dadinꞌ nej sôꞌ huin si dugumîn ma̱ꞌan nimân nej suj,
dadinꞌ nej sôꞌ huin si nàgàꞌhuìꞌ guenda rayiꞌî nej suj riñan Ma̱ꞌan Ñaꞌanj an;
ni̱ si dagahuin nej suj ni̱ nda nìhiàꞌ chre hua ruhuâ nej sôꞌ nga gu̱na̱nj gi̱tsî nej sôꞌ rayiꞌî nej suj riñan Ma̱ꞌan Ñaꞌanj an,
huê danj na̱nj si̱ gaꞌmin gakï̱nꞌ nej sôꞌ rayiꞌî sa giꞌhiaj nej suj riñan Ma̱ꞌan Ñaꞌanj an mánj,
dadinꞌ nitaj si niꞌñanj si huaj si gi̱ꞌhiaj nej sôꞌ dànanj mánj.
18 Gàchìnj nìꞌhiaj nej suj rayiꞌî nej ñûnj;
dadinꞌ niꞌin nej ñûnj si hua̱ hueꞌê daꞌngaꞌ nu̱n ruhuâ nimân nej ñûnj,
ni̱ hua̱ ruhuâ nej ñûnj gi̱ꞌhiaj hueꞌê nej ñûnj daranꞌanj na̱nj ánj.
19 Ni̱ gachín ni̱ꞌhia riñan nej suj ni̱ gi̱ꞌhiaj nej suj sunuj ni̱ gàchìnj nìꞌhiaj nej suj rayiꞌí riñan Ma̱ꞌan Ñaꞌanj an,
ni̱ râꞌñanj ga̱ꞌnïn gùchìj ñan màn nej suj na̱nj ánj
Nagaꞌhuiꞌ nuguanꞌ ni̱ꞌña̱nj an ni̱ nuguanꞌ hua hueꞌê riñan nej dinï̂nt
20 Ni̱ Ma̱ꞌan Ñaꞌanj giꞌhiaj hua dïnꞌïnj ni̱ Ma̱ꞌan Ñaꞌanj giꞌhiaj ganaꞌnï̂nj Ma̱ꞌan Señor Jesucristo siganï̂nj nej nîman,
ni̱ Ma̱ꞌan Señor Jesús huin sa ni̱kï̱nꞌ dugumîn nej matsïj ï,
ni̱ ngà tun Ma̱ꞌan ni̱ guchiꞌ Ma̱ꞌan Ñaꞌanj an ꞌngo̱ duꞌhua ngà nej guiì nìgànj nï̀nꞌ na̱nj ánj.
21 Ni̱ Ma̱ꞌan Ñaꞌanj an huin sa gi̱ꞌhiaj yu̱gui nej suj ni̱ ga̱ yu̱gui nej suj guendâ gi̱ꞌhiaj hueꞌê nej suj daranꞌ sa garanꞌ ruhuâ Ma̱ꞌan,
ni̱ ngà Ma̱ꞌan Jesucristo gi̱ꞌhia ngà nej suj sa garanꞌ ruhuaj;
ni̱ rayiꞌî Ma̱ꞌan Señor Jesús huin sa ga̱ꞌmi̱n hueꞌêꞌ,
daꞌ gachîn ꞌngo̱ sientu hioꞌo,
daꞌ gachîn ꞌngo̱ sientu hioꞌo.
Ni̱ huê danj huin rûꞌhuaj.
22 Ni̱ gachín ni̱ꞌhia riñan nej suj di̱nï̂nj,
si ga̱ nùkuaj ruhuâ nej suj ngà nej nuguanꞌ dunaꞌngâj riñan nej suj,
dadinꞌ do̱j huin sa gachrûnj riñan nej suj.
23 Ruhuâj si gi̱ni̱ꞌin nej suj si gàꞌ gahui dinï̂nt Timoteo ruhuâ dukuâ gaꞌa;
ni̱ asàꞌ guyumân raꞌña̱nj sij ñan nné ni̱ gi̱nika gùchìj sij nga gùchìꞌ gi̱ni̱ꞌhia ñan màn nej suj na̱nj ánj.
24 Nàgàꞌhuìꞌ nej suj nuguanꞌ ni̱ꞌñanj an riñan nej sôꞌ ni̱kï̱nꞌ dugumîn nej suj,
ni̱ huê danj na̱nj nàgàꞌhuìꞌ nej suj nuguanꞌ niꞌñanj an riñan nej sôꞌ dugumîn ma̱ꞌan riñan gakï̱nꞌïn.
Ni̱ huê danj na̱nj gaꞌnḯn nej dinï̂nt màn Italia nuguanꞌ ni̱ꞌña̱nj an huaj riñan nej suj.
25 Ni̱ si-su̱nu̱j Ma̱ꞌan Ñaꞌanj an gùchìꞌ riñan daranꞌ nej suj.
Ni̱ huê danj huin rûꞌhuaj na̱nj ánj.