Gànï̀nj ñunꞌ Ma̱ꞌan Jesús
12
Huê danj na̱nj nêꞌ,
ni̱ gi̱niꞌhioꞌ dadinꞌ nda ganikàj neꞌ rùkùꞌ mân nej dinï̂nt guyumân yìtï̀nj ruhuâ ni̱ dàj rûnꞌ mân nnga mân nej sôꞌ,
ni̱ gu̱du̱nôꞌ daranꞌ nej sa garanꞌ ñuꞌunj ñùnꞌ guendâ gi̱nikôꞌ rukû Ma̱ꞌan Jesús,
ni̱ huê danj gu̱du̱nôꞌ daranꞌ nej gakï̱nꞌ garanꞌ ruhuôꞌ gi̱ꞌhiôꞌ,
ni̱ gu̱nu̱nꞌ na̱na̱j ni̱ gu̱nꞌ neꞌ ña̱an ni̱ ga̱ nùkuaj ruhuôꞌ ga̱che̱ꞌ chrej gàꞌ gidoꞌoꞌ,
2 gàꞌnï̀nj ñunꞌ riñan Ma̱ꞌan Jesús,
dadinꞌ huê Ma̱ꞌan huin sa gunùkuaj giꞌhiaj ga̱nan riñan daranꞌanj,
ni̱ huej huin sa gi̱ꞌhiaj gùnùkuôꞌ gi̱ꞌhiaj ga̱nunꞌ si gùyùmàn yìtï̀nj ruhuôꞌ,
ni̱ ga ruhuâ Ma̱ꞌan Jesús giranꞌ sa̱ñunj riñan rugutsìi rayiꞌî nêꞌ,
ni̱ nun gayakaj guendaj si gata rùhuà nej sij Ma̱ꞌan,
dadinꞌ neꞌ rùkù nga gisîj ûta giranꞌ sa̱ñunj ni̱ ûta ga̱na̱huin nìhiàꞌ ruhuaj,
ni̱ gaꞌanj ga̱ne neꞌ huàꞌ ñan ni̱kï̱nꞌ chrun yilâ nne Ma̱ꞌan Ñaꞌanj an.
3 Ga̱na̱ka̱j guendâ nej suj dàj nìko staꞌu giranꞌ sa̱ñu̱n Ma̱ꞌan Jesús,
dadinꞌ nej sí giꞌhiaj gakï̱nꞌïn ni̱ ûta gininj ꞌì Ma̱ꞌan ni̱ ûta gata rùhuà nej sôꞌ Ma̱ꞌan,
huê danj ni̱ si̱ guyuꞌhuiꞌ nej suj ni̱ si̱ ginichre ruhuâ nej suj mánj.
4 Dadinꞌ hua̱ na̱nj nun gàhuìꞌ nej suj,
guendâ gunïnꞌ nej suj ngà gakï̱nꞌïn dàj rûnꞌ giranꞌ Ma̱ꞌan Jesús mánj.
5 Ni̱ gàꞌ giniꞌñûn nej suj nga dugunïn gàꞌì Ma̱ꞌan Ñaꞌanj an nej suj,
dadinꞌ giꞌhia dàj rûnꞌ giꞌhiaj sí ꞌì ruhuâ niꞌin daꞌní ni̱ gataj sôꞌ gu̱nïn daꞌní sôꞌ:
Sòꞌ huin daꞌní Ma̱ꞌán,
ni̱ si̱ gaꞌman ruhuâꞌ si nagiꞌhiaj ni̱ka̱ Ma̱ꞌan Ñaꞌanj an sòꞌ rayiꞌî guendâ nitaj si dagahuînꞌ sun giyiꞌnïn giꞌhia.
Ni̱ si̱ ginichre ruhuâꞌ nga ranꞌanj sôꞌ mánj;
6 Dadinꞌ nej guiì ꞌì ruhuâ Ma̱ꞌan Señor ni̱ nagiꞌhiaj ni̱kaj ninj nga nitaj si dagahuin ninj sun gaꞌnïnꞌ sunj gi̱ꞌhiaj ninj,
ni̱ nga ruhuaj na̱gi̱ꞌhiaj ni̱ka̱j nej daꞌnin,
ni̱ giranꞌ sa̱ñu̱n daranꞌ ninj giꞌhia.
7 Ni̱ si gunùkuaj nej suj nga nagiꞌhiaj ni̱ka̱ Ma̱ꞌan Ñaꞌanj an nej suj,
dadinꞌ Ma̱ꞌan Ñaꞌanj an ni̱ giꞌhia ngà nej daꞌnin dàj rûnꞌ giꞌhiaj ꞌngo̱ sí ꞌì ruhuâ ni̱ nagiꞌhiaj ni̱ka̱ sôꞌ daꞌní sôꞌ.
Ni̱ hua̱ ꞌngo̱ silíj nitaj si gunïn gàꞌì giꞌhiaj rej na̱nj nînꞌ.
8 Sani̱ si nitaj si nagiꞌhiaj ni̱ka̱ Ma̱ꞌan Ñaꞌanj an nej suj dàj rûnꞌ nagiꞌhiaj ni̱ka̱ nej suj daꞌní nej suj,
hiôꞌ ni̱ sê daꞌní Ma̱ꞌan Ñaꞌanj an huin nej suj mánj,
ni huin nej suj dàj rûnꞌ huin silíj ga̱ni̱ki nitaj rej hua.
9 Ni̱ aꞌngô sa huaj huin si,
daꞌ goꞌngo̱ nêꞌ ni̱ ga rej nêꞌ riñan hioꞌó nânj ni̱ nga giꞌhiôꞌ sa aꞌnanꞌan ni̱ nagiꞌhia ni̱ka̱ sôꞌ ñùnꞌ,
ni̱ ginikaj chrej nêꞌ riñan nej sôꞌ.
Ni̱ sê dànanj hueꞌê doj huaj si da̱gahuînꞌ riñan Ma̱ꞌan Reꞌ Ñaꞌanj an ni̱ ga̱ nìꞌnòꞌ ràꞌ saj ûnꞌ.
10 Ni̱ nej sôꞌ,
ni̱ man do̱j sînj nej gui nga ganêꞌ riñan hioꞌó nânj nagiꞌhiaj ni̱ka̱ nej sôꞌ ñùnꞌ,
dàj garânj daꞌngaꞌ ruhuâ nej sôꞌ giꞌhiaj nej sôꞌ,
sani̱ nga nagiꞌhiaj ni̱ka̱ Ma̱ꞌan Ñaꞌanj an ñùnꞌ ni̱ nagiꞌhiaj ni̱kaj ñùnꞌ guendâ sisa̱ꞌ muꞌûnꞌ,
daꞌnga ni̱ gaꞌhue ga̱huînꞌ guiì nitaj si hua̱ gakï̱nꞌïn riñan dàj rûnꞌ nitaj gakï̱nꞌïn riñan Ma̱ꞌan na̱nj ánj.
11 Yàngàꞌ hia ni̱ daran diû nga nagiꞌhiaj ni̱ka̱ Ma̱ꞌan Ñaꞌanj an ñùnꞌ ni̱ nitaj si hua̱ nìhiàꞌ ruhuôꞌ,
dadinꞌ gananï̂n ruhuôꞌ nga nagiꞌhiaj ni̱kaj ñûnꞌ;
sani̱ si ga̱huin chru̱nꞌ da̱gahuînꞌ ni̱ ga̱ dïnꞌïnj ruhuôꞌ na̱nj ánj.
Gi̱ranꞌ sa̱ñu̱nꞌ gi̱ꞌhiaj Ma̱ꞌan Ñaꞌanj an sisi si̱ dagahuin ngà gaꞌmin riñunꞌ
12 Rayiꞌî dan,
ni̱ giꞌhiaj guesâ nej suj ni̱ ga̱na̱chi nikaj nej suj raꞌa nej suj ni̱ du̱sikiꞌ nej suj sirùhuìj nej suj;
13 ni̱ ga̱che̱ nej suj ruhuâ chrej ni̱ka̱a,
ni̱ si̱ gudunâ nej suj chrej ga̱che̱ nej suj daꞌnga ni̱ ga̱na̱huin dakó nej suj sa aꞌnanꞌ dânj.
14 Ga̱ dïnꞌïnj ruhuâ nej suj ngà daranꞌ nej guiì,
ni̱ si̱ giꞌhiaj nej suj gakï̱nꞌïn,
dadinꞌ si si̱ gudunâj nej suj gakï̱nꞌïn ni̱ nitaj àmàn huaj gi̱ni̱ꞌin nej suj riñan Ma̱ꞌan Señor mánj.
15 Gi̱niꞌhiaj hueꞌê nej suj,
dadinꞌ si nuhuij ni̱ hua̱ ꞌngo̱ nej suj si̱ giriꞌ si-su̱nu̱j Ma̱ꞌan Ñaꞌanj an mánj;
ni̱ gi̱niꞌhiaj nej suj ni̱ si̱ gatûj sa naꞌan chre dan ruhuâ nimân nej suj,
ni̱ ga̱ra̱nꞌ ñuꞌun riñan nej suj,
ni̱ gàꞌhuìꞌ yìꞌij ûta gàꞌì nej guiì na̱nj ánj;
16 gi̱niꞌhiaj nej suj ni̱ si̱ ga nej sí gaché sìgìchràꞌ siganï̂nj nej suj,
ni̱ si̱ ga nej sí ûta ga̱na̱huij ruhuâ niꞌin nej sa màn ruhuâ yumiguìi siganï̂nj nej suj dàj rûnꞌ giꞌhiaj Esaú,
dadinꞌ man rayiꞌî ꞌngo̱ goꞌo nihiaa ni̱ guduꞌhuêj sôꞌ guendâ huin sôꞌ sí yàhuàꞌa.
17 Dadinꞌ gàꞌ niꞌin nej suj si neꞌ rùkù doj,
ni̱ ûta gahuin ruhuâ sôꞌ ga̱na̱huin ra̱ꞌa sôꞌ nuguanꞌ hua̱ hueꞌê nàgàꞌhuìꞌ rej sôꞌ riñan sôꞌ,
sani̱ nun ga̱na̱huin ràꞌa sôꞌ nuguanꞌ hua̱ hueꞌê,
ni̱ nùnj huin si gananikàj ruhuâ sôꞌ ni̱ ûta dugueꞌe sôꞌ,
sani̱ gàꞌ dânj ni̱ nun ga̱ꞌhue ga̱na̱huin ñûn sôꞌ sí yàhuàꞌa gàꞌ mánj.
18 Dadinꞌ nun ga̱huin nìchrùnꞌ nej suj ñan ni̱kï̱nꞌ kïj ga̱ꞌhue ga̱ga̱nꞌ raꞌa nej suj,
ni̱ kïj ganûn ñaꞌaan,
ni̱ nda gahuin ru̱mi̱nꞌ chre orâ dânj ni̱ huê danj na̱nj nda garï̱n chre aguâj duꞌhui,
19 dadinꞌ ûta nùkuaj gaguâj chrun âꞌñànj an,
ni̱ ûta nùkuaj gaꞌmin sa gaꞌmin ra̱ kïj dânj,
ni̱ nga gunïn nej israelita nuguanꞌ nânj ni̱ guyuꞌhuiꞌ nej sôꞌ ni̱ ûta àko gachín nìꞌhiaj nej sôꞌ,
si si̱ gaꞌmin doj sa gaꞌmin dânj riñan nej sôꞌ mánj,
20 dadinꞌ nun ga̱ꞌhue gùnùkuaj nej sij nga gunïn nej sij dàj hua sun gaꞌnïnꞌ Ma̱ꞌan Ñaꞌanj an riñan nej sij:
“Ni̱ si ga̱chi̱n ꞌngo̱ guiì nej si ga̱chi̱n ꞌngo̱ yuku ni̱ gùrùn yôꞌ yiꞌî kïj dânj,
ni̱ ga̱ꞌhue ga̱rru̱n nej sij hiëj nej si ga̱ꞌhue da̱gahuiꞌ nej sij ngà lansa yôꞌ na̱nj ánj.”
21 Ni̱ ûta yuꞌhuiꞌ gahuin gunïn nej sij ni̱ giniꞌhiaj nej sij,
ni̱ rayiꞌî dan ni̱ gataj Moisés:
“Ûta yuꞌhuí sa gahuin ni̱ nda nagunanj ñùnj.”
22 Sani̱ nej suj,
ni̱ gaꞌnaꞌ nichì nej suj ñan ni̱kï̱n kïj gùꞌnàj Sión,
yumanꞌ snàꞌànj huin yiñán Ma̱ꞌan Ñaꞌanj hua̱ nìꞌnàꞌa,
Jerusalén nngaj neꞌ yàtàꞌa,
ni̱ hiuj dânj mân ûta gàꞌì mîn nej ángel,
23 ñan màn nej guiì rìgì si̱nï̱n ginikòꞌ rukû Ma̱ꞌan Jesús ni̱ gàꞌ tàj siyu̱gui ninj riñan librû tàj neꞌ yàtàꞌa,
ni̱ Ma̱ꞌan Ñaꞌanj an huin guesì nikïnꞌ riñan daranꞌ ninj,
ni̱ huê danj na̱nj mân nanè nimân nej guiì gàꞌ nagiꞌhiaj ni̱ka̱ Ma̱ꞌan Ñaꞌanj an,
24 ni̱ Ma̱ꞌan Jesús huin sa ni̱kï̱nꞌ guchraꞌ da̱ꞌa̱j ni̱ huej gi̱ꞌhiaj ni̱ guchiꞌ Ma̱ꞌan Ñaꞌanj an ꞌngo̱ duꞌhua ngà nej guiì,
ni̱ dànanj ûta gisîj tun gañanj giꞌhiaj Ma̱ꞌan Jesús dadinꞌ ga̱ꞌhue na̱du̱rëꞌëj si-ga̱kïnꞌ nêꞌ gàꞌ daꞌ tun Abel.
25 Gi̱niꞌhiaj nej suj ni̱ si̱ giꞌhiaj anêj nej suj Ma̱ꞌan sa gaꞌmin riñan nej suj.
Dadinꞌ si nun ga̱ꞌhue gìyìꞌìj huì nej guiì gudunâj ma̱ꞌan riñan sa du̱gunïn gàꞌì riñan hioꞌó nânj ninj,
dàj gàꞌ nêꞌ,
ni̱ si̱ gaꞌhue gìyìꞌìj huìꞌ riñan Ma̱ꞌan sa dugunïn gàꞌì ñùnꞌ nda neꞌ yàtàꞌa mánj.
26 Nga gaꞌmin Ma̱ꞌan Ñaꞌanj an diû dânj,
ni̱ gaꞌhuij ñûn riñan hioꞌóo,
sani̱ hia̱j ni̱ giꞌhiaj yìtï̀nj Ma̱ꞌan si-nùguànꞌanj,
ni̱ gata:
“Gi̱ꞌhiaj ñûn si ga̱ꞌhuij ñûn riñan hioꞌóo,
ni̱ huê danj gi̱ꞌhia si gìsìkìꞌ nej sa màn yàtàꞌa na̱nj ánj.”
27 Ni̱ nuguanꞌ gata:
“Aꞌngô ñûn”,
ruhuaj ga̱ta si na̱du̱naj dàj gimàn nej sa ga̱ꞌhue gìsìkìꞌ,
nej sa giꞌhia ngà raꞌa,
daꞌnga ni̱ gùnàj nej sa si̱ gisikiꞌ.
28 Huê danj ni̱,
nga ga̱na̱huin ro̱ꞌôꞌ ga̱tu̱ꞌ ñan ni̱ka̱j sun Ma̱ꞌan Cristo ni̱ nitaj si huaj gìsìkìꞌ ñan ga̱neꞌ gàꞌ mánj,
ni̱ gàꞌhuìꞌ si guruhuâ Ma̱ꞌan Ñaꞌanj an,
ni̱ ganahuin roꞌôꞌ sunuj u ni̱ rayiꞌî dan ni̱ gu̱na̱nj gi̱tsîꞌ riñan Ma̱ꞌan Ñaꞌanj an,
ni̱ gi̱ꞌhiôꞌ sa garanꞌ ruhuaj ni̱ gi̱nikaj chre̱ꞌ riñanj;
dadinꞌ Ma̱ꞌan Duꞌunꞌ ni̱ huin ꞌngo̱ ñaꞌan ga̱ꞌhue du̱nahuij daranꞌanj na̱nj ánj.