Gùyùmàn ruhuâ
11
Sa yumân ruhuô da huin,
sa giꞌhiaj si hua̱ yìtï̀nj ruhuôꞌ ga̱na̱huin ro̱ꞌoꞌ sa ànàꞌhuìꞌ,
ni̱ guyumân yìtï̀nj ruhuôꞌ si hua̱ yàngàꞌ sa ga̱na̱huin roꞌôꞌ nùnj huin si hua̱ nun giniꞌînꞌ dàj huaj.
2 Dadinꞌ guendâ guyumân ruhuâ nej sôꞌ gimân àsìj nâ ni̱ giriꞌ nìꞌhiaj nej sôꞌ si ga̱huin nej sôꞌ sí giꞌhiaj sa hua̱ hueꞌê.
3 Guendâ guyumân ruhuôꞌ ni̱ garânj daꞌngaꞌ ruhuôꞌ si ngà nuguanꞌ gaꞌmin Ma̱ꞌan Ñaꞌanj an ni̱ giꞌhia gahuin yumiguìi,
huê danj ni̱ gidaꞌa Ma̱ꞌan Ñaꞌanj an nej sa naꞌhue gùrùguìꞌ gi̱ni̱ꞌînꞌ,
ni̱ giꞌhia si gùrùguìꞌij gi̱ni̱ꞌînꞌ.
4 Guendâ guyumân ruhuâ Abel niꞌin sôꞌ Ma̱ꞌan Ñaꞌanj an,
ni̱ rayiꞌî dan ni̱ ganahuin ra̱ꞌa Ma̱ꞌan Ñaꞌanj an yuku gaꞌhuiꞌ sôꞌ riñanj gàꞌ daꞌ sa gaꞌhuiꞌ Kaín,
ni̱ guendâ giꞌhiaj sôꞌ dànanj ni̱ gataj Ma̱ꞌan Ñaꞌanj an si gahuin sôꞌ sí giꞌhiaj sa ni̱ka̱a,
ni̱ ganahuin ra̱ꞌa Ma̱ꞌan Ñaꞌanj an ofrenda gaꞌhuiꞌ sôꞌ riñanj,
ni̱ nùnj si gahuiꞌ sôꞌ sani̱ hua̱ na̱nj gananï̂n riñan ñanj rayiꞌî sa giꞌhiaj sôꞌ.
5 Guendâ guyumân ruhuâ Enoc ni̱ hua̱ nìꞌnàꞌ sôꞌ ni̱ ginikaj Ma̱ꞌan Ñaꞌanj an gaꞌan sôꞌ,
ni̱ nga nanaꞌhuiꞌ nej guiì sôꞌ ni̱ nun gànàrìꞌ ninj sôꞌ mánj,
dadinꞌ ginikaj Ma̱ꞌan Ñaꞌanj an gaꞌan sôꞌ yàtàꞌa;
sani̱ nga nï̀nꞌ gàchin gi̱nikaj Ma̱ꞌan Ñaꞌanj an ga̱ꞌan sôꞌ,
ni̱ gàꞌ giniꞌin nej guiì si dagahuin hueꞌê sôꞌ riñan Ma̱ꞌan Ñaꞌanj an nga gane sòꞌ riñan hioꞌó nânj.
6 Sani̱ si nitaj si guyumân ruhuôꞌ ni̱ nitaj àmàn huaj gi̱ꞌhio sa garanꞌ ruhuâ Ma̱ꞌan Ñaꞌanj an mánj;
dadinꞌ ña̱ꞌa̱n huaj si nej guiì huaꞌanj nichì riñan Ma̱ꞌan Ñaꞌanj an,
ni̱ daꞌhui ninj ni̱ gùyùmàn ruhuâ ninj si hua̱ Ma̱ꞌan Ñaꞌanj an,
ni̱ hua̱ ruhuâ Ma̱ꞌan Ñaꞌanj an gàꞌhuij premiun riñan nej guiì naꞌhuiꞌ Ma̱ꞌan na̱nj ánj.
7 Guendâ guyumân ruhuâ Noé,
ni̱ nga gunïn sôꞌ gataj naꞌanj Ma̱ꞌan Ñaꞌanj an si gàmànꞌ,
sani̱ nùnj huin si nun gi̱ni̱ꞌin sôꞌ riñan gumàan,
ni̱ ûta hio dagahuin sôꞌ ni̱ giꞌhiaj yu̱gui sôꞌ barku nìko ñan gi̱nun sôꞌ ni̱ ga̱na̱ni̱n sôꞌ ngà nej duguiꞌ sôꞌ;
sani̱ nun gùyùmàn ruhuâ aꞌngô nej guiì nuguanꞌ gananï̂n sôꞌ,
ni̱ rayiꞌî dan ni̱ gaꞌanj niꞌhia daranꞌ nej guiì gimân yumiguì si̱nï̱ïn,
sani̱ ganariꞌ sôꞌ nanìꞌhiaj sôꞌ dadinꞌ gataj Ma̱ꞌan Ñaꞌanj an si gahuin sôꞌ sí giꞌhiaj sa ni̱ka̱a,
ni̱ ganahuin ra̱ꞌa sôꞌ nuguanꞌ nânj guendâ guyumân ruhuâ sôꞌ na̱nj ánj.
8 Ni̱ guendâ guyumân ruhuâ Abraham nga gakḯn Ma̱ꞌan Ñaꞌanj an,
ni̱ dagahuin sôꞌ nuguanꞌ gata gu̱nïn sôꞌ ni̱ gudunâj sôꞌ yiñán sôꞌ,
ni̱ gahui sôꞌ ni̱ gaꞌanj sôꞌ ñan gataj Ma̱ꞌan Ñaꞌanj an ga̱ꞌhuij ga̱na̱huin raꞌa sôꞌ;
sani̱ nun niꞌin sôꞌ dànèꞌ gùchìꞌ sôꞌ mánj.
9 Ni̱ guyumân ruhuâ sôꞌ ni̱ gane sôꞌ riñan hioꞌó ñan gataj Ma̱ꞌan Ñaꞌanj an ga̱ꞌhuij raꞌa sôꞌ,
ni̱ giꞌhiaj sôꞌ guendâ si sê doꞌó sôꞌ gahuin ñan nne sôꞌ,
ni̱ gahuin sôꞌ dàj rûnꞌ huin ꞌngo̱ sí ꞌna̱ꞌ aꞌngô país,
ni̱ gane sôꞌ ruhuâ hueꞌ atsîj i ngà Isaac ni̱ nga Jacob,
ni̱ gu̱ña̱n hua sa ga̱na̱huin raꞌa nej sôꞌ;
10 dadinꞌ gàꞌ niꞌin sij si ga̱na̱huin raꞌa sij ga̱ne sij ꞌngo̱ yumanꞌ snàꞌànj ñan nitaj si huaj ga̱na̱huij,
dadinꞌ Ma̱ꞌan Ñaꞌanj an huin sa giri ra̱ dàj gaj ni̱ Ma̱ꞌan Ñaꞌanj an huin sa giꞌhiaj yumanꞌ snàꞌànj dânj.
11 Ni̱ guendâ guyumân ruhuâ Sara siyànà gahuin sa a̱tïn,
ni̱ ganahuin ra̱ꞌa guesâ guendâ ga̱ꞌhue gi̱nun ri̱ki;
ni̱ gàꞌ ûta ata hioꞌo nga gaꞌnga daꞌni,
sani̱ guyumân ruhuaj dadinꞌ gàꞌ niꞌin si yàngàꞌ hia da̱gahuin Ma̱ꞌan Ñaꞌanj an nuguanꞌ gata na̱nj ánj.
12 Ni̱ huê rayiꞌî dan,
ni ꞌngo̱ rïn Abraham huin,
sani̱ gàꞌ doj huaj ni̱ gàhuìꞌ sôꞌ,
sani̱ dàj rûnꞌ mân nej atïꞌ màn neꞌ yàtàꞌa ni̱ dàj rûnꞌ mân nej hioꞌó chru̱ màn duꞌhua nne ña̱nꞌa̱nj,
huê danj ga̱ ûta gàꞌì daꞌní sôꞌ.
13 Ni̱ guyumân ruhuâ daranꞌ nej sôꞌ sani̱ nun ga̱na̱huin ra̱ꞌa nej sôꞌ sa gaꞌnḯn ñan nej sôꞌ,
huê danj ni̱ gahuiꞌ nej sôꞌ,
ni̱ nda gànꞌ nikïnꞌ nej sôꞌ giniꞌhiaj nej sôꞌ riñan hioꞌó gataj Ma̱ꞌan Ñaꞌanj an nàgàꞌhuij raꞌa nej sôꞌ,
ni̱ guyumân ruhuâ nej sôꞌ,
ni̱ gaꞌmin nej sôꞌ nuguanꞌ ni̱ꞌña̱nj an riñan Ma̱ꞌan sa nne hiuj dânj,
ni̱ gataj nej sôꞌ si huin nej sôꞌ dàj rûn huin sí ꞌna̱ꞌ aꞌngô país ni̱ gataj nej sôꞌ si gahuin nej sôꞌ sí gaché nun riñan hioꞌóo.
14 Dadinꞌ nej sôꞌ gataj dànanj,
ni̱ nda nîꞌnïnj chre giꞌhiaj nej sôꞌ si ga̱ra̱n daꞌngaꞌ ruhuôꞌ si nanaꞌhuiꞌ nej sôꞌ aꞌngô país hua̱ hueꞌê doj ga̱ne nej sôꞌ;
15 dadinꞌ si ni̱ ganï̂n ruhuâ nej sôꞌ gànànìkàj ñûn nej sôꞌ ñan gane nej sôꞌ,
ni̱ hua̱ diû si nànìkàj ñûn nej sôꞌ na̱nꞌ nej sôꞌ ñan gahui nej sôꞌ gaꞌnaꞌ nej sôꞌ.
16 Sani̱ huin ruhuâ nej sôꞌ ga̱na̱huin ra̱ꞌa nej sôꞌ ꞌngo̱ ñan hua̱ hueꞌê doj ga̱ne nej sôꞌ,
ni̱ nânj huin yumanꞌ ña̱ꞌa̱nj;
ni̱ rayiꞌî dan ni̱ nitaj si giriꞌ nàꞌàj Ma̱ꞌan Ñaꞌanj an si ga̱ta si huin Da̱ꞌa̱nj nej sôꞌ;
dadinꞌ gàꞌ giꞌhiaj yu̱gui ꞌngo̱ yumanꞌ snàꞌànj ñan ga̱ne nej sôꞌ.
17 Nga gayakaj Ma̱ꞌan Ñaꞌanj an daꞌngaꞌa ngà Abraham,
ni̱ guyumân ruhuâ sôꞌ nga gataj Ma̱ꞌan Ñaꞌanj an si da̱gahuiꞌ sôꞌ daꞌní sôꞌ riñanj,
huê danj ni̱ ga ruhuâ sôꞌ da̱gahuiꞌ sôꞌ ꞌngo̱ rïn daꞌní sôꞌ Isaac riñanj:
18 “Ni̱ gàꞌ gataj Ma̱ꞌan Ñaꞌanj an gu̱nïn sôꞌ:
Nga Isaac ni̱ gi̱ꞌhia si gi̱yi̱na̱nj danꞌ na̱nj ánj.”
19 Ni̱ garânj yina sôꞌ gi̱ꞌhiaj sôꞌ dànanj dadinꞌ niꞌin sôꞌ sí ûta nùkuaj Ma̱ꞌan Ñaꞌanj an gi̱ꞌhia si gànàꞌnï̀nj daꞌní sôꞌ siganï̂nj nej nîman,
ni̱ nânj gahuin ꞌngo̱ daꞌngaꞌa,
dadinꞌ nun gàhuìꞌ yàngàꞌ daꞌní sôꞌ dadinꞌ nun ga̱ꞌhue̱j Ma̱ꞌan Ñaꞌanj an si gàhuìꞌ sôꞌ huê danj ni ganahuin ra̱ꞌa sôꞌ daꞌní sôꞌ na̱nj ánj.
20 Guyumân ruhuâ Isaac ni̱ gaꞌmin sôꞌ si ga̱ꞌna̱ꞌ nej sa hua̱ hueꞌê riñan daꞌní sôꞌ Jacob ngà riñan daꞌní sôꞌ Esaú nej gui ga̱ꞌna̱ꞌ neꞌ ña̱an.
21 Ni̱ guyumân ruhuâ Jacob,
rayiꞌî dan ni̱ nga nï̀nꞌ gachin gàhuìꞌ sôꞌ,
ni̱ gataj sôꞌ si ga̱ꞌna̱ꞌ nej sa hua̱ hueꞌê riñan nej daꞌní José,
ni̱ duguꞌnïnꞌ sôꞌ chrun si-nìꞌì sôꞌ riñan hioꞌóo ni̱ ginûn ña̱ꞌa̱nj sôꞌ riñan Ma̱ꞌan Ñaꞌanj an.
22 Ni̱ guendâ guyumân ruhuâ José,
ni̱ rayiꞌî dan ni̱ nga nï̀nꞌ ga̱chin gàhuìꞌ sôꞌ,
ni̱ gataj sôꞌ si nej gui ga̱ꞌna̱ꞌ neꞌ ña̱an ni̱ ga̱hui̱ nej Israelita riñan hioꞌó Egipto,
ni̱ rayiꞌî dan ni̱ gaꞌnïnꞌ sôꞌ suun si nga gahui nej sij hiuj dânj ni̱ gi̱ni̱kaj nej sij nneè kú sôꞌ nga ga̱hui̱ nej sij hiuj dânj ga̱ꞌa̱nj nej sij,
23 Ni̱ guendâ guyumân ruhuâ rej Moisés nga nni sôꞌ,
ni̱ rayiꞌî dan ni̱ giꞌnïnj huì sôꞌ huàꞌnï̀nj ahuii giꞌhiaj rej sôꞌ ngà nni sôꞌ,
dadinꞌ giniꞌin nej sôꞌ si ûta nìhiàꞌ hua silíj dânj,
ni̱ rayiꞌî dan ni̱ nun gu̱yuꞌhuiꞌ nej sôꞌ ngà ley giri rà síchìj rey Faraón gi̱ꞌhiaj sôꞌ.
24 Ni̱ guendâ guyumân ruhuâ Moisés,
rayiꞌî dan ni̱ nga gachij sôꞌ,
ni̱ nun ga̱ꞌhue̱j sôꞌ si huin sôꞌ daꞌní siyànà huin daꞌní Faraón,
25 ni̱ ganagui sôꞌ gi̱ranꞌ sa̱ñu̱n sôꞌ ngà yumanꞌ huin yiñán Ma̱ꞌan Ñaꞌanj an,
gàꞌ daꞌ guendâ ga̱na̱huin nìhiàꞌ ruhuâ sôꞌ man ꞌngo̱ diû lij ngà nneè kú sôꞌ,
26 ni̱ ganï̂n ruhuâ sôꞌ si dànanj yi̱ruꞌhue doj hua nej sañun ganahuin ra̱ꞌa sôꞌ ngà Ma̱ꞌan Cristo,
gàꞌ daꞌ nej sa yi̱ruꞌhue hua̱ riñan nej sí Egipto;
dadinꞌ gaꞌnḯn ñan sôꞌ riñan rasu̱n ga̱na̱huin ra̱ꞌa sôꞌ gi̱ꞌhiaj Ma̱ꞌan Ñaꞌanj an rayiꞌî sun giꞌhiaj sôꞌ.
27 Ni̱ guendâ guyumân ruhuâ sôꞌ ni̱ gudunâj sôꞌ Egipto,
ni̱ nun gu̱yuꞌhuiꞌ sôꞌ si gi̱na̱ꞌan ruhuâ rey Faraón niꞌin síchìj dânj sôꞌ,
dadinꞌ ganikïnꞌ ran sôꞌ ni̱ giꞌhiaj sôꞌ dàj rûnꞌ giꞌhiaj ꞌngo̱ sí giniꞌin ràngàꞌ riñan Ma̱ꞌan Ñaꞌanj an na̱nj ánj.
28 Ni̱ guyumân ruhuâ sôꞌ ni̱ rayiꞌî dan ni̱ giꞌhiaj sôꞌ pascua ni̱ dagamanꞌ sôꞌ tun riñan nej rahueꞌe,
daꞌnga ni̱ nga gachîn ángel dagahuij nej silíj yàhuàꞌ huin daꞌní nej Egipto ni̱ si̱ dagahuij nej daꞌní yàhuàꞌ nej israelita mánj.
29 Ni̱ guendâ guyumân ruhuâ nej israelita ni̱ rayiꞌî dan ni̱ gachîn nej sij da̱nï̱n nne ña̱ꞌa̱nj ma̱re,
ni̱ ganahuin nàkò hioꞌóo gaché nej sij;
ni̱ huê danj na̱nj gachin nej egipcio ruhuâ nne ña̱ꞌa̱nj ma̱re,
sani̱ ganûn yichrá nej sij nga gayamânj nej sij nnee ni̱ gahuiꞌ nej sij.
30 Ni̱ guendâ guyumân ruhuâ nej israelita ni̱ ganikàj nej sij rukû hiëj yìngà xi ni̱kï̱nꞌ rukû Jerikó ni̱ ganatu giꞌhiaj nej sij.
31 Ni̱ guyumân ruhuâ Rahab siyànà guduꞌhuêj ma̱ꞌan,
ni̱ gachrîj huij nej israelita gaꞌanj gi̱niꞌhiaj dàj hua yumanꞌ Jerikó ni̱ ga dïnꞌïnj riñan nej sôꞌ,
huê danj ni̱ nga gaꞌanj du̱nahuij nej israelita nej sí nun gùyùmàn ruhuâ niꞌin nej sôꞌ ni̱ nun da̱gaꞌhuiꞌ nej sôꞌ siyànà dânj mánj.
32 Nùnj huin doj si gàtà hia̱j ràꞌaj.
Dadinꞌ dànanj ga̱chin doj diû gànàtàj rayiꞌî Gedeón,
rayiꞌî Barac,
rayiꞌî Sansón,
rayiꞌî Jefté,
rayiꞌî David,
ni̱ huê danj na̱nj rayiꞌî Samuel ga rayiꞌî nej profeta;
33 ni̱ guendâ guyumân ruhuâ nej sôꞌ ni̱ giꞌhiaj ga̱nan nej sôꞌ aꞌngô nej yumanꞌ gimân nga diû dânj,
ni̱ giꞌhiaj nej sôꞌ sa ni̱ka̱a,
ni̱ ganahuin ra̱ꞌa nej sôꞌ sa gataj Ma̱ꞌan Ñaꞌanj an ga̱na̱huin ra̱ꞌa nej sôꞌ,
ni̱ ganarán nej sôꞌ duꞌhua nej sigeꞌej e,
34 ni̱ gudunaꞌâj nej sôꞌ ñaꞌan nìko xi,
ni̱ gunânj nej sij riñan nej sí ruhuâ da̱gahuiꞌ ngà yîti nej sij,
ni̱ nitaj guesâ nej sôꞌ sani̱ nga gutaꞌ nej sôꞌ ni̱ ganahuin nùkuaj nej sôꞌ riñan nej sí gutaꞌ ngà nej sôꞌ,
ni̱ giꞌhiaj nej sôꞌ gunânj nej stadû ꞌna̱ꞌ aꞌngô país.
35 Nej siyànàa ni̱ gànàrìꞌ duguiꞌ ninj ngà nej duguiꞌ ninj nga gànàꞌnï̀nj nej sôꞌ siganï̂nj nej nîman;
sani̱ aꞌngô da̱ꞌa̱j nej dinï̂nt ni̱ ga ruhuâ nej sôꞌ giranꞌ sa̱ñu̱n nej sôꞌ huê danj ni̱ gahuiꞌ nej sôꞌ,
dadinꞌ nun ga̱ra̱n yina nej sôꞌ si du̱nanin aꞌngô nej síi nej sôꞌ,
dadinꞌ niꞌin nej sôꞌ si gànàꞌnï̀nj nej sôꞌ siganï̂nj nej nîman ni̱ gànàrìꞌ nej sôꞌ ñan hua̱ hueꞌê doj ga̱ne nej sôꞌ.
36 Ni̱ riñan aꞌngô nej sôꞌ ni̱ gaꞌmin kï̱j nej guiì ni̱ gañun nej sôꞌ,
ni̱ da̱ꞌa̱j nej sôꞌ gatûj dukuâ gaꞌa lij ni̱ aꞌngô da̱ꞌa̱j nej sôꞌ gatûj dukuâ gaꞌ nìko.
37 Ni̱ da̱ꞌa̱j nej sôꞌ garrûn nej sij hiëj,
ni̱ aꞌngô da̱ꞌa̱j nej sôꞌ gaꞌneꞌ nej sij ngà agaꞌ sierra da̱ꞌa̱j nneè kú nej sôꞌ,
ni̱ da̱ꞌa̱j nej sôꞌ gutïnꞌ nej sij ngà yiti,
ni̱ gaché nun nej sôꞌ ni̱ gaꞌnaꞌ nej sôꞌ neꞌ dànanj ni̱ gaꞌanj nej sôꞌ neꞌ dàmanj ni̱ ngà nnïnj matsïj ni̱ ngà nnïnj stanee garán nej sôꞌ nneè kú nej sôꞌ,
ni̱ ûta àko ranꞌ nej sôꞌ,
ûta huin ruhuâ nej sôꞌ,
ni̱ ûta duguaꞌì nej sí dânj nej sôꞌ;
38 ni̱ sí sàꞌ hia nï̀nꞌïn gahuin nej sij,
ni̱ nun daꞌhui nej sí nânj ga̱ne nej sôꞌ siganï̂nj nej sij dadinꞌ ûta kï̱j hua nej sôꞌ;
sani̱ dànanj gata ra̱ꞌa nej sôꞌ nej sij huê danj ni̱ gahui nej sij gaꞌanj nej sij ruhuâ yumanꞌ gahuin yiñán nej sij,
ni̱ nitaj ñan ga̱ne nej sij ga ni̱ gaché nun nej sij riñan hioꞌó nakòo,
ni̱ giꞌnïnj nej sij riki kïj ï,
ni̱ gane nej sij ruhuâ huej e,
ni̱ gane nej sij ruhuâ nej huej hueꞌ màn riñan hioꞌó nàkòo.
39 Huê dànanj giranꞌ sa̱ñu̱n daranꞌ nej sij,
ni̱ guendâ guyumân ruhuâ nej sij niꞌin nej sij Ma̱ꞌan Ñaꞌanj an ni̱ giranꞌ nej sij dànanj,
ni̱ giniꞌin nej guiì si ûta hueꞌê giꞌhiaj nej sij,
sani̱ nga nï̀nꞌ gane nej sij riñan hioꞌó nânj ni̱ nun ga̱na̱huin ra̱ꞌa nej sij sa gataj Ma̱ꞌan Ñaꞌanj an ga̱ꞌhuij riñan nej sij mánj;
40 ri̱ki̱ Ma̱ꞌan Ñaꞌanj an sa hua̱ hueꞌê doj ga̱chin riñan nêꞌ,
ni̱ Ma̱ꞌan Ñaꞌanj an huin sa gi̱ꞌhiaj ga̱na̱huin ni̱ka̱ nej sij nga sa nika giꞌhiaj Ma̱ꞌan ngà nêꞌ.