10
Dadinꞌ si-ley Moisés,
ni̱ man ꞌngo̱ gayu̱nꞌun huin riñan nej sa sàꞌ ga̱ꞌna̱ꞌ gi̱ꞌhiaj Ma̱ꞌan Ñaꞌanj an neꞌ ña̱n doj,
sani̱ nitaj si huaj dàj rûnꞌ hua sa yàngàꞌ hia mánj.
Rayiꞌî dan ni̱ naꞌhue na̱gi̱ꞌhiaj ni̱ka̱ ley nej guiì ginikaj nej yuku gaꞌanj ninj riñan nej rej,
guendâ dagahuiꞌ nej sôꞌ riñan Ma̱ꞌan Ñaꞌanj an daꞌ hioꞌo rayiꞌî si-ga̱kïnꞌ ninj mánj.
2 Dadinꞌ si yàngàꞌ ga̱ꞌhue gi̱ꞌhiaj ley si gànàrë̀ꞌ gakï̱nꞌ hua̱ riñan daꞌngaꞌ nu̱n ruhuâ nimân nej guiì,
ni̱ si̱ giꞌhia si ga̱na̱nun ruhuâ ninj niꞌin ninj si-ga̱kïnꞌ ninj,
hiôꞌ ni̱ si̱ dagahuiꞌ ninj nej yuku gàꞌ saj mánj.
3 Sani̱ nga dagahuiꞌ nej sij yuku daꞌ hioꞌo ni̱ giꞌhia si ga̱na̱nun ruhuâ nej sij niꞌin nej sij gakï̱nꞌ giꞌhiaj nej sij;
4 dadinꞌ naꞌhue ga̱ꞌne̱ tun nej rô ngà tun nej guâtu si-ga̱kïnꞌ nej guiì mánj.
5 Rayiꞌî dan ni̱ nga guyumân Ma̱ꞌan Jesús ruhuâ yumiguìi ni̱ gata:
Nun ga̱ra̱nꞌ ruhuâ Ma̱ꞌan rèꞌ si da̱gahuiꞌ nej sij yuku ni̱ ri̱ki̱ nej sij ofrenda riñan Ma̱ꞌân rèꞌ,
sani̱ giꞌhiaj yu̱gui Ma̱ꞌan rèꞌ si ga̱ nneè ku ni̱ ga̱huín guiì riñan Ma̱ꞌân rèꞌ.
6 Nun ga̱ra̱nꞌ ruhuâ Ma̱ꞌan rèꞌ si gàhuìꞌ ûta gàꞌì nej yuku ni̱ na̱ruꞌhue nej sij tun nej xuj rayiꞌî si-ga̱kïnꞌ nej sij riñan Ma̱ꞌan rèꞌ mánj.
7 Hiôꞌ ni̱ gatâ:
“Hué ni̱kï̱nꞌ nan,
ni̱ dàj rûnꞌ nnunj riñan ñanj librû rayiꞌí ni̱ hua̱ ruhuâj da̱gahuín dàj rûnꞌ garanꞌ ruhuâ Ma̱ꞌân rèꞌ na̱nj ánj.”
8 Ni̱ gàꞌ si̱nï̱n taj riñan ñanj:
Nun ga̱ra̱nꞌ ruhuâ Ma̱ꞌan rèꞌ si da̱gahuiꞌ nej sij yuku ni̱ si ri̱ki̱ nej sij ofrenda riñan Ma̱ꞌân rèꞌ ni̱ nitaj si garanꞌ ruhuâ Ma̱ꞌân rèꞌ,
si da̱gahuiꞌ nej guiì ûta gàꞌì nej yuku riñan Ma̱ꞌân rèꞌ.
Ni̱ nitaj si garanꞌ ruhuâ Ma̱ꞌân rèꞌ si na̱ru̱ꞌhue nej sij tun rayiꞌî si-ga̱kïnꞌ nej sij ni̱ nùnj si huê danj huin sa gaꞌnïnꞌ su̱n ley,
9 ni̱ taj ñûn riñan ñanj:
“ꞌNàj guendâ gi̱ꞌhia sa garanꞌ ruhuâ Ma̱ꞌân rèꞌ,
na̱nj Señor.”
Ni̱ gaꞌne rèꞌ nuguanꞌ gaꞌnïnꞌ su̱n guendâ gàhuìꞌ nej yuku rayiꞌî gakï̱nꞌïn,
ni̱ na̱gi̱ꞌhiaj nàkà ñûn Ma̱ꞌân rèꞌ aꞌngôj na̱nj ánj.
10 Ni̱ giꞌhiaj Ma̱ꞌan Ñaꞌanj an ganaruhui si-ga̱kïnꞌ nêꞌ guendâ giꞌhiaj Ma̱ꞌan Jesús sa garanꞌ ruhuâ Ma̱ꞌan Ñaꞌanj an,
dadinꞌ ꞌngo̱ rïn ni̱ nìgànj gahuiꞌ Ma̱ꞌan Jesús rayiꞌî si-ga̱kïnꞌ nej guiì.
11 Ni̱ yàngàꞌ hia ni̱ daranꞌ nej gui gatûj nej rej ruhuâ nuhuî nìko guendâ gunânj gi̱tsi nej sôꞌ riñan Ma̱ꞌan Ñaꞌanj an ni̱ dagahuiꞌ nej sôꞌ nej yuku,
sani̱ nitaj àmàn gaꞌhue ganaruhui si-ga̱kïnꞌ nej guiì giꞌhiaj tun nej yuku dagahuiꞌ nej sôꞌ mánj.
12 Sani̱ ꞌngo̱ rïn gahuiꞌ Ma̱ꞌan Cristo rayiꞌî si-ga̱kïnꞌ nej guiì ni̱ nìgànj giꞌhiaj ga̱nanj riñan nej gakï̱nꞌïn,
huê danj ni̱ gaꞌanj ga̱ne raꞌa neꞌ huàꞌ Ma̱ꞌan Ñaꞌanj an.
13 Ni̱ hiuj dânj nne ganaꞌhui nda gunùkuaj Ma̱ꞌan Ñaꞌanj an gi̱ꞌhiaj ga̱nanj riñan daranꞌ nej guiì gunïnꞌ ngà Ma̱ꞌan;
14 dadinꞌ ꞌngo̱ rïn gahuiꞌ Ma̱ꞌan Cristo ni̱ rayiꞌî dan ni̱ ga̱ꞌhue gi̱nikaj Ma̱ꞌan Ñaꞌanj an nimân nìko rayiꞌî nej guiì gananikàj ruhuâ rayiꞌî si-ga̱kïnꞌ,
ni̱ nagiꞌhiaj ni̱kaj ninj ni̱ ga̱ꞌhue ga̱ne nìgànj ninj ngà Ma̱ꞌan.
15 Ni̱ huê danj hua hia gataj Ma̱ꞌan Espíritu Santo nga gaꞌmin:
16 Gataj Ma̱ꞌan Señor:
Nânj huin ꞌngo̱ duꞌhua gùchìj ngà nej guiì,
diû ga̱ꞌna̱ꞌ neꞌ ña̱an.
Ni̱ gàꞌnï̀n si-ley ruhuâ nimân ninj,
ni̱ gàchrùnj si-ley ruhuâ daꞌngaꞌ ninj,
17 ni̱ gataj Ma̱ꞌan Señor:
Ni̱ nitaj àmàn ga̱na̱nun ruhuâj niꞌín si-ga̱kïnꞌ ninj ngà nej sa kï̱j hua giꞌhiaj ninj gàꞌ mánj.
18 Huê danj ni̱ nga gàꞌ ginika nimân nìko rayiꞌî si-ga̱kïnꞌ ninj,
huê danj ni̱ nitaj si huaj gàhuìꞌ yuku rayiꞌî si-ga̱kïnꞌ ninj gàꞌ mánj.
Daꞌhuîꞌ ga̱huin nichrûnꞌ riñan Ma̱ꞌan Ñaꞌanj an
19 Di̱nï̂nj,
tun Ma̱ꞌan Jesucristo giꞌhia̱j ni̱ giyiꞌnï̂nj ni̱ ga̱ꞌhue ga̱tu̱ꞌ lugâ gè staꞌuu,
20 rayiꞌî guendâ gahuiꞌ Ma̱ꞌan Señor Jesús ni̱ huaj ga̱ꞌhue gùchìꞌ riñan Ma̱ꞌan Ñaꞌanj an ni̱ rayiꞌî dan ni̱ ña̱ꞌa̱n huaj si ga̱che̱ꞌ chrej nàkà gidigân Ma̱ꞌan Jesús,
dadinꞌ àsìj nâ ni̱ gàꞌ si ꞌngo̱ nej guiì nitaj si gatûj lugâ gè staꞌuu,
sani̱ hia̱j ni̱ huaj ga̱ꞌhue ga̱che̱ꞌ chrej nàkà gi̱ꞌhiaj ga̱ nìꞌnòꞌ ni̱ gùchìꞌ riñan Ma̱ꞌan Jesús.
21 Ni̱ Ma̱ꞌan Jesús huin Rej huin ña̱n nï̀nꞌïn nikïnj riñan nêꞌ neꞌ yàtàꞌa,
22 ni̱ ga̱ꞌa̱nj nichìꞌ riñanj ngà daranꞌ nimûnꞌ,
ni̱ hueꞌê ga̱ ruhuôꞌ ni̱ yìtï̀nj ga̱ ruhuôꞌ ni̱ gùyùmàn ruhuôꞌ,
ni̱ na̱gi̱ꞌhiaj hueꞌêꞌ nimûnꞌ ni̱ gu̱du̱noꞌ sa aꞌnanꞌ giꞌhiaj daꞌngaꞌ nu̱n ruhuâ nimûnꞌ,
ni̱ ga̱na̱ꞌnï̱nꞌ muꞌûnꞌ ngà si-nùguànꞌ Ma̱ꞌan Ñaꞌanj an.
23 Ga̱ni̱kïnꞌ runꞌ ni̱ ga̱ yìtï̀nj ruhuôꞌ,
ni̱ si̱ ganï̂n huàꞌ ruhuôꞌ,
rayiꞌî chrej hua̱ hueꞌê huoꞌ dadinꞌ ànàꞌhuìꞌ si ga̱na̱huin ràꞌa Ma̱ꞌan Ñaꞌanj an ñùnꞌ.
24 Ni̱ nàꞌhuìꞌ dàj guruguñuꞌun nej duguîꞌ ni̱ nàgàꞌhuìꞌ chrej nùkuaj ruhuâ,
ni̱ ga ꞌì ruhuôꞌ ni̱ du̱guꞌnïnꞌ gi̱ꞌhiôꞌ sa sàꞌa ngà ꞌngo̱ ni̱ aꞌngô nej sij na̱nj ánj;
25 ni̱ si̱ gudunôꞌ guendâ nàràꞌhuìꞌ ngà nej sôꞌ nìkòꞌ rukû Ma̱ꞌan Cristo,
dàj rûnꞌ giꞌhiaj aꞌngôꞌ da̱ꞌa̱j nej sôꞌ nitaj si naraꞌhuiꞌ ngà nej sôꞌ nìkòꞌ rukû Ma̱ꞌan Cristo,
sa daꞌhuîꞌ gi̱ꞌhiôꞌ huin si du̱naꞌngoꞌ riñan nej sij dadinꞌ gàꞌ gahuin nichrunꞌ gui ga̱ꞌna̱ꞌ ñûn Ma̱ꞌan Señor.
Dunaꞌnga si ûta gudadû ga̱ ni̱ si̱ giꞌhiaj gakï̱nꞌïn
26 Dadinꞌ si gàꞌ giniꞌînꞌ nuguanꞌ yàngàꞌa ni̱ neꞌ rùkù ni̱ hua̱ na̱nj hua̱ ruhuôꞌ gi̱ꞌhioꞌ gakï̱nꞌïn,
hiôꞌ ni̱ si̱ ga̱ꞌhue gi̱nikaj Ma̱ꞌan Ñaꞌanj an nimân nìko rayiꞌî nej gakï̱nꞌ dânj dadinꞌ nitaj si huaj gàhuìꞌ ñûn Ma̱ꞌan Jesús gàꞌ mánj,
27 man aꞌngô rïn sa gànàꞌhuìj nej guiì giꞌhiaj gakï̱nꞌïn huin ga̱na̱huin raꞌa ninj sañun nìko xi,
dadinꞌ ga̱na̱nikïnꞌ ninj riñan Ma̱ꞌan Ñaꞌanj an guendâ na̱giꞌhia guenda ngà ninj,
ni̱ nda nayumàn chre ñaꞌan nu̱n hiuj dânj ni̱ nda na̱du̱ta̱ chre ninj na̱nj ánj.
28 Ni̱ guiì nitaj si dagahuin sa taj ley gaꞌhuiꞌ Ma̱ꞌan Ñaꞌanj an raꞌa Moisés,
ni̱ si giniꞌin huìj ni̱ huàꞌnï̀nj guiì gakï̱nꞌ giꞌhiaj ninj ni̱ nitaj si huaj ga̱na̱nï̱n àko ruhuâ nej sôꞌ niꞌin nej sôꞌ,
ni̱ hua̱ ni̱ña̱n si gàhuìꞌ guiì dânj na̱nj ánj.
29 Ni̱ ngà tun Ma̱ꞌan Jesús guchiꞌ Ma̱ꞌan Ñaꞌanj an ꞌngo̱ duꞌhua ngà nej guiì,
ni̱ dàj nìko kastîgu ga̱na̱huin ra̱ꞌa nej guiì gurûn tun Ma̱ꞌan Jesús ruhuâꞌ hia̱j doj,
dadinꞌ ngà tun ni̱ ga̱ꞌhue ginikaj Ma̱ꞌan Ñaꞌanj an nimân nìko rayiꞌî si-ga̱kïnꞌ ninj,
sani̱ nun gi̱nikaj chre̱j ninj ngà tun Ma̱ꞌan Jesús ni̱ giꞌhiaj ninj si ga̱huin sa kï̱j huaa ni̱ rayiꞌî dan ni̱ giꞌhiaj ninj si ginaꞌan ruhuâ Ma̱ꞌan Espíritu Santo na̱nj ánj.
30 Dadinꞌ gàꞌ niꞌînꞌ dàj gataj Ma̱ꞌan Ñaꞌanj an:
“Ni̱ hua̱ ni̱ña̱n si gi̱ꞌhia gi̱ranꞌ sa̱ñu̱n ninj ni̱ naruꞌhuej dàj na̱nj hua ma̱ꞌan sa giꞌhiaj ninj ni̱ huê dànanj gataj Ma̱ꞌan Señor.”
Ni̱ aꞌngô ñûn taj riñan ñanj:
“Ni̱ na̱gi̱ꞌhiaj Ma̱ꞌan Señor guendâ ngà nej guiì huin yiñan na̱nj ánj.”
31 Ûta yuꞌhuiꞌ hua sa̱ñu̱n ga̱na̱huin ra̱ꞌa nej guiì nitaj si dagahuin riñan Ma̱ꞌan Ñaꞌanj hua̱ nìꞌnàꞌa na̱nj ánj.
32 Ga̱na̱nun ruhuâ nej suj dàj giranꞌ nej suj nej gui gâchin,
nga ganahuin ra̱ꞌa nej suj nuguanꞌ yàngàꞌa,
dadinꞌ ûta giranꞌ sa̱ñu̱n nej suj sani̱ ga nùkuaj ruhuâ nej suj;
33 hua̱ da̱ꞌa̱j nej suj ni̱ ûta kï̱j gaꞌmin nej guiì riñan nej suj ni̱ gata ràꞌa nej sôꞌ nej suj ni̱ ûta ganahuin nìhiàꞌ ruhuâ nej guiì rìgìi rayiꞌî sañun giranꞌ nej suj;
ni̱ huê danj na̱nj ganakaj duguiꞌ nej suj ngà nej sôꞌ giranꞌ sa̱ñu̱n dàj rûnꞌ giranꞌ sa̱ñu̱n nej suj.
34 Dadinꞌ huê danj na̱nj gananï̂n àko ruhuâ nej suj niꞌin nej suj nej sôꞌ ꞌnï̱nj dukuâ gaꞌa,
ni̱ nga gaꞌnêj nej sí gata rùhuà nej suj,
siꞌhiaj nej suj ni̱ ga nìhiàꞌ ruhuâ nej suj rayiꞌî sañun giranꞌ nej suj,
dadinꞌ gàꞌ niꞌin nej suj si ûta hueꞌê ga̱ sa ga̱na̱huin ra̱ꞌa nej suj ni̱ gìrìꞌ nej suj ñan hua̱ hueꞌê ga̱ne nìgànj nej suj neꞌ yàtàꞌa.
35 Rayiꞌî dan,
ni̱ si̱ gudunâj nej suj si ginu̱n ñan nej suj Ma̱ꞌan Ñaꞌanj an,
dadinꞌ si huê danj gi̱ꞌhiaj nej suj ni̱ ûta nìko hua sa gànàrìꞌ nej suj ga̱na̱ka̱j nej suj rayiꞌî sun giꞌhiaj nej suj na̱nj ánj;
36 dadinꞌ ña̱ꞌa̱n huaj si ga̱ nùkuaj ruhuâ nej suj,
ni̱ nga gisîj giꞌhiaj nej suj sa garanꞌ ruhuâ Ma̱ꞌan Ñaꞌanj an,
ni̱ gìrìꞌ nej suj sa gataj Ma̱ꞌan Ñaꞌanj an ri̱kij riñan nej suj.
37 Dadinꞌ huê danj taj riñan ñanj:
Dadinꞌ doj sînj huaj,
ni̱ ga̱ꞌna̱ꞌ Ma̱ꞌan sa gataj ga̱ꞌna̱ꞌ,
ni̱ si̱ gahuin ranj mánj.
38 Nej guiì dagahuin ni̱ giꞌhiaj ninj sa ni̱ka̱a,
ni̱ guendâ guyumân ruhuâ ninj ni̱ ga̱ nìꞌnàꞌ ninj;
ni̱ asàꞌ nanikàj rùkù ninj,
ni̱ si ga nìhiàꞌ ruhuâ ma̱ꞌan nimânj niꞌín ninj mánj.
39 Sani̱ nêꞌ ni̱ nitaj si huin nêꞌ nej guiì nanikàj rùkù guendâ ga̱ꞌa̱nj ni̱ꞌhio̱ꞌ mánj,
huînꞌ guiì guyumân ruhuâ ni̱ dugumînꞌ ma̱ꞌan nimûnꞌ riñan gakï̱nꞌïn na̱nj ánj.