Lugâ gè hua̱ riñan hioꞌóo ni̱ lugâ gè hua̱ yàtàꞌa
9
Hia̱j ni̱ dùgùnàj huaj,
dadinꞌ nga guchiꞌ si̱nï̱n Ma̱ꞌan Ñaꞌanj an ꞌngo̱ duꞌhua ngà nej guiì ni̱ gaꞌnïnj suun dàj ga̱ꞌhue ginùn ña̱ꞌa̱nj ninj riñanj,
ni̱ huê danj na̱nj gaꞌhuij ꞌngo̱ nuguanꞌan dàj ga ꞌngo̱ hueꞌ ñan ginùn ña̱ꞌa̱nj ninj riñan Ma̱ꞌan.
2 Ni̱ dànanj hua hueꞌ atsîj ganachinikaj nej sij:
Ni̱ gàꞌ si̱nï̱n,
hua ꞌngo̱ ñan gùꞌnàj lugâ gèe,
ni̱ hiuj dânj nikïnꞌ Kandelabro ngà ꞌngo̱ mesa tàj rachrún gè huin si-ràchrùnj Ma̱ꞌan Ñaꞌanj an.
3 Ni̱ nìkòꞌ ꞌngo̱ atsîj belo garán da̱nï̱n nguèj lugâ dânj ni̱ rukû atsîj belo dânj huin lugâ gè staꞌuu,
4 ni̱ ruhuâ lugâ gè staꞌu dânj nikïnꞌ ꞌngo̱ nna a̱gaꞌ huin oro ni̱ hiuj dânj duguaka nej sij sikíi riñan Ma̱ꞌan Ñaꞌanj an,
ni̱ ni̱kï̱nꞌ ꞌngo̱ chrún dàkòj o ni̱ narunûn nej sij nï̀nꞌ gàchràꞌ chrún dàkòj dânj nga agaꞌ oro,
ni̱ ruhuâ chrún dàkòj dânj nun ꞌngo̱ sigùu huin agaꞌ oro ni̱ ruhuâ sigù dânj nun maná,
ni̱ huê danj na̱nj nun si-rùtsì Aarón sa ganahuin ꞌhuì ni̱ nun nguèj hiëj nnùn nej chi̱ꞌ si-ley Moisés;
5 ni̱ ri̱ña̱n chrún dàkòj dânj nikïnꞌ huìj kerubin ni̱ ruhuaj ga̱ta si nne Ma̱ꞌan Ñaꞌanj an hiuj dânj,
ni̱ niꞌhiaj ri̱ña̱n duguiꞌ nguèj kerubin dânj ni̱ ngà siga̱chi ngue garán ngue riñan chrún da̱ko̱j o,
sani̱ si̱ gaꞌhue ga̱ꞌmi̱nꞌ nda giꞌnïnj du̱ꞌhua chre rayiꞌî chrún dàkòj dânj mánj.
6 Ni̱ huê dànanj mân nej rasu̱n nânj,
ni̱ daranꞌ nej gui gatûj nej rej ruhuâ lugâ gèe guendâ gi̱ꞌhiaj nej sôꞌ nej sun daꞌhui nej sôꞌ gi̱ꞌhiaj nej sôꞌ riñan Ma̱ꞌan Ñaꞌanj an;
7 sani̱ ꞌngo̱ rïn na̱ꞌa̱nj daꞌ hioꞌo gatûj rej huin ña̱n nï̀nꞌïn ruhuâ lugâ gè staꞌu,
ni̱ nga gatûj sôꞌ ruhuâ lugâ gè dânj ni̱ dàñùn daꞌhui sôꞌ gi̱nikaj sôꞌ tun nej yuku ga̱ꞌa̱nj sôꞌ,
guendâ gàꞌhuìꞌ sôꞌ riñan Ma̱ꞌan Ñaꞌanj an rayiꞌî si-ga̱kïnꞌ sôꞌ ngà rayiꞌî si-ga̱kïnꞌ nej guiì yùmànꞌan,
gakï̱nꞌ nun gi̱ni̱ꞌin daꞌnga nej guiì yùmànꞌan sa giꞌhiaj ninj;
8 ni̱ huê ngà nej nânj ni̱ giꞌhiaj Ma̱ꞌan Espíritu Santo si ga̱ra̱n daꞌngaꞌ ruhuôꞌ,
si hua̱ na̱nj nitaj si hua̱ nîꞌnïnj ga̱tu̱ nej sij lugâ gè staꞌuu,
nga nï̀nꞌ hua̱ lugâ gè si̱nï̱n dânj.
9 Ni̱ man daꞌngaꞌa gahuin nej nânj diû hia̱j,
dadinꞌ nej ofrenda ngà nej yuku dagahuiꞌ nej sij riñan Ma̱ꞌan Ñaꞌanj an ni̱ nitaj si nagiꞌhiaj ni̱kaj daꞌngaꞌ nu̱n ruhuâ nimân nej guiì,
sani̱ huê danj ginûn ña̱ꞌa̱nj nej sij riñan Ma̱ꞌan Ñaꞌanj an,
10 sani̱ man sa ràyìꞌì gaꞌmin nej sij huin rayiꞌî nej sa ya̱ nej sij,
sa go̱ꞌo̱ nej sij,
ni̱ dàj ga̱ꞌhue na̱gi̱ꞌhiaj sàꞌ nej sij neꞌ ye̱ꞌ nej sij sani̱ nitaj si guruguñuꞌunj nej nânj dàj ga̱na̱huin hueꞌê nimân nej sij mánj,
ni̱ ni̱ka̱j sun nuguanꞌ nânj nda gùyùmàn gui na̱gi̱ꞌhiaj na̱ka̱ ñûn Maꞌan Ñaꞌanj an daranꞌanj.
11 Sani̱ hia̱j ni̱ gàꞌ gaꞌnaꞌ Ma̱ꞌan Cristo,
ni̱ huej huin rej huin ña̱n nï̀nꞌïn riñan nej guiì nìkòꞌ rukuj,
ni̱ ñan nne huin rej huin ñan nï̀nꞌïn nikaj sunj ni̱ dànanj ûta hueꞌê ni̱ dànanj nìko huaj gàꞌ daꞌ hueꞌ atsîj ga àsìj si̱nï̱ïn,
ni̱ sê gàꞌ si ꞌngo̱ nej síi giꞌhiaj ñan nne,
ni̱ sê sa màn ruhuâ yumiguì nânj huin mánj,
12 ni̱ ꞌngo̱ rïn gatûj Ma̱ꞌan Jesús ruhuâ lugâ gè staꞌuu sani̱ nun ga̱ra̱n sunj tun nej guâtu ngà tun nej rô guendâ gi̱ꞌhia gànàrë̀ꞌ si-ga̱kïnꞌ nej guiì,
garânj sunj tun Ma̱ꞌan ni̱ nga gatu ruhuâ lugâ gè staꞌuu ni̱ giꞌhiaj gànanj nìgànj riñan daranꞌ nej gakï̱nꞌïn ni̱ ga̱ꞌhue giꞌhia ga̱na̱ni̱nꞌ nìgànj nêꞌ.
13 Sa gidigân nej judío huin,
ni̱ si hua̱ kï̱j ngo̱ guiì ni̱ si̱ gaꞌhue ga̱tu̱ ninj ginu̱n ña̱ꞌa̱nj ninj Ma̱ꞌan Ñaꞌanj an,
sani̱ nga dagamanꞌ nej rej riñan nej guiì tun nej rô,
tun nej guâtu ni̱ hiaj nej baka gachrîj ña̱ꞌa̱n nej sij riñan Ma̱ꞌan Ñaꞌanj an ni̱ ga̱na̱huin hueꞌê neꞌ ye̱ꞌ nej guiì,
14 ni̱ si dànanj giꞌhiaj nej rasu̱n nânj,
ni̱ dànanj ûta nùkuaj hua tun Ma̱ꞌan Cristo,
dadinꞌ Ma̱ꞌan Espíritu Santo huin sa giꞌhiaj ni̱ garânj yinaj gàhuij riñan Ma̱ꞌan Ñaꞌanj an sani̱ nitaj gakï̱nꞌïn ga riñanj mánj,
rayiꞌî dan ni̱ ga̱ꞌhue gi̱ꞌhia si ga̱na̱ru̱hui̱ gakï̱nꞌ hua̱ riñan daꞌngaꞌ nu̱n ruhuâ nimân nej guiì daꞌnga ni̱ gaꞌhue gu̱na̱nj gi̱tsi ninj riñan Ma̱ꞌan na̱nj ánj.
15 Huê danj ni̱,
Ma̱ꞌan Jesucristo huin sa ꞌnï̱nj guchraꞌ da̱ꞌa̱j si-ga̱kïnꞌ nej guiì ngà nuguanꞌ nàkà guchiꞌ Ma̱ꞌan Ñaꞌanj an ꞌngo̱ duꞌhua ngà ninj,
ni̱ rayiꞌî guendâ gahuiꞌ Ma̱ꞌan Jesucristo ni̱ giꞌhia si ga̱na̱ni̱n nej guiì riñan gakï̱nꞌ giꞌhiaj ninj nga giꞌnïnj ninj riki si-ley Moisés,
ni̱ nej guiì gakḯn Ma̱ꞌan Ñaꞌanj an ni̱ giꞌhia si gànàrìꞌ ninj nanìꞌhiaj ninj nìgànj.
16 Dadinꞌ ñan hua̱ ñanj hioꞌóo,
ni̱ ña̱ꞌa̱n huaj si gàhuìꞌ sí dugumîn ñanj hioꞌó dânj,
daꞌnga ni̱ gaꞌhue ga̱na̱huin ràꞌa daꞌní sôꞌ ñanj hioꞌó dânj.
17 Dadinꞌ nùnj huin si gàꞌ hua̱ yu̱gui ñanj guendâ ga̱na̱huin ràꞌa daꞌní sí dânj,
sani̱ si̱ gaꞌhue ga̱na̱huin ràꞌa daꞌní sôꞌ nga nï̀nꞌ hua nìꞌnàꞌ sôꞌ mánj.
18 Rayiꞌî dan ni̱ nga gaꞌhuiꞌ Ma̱ꞌan Ñaꞌanj an ley raꞌa nej israelita ni̱ gata si ña̱ꞌa̱n huaj si da̱gahuiꞌ nej sij yuku riñanj.
19 Dadinꞌ nga gaꞌhuiꞌ nùguànꞌ sachij Moisés daranꞌ nej si-ley Ma̱ꞌan Ñaꞌanj an riñan nej israelita,
ni̱ gidaꞌa sôꞌ tun nej rô ꞌnìnj in ngà tun nej guâtu ni̱ dunachej sôꞌ ngà nne huìj i,
ni̱ gidaꞌa sôꞌ to matsïj hua̱ ma̱re ngà ꞌngo̱ raꞌa koj chrun gùꞌnàj hisopo,
ni̱ dagamanꞌ sôꞌ tun nej yuku dânj riñan librû nnùn si-ley Ma̱ꞌan Ñaꞌanj an ni̱ huê danj na̱nj dagamanꞌ sôꞌ riñan nej guiì,
20 ni̱ gataj Moisés:
“Ngà tun nânj gaꞌnïnꞌ Ma̱ꞌan Ñaꞌanj an suun ni̱ guchij ꞌngo̱ duꞌhua ngà nej suj.”
21 Ni̱ huê danj na̱nj dagaꞌmanꞌ Moisés tun riñan hueꞌ atsîj i ni̱ huê danj na̱nj dagamanꞌ sij riñan daranꞌ nej rasu̱n garânj sun nej sij ruhuâ hueꞌ dânj.
22 Sa taj ley huin si daꞌhui nej rej ni̱ da̱gamanꞌ nej sij tun riñan daranꞌ nej rasu̱un,
daꞌnga ni̱ ganahuin sàꞌaj ni̱ huê danj na̱nj dagamanꞌ nej sij tun riñan nej guiì daꞌnga ni̱ ga̱ꞌhue gi̱nikaj Ma̱ꞌan Ñaꞌanj an nimân nìko rayiꞌî nej gakï̱nꞌ giꞌhiaj ninj.
Guendâ gahuiꞌ Ma̱ꞌan Jesús ni̱ ga̱ꞌhue ga̱ꞌne si-ga̱kïnꞌ nej guiì
23 Rayiꞌî dan ni̱ ña̱ꞌa̱n huaj si gahuiꞌ nej yuku ni̱ dagamanꞌ nej sij tun nej xuj daꞌnga ni̱ gaꞌhue ga̱na̱huin sàꞌ nej rasu̱n dânj,
dadinꞌ huin ñan du̱ꞌhua nej sa màn yàtàꞌa;
sani̱ nej sa màn yàtàꞌa ni̱ niꞌñanj ninj sa hua̱ hueꞌê doj gàꞌ daꞌ tun nej yuku.
24 Dadinꞌ nun ga̱tu̱ Ma̱ꞌan Jesús ruhuâ hueꞌ atsîj giꞌhiaj ràꞌa nej síi dadinꞌ nânj gahuin ñan du̱ꞌhua sa yàngàꞌ hia,
huê danj ni̱ gaꞌanj Ma̱ꞌan Jesús yàtàꞌa guendâ gàchìnj nìꞌhia rayiꞌî nêꞌ riñan Ma̱ꞌan Ñaꞌanj an.
25 Ni̱ gatûj Ma̱ꞌan Jesús yàtàꞌa sani̱ nitaj si huaj gàhuij gàꞌì dàj rûnꞌ giꞌhiaj rej huin ña̱n nï̀nꞌïn,
nga gatûj sôꞌ daꞌ hioꞌo ruhuâ lugâ gèe guendâ da̱gamanꞌ sôꞌ tun nej yuku mánj.
26 Ni̱ si danj daꞌhui gaj ni̱ ña̱ꞌa̱n huaj si gàhuìꞌ Ma̱ꞌan Jesús daranꞌ diû àsìj nga gaꞌanj gi̱ngaj yumiguìi,
sani̱ sa huaj huin si nda ruhuâ ga̱na̱huij diû nânj gaꞌnaj,
ni̱ ꞌngo̱ rïn na̱ꞌa̱nj gahuij guendâ ga̱ꞌhue gi̱nikaj Ma̱ꞌan Ñaꞌanj an nimân nìko rayiꞌî si-ga̱kïnꞌ nej guiì
27 Gàꞌ giyiꞌnïnꞌ suun gi̱ꞌhiaj Ma̱ꞌan Ñaꞌanj an si ꞌngo̱ rïn gàhuìꞌ daranꞌ nej guiì,
ni̱ neꞌ rùkù ni̱ ga̱na̱nikïnꞌ ninj riñan Ma̱ꞌan guendâ na̱gi̱ꞌhia guendâ ngà ninj na̱nj ánj,
28 huê danj ni̱ ꞌngo̱ rïn gahuiꞌ Ma̱ꞌan Cristo guendâ ga̱ꞌhue gi̱nikaj Ma̱ꞌan Ñaꞌanj an nimân nìko rayiꞌî si-ga̱kïnꞌ ûta gàꞌì nej guiì.
Ni̱ neꞌ rùkù ni̱ ga̱ꞌnaj aꞌngô ñûn sani̱ sê guendâ gàhuìj rayiꞌî nej gakï̱nꞌïn gàꞌ mánj,
ga̱ꞌnaj guendâ ga̱na̱ka nej guiì nne anaꞌhuìj Ma̱ꞌan na̱nj ánj.