Jesús huin Ma̱ꞌan sa ni̱kï̱nꞌ dunaꞌhuej rayiꞌî nej guiì ngà nuguanꞌ nàkà guchiꞌ Ma̱ꞌan Ñaꞌanj an ꞌngo̱ duꞌhua ngà nej guiì
8
Sani̱ sa ña̱ꞌa̱n ràyìꞌì nuguanꞌ aꞌminꞌ ꞌnôꞌ huin si hua̱ ꞌngo̱ rej huin ña̱n nï̀nꞌïn nikïnꞌ riñan nêꞌ,
ni̱ gaꞌanj ga̱ne neꞌ huàꞌ ñan ni̱kï̱nꞌ chrun yilâ nne Ma̱ꞌan Ñaꞌanj ni̱ka̱j su̱n riñan daranꞌanj,
2 Ni̱ huej huin rej huin ña̱n nï̀nꞌïn nikïnꞌ gidigân si-nùguànꞌ Ma̱ꞌan Ñaꞌanj nda dukun,
ruhuâ nuhuî ganachi nikaj Ma̱ꞌan ni̱ sê síi giꞌhiaj gisîj nuhuî dânj mánj.
3 Dadinꞌ daranꞌ nej rej huin ña̱n nï̀nꞌïn ni̱ ganûn su̱n nej sôꞌ guendâ gàꞌhuìꞌ nej sôꞌ si-ofrenda nej guiì riñan Ma̱ꞌan Ñaꞌanj an ni̱ dagahuiꞌ nej sôꞌ yuku gaꞌhuiꞌ nej guiì riñan Ma̱ꞌan Ñaꞌanj an,
ni̱ rayiꞌî dan ni̱ ña̱ꞌa̱n huaj si Ma̱ꞌan Jesucristo ni̱ gi̱nika sa ga̱ꞌhuij riñan Ma̱ꞌan Ñaꞌanj an.
4 Huê danj ni̱,
si nne Ma̱ꞌan Jesús riñan hioꞌó nânj,
ni̱ gàꞌ si gahuin rej,
dadinꞌ hua̱ na̱nj màn nej rej guendâ gàꞌhuìꞌ nej sôꞌ ofrenda riñan Ma̱ꞌan Ñaꞌanj an dàj rûnꞌ gaꞌnïnꞌ su̱n si-ley Moisés;
5 dadinꞌ sun giꞌhiaj nej rej nânj ni̱ huin ñan du̱ꞌhua ni̱ si-gàyùnꞌ nej sa màn yàtàꞌa,
dàj rûnꞌ gataj naꞌanj Ma̱ꞌan Ñaꞌanj an gu̱nïn Moisés dàj gi̱ꞌhiaj sôꞌ nuhuî atsîj gane riñan hioꞌó nàkòo ni̱ dànanj gata gu̱nïn sôꞌ:
“Niꞌhiaj sòꞌ ni̱ gi̱ꞌhiáꞌ nuhui atsìj i dàj rûnꞌ hua daꞌngaꞌ gidigân sìnï̀nj riñanꞌ ra kïj Sinaí.”
6 Sani̱ hia̱j ni̱ dànanj ûta hueꞌê hua sun ganahuin ràꞌa Ma̱ꞌan Jesús,
dadinꞌ ni̱kïnj giꞌhiaj hia ni̱ guchraꞌ da̱ꞌa si-ga̱kïnꞌ nej guiì dàj giri daꞌngaꞌ nuguanꞌ nàkà guchiꞌ Ma̱ꞌan Ñaꞌanj an ꞌngo̱ duꞌhua ngà nej guiì.
7 Dadinꞌ si nu̱n gaꞌhue gu̱ru̱gûñuꞌunj hueꞌê nuguanꞌ guchiꞌ si̱nï̱n Ma̱ꞌan Ñaꞌanj an ꞌngo̱ duꞌhua ngà nej sí gimân àsìj nâ,
hiôꞌ ni̱ si̱ ganahuij ruhuâ Ma̱ꞌan Ñaꞌanj an si ga̱ꞌna̱ꞌ nuguanꞌ nàkà guchiꞌ Ma̱ꞌan ꞌngo̱ duꞌhua ngà nej síi saj mánj.
8 Ni̱ dugunïn gàꞌì Ma̱ꞌan ni̱ gata:
Hia̱j ni̱ gùyùmàn gui,
taj Ma̱ꞌan Señor,
ni̱ gùchìj ꞌngo̱ duꞌhua ngà nej israelita ni̱ ngà nej daꞌní Judá.
9 Sani̱ sê rûꞌhua ꞌngo̱ duꞌhua guchí ngà yi nej suj,
nga girîj nej sôꞌ riñan hioꞌó Egipto gaj mánj;
dadinꞌ nun dugu̱ꞌnïnꞌ nej sôꞌ da̱gahuin nej sôꞌ ꞌngo̱ duꞌhua guchí ngà nej sôꞌ,
ni̱ rayiꞌî dan ni̱ gudunâ ni̱ nun gu̱ru̱gûñuꞌun nej sôꞌ gàꞌ mánj.
Huê danj gataj Ma̱ꞌan Señor.
10 Huê danj ni̱,
nânj huin ꞌngo̱ duꞌhua gùchìj ngà dukuâ Israel.
Ni̱ neꞌ rùkù nga gùyùmàn nej gui dânj gataj Ma̱ꞌan Señor:
Ni̱ gàꞌnï̀n si-ley ruhuâ daꞌngaꞌ nej sij,
ni̱ gàchrùnj si-ley ruhuâ nimân nej sij;
ni̱ ga̱huín Daꞌanj nej sij,
ni̱ ga̱huin nej sij yiñân.
11 Ni̱ gàꞌ si ꞌngo̱ nej sij si̱ gidigân riñan nej duguiꞌ nej sij rayiꞌí mánj,
ni̱ gàꞌ si ꞌngo̱ nej sij si̱ gidigân riñan dinḯn nej sij rayiꞌí,
ni̱ si̱ gataj nej sij,
gu̱hua̱ꞌ sôꞌ ni̱ gi̱di̱gán rayiꞌî Ma̱ꞌan Ñaꞌanj an riñan râj;
dadinꞌ gi̱ni̱ꞌin daranꞌ nej sij ñùnj,
ni̱ giniꞌin nej sílìj i ñùnj ni̱ huê danj na̱nj gi̱ni̱ꞌin nej sí achij i ñùnj.
12 Ni̱ ga̱ꞌhue gi̱nikâ nimân nìko rayiꞌî nej si-ga̱kïnꞌ nej sij,
ni̱ nitaj àmàn ga̱na̱nun ruhuâj niꞌín si-ga̱kïnꞌ nej sij ni̱ si̱ gananun ruhuâj niꞌín nej sa kï̱j giꞌhiaj nej sij mánj.
13 Ni̱ nga gata:
Ni̱ gùchìꞌ nàkà ñûn ꞌngo̱ duꞌhua ngà nej sij,
ni̱ ruhuaj ga̱ta̱ si nitaj si niꞌñanj ꞌngo̱ duꞌhua guchiꞌ sìnï̀nj ngà nej sij mánj;
ni̱ sa gàꞌ gahuin reꞌë̀ ni̱ nitaj si niꞌñan,
ni̱ gàꞌ doj huaj ni̱ ga̱na̱hui.