Dàj rûnꞌ gahuin Melquisedec rej huê danj huin Ma̱ꞌan Jesús rej huin ña̱an
7
Dadinꞌ Melquisedec,
huin rej huin ña̱n nï̀nꞌïn riñan Ma̱ꞌan Ñaꞌanj ni̱ka̱j sun nìko,
ni̱ gahuin sôꞌ rey riñan yumanꞌ Salem,
huê danj ni̱ nga gaꞌanj gùtàꞌ sachij Abraham nga aꞌngô nej rey gata rùhuà sôꞌ,
ni̱ giꞌhiaj ga̱nanj sôꞌ ni̱ nanikàj sôꞌ gaꞌnaꞌ sôꞌ yumanꞌ Salem ni̱ gahui Melquisedec ni̱ gataj sôꞌ si Ma̱ꞌan Ñaꞌanj an gi̱ꞌhiaj sa hua̱ hueꞌê ngà sachij Abraham.
2 Ni̱ huê danj na̱nj gaꞌhuiꞌ sachij Abraham sa chi̱ꞌ nej sa gahui riñan daranꞌ nej sa giꞌhiaj ga̱nan sôꞌ,
riñan nej sí gutaꞌ ngà sôꞌ raꞌa Melquisedec;
ni̱ Melquisedec ruhuaj ga̱ta “rey giꞌhiaj sa ni̱ka̱a”;
ni̱ sôꞌ huin rey ni̱ka̱j sun riñan Salem,
ni̱ Salem ruhuaj ga̱ta “hua̱ dïnꞌïnj”;
“rey giꞌhiaj sa hua dïnꞌïnj”.
3 Sani̱ nun niꞌînꞌ ahuin sí gahuin rej sôꞌ,
ni̱ nun niꞌînꞌ ahuin si gahuin nni sôꞌ,
ni̱ nun niꞌînꞌ ahuin si gahuin yi sôꞌ;
ni̱ nun niꞌînꞌ àmàn gaꞌnga sôꞌ,
ni̱ nun niꞌînꞌ àmàn gahuiꞌ sôꞌ,
ni̱ huê dàj rûnꞌ huin Ma̱ꞌan Jesús,
ni̱ huê danj huin sôꞌ rej nìgànj nï̀nꞌ.
4 Na̱di̱giꞌñunꞌ,
si Melquisedec ni̱ gahuin sij ꞌngo̱ sí ginikaj sun nìko xi,
dadinꞌ gaꞌhuiꞌ sachij Abraham sa chi̱ꞌ nej sa gahui riñan daranꞌ nej sa giꞌhiaj ga̱nan sôꞌ riñan nej sí gutaꞌ ngà sôꞌ raꞌa sij.
5 Yàngàꞌ hia ni̱ nej daꞌní Leví huin sa ganûn su̱n guendâ ga̱huin nej sôꞌ rej,
ni̱ gaꞌnïnꞌ ley suun si hua̱ ni̱ña̱n si ganahuin ràꞌa nej sôꞌ sa chi̱ꞌ nej sa gahui riñan siꞌhiaj nej guiì yùmànꞌan,
ni̱ nùnj huin si huin nej sôꞌ daꞌnin si̱ꞌnï̱n sachij Abraham,
sani̱ hua̱ ni̱ña̱n si gàꞌhuìꞌ nej sôꞌ sa chi̱ꞌ nej sa gahui riñan siꞌhiaj nej sôꞌ raꞌa nej rej.
6 Sani̱ nùnj huin si sê daꞌní Leví huin Melquisedec,
sani̱ ganahuin ràꞌa sôꞌ sa chi̱ꞌ nej sa gahui riñan siꞌhiaj sachij Abraham ni̱ gataj sôꞌ si gi̱ꞌhiaj Ma̱ꞌan Ñaꞌanj an sa hua̱ hueꞌê ngà sachij Abraham,
ni̱ gàꞌ gaꞌhuiꞌ Ma̱ꞌan Ñaꞌanj an si-nùguànꞌanj ni̱ gata si hua̱ sa gàꞌhuij raꞌa sôꞌ.
7 Ni̱ nitaj gàꞌ si ꞌngo̱ na̱gi̱ꞌhiaj chìꞌ,
dadinꞌ ganahuin ra̱ꞌa sí ni̱ka̱j sun ninaj doj dânj sa hua̱ hueꞌê giꞌhiaj sí ni̱ka̱j sun nìko.
8 Riñan hioꞌó nânj,
ni̱ ganahuin raꞌa nej sij sa chi̱ꞌ gaꞌhuiꞌ nej sí huaj gàhuìꞌ;
sani̱ riñan ñanj si-nùguànꞌ Ma̱ꞌan Ñaꞌanj an aꞌmin si hua̱ na̱nj hua̱ nìꞌnàꞌ sachij Melquisedec.
9 Ni̱ ga̱ꞌhue gataj nêꞌ si nej rej huin daꞌní leví,
ni̱ gaꞌhuiꞌ nej sôꞌ sa chi̱ꞌ ganahuin ràꞌa nej sôꞌ riñan Melquisedec,
nga gaꞌhuiꞌ sachij Abraham sa chi̱ꞌ nej sa hua̱ riñan sôꞌ riñan Melquisedec;
10 dadinꞌ hua̱ nun gùyùmàn nej sôꞌ ruhuâ yumiguìi dadinꞌ nï̀nꞌ nne nej sôꞌ ruhuâ nneè kú sachij Abraham nga ganariꞌ duguiꞌ sôꞌ ngà melquisedec.
11 Ni̱ si gaꞌhuiꞌ Ma̱ꞌan Ñaꞌanj an si-ley raꞌa nej israelita,
ni̱ ley dânj giꞌnïnj raꞌa nej rej huin daꞌní Leví,
ni̱ gaꞌhue giꞌhiaj ley dânj ganahuin ni̱ka̱ nej guiì,
hiôꞌ ni̱ ahuin gue̱nda̱ niꞌñanj si ga̱ꞌna̱ꞌ aꞌngô rej ni̱ gi̱nikaj sôꞌ si-su̱n Melquisedec sani̱ nun ga̱ꞌna̱ꞌ sôꞌ siganï̂nj nej daꞌní Levi ràꞌaj.
12 Dadinꞌ nga gachîn suun dânj riñan aꞌngô rej,
ni̱ ña̱ꞌa̱n huaj si ga̱na̱huin nàkà aꞌngô ley.
13 Ni̱ rej rayìꞌì gaꞌmin nuguanꞌ nânj huin Ma̱ꞌan Señor Jesucristo ni̱ gaꞌnga riki nej guiì ꞌnïnj riki yiꞌnïn huin daꞌní Judá,
sani̱ gàꞌ si ꞌngo̱ nej daꞌní Judá nun gahuin rej mánj.
14 Dadinꞌ ûta niꞌnï̀nj huaj si gahui Ma̱ꞌan Señor Jesús riki yiꞌnïnꞌ huin daꞌnin sìꞌnï̀n Judá,
ni̱ nga gaꞌmin sachij Moisés ni̱ nun ga̱ta̱j sôꞌ si ga̱ꞌhue ga̱hui̱ nej rej riki yiꞌnïn huin daꞌní Judá mánj.
15 Ni̱ dànanj ûta nîꞌnïnj huaj ga̱ꞌhue ga̱ra̱n daꞌngaꞌ ruhuôꞌ dadinꞌ dàj rûnꞌ huaj nga guyumân Melquisedec,
ni̱ huê danj huaj nga gaꞌnaꞌ rej nàkà nânj,
16 ni̱ ginikaj sunj sani̱ sê guendâ huin nej dùguìꞌ rej dadinꞌ nitaj gàꞌ si ꞌngo̱ ley gataj si ga̱huin rej mánj,
ni̱ gahuin rej giꞌhiaj Ma̱ꞌan Ñaꞌanj nùkuaj ni̱ ga̱ne nìgan.
17 Ni̱ huê danj taj riñan ñanj si-nùguànꞌ Ma̱ꞌan Ñaꞌanj an rayiꞌî Ma̱ꞌan Jesús:
Sòꞌ huin rej nìgànj nï̀nꞌ,
dàj rûnꞌ gahuin Melquisedec rej na̱nj ánj.
18 Huê danj ni̱ girëꞌ ley nâ,
gaꞌnïnꞌ su̱n rayiꞌî nej giꞌñanj an,
dadinꞌ nitaj si hua̱ guesaj ni̱ nitaj si niꞌñan gàꞌ mánj,
19 sani̱ nun gaꞌhue na̱gi̱ꞌhiaj ni̱ka̱ si-ley Moisés nej guiì mánj,
sa giꞌhiaj ley dan huin ni̱ gaꞌnïn si dànanj hueꞌê hua sa gànàꞌhuìꞌ ga̱na̱huin roꞌôꞌ,
ni̱ rayiꞌî dan ni̱ ga̱ꞌhue ga̱ꞌa̱nj ga̱huin nichrûnꞌ riñan Ma̱ꞌan Ñaꞌanj an.
20 Ni̱ sa gataj Ma̱ꞌan Ñaꞌanj an huin,
si hua̱ ni̱ña̱n si ri̱kij ꞌngo̱ rej riñan nêꞌ;
21 ni̱ aꞌngôꞌ nej rej dânj ni̱ ganahuin ràꞌa nej sôꞌ suun sani̱ nitaj àmàn gataj Ma̱ꞌan Ñaꞌanj an si gachrûn sunj nej sôꞌ mánj;
sani̱ rayiꞌî Ma̱ꞌan Cristo ni̱ gataj Ma̱ꞌan Ñaꞌanj an:
Yàngàꞌ hia nï̀nꞌ gataj Maꞌan Señor;
ni̱ si̱ nanikàj ruhuâj rayiꞌî nuguanꞌ gata mánj:
“Sòꞌ huin rej nìgànj nï̀nꞌ,
dàj rûnꞌ gahuin Melquisedec.”
22 Huê danj ni̱,
Ma̱ꞌan Jesús huin sa giꞌhiaj yìtï̀nj ꞌngo̱ nuguanꞌ nàkà guchiꞌ Ma̱ꞌan Ñaꞌanj an ꞌngo̱ duꞌhua ngà nej guiì.
23 Ni̱ àsìj nâ ni̱ ga gàꞌì nej rej,
dadinꞌ nitaj si gane nìgànj nej sôꞌ dadinꞌ doj hioꞌo gane nej sôꞌ ni̱ gahuiꞌ nej sôꞌ;
24 sani̱ ñan nitaj si huaj gàhuìꞌ Ma̱ꞌan Jesús,
huê danj ni̱ nitaj si huaj na̱du̱na̱ si-sunj riñan aꞌngô síi dadinꞌ nìgànj nï̀nꞌ ga̱huin rej:
25 Huê rayiꞌî dan ni̱ nìgànj nï̀nꞌ ga̱ꞌhue gi̱ꞌhia ga̱na̱ni̱n nej guiì huaꞌanj nichì riñan Ma̱ꞌan Ñaꞌanj an,
si gàꞌ si̱nï̱n ga̱na̱ka̱j guendâ ninj si huej gahuiꞌ rayiꞌî si-ga̱kïnꞌ ninj ni̱ gaꞌmin àko ninj riñanj,
ni̱ nne guendâ gàchìnj nìꞌhia nìgànj nï̀nꞌ rayiꞌî nej guiì nnùn ñan Ma̱ꞌan.
26 Dadinꞌ huej huin ꞌngo̱ rej huin ña̱n nï̀nꞌ sa niꞌñanj nêꞌ:
Ni̱ huin sa gèe,
ni̱ gàꞌ si ꞌngo̱ sa aꞌnanꞌ nun ga̱nï̱n ruhuaj,
ni̱ nitaj gàꞌ si ꞌngo̱ gakï̱nꞌïn giꞌhia,
ni̱ nitaj si ni̱ka̱j duguiꞌij ngà nej sí giꞌhiaj gakï̱nꞌïn,
ni̱ ginika sun nìko riñan daranꞌ nej sa màn yàtàꞌa.
27 Hia̱j ni̱ nitaj si huaj gàhuìꞌ nej yuku daranꞌ nej gui rayiꞌij,
dàj rûnꞌ giꞌhiaj nej rej gimân àsìj nâ dadinꞌ dagahuiꞌ nej sôꞌ yuku rayiꞌî si-ga̱kïnꞌ nej sôꞌ,
ni̱ neꞌ rùkù ni̱ dagahuiꞌ nej sôꞌ yuku rayiꞌî si-ga̱kïnꞌ nej guiì yumanꞌan;
sani̱ Ma̱ꞌan Jesús ni̱ ngo̱ rïn gahuij ni̱ naruꞌhue Ma̱ꞌan rayiꞌî si-ga̱kïnꞌ nej guiì nìgànj chre,
dadinꞌ gaꞌnḯn nimanj gahuij rayiꞌî daranꞌ nej guiì.
28 Dadinꞌ si-ley Moisés ni̱ gaꞌnïnꞌ sunj si ga̱chru̱n su̱n nej sij nej sij síi guendâ ga̱huin nej sôꞌ rej huin ña̱n nï̀nꞌïn;
sani̱ rukû ley ni̱ gaꞌnaꞌ nuguanꞌ yàngàꞌ gataj Ma̱ꞌan Ñaꞌanj an ni̱ gachrûn sunj Daꞌnin Jesús ga̱huin rej huin ña̱n nï̀nꞌïn nìgànj nï̀nꞌ.