6
Huê danj ni̱ si̱ ganakaj gunuchruj nej ñûnj gi̱digân nej ñûnj riñan nej suj rayiꞌî nej yìꞌnï̀nꞌ nuguanꞌ nitaj si chìꞌ nìko hua rayiꞌî Ma̱ꞌan Cristo,
ni̱ sa ña̱ꞌa̱n gi̱di̱gân nej ñûnj riñan nej suj huin nej nuguanꞌ hua̱ chìꞌ doj daꞌnga ni̱ giniꞌin hueꞌê nej suj doj,
ni̱ gàꞌ niꞌin nej suj si ña̱ꞌa̱n huaj si nànìkàj ruhuâ nej suj rayiꞌî nej gakï̱nꞌïn,
huê danj ni̱ si̱ giꞌhiaj nej suj gakï̱nꞌïn dadinꞌ nitaj si niꞌñanj huaj mánj,
ni̱ gàꞌ niꞌin nej suj si ña̱ꞌa̱n huaj si gùyùmàn ruhuâ nej suj niꞌin nej suj Ma̱ꞌan Ñaꞌanj an,
2 ni̱ gàꞌ niꞌin nej suj nej yìꞌnï̀nꞌ nuguanꞌ gaꞌmin rayiꞌî guendâ gàtàꞌ nne nej guiì,
guendâ gùtòꞌ roꞌôꞌ ahui nej guiì,
guendâ gànàꞌnï̀nj nej nîman,
ni̱ guendâ ga̱na̱nikïnꞌ nej guiì riñan Ma̱ꞌan Ñaꞌanj an ni̱ na̱gi̱ꞌhia guenda ngà ninj ni̱ gìrìꞌ ninj ñan ga̱ne nìgànj ninj.
3 Ni̱ hua̱ ni̱ña̱n si gi̱digân nej ñûnj nej nuguanꞌ chìꞌ doj huaa si ga̱ra̱n yina Ma̱ꞌan Ñaꞌanj an na̱nj ánj.
4 Sani̱ nej guiì gàꞌ giniꞌin Ma̱ꞌan Cristo ni̱ ganahuin ra̱ꞌa ninj ꞌngo̱ suun giꞌhiaj Ma̱ꞌan Ñaꞌanj an,
ni̱ huê danj na̱nj gàꞌ ganahuin ràꞌa ninj Ma̱ꞌan Espíritu Santo,
5 ni̱ huê danj na̱nj garanꞌ ruhuâ ninj niꞌin ninj si-nùguànꞌ Ma̱ꞌan Ñaꞌanj an ni̱ garânj daꞌnga ruhuâ ninj dàj nùkuaj gi̱nikaj su̱n Ma̱ꞌan Ñaꞌanj an,
riñan yumiguì ga̱ꞌna̱ꞌ neꞌ ña̱an,
6 sani̱ gininj ninj riñan gakï̱nꞌïn ni̱ ûta chìꞌ huaj gànànìkàj ñûn ruhuâ ninj rayiꞌî nej si-ga̱kïnꞌ ninj ni̱ ga̱na̱huin nàkà ñûn ninj,
dadinꞌ dàj rûnꞌ huin si go̱dokoꞌ ñûnꞌ ninj Ma̱ꞌan Jesús huin Daꞌní Ma̱ꞌan Ñaꞌanj an riñan rutsìi huin,
ni̱ gi̱ꞌhiaj ninj si ga̱ꞌmi̱n kï̱j nej guiì rayiꞌî Ma̱ꞌan Jesús.
7 Ni̱ huin ninj dàj rûnꞌ huin hioꞌó ri̱ña̱n ûta gàꞌì gininj gumàan,
ni̱ si guchraꞌ nej sôꞌ hioꞌó dânj ni̱ giyichraꞌ koj sàꞌa riñanj,
ni̱ na̱gi̱ꞌhiaj hueꞌê Ma̱ꞌan Ñaꞌanj an doj hioꞌó dânj;
8 sani̱ si hioꞌó ri̱ña̱n guchraꞌ nej sij sani̱ man ni̱na̱nj tanj an giyichraꞌ ni̱ huin ꞌngo̱ hioꞌó gàꞌ girëꞌ,
ni̱ doj ni̱ gàꞌ gùyùmàn diû ni̱ gùyùmàn sa yìꞌìi riñanj,
ni̱ nngaj yugui guendâ ga̱ka man ni̱ ga̱na̱hui na̱nj ánj.
Si gànàꞌhuìꞌ Ma̱ꞌan Jesús ni̱ ga̱ꞌhue ga̱nikïnꞌ rûnꞌ
9 Di̱nï̂nj,
sani̱ nùnj huin si gaꞌmin nej ñûnj dànanj riñan nej suj sani̱ guyumân ruhuâ nej ñûnj si ûta hueꞌê ga̱ riñan nej suj,
ni̱ si da̱gahuin nej suj ni̱ ga̱na̱ni̱n nej suj na̱nj ánj.
10 Dadinꞌ nitaj si giniꞌñûn Ma̱ꞌan Ñaꞌanj an rayiꞌî sun hua̱ hueꞌê giꞌhiaj nej suj,
dadinꞌ daranꞌ diû giꞌhia sa ni̱ka̱a ngà nej suj guendâ ga ꞌì ruhuâ nej suj niꞌin nej suj Ma̱ꞌan,
ni̱ huê danj na̱nj gunânj gi̱tsi nej suj riñan nej sôꞌ gàꞌ ganaruhui si-ga̱kïnꞌ,
ni̱ hua̱ na̱nj gunânj gi̱tsi nej suj riñan nej sôꞌ doj na̱nj ánj.
11 Sani̱ sa huin ruhuâ nej ñûnj huin si gi̱ꞌhiaj hueꞌê daꞌ goꞌngo̱ nej suj dàj rûnꞌ giꞌhiaj nej suj nda gui hia̱j,
ni̱ huê danj gi̱ꞌhiaj nej suj aꞌngô rïn gui ga̱ne nej suj riñan hioꞌó nânj,
ni̱ ga̱ nùkuaj ruhuâ nej suj ni̱ ga̱ yìtï̀nj ruhuâ nej suj ni̱ gànàꞌhuìj nej suj ga̱na̱huin ràꞌa nej suj sa hua̱ hueꞌê ri̱ki̱ Ma̱ꞌan Ñaꞌanj an riñan nej suj,
12 nun ga̱ra̱nꞌ ruhuâ nej ñûnj si ga̱huin nej suj sí rùmìin,
ni̱ sa garanꞌ ruhuâ nej ñûnj huin si gi̱daꞌa nej suj chrej gidigân aꞌngô nej sôꞌ guyumân yìtï̀nj ruhuâ,
dadinꞌ ga nùkuaj ruhuâ nej sôꞌ ni̱ rayiꞌî dan ni̱ ga̱na̱huin ràꞌa nej sôꞌ nanìꞌhiaj nej sôꞌ dadinꞌ gàꞌ gataj Ma̱ꞌan Ñaꞌanj an si gàꞌhuij nanìꞌhiaj nej sôꞌ.
13 Dadinꞌ nga gataj Ma̱ꞌan Ñaꞌanj an si hua̱ ꞌngo̱ sa gàꞌhuij riñan sachij Abraham,
ni̱ ñan nitaj aꞌngô sa nìko doj gìrìꞌij ga̱nïnj riñanj,
huê danj ni̱ gata gu̱nïn Ma̱ꞌan si yàngàꞌ hia ni̱ gàꞌhuìj sa gata riñan sôꞌ,
14 ni̱ gata:
“Yàngàꞌ hia ni̱ ûta hueꞌê hua sa gi̱ꞌhiâ ngàꞌ ni̱ gi̱ꞌhiâ si ûta ga̱ yi̱ruꞌhueꞌ,
ni̱ giꞌhia si ûta gi̱yi̱ꞌna̱nj nej daꞌnít.”
15 Ni̱ ûta nùkuaj ga ruhuâ sij ni̱ ganaꞌhuij sij,
huê danj ni̱ ganahuin ràꞌa sij sa gataj Ma̱ꞌan Ñaꞌanj an gàꞌhuij riñan sij.
16 Dadinꞌ nga gataj nej guiì si sa yàngàꞌa hia huin sa gaꞌmin ninj,
ni̱ dàñùn naꞌhuiꞌ ninj ꞌngo̱ guiì achij gànàtàꞌ rayiꞌî nuguanꞌ gaꞌmin ninj,
ni̱ guendâ huin ruhuâ ninj ga̱huin hia nuguanꞌ ñan unïnꞌ ninj ni̱ dàñùn naꞌhuiꞌ ninj ꞌngo̱ guiì giniꞌin yàngàꞌ hia,
si huê danj hua hia rayiꞌî nuguanꞌ unïnꞌ ninj.
17 Rayiꞌî dan ni̱,
ruhuâ Ma̱ꞌan Ñaꞌanj an gi̱di̱ganj nda nîꞌnï̱nj chre riñan nej guiì gìrìꞌ nìꞌhiaj si hua̱ sa ganahuin ra̱ꞌa ninj,
ni̱ chrej nagaꞌhuij riñan ninj ni̱ nitaj si nadunaj aꞌngôj mánj,
rayiꞌî dan ni̱ giꞌhiaj ñanj ni̱ gi̱ꞌhiaj yìtïn si-nùguànꞌanj na̱nj ánj;
18 huê danj ni̱ hua̱ huìj rasu̱n ràyìꞌì nitaj si huaj na̱du̱na̱ Ma̱ꞌan Ñaꞌanj an sa ganï̂n ruhuaj,
huê danj ni̱ nitaj si huaj gi̱di̱gañuꞌun mánj,
ni̱ du̱guꞌnïnꞌ nêꞌ ni̱ ga̱na̱huin hueꞌê ruhuâ neꞌ ni̱ ga̱ꞌa̱nj nêꞌ ni̱ gi̱doꞌoꞌ ni̱ gùyùmàn ruhuôꞌ chrej gàꞌ guchruj Ma̱ꞌan Ñaꞌanj an neꞌ ña̱an riñunꞌ.
19 Ni̱ sa guyumân ruhuôꞌ ni̱ huin dàj rûnꞌ huin agaꞌ nnùn sitï̂n guduninj nej sij ruhuâ nne ña̱ꞌa̱nj,
ni̱ nagiꞌhiaj yìtïn ruhuôꞌ ni̱ ganahuin ran ma̱ꞌan nimûnꞌ giꞌhia,
ni̱ ni̱ka huaꞌan ñùnꞌ nda ñan gatûj rej huin ña̱n nï̀nꞌïn,
20 dadinꞌ gàꞌ si̱nï̱n gaꞌnaꞌ Ma̱ꞌan Jesús neꞌ ña̱an ni̱ gatû hiuj dânj,
ni̱ gahuin rej huin ña̱n nï̀nꞌïn nìgànj chre ni̱ giꞌhia dàj rûnꞌ giꞌhiaj Melquisedec.