5
Dadinꞌ daranꞌ nej rej huin ña̱nꞌ nï̀nꞌïn ni̱ ganagui nej síi siganï̂nj nej sôꞌ,
ni̱ gachrûn su̱n nej sôꞌ sí dânj guendâ ga̱nikïnꞌ sôꞌ riñan Ma̱ꞌan Ñaꞌanj an ni̱ du̱naꞌhuej sôꞌ rayiꞌî nej sij,
ni̱ gaꞌhuiꞌ sô si-ofrenda nej sij ni̱ dagahuiꞌ sôꞌ yuku riñan Ma̱ꞌan Ñaꞌanj an rayiꞌî si-ga̱kïnꞌ nej sij;
2 ni̱ huê danj na̱nj huaj ga̱ꞌhue gi̱ni̱nj rej huin ñan nï̀nꞌ dânj gakï̱nꞌïn dàj rûnꞌ gininj aꞌngô nej síi,
ni̱ rayiꞌî dan ni̱ ga̱ꞌhue gananï̂n àko ruhuâ sôꞌ niꞌin sôꞌ nej sí nitaj nùnj niꞌin daꞌnga sa giꞌhiaj,
ni̱ huê danj na̱nj ga̱ꞌhue gu̱ru̱gûñuꞌunj sôꞌ rukû nej sí gaꞌanj ni̱ꞌhia̱;
3 ni̱ rayiꞌî si huaj ga̱ꞌhue gi̱ni̱nj sij riñan gakï̱nꞌïn,
ni̱ dagahuiꞌ sij ꞌngo̱ yuku rayiꞌî ma̱ꞌan sij,
ni̱ huê danj na̱nj dagahuiꞌ sij nej yuku rayiꞌî nej guiì yùmànꞌan.
4 Ni̱ gàꞌ si ꞌngo̱ síi si̱ gaꞌhue ga̱chru̱n sun ma̱ꞌan guendâ ga̱huin sôꞌ rej huin ña̱n nï̀nꞌïn,
dadinꞌ Ma̱ꞌan Ñaꞌanj an huin sa gakḯn ni̱ gaꞌhuij sun nânj raꞌa sôꞌ,
dàj rûnꞌ giꞌhia ngà Aarón.
5 Huê danj,
ni̱ sê Ma̱ꞌan Cristo huin sa gachrûn su̱n Ma̱ꞌan si ga̱huin rej huin ña̱n nï̀nꞌïn mánj,
Ma̱ꞌan Ñaꞌanj an huin sa gachrûn su̱n Ma̱ꞌan,
dadinꞌ huê danj gataj Ma̱ꞌan Ñaꞌanj an:
Sòꞌ huin Daꞌnîn,
ni̱ hia̱j guruguîꞌ giꞌhiâ.
6 Dàj rûnꞌ taj riñan ñanj si-nùguànꞌ Ma̱ꞌan Ñaꞌanj an aꞌngô hiuj u:
Sòꞌ huin Rej nìgànj nï̀nꞌ,
dàj rûnꞌ gahuin Melquisedec rej na̱nj ánj.
7 Nga nï̀nꞌ gane Ma̱ꞌan Cristo ruhuâ yumiguì nânj,
ni̱ ûta nùkuaj gaꞌmin ni̱ ûta àko gachín nìꞌhia ni̱ ûta gahiu nne riñanj riñan Ma̱ꞌan Ñaꞌanj an,
ni̱ si ruhuâ Ma̱ꞌan Ñaꞌanj an ni̱ si̱ gaꞌnïn guendâ ga̱huij,
ni̱ gunïn Ma̱ꞌan Ñaꞌanj an nuguanꞌ gachín nìꞌhia,
dadinꞌ daranꞌ diû dagahuin Ma̱ꞌan riñan Ma̱ꞌan Ñaꞌanj an.
8 Ni̱ nùnj huin si huin Ma̱ꞌan Cristo Daꞌní Ma̱ꞌan Ñaꞌanj an,
sani̱ gahuin chrunj gi̱ranꞌ sa̱ñunj giꞌhiaj Ma̱ꞌan Ñaꞌanj an sani̱ rayiꞌî dan ni̱ gahuin chrunj dagahuin.
9 Ni̱ dagahuin Ma̱ꞌan Jesús daranꞌ sun giyiꞌnïnꞌ riñanj,
ni̱ giꞌhiaj Ma̱ꞌan Ñaꞌanj an si ga̱ꞌhue gi̱ꞌhia ga̱na̱ni̱n nìgànj daranꞌ nej guiì dagahuin riñanj.
10 Ni̱ gachrûn su̱n Ma̱ꞌan Ñaꞌanj an si ga̱huin Ma̱ꞌan Jesús rej huin ña̱n nï̀nꞌïn dàj rûnꞌ gahuin Melquisedec rej huin ña̱n nï̀nꞌïn.
Dunaꞌnga si nitaj si dùgùnàj huaj si gu̱du̱nôꞌ sa guyumân ruhuôꞌ
11 Rayiꞌî nuguanꞌ nânj ni̱ nìko huaj ga̱na̱nï̱n nej ñûnj riñan nej suj,
sani̱ chìꞌ huaj gànàtàꞌ nej ñûnj riñan nej suj,
rayiꞌî guendâ ûta ra̱n garânj daꞌnga ruhuâ nej suj.
12 Ni̱ gàꞌ daꞌhui nej suj ga̱huin nej suj maestrû,
dadinꞌ gàꞌ ûta nâ niꞌin nej suj nuguanꞌ gi̱ꞌhiaj ga̱na̱ni̱n nej suj,
sani̱ ganï̂n ruhuâ nej suj si hua̱ na̱nj gi̱di̱gân ñûn nej ñûnj aꞌngô ñûn nej suj rayiꞌî nuguanꞌ nitaj si chìꞌ hua gidigân Ma̱ꞌan Ñaꞌanj an;
huê danj ni̱ huin nej suj dàj rûnꞌ huin neꞌej goꞌo tòo,
ni̱ hua̱ na̱nj naꞌhue ya̱ nej suj nihia sìkàꞌ huaa mánj.
13 Ni̱ nej guiì nitaj si hua ran ruhuâ ni̱ huin ninj dàj rûnꞌ huin neꞌej goꞌo tòo,
ni̱ huin ninj dàj rûnꞌ huin nej guiì hia̱j gayiꞌì dadinꞌ nitaj si chru̱n ninj ga̱na̱ka̱j guendâ hueꞌê ninj ahuin sa huin sa nìkàa mánj.
14 Sani̱ nihia hua̱ sìkàꞌa niꞌñanj riñan nej guiì hua̱ ruhuâ gi̱nikòꞌ yìtï̀nj rukû Ma̱ꞌan Ñaꞌanj an,
ni̱ chru̱n ninj ga̱na̱ka̱j guendâ ninj ahuin sa huin sa sàꞌa ngà sa aꞌnanꞌan.