4
Du̱gumîn nêꞌ ma̱ꞌan nêꞌ,
dadinꞌ nùnj huin si huaj ga̱ꞌhue ga̱tu̱ꞌ ñan nne Ma̱ꞌan Ñaꞌanj an ga̱na̱ra̱n ruhuôꞌ,
sani̱ hua̱ da̱ꞌa̱j nej suj si̱ gaꞌhue ga̱tu̱ ñan nne Ma̱ꞌan Ñaꞌanj an si nitaj si dugumînꞌ nej suj ma̱ꞌan nej suj riñan gakï̱nꞌïn mánj.
2 Dadinꞌ dàj rûnꞌ ganataꞌ nej sij riñunꞌ nuguanꞌ gi̱ꞌhiaj ga̱na̱ni̱nꞌ,
ni̱ huê danj gàꞌ gunïn nej israelita gahui riñan hioꞌó Egipto nuguanꞌ gi̱ꞌhiaj ga̱na̱ni̱n nej sôꞌ;
sani̱ nun ga̱ꞌhue̱j nej sôꞌ gu̱nïn nej sôꞌ nuguanꞌ dânj,
dadinꞌ nun gùyùmàn ruhuâ nej sôꞌ.
3 Sani̱ nêꞌ guyumân ruhuâ ni̱ ga̱tu̱ꞌ ñan nne Ma̱ꞌan Ñaꞌanj an ga̱na̱ra̱n ruhuôꞌ,
dàj rûnꞌ gata:
Hia̱j ni̱ ginaꞌan ruhuâj niꞌín ninj,
rayiꞌî dan ni̱ gatâ si nitaj àmàn huaj ga̱tu̱ ninj ñan nné ga̱na̱ra̱n ruhuâ ninj mánj.
Sani̱ gàꞌ ganarânj ruhuâ Ma̱ꞌan Ñaꞌanj an àsìj nga ganahui giꞌhia yumiguìi.
4 Dadinꞌ huê danj gananï̂n riñan ñanj si-nùguànꞌ Ma̱ꞌan Ñaꞌanj an rayiꞌî gui chi̱j i:
Ni̱ gui chi̱j i ganarânj ruhuâ Ma̱ꞌan Ñaꞌanj an rayiꞌî daranꞌ nej sun guruguiꞌ giꞌhia.
5 Sani̱ gataj Ma̱ꞌan Ñaꞌanj an aꞌngô ñûn:
Ni̱ si̱ gatûj ninj ñan nné ga̱na̱ra̱n ruhuâ ninj mánj.
6 Sani̱ hua̱ nï̀nꞌ ga̱chin ga̱tu̱ aꞌngô nej guiì ñan nne Ma̱ꞌan Ñaꞌanj an ga̱na̱ra̱n ruhuâ ninj,
dadinꞌ nun ga̱ꞌhue ga̱tu̱ nej guiì gàꞌ gunïn si̱nï̱n nuguanꞌ giꞌhiaj ga̱na̱ni̱n ninj ñan ga̱na̱ra̱n ruhuâ ninj,
rayiꞌî guendâ nun ga̱ꞌhue da̱gahuin ninj,
7 rayiꞌî dan ni̱ gaꞌnḯn nimân Ma̱ꞌan Ñaꞌanj an aꞌngô ñûn,
ni̱ rikij aꞌngô gui:
Ni̱ gui dânj huin gui hia̱j,
ni̱ neꞌ rùkù nga gachîn ûta gàꞌì diû nga garânj sunj gaꞌmin David ni̱ gataj sôꞌ:
Si gui hia̱j gunïn nej suj gaꞌmin Ma̱ꞌan Ñaꞌanj an,
ni̱ si̱ nagiꞌhiaj tsì nej suj ruhuâ nimân nej suj mánj.
8 Dadinꞌ si nu̱n gunùkuaj Josué gi̱ꞌhiaj sôꞌ ganarânj ruhuâ nej israelita,
hiôꞌ ni̱ si̱ gataj Ma̱ꞌan Ñaꞌanj an si hua̱ aꞌngô gui ga̱ꞌhue ga̱na̱ra̱n ruhuâ nej guiì saj mánj.
9 Huê danj ni̱,
nêꞌ huin yiñán Ma̱ꞌan Ñaꞌanj an ni̱ hua̱ na̱nj gànàꞌhuìꞌ,
si gùyùmàn ꞌngo̱ gui ni̱ ga̱na̱ra̱n ruhuôꞌ.
10 Dadinꞌ guiì gunùkuaj gatûj ñan nne Ma̱ꞌan Ñaꞌanj an ganarânj ruhuâ,
ni̱ ga̱na̱ra̱n ruhuâ ninj riñan daranꞌ sun giꞌhiaj ninj,
dàj rûnꞌ ganarânj ruhuâ Ma̱ꞌan Ñaꞌanj an riñan nej sun giꞌhia na̱nj ánj.
11 Du̱guꞌnï̂nꞌ ga̱tu̱ꞌ ñan huaj ga̱na̱ra̱n ruhuôꞌ,
daꞌnga ni̱ gàꞌ si ꞌngo̱ nêꞌ si̱ gi̱daꞌa si-chrej nej guiì nun ga̱ꞌhue̱j da̱gahuin mánj.
12 Dadinꞌ hua̱ nìꞌnàꞌ ni̱ ûta hueꞌê hua si-nùguànꞌ Ma̱ꞌan Ñaꞌanj an,
ni̱ dànanj ûta sa gaꞌnej gàꞌ daꞌ ꞌngo̱ yitî hua̱ huà nguèj riñan;
ni̱ gatu ni̱ guchraꞌ da̱ꞌa ma̱ꞌan nimân nej guiì ni̱ guchraꞌ da̱ꞌa nanè nimân ninj,
ni̱ gatu ñan nadaꞌa duguiꞌ nej kúu ni̱ gatu ñan màn rakïnj nu̱n ruhuâ kúu,
ni̱ garânj daꞌngaꞌ ruhuâj dàj ganï̂n ruhuâ nej guiì ni̱ garânj daꞌnga ruhuâj sa ganï̂n ruhuâ nimân ninj gi̱ꞌhiaj ninj.
13 Gàꞌ si ꞌngo̱ nej sa giꞌhiaj Ma̱ꞌan Ñaꞌanj an ni̱ si̱ gaꞌhue gìyìꞌìj huij riñanj mánj;
ni̱ nga ga̱na̱huin guenda gi̱ꞌhiaj Ma̱ꞌan Ñaꞌanj an ngà daꞌ goꞌngo̱ nej guiì,
ni̱ gùrùguìꞌ nda hueꞌê chre gi̱niꞌhiaj Ma̱ꞌan riñan daranꞌ nej sa giꞌhiaj daꞌ goꞌngo̱ ninj na̱nj ánj.
Maꞌan Jesús huin Ma̱ꞌan Rej huin ña̱n nï̀nꞌïn
14 Hia̱j ni̱,
hua̱ ꞌngo̱ rej huin ña̱n nï̀nꞌïn nikïnꞌ riñan nêꞌ ni̱ gahui gaꞌan yàtàꞌà,
ni̱ huej huin Ma̱ꞌan Jesús Daꞌní Ma̱ꞌan Ñaꞌanj an,
hia̱j ni̱ da̱gahuînꞌ nej sa gidiganj riñunꞌ.
15 Dadinꞌ hua̱ ꞌngo̱ rej huin ña̱n nï̀nꞌ ni̱kï̱nꞌ riñanꞌ nêꞌ ni̱ chrùnj ga̱na̱nï̱n àko ruhuâ niꞌin nga gininaj ruhuôꞌ,
dadinꞌ huê dàj rûnꞌ duguaneꞌ sichre gakï̱nꞌïn riñunꞌ huê danj na̱nj duguaneꞌ sichre gakï̱nꞌïn riñanj,
sani̱ nitaj àmàn giꞌhia nej gakï̱nꞌ duguaneꞌ sichre riñanj mánj.
16 Si̱ guyuꞌhuîꞌ ga̱ꞌa̱nj nichìꞌ ñan nne Ma̱ꞌan Jesús nikaj sunj,
ni̱ gìrìꞌ si-su̱nu̱j Ma̱ꞌan ni̱ gu̱ru̱gûñuꞌun rukûꞌ,
ni̱ gi̱ni̱nj hueꞌêꞌ riñanj ni̱ gìrìꞌ ni̱ꞌhioꞌ si du̱naꞌhue rayiꞌîꞌ.