Ñânj kartâ si̱nï̱n nânj huin gachrûn Apóstol
PEDRO
Gaꞌnḯn Pedro nuguanꞌ ni̱ꞌña̱nj an riñan nej dinï̂nt nìkòꞌ Ma̱ꞌan Ñaꞌanj an
1
Pedro huin sí gaꞌanj gi̱di̱gân si̱nï̱n si-nùguànꞌ Ma̱ꞌan Ñaꞌanj an,
ni̱ gaꞌnï̂n sôꞌ ñanj nânj hua riñan nej dinï̂nt màn gayaꞌnï̀n gaꞌanj aꞌngô nej país gùꞌnàj Ponto,
Galacia,
Kapadocia,
Asia ni̱ Bitinia,
2 ni̱ ganagui Ma̱ꞌan Reꞌ Ñaꞌanj an nej suj dadinꞌ gàꞌ gata dàj ga̱huin rayiꞌî nej suj ni̱ nagiꞌhiaj gè Ma̱ꞌan Espíritu Santo nej suj,
guendâ da̱gahuin nej suj ni̱ tun Ma̱ꞌan Jesús giꞌhiaj ganaruhui si-ga̱kïnꞌ nej suj:
Ni̱ si-su̱nu̱j ni̱ sa hua̱ dïnꞌïnj riñan Ma̱ꞌan Ñaꞌanj an ga̱huin nìko riñan nej suj na̱nj ánj.
Daranꞌ diû anaꞌhuìj Ma̱ꞌan Ñaꞌanj an
3 Ga̱ꞌmi̱n hueꞌêꞌ rayiꞌî Ma̱ꞌan Ñaꞌanj huin Rej Ma̱ꞌan Señor Jesucristo,
dadinꞌ giꞌhia si ganaꞌnï̂nj Ma̱ꞌan Señor Jesucristo siganï̂nj nej nimân.
Ni̱ ûta nìko guruguñuꞌunj Ma̱ꞌan ñùnꞌ dadinꞌ giꞌhia si ga̱ꞌnga̱ nàkà ñûnꞌ ni̱ nda nìhiàꞌ chre hua ruhuôꞌ ni̱ ga̱ꞌhue gànàꞌhuìꞌ Ma̱ꞌan,
4 ni̱ hua̱ ꞌngo̱ nani̱ꞌhiaj nej suj gànàrìꞌ nej suj neꞌ yàtàꞌa ni̱ sê sa gìrë̀ꞌ huin,
ni̱ sê sa go̱chroj huin,
ni̱ nitaj si hua̱ kï̱j hiuj dânj mánj.
5 Ni̱ guendâ guyumân ruhuâ nej suj ni̱ dugumîn Ma̱ꞌan Ñaꞌanj an nej suj ngà sa nùkuaj hua̱ riñanj,
ni̱ gi̱ꞌhia si gùnùkuaj nej suj ga̱na̱ni̱n nej suj dadinꞌ gàꞌ hua yu̱gui gànàrìꞌ nej suj gui ga̱ꞌna̱ꞌ neꞌ ña̱an.
6 Ni̱ rayiꞌî dan ni̱ ga̱na̱huin nìhiàꞌ ruhuâ nej suj rayiꞌî si gàꞌ ginikaj Ma̱ꞌan Ñaꞌanj an nimân nìko rayiꞌî nej suj,
nùnj huin si hua̱ hia ni̱ gi̱ranꞌ sa̱ñu̱n nej suj do̱j riñan gàꞌì yìꞌnï̀nꞌ sañun gùyùmàn riñan nej suj,
7 dadinꞌ dàñùn ga̱chi̱n sa yumân ruhuâ nej suj dânj riñan sañuun,
dadinꞌ oro ni̱ huin sa gìrë̀ꞌ sani̱ dàñùn daꞌhui gàchinj riñan ñaꞌaan,
hiôꞌ ni̱ nga gunukuaj nej suj gachînꞌ nej suj riñan sañuun ni̱ dànanj ga̱na̱huin hueꞌê nej suj gàꞌ daꞌ agaꞌ oro,
ni̱ huê danj na̱nj ga̱ꞌmi̱n hueꞌê nej guiì yiꞌî nej suj ni̱ gi̱nikaj chrej ninj ngà nej suj nda gui nga ga̱ꞌna̱ꞌ Ma̱ꞌan Cristo.
8 Dadinꞌ nun gi̱ni̱ꞌin nej suj Ma̱ꞌan Cristo sani̱ ꞌì ruhuâ nej suj niꞌin nej suj Ma̱ꞌan,
ni̱ guyumân ruhuâ nej suj niꞌin nej suj Ma̱ꞌan,
ni̱ nùnj huin si nun gi̱ni̱ꞌin nej suj Ma̱ꞌan,
sani̱ ûta nìhiàꞌ hua ruhuâ nej suj ni̱ sê nuguanꞌ gìrìꞌ gànàtòꞌ huin dadinꞌ ûta nìko sîj Ma̱ꞌan Cristo na̱nj ánj.
9 Ni̱ si guyumân yìtï̀nj ruhuâ nej suj nda aꞌngô rïn gui gane nej suj riñan hioꞌó nânj,
hiôꞌ ni̱ ga̱na̱ni̱n ma̱ꞌan nimân nej suj.
10 Ni̱ nda hueꞌê chre nanaꞌhuiꞌ guentû nej sôꞌ gataj dàj ga̱huin rayiꞌî sunuj ga̱ riñan nej suj,
ni̱ ûta ga gu̱dadû nej sôꞌ nga ganachinꞌ naꞌanj nej sôꞌ aꞌngô nej sachij garânj daꞌnga ruhuâ,
si hi̱a ni̱ gi̱ꞌhiaj Ma̱ꞌan Ñaꞌanj an ga̱na̱ni̱n nej suj.
11 Ni̱ nadigiꞌñûn nej sôꞌ ahuin guiì ni̱ ahuin diû giꞌhiaj Si-Espíritu Ma̱ꞌan Cristo garânj daꞌnga ruhuâ nej sôꞌ ni̱ nne ngà nej sôꞌ,
dadinꞌ huê Ma̱ꞌan Espíritu dânj gidigân dàj nìko gi̱ranꞌ sa̱ñu̱n Ma̱ꞌan Cristo,
ni̱ giꞌhia garânj daꞌngaꞌ ruhuâ nej sôꞌ gataj dàj ga̱huin dàj hueꞌê ga̱ neꞌ ñan doj.
12 Ni̱ ganadigân Ma̱ꞌan Ñaꞌanj an nuguanꞌ nânj riñan nej sôꞌ sani̱ sê guendâ nej sôꞌ gahuin mánj,
guendâ nêꞌ gahuin ni̱ man si ginikaj ñuꞌunj nej sôꞌ nuguanꞌ dânj,
ni̱ nda diû nânj gisîj nuguanꞌ dânj ni̱ ganahuin ra̱ꞌa nej sôꞌ ganataꞌ nuguanꞌ gi̱ꞌhiaj ga̱na̱ni̱n nej guiì giꞌhiaj Ma̱ꞌan Espíritu Santo gaꞌnaꞌ yàtàꞌa;
ni̱ ûta huin ruhuâ nej ángel gi̱ni̱ꞌin ninj nej nânj.
Gaꞌnïnꞌ su̱n Ma̱ꞌan Ñaꞌanj an si da̱gahuînꞌ riñanj
13 Hia̱j ni̱,
dàj rûnꞌ giꞌhiaj nej sí nagiꞌhiaj ran nnïnj ꞌnï̱nj gatï̀n,
huê danj na̱nj gànàꞌnï̀nj sàꞌ nej suj sa garânj daꞌnga ruhuâ nej suj,
ni̱ daꞌngaꞌ hueꞌê gè gi̱ꞌhiaj nej suj ni̱ gànàꞌhuìj nej suj si gi̱ꞌhiaj Ma̱ꞌan Jesús sunuj u ngà nej suj nga nànìkàj ñûn Ma̱ꞌan ga̱ꞌnaj.
14 Ni̱ si̱ gi̱ꞌhiaj nej suj gakï̱nꞌïn dàj rûnꞌ giꞌhiaj nej suj nga nï̀nꞌ gàchin gi̱ni̱ꞌin nej suj Ma̱ꞌan Jesús mánj,
gi̱ꞌhiaj nej suj dàj rûnꞌ giꞌhiaj ꞌngo̱ daꞌní nej suj hueꞌê dagahuin riñan nej suj;
15 sani̱ si̱ giꞌhiaj nej suj gàꞌ si ꞌngo̱ gakï̱nꞌïn dadinꞌ nitaj gàꞌ si ꞌngo̱ gakï̱nꞌïn giꞌhiaj Ma̱ꞌan sa gakḯn nej suj mánj;
16 dadinꞌ huê danj nnunj riñan ñanj:
“Ni̱ gataj Ma̱ꞌan ni̱ ga̱huin nej suj sa gèe ni̱ si̱ giꞌhiaj nej suj gakï̱nꞌïn,
dadinꞌ ñùnj ni̱ sa gèe huín ni̱ nitaj gakï̱nꞌïn giꞌhiâ mánj.”
17 Si gataj nej suj si “Rej” nej suj huin Ma̱ꞌan Ñaꞌanj an,
ni̱ gi̱nun ruhuâ nej suj si Ma̱ꞌan Ñaꞌanj an ni̱ nitaj si chrùnj gi̱ꞌhiaj ni̱nïnj nej guiì dadinꞌ gayakaj guendaj dàj na̱nj hua ma̱ꞌan sa giꞌhiaj daꞌ goꞌngo̱ ninj,
rayiꞌî dan ni̱ ga̱ gudadû nej suj Ma̱ꞌan nej suj ni̱ gi̱ni̱kaj chre̱j nej suj daranꞌ diû riñan Ma̱ꞌan nga nï̀nꞌ aché nun nej suj riñan hioꞌó nânj riñan Ma̱ꞌan na̱nj ánj.
18 Ma̱ꞌan Ñaꞌanj an gi̱ꞌhiaj ga̱na̱ni̱n nej suj,
riñan nej chrej nâ gidigân rej nej suj,
ni̱ gàꞌ niꞌin nej suj si sê ngà oro ni̱ sê ngà plata giran nej suj mánj dadinꞌ nej nânj ni̱ sa ga̱na̱huij huin na̱nj ánj,
19 ni̱ girânj Ma̱ꞌan Cristo ngà tun nej suj,
ni̱ gahuin dàj rûnꞌ huin ꞌngo̱ matsïj hua sàꞌa ni̱ gahuin dàj rûnꞌ huin ꞌngo̱ matsïj nitaj si hua̱ díin,
20 ni̱ àsìj nga nï̀nꞌ ga̱chin gi̱ꞌhiaj Ma̱ꞌan Ñaꞌanj an yumiguìi ni̱ gàꞌ hua̱ yugui si huê dànanj gi̱ranꞌ Ma̱ꞌan Cristo,
sani̱ neꞌ rùkù doj ni̱ gaꞌnaꞌ Ma̱ꞌan Cristo ni̱ gahuij rayiꞌî nêꞌ guendâ ꞌì ruhuâj niꞌin ñùnꞌ.
21 Ni̱ rayiꞌî guendâ giꞌhiaj Ma̱ꞌan Cristo dànanj ni̱ guyumân ruhuâ nej suj niꞌin nej suj Ma̱ꞌan Ñaꞌanj an,
ni̱ giꞌhiaj Ma̱ꞌan Ñaꞌanj an si ganaꞌnï̂nj Ma̱ꞌan Cristo siganï̂nj nej nîman ni̱ gaꞌmin hueꞌê Ma̱ꞌan Ñaꞌanj an rayiꞌî Ma̱ꞌan Cristo,
daꞌnga ni̱ gaꞌhue gùyùmàn ruhuâ nej suj ni̱ gànàꞌhuìj nej suj Ma̱ꞌan Ñaꞌanj an na̱nj ánj.
22 Hia̱j ni̱ guendâ guyumân ruhuâ nej suj niꞌin nej suj nuguanꞌ yàngàꞌa,
ni̱ ganahuin hueꞌê ma̱ꞌan nimân nej suj ni̱ gaꞌhue ga ꞌì ruhuâ nej suj niꞌin nej suj nej dinḯn nej suj giꞌhiaj Ma̱ꞌan Espíritu Santo,
sani̱ ga̱ ꞌì yàngàꞌ ruhuâ nej suj ngà daranꞌ sa nùkuaj hua̱ ruhuâ nimân nej suj ngà nej dinḯn nej suj dadinꞌ hua̱ da̱ꞌa̱j nej suj ni̱ man si giꞌhiaj nej suj si ꞌì ruhuâ nej suj niꞌin nej suj nej dinḯn nej suj sani̱ nitaj si ꞌì yàngàꞌ ruhuâ nej suj mánj.
23 Ni̱ gaꞌnga nàkà nej suj,
sani̱ sê si̱ gaꞌnga ñûn nej suj riki nni nej suj mánj,
si-nùguànꞌ Ma̱ꞌan Ñaꞌanj an giꞌhiaj gaꞌnga nàkà nej suj dadinꞌ huin ꞌngo̱ nuguanꞌ hua̱ nìꞌnàꞌa ni̱ nitaj si huaj ga̱na̱hui dadinꞌ nìgànj nï̀nꞌ huaj.
24 Dadin huê dànanj taj ñanj si-nùguànꞌ Ma̱ꞌan Ñaꞌanj an:
Dadinꞌ daranꞌ nej guiì ni̱ huin ninj dàj rûnꞌ huin koj o,
ni̱ daranꞌ nej sí ganï̂n ruhuâ si huin nej sôꞌ doj ni̱ dàj rûnꞌ huin hiaj ganï̀n raa̱ koj o huin nej sôꞌ.
Ni̱ ganakò koj o,
ni̱ gininj hiaj gitá raa̱ koj dânj.
25 Sani̱ si-nùguànꞌ Ma̱ꞌan Ñaꞌanj an ni̱ nitaj si huaj ga̱na̱hui dadinꞌ nìgànj nï̀nꞌ huaj na̱nj ánj.
Ni̱ huê nuguanꞌ nânj huin nuguanꞌ gi̱ꞌhiaj ga̱na̱ni̱n nej guiì ni̱ gàꞌ gunïn nej suj nuguanꞌ nânj.