Ga̱na̱huij siꞌhiaj nej sí yi̱ruꞌhuee
5
Gu̱nïn nej suj hua̱ yiruꞌhuee nej nuguanꞌ nânj.
Ni̱ gu̱du̱gue̱ꞌe nej suj,
ni̱ ga̱gua̱j hia nej suj dadinꞌ gùyùmàn gui ni̱ gi̱ranꞌ àko nej suj.
2 Gàꞌ girëꞌ daranꞌ nej rasu̱n hua̱ duꞌhue riñan nej suj,
ni̱ gàꞌ yâ nej yahuì lij nej siganꞌ nej suj.
3 Ni̱ gàꞌ gato nï̀nꞌ nej agaꞌ oro ni̱ agaꞌ plata hua̱ riñan nej suj;
ni̱ sa gato dânj huin sa gànàtàꞌ rayiꞌî nej suj ni̱ dàj rûnꞌ gaka nej rasu̱un giꞌhiaj ñaꞌaan ni̱ huê danj girëꞌ nej suj gi̱ꞌhiaj sa gato dânj.
4 Huê danj ni̱,
gaꞌmin gakï̱nꞌ nej síi rayiꞌî nej gui giꞌhiaj sun nej sôꞌ riñan ꞌngo̱ yiruꞌhuee,
dadinꞌ gidigañuꞌunj nej yiruꞌhuee nej sôꞌ ni̱ nun ga̱na̱ruꞌhue hueꞌê nej yiruꞌhuee duꞌhue nej sôꞌ;
ni̱ gunïn Ma̱ꞌan Ñaꞌanj an daranꞌ nej nuguanꞌ gaꞌminꞌ gakï̱nꞌ nej sí giꞌhiaj suun.
5 Nga gane nej suj riñan hioꞌó nânj ni̱ ûta ganahuin nìhiàꞌ ruhuâ nej suj ngà nneè kú nej suj ngà nej gakï̱nꞌïn,
ni̱ ûta guꞌñûn nej suj giꞌhiaj nej suj gakï̱nꞌïn,
ni̱ dàj rûnꞌ ganaminj nej yuku dagahuiꞌ nej sij huê danj ganaminj nimân nej suj ngà nej gakï̱nꞌïn.
6 Ni̱ nitaj si dunaꞌhuej nej sí giꞌhiaj sa ni̱ka̱a rayiꞌî nej sôꞌ,
huê danj ni̱ duguaꞌì nej suj ni̱ dagahuiꞌ nej suj nej sôꞌ.
Ga̱ nùkuaj ruhuâ ni̱ da̱gahuin
7 Huê danj ni̱ ga̱ nùkuaj ruhuâ nej suj na̱nj di̱nï̂nj,
nda gui nànìkàj ñun Ma̱ꞌan Señor ga̱ꞌnaj.
Ni̱ gi̱niꞌhiaj nej suj dàj giꞌhiaj nej sí gunuun dadinꞌ hua̱ nùkuaj ruhuâ nej sôꞌ ganaꞌhuìj nej sôꞌ nda gùyùmàn gumàn ràan ngà gumàn raꞌñanj an,
daꞌnga ni̱ gaꞌhue ga̱chi̱j yinà nej sôꞌ ni̱ gìrìꞌ nej sôꞌ tanꞌan ya̱ nej sôꞌ.
8 Huê danj na̱nj ga̱ nùkuaj ruhuâ nej suj,
ni̱ na̱gi̱ꞌhiaj ran nej suj nimân nej suj;
dadinꞌ gàꞌ gahuin nichrunꞌ diû ga̱ꞌna̱ꞌ ñûn Ma̱ꞌan Señor.
9 Ni̱ si̱ garânj ruhuâ ꞌngo̱ ni̱ aꞌngô nej suj rayiꞌî nej dinḯn nej suj man di̱nï̂nj,
daꞌnga ni̱ si̱ gaꞌanj ni̱ꞌhia̱ nej suj;
dadinꞌ gàꞌ ni̱kï̱nꞌ chru̱n guesì riñan rahueꞌe guendâ na̱gi̱ꞌhia guenda ngà nej suj.
10 Gi̱daꞌa nej suj si-chrej nej sí ganataꞌ dàj ga̱huin na̱nj di̱nï̂n,
dadinꞌ gananï̂n nej sôꞌ yiꞌî siyu̱gui Ma̱ꞌan Señor huê danj ni̱ giranꞌ sa̱ñu̱n nej sôꞌ,
sani̱ ga nùkuaj ruhuâ nej sôꞌ.
11 Dadinꞌ gàꞌ niꞌînꞌ si dànanj ganahuin nìhiàꞌ ruhuâ nej guiì giranꞌ sa̱ñu̱n.
Ni̱ gàꞌ gunïn nej suj dàj ga nùkuaj ruhuâ Job nga giranꞌ sa̱ñu̱n sôꞌ,
ni̱ gàꞌ niꞌin nej suj dàj giꞌhiaj Ma̱ꞌan Señor ngà sôꞌ nda neꞌ rùkù nï̀nꞌ,
dadinꞌ ûta gananï̂n àko ruhuaj niꞌin sôꞌ.
12 Sani̱ sa daꞌhui nej suj gi̱ꞌhiaj nej suj huin,
di̱nï̂nj,
ni̱ si̱ gi̱ꞌhiaj yìtï̀nj nej suj si-nùguànꞌ nej suj,
ni̱ si̱ gataj nej suj si yàtàꞌa ngà hioꞌóo huin sa giniꞌin yàngàꞌ sa giꞌhiaj nej suj mánj:
Ni̱ gàꞌ si̱ gaꞌhue ga̱ta̱j nej suj si aꞌngô nej rasu̱un huin sa giniꞌin yàngàꞌ sa giꞌhiaj nej suj mánj;
ni̱ si gataj nej suj “ga̱ꞌhue” ni̱ da̱gahuin nej suj nuguanꞌ garânj yina nej suj dânj,
ni̱ si gataj nej suj “si̱ gaꞌhue” ni̱ huê danj gi̱ꞌhiaj nej suj,
daꞌnga ni̱ si̱ giranꞌ sa̱ñu̱n nej suj mánj.
13 Hua̱ ꞌngo̱ nej sôꞌ màn siganï̂nj nej suj giranꞌ sa̱ñu̱n nîꞌ.
Gàchìnj nìꞌhiaj nej suj rayiꞌî nej sôꞌ.
Hua̱ nìhiàꞌ ruhuâ ꞌngo̱ nej sôꞌ màn siganï̂nj nej suj nîꞌ.
Ga̱chra̱ nej sôꞌ chraꞌa riñan Ma̱ꞌan Ñaꞌanj an.
14 Ni̱ hua̱ ꞌngo̱ guiì aꞌnanꞌan siganï̂nj nej suj nîꞌ,
gàkï̀nj nej suj nej sôꞌ ni̱ka̱j suj riñan nej sôꞌ nìkòꞌ rukû Ma̱ꞌan Jesús,
ni̱ ga̱ꞌna̱ꞌ nej sôꞌ ni̱ gàchìnj nìꞌhiaj nej sôꞌ rayiꞌî nej guiì aꞌnanꞌan ni̱ ga̱chri̱ nej sôꞌ gasîti nej guiì dânj ngà siyu̱gui Ma̱ꞌan Señor.
15 Ni̱ si guyumân ruhuâ nej sôꞌ nga gachín nìꞌhiaj nej sôꞌ rayiꞌî guiì aꞌnanꞌ dânj,
ni̱ ga̱na̱huin guiì aꞌnanꞌ dânj,
ni̱ ga̱na̱chi nikaj Ma̱ꞌan Señor guiì aꞌnanꞌ dânj;
ni̱ si giꞌhiaj guiì dânj gakï̱nꞌïn ni̱ gi̱nikaj Ma̱ꞌan Ñaꞌanj an nimân nìko rayiꞌî guiì dânj.
16 Gànàtàꞌ ꞌngo̱ ni̱ aꞌngô nej suj si-ga̱kïnꞌ nej suj riñan nej duguiꞌ nej suj,
ni̱ gàchìnj nìꞌhiaj ꞌngo̱ ni̱ aꞌngô nej suj rayiꞌî nej duguiꞌ nej suj,
daꞌnga ni̱ ganahuin nej suj.
Ni̱ si hua̱ yìtï̀nj ruhuâ sí giꞌhiaj sa ni̱ka̱a nga gàchìnj nìꞌhiaj sôꞌ ni̱ ûta nìko ga sa gaꞌhue gi̱ꞌhiaj sôꞌ.
17 Ni̱ dàj rûnꞌ hua nêꞌ huê danj ga Elías sôꞌ gataj dàj ga̱huin,
ni̱ nga gaꞌmin sôꞌ ngà Ma̱ꞌan Ñaꞌanj an ni̱ nga gachín nìꞌhiaj sôꞌ sisi̱ si̱ gamanꞌ ni̱ guyumân yìtï̀nj ruhuâ sôꞌ rayiꞌî sa gachín sôꞌ huê danj ni̱ nun gàmànꞌ huàꞌnï̀nj hioꞌo tá huàtànꞌ ahui mánj.
18 Ni̱ neꞌ rùkù ni̱ gachín nìꞌhiaj ñûn sôꞌ,
huê danj ni̱ gamanꞌ,
ni̱ gahiu ñûn nej sa màn riñan hioꞌóo yâ nej guiì.
19 Ni̱ si hua̱ ꞌngo̱ nej dinï̂nt màn siganï̂nj nej suj guxunj ma̱ꞌan riñan chrej yàngàꞌa,
ni̱ aꞌngô nej suj giꞌhiaj gananikàj ñûn sí dânj ni̱ gaché sôꞌ chrej yàngàꞌa,
20 ni̱ dùgùnàj huaj si gi̱niꞌin nej suj ni̱ si hua̱ ꞌngo̱ nej dinï̂nt giꞌhiaj gananikàj ñûn sí dânj gatûj sôꞌ ruhuâ chrej yàngàꞌa,
ni̱ giꞌhiaj sôꞌ si ga̱na̱ni̱n sí dânj ni̱ si̱ gaꞌanj ni̱ꞌhia sôꞌ,
ni̱ giꞌhiaj sôꞌ si gi̱nikaj Ma̱ꞌan Ñaꞌanj an nimân nìko rayiꞌî gàꞌì nej si-ga̱kïnꞌ sí danj.