Si̱ gi̱nikaj duguiꞌ ngà nej guiì nun niꞌin Ma̱ꞌan Ñaꞌanj an
4
Dànèꞌ gaꞌnaꞌ sun gutaꞌa ngà sun gunïnꞌïn siganï̂nj nej suj ràꞌaj.
Sê rayiꞌî sa aꞌnanꞌ ganï̂n ruhuâ nej suj gi̱ꞌhiaj nej suj huin sa giꞌhiaj ràꞌ saj ûnꞌ.
2 Ûta huin ruhuâ nej suj ga̱ doj rasu̱un riñan nej suj,
sani̱ nitaj nùnj giriꞌ nej suj ga̱ riñan nej suj,
ni̱ dagahuiꞌ nej suj ni̱ huin yìkòj ruhuâ nej suj niꞌin nej suj nej duguiꞌ nej suj, sani̱ naꞌhue gìrìꞌ nej suj, ni̱ ûta gunïnꞌ nej suj ni̱ gutaꞌ nej suj, sani̱ naꞌhue gìrìꞌ nej suj sa ganï̂n ruhuâ nej suj, dadinꞌ nitaj si gachín nej suj riñan Ma̱ꞌan Ñaꞌanj an mánj.
3 Gachín nej suj,
sani̱ nitaj si ganahuin ra̱ꞌa nej suj,
dadinꞌ gachín nej suj guendâ ga̱na̱huin nìhiàꞌ ruhuâ nej suj ngà nneè kú nej suj.
4 Dàj rûnꞌ giꞌhiaj nej guiì ni̱ka̱j nika duguiꞌ huê danj giꞌhiaj anêj ma̱ꞌan nimân nej suj ma̱ꞌan riñan Ma̱ꞌan Ñaꞌanj an.
Nun niꞌin nej suj si nga ginikaj duguiꞌ nej suj ngà nej guiì màn ruhuâ yumiguìi ni̱ gunïnꞌ nej suj ngà Ma̱ꞌan Ñaꞌanj an mínj.
Ahuin na̱nj guiì,
huin ruhuâ gi̱nikaj duguiꞌ ngà nej guiì màn ruhuâ yumiguìi. Ni̱ huin ninj guiì gunïnꞌ ngà Ma̱ꞌan Ñaꞌanj an na̱nj ánj.
5 Ni̱ ganï̂n ruhuâ nej suj si man si gaꞌmin ma̱ꞌan ñanj si-nùguànꞌ Ma̱ꞌan Ñaꞌanj an na̱nj nîꞌ:
“Nun niꞌin nej suj si ûta huin ruhuâ Ma̱ꞌan Espíritu Santo nne ruhuâ nimân nej suj si da̱gahuin nej suj mínj.”
6 Sani̱ dànanj ûta nìko guruguñuꞌunj Ma̱ꞌan Ñaꞌanj an ni̱ giꞌhia sunuj u ngà nej guiì dagahuin riñanj.
Ni̱ rayiꞌî dan gataj ñanj si-nùguànꞌ Ma̱ꞌan Ñaꞌanj an:
Ni̱ gunïnꞌ Ma̱ꞌan Ñaꞌanj an ngà nej guiì ganï̂n ruhuâ si ûta huin ninj,
sani̱ giꞌhiaj Ma̱ꞌan Ñaꞌanj an sunuj u ngà nej guiì giꞌhiaj si huin ninj guiì ninaj doj.
7 Da̱gahuin nej suj,
sa gataj Ma̱ꞌan Ñaꞌanj an;
ni̱ si̱ gaꞌnï̂nj nej suj si gi̱ꞌhiaj ga̱nan sa nàsàꞌa riñan nej suj,
huê danj ni̱ gu̱xunj ma̱ꞌan riñan nej suj na̱nj ánj.
8 Ga̱ꞌna̱ꞌ nichì nej suj riñan Ma̱ꞌan Ñaꞌanj an,
ni̱ ga̱ꞌna̱ꞌ nichì Ma̱ꞌan riñan nej suj.
Nej suj giꞌhiaj gakï̱nꞌïn ni̱ gànànìkàj ruhuâ nej suj rayiꞌî si-ga̱kïnꞌ nej suj, ni̱ nej suj ganï̂n huàꞌ ruhuâ ni̱ na̱gi̱ꞌhiaj hueꞌê nej suj nimân nej suj.
9 Ga̱na̱nï̱n staꞌu ruhuâ nej suj,
ni̱ gu̱du̱gue̱ꞌe nej suj,
ni̱ ga̱gua̱j hia nej suj. Ni̱ gàꞌngàꞌ nej suj ni̱ ga̱na̱huin sa aꞌngaꞌ nej suj dânj sa gu̱du̱gue̱ꞌe nej suj, ni̱ si hua̱ nìhiàꞌ ruhuâ nej suj ni̱ ga̱na̱nï̱n ruhuâ nej suj.
10 Ni̱ na̱gi̱ꞌhiaj ninaj nej suj ma̱ꞌan nej suj riñan Ma̱ꞌan Señor,
ni̱ ga̱na̱chinika nej suj na̱nj ánj.
Si̱ gutaꞌ gakï̱nꞌïn dinḯn
11 Ni̱ si̱ gaꞌmin nej suj,
rayiꞌî ꞌngo̱ ni̱ aꞌngô nej duguiꞌ nej suj man di̱nï̂nj.
Ni̱ guiì gaꞌmin rayiꞌî nej duguiꞌ ni̱ gutaꞌ ninj gakï̱nꞌïn yichrá nej duguiꞌ ninj, ni̱ gaꞌmin ninj rayiꞌî ley ni̱ gutaꞌ ninj gakï̱nꞌïn yichrá ley; sani̱ si gutâꞌ gakï̱nꞌïn yichrá ley, hiôꞌ ni̱ nitaj si dagahuînꞌ sa taj ley mánj. Hiôꞌ ni̱ huînꞌ guesì riñan ley na̱nj ánj.
12 ꞌNgo̱ rïn Ma̱ꞌan Ñaꞌanj an huin sa giri rà dàj ga ley ni̱ huej huin guesì,
ni̱ ga̱ꞌhue gi̱ꞌhia ga̱na̱ni̱n ninj ni̱ ga̱ꞌhue gi̱ꞌhia si ga̱ꞌa̱nj ni̱ꞌhia ninj;
sani̱ sòꞌ,
ni̱ ahuin si huînꞌ ni̱ gutaꞌ gakï̱nꞌïn yichrá nej duguiꞌ ràꞌaj.
Nun niꞌînꞌ nùnj huin si ga̱huin gui aꞌhioj
13 Hia̱j,
ni̱ gu̱nïn nej suj gataj dànanj:
“Hia̱j nej si aꞌhioj ni̱ ga̱ꞌa̱nj nêꞌ ꞌngo̱ yumanꞌ snàꞌànj dânj, ni̱ ga̱ne nêꞌ ꞌngo̱ hioꞌo hiuj dânj, ni̱ gu̱du̱ꞌhue̱ nêꞌ rasu̱un ni̱ gi̱ꞌhiaj ga̱nunꞌ sanꞌanj an.”
14 Sani̱ nun niꞌin nej suj dàj ga̱huin gui aꞌhioj mánj. Ni̱ hua̱ ꞌngo̱ nej suj niꞌin si ga̱ne nej suj gui aꞌhioj na̱nj nîꞌ. Yàngàꞌ hia ni̱ sa nìꞌnàꞌ hua riñan nêꞌ ni huin dàj rûnꞌ huin nnga dadinꞌ guruguiꞌij giniꞌhio sani̱ nda nanè chre ni̱ giyitïnꞌ man na̱nj ánj.
15 Nej nuguanꞌ daꞌhui nej suj ga̱ta̱j nej suj huin:
“Si ruhuâ Ma̱ꞌan Señor,
ni̱ ga̱neꞌ ni̱ ga̱ꞌhue gi̱ꞌhiôꞌ ꞌngo̱ sun nânj nej si gi̱ꞌhiôꞌ aꞌngô sun nânj.”
16 Sani̱ sa giꞌhiaj nej suj huin,
si ûta nìchràj ruhuâ nej suj ga̱ꞌmi̱n nej suj ni̱ ûta huin nej suj ruhuâ nej suj.
Ni̱ daranꞌ nej guiì ganï̂n ruhuâ si ûta huin ninj doj ni̱ aꞌnanꞌ hua sa ganï̂n ruhuâ ninj;
17 Ni̱ nej guiì niꞌin gi̱ꞌhiaj sa sàꞌaj,
ni̱ nitaj si giꞌhiaj ninj sa sàꞌaj,
ni̱ gakï̱nꞌïn huin sa giꞌhiaj ninj na̱nj ánj.