Sa gi̱ꞌhiaj hiôꞌ
3
Si̱ giꞌhiaj nej suj si huin nej suj maestrû chru̱n nï̀nꞌ ruhuâ nga gidigân nej suj riñan nej dinï̂nt man di̱nï̂nj,
dadinꞌ gàꞌ niꞌin nej suj si dànanj nìko gànàchìnꞌ Ma̱ꞌan Ñaꞌanj an guenda riñan nej suj.
2 Daranꞌ nêꞌ ni̱ dàñùn giꞌhioꞌ si ginaꞌan ruhuâ ni̱ gananï̂n ruhuâ aꞌngô nej duguîꞌ.
Ni̱ si hua̱ ꞌngo̱ guiì nitaj si gi̱ꞌhiaj gi̱na̱ꞌan ruhuâ ni̱ nitaj si giꞌhiaj gananï̂n ruhuâ aꞌngô nej duguîꞌ ngà nuguanꞌ gaꞌmin ninj,
ni̱ huin ninj ꞌngo̱ guiì giꞌhiaj sa ni̱ka̱a,
ni̱ huê danj na̱nj ga̱ꞌhue gi̱nikaj su̱n ninj riñan nneè kú ninj ni̱ si̱ giꞌhiaj ninj gakï̱nꞌïn mánj.
3 Ni̱ si gaꞌnï̂nꞌ agaꞌ freno duꞌhua nej guâhiu guendâ da̱gahuin nej xuj riñunꞌ,
ni̱ giꞌhiôꞌ dànanj daꞌnga ni̱ gaꞌhueꞌ gi̱nikaj su̱nꞌ riñan daꞌ hua̱ nï̀nꞌ gàchràꞌ nneè kú xuj.
4 Gi̱niꞌhiaj nej suj dàj giꞌhiaj nej sí guduguâj nej barkû yàchìj xi nga gache riñan nnee;
dadinꞌ nùnj huin si ûta nìko huaj,
ni̱ huê danj na̱nj ûta nùkuaj guruꞌman nanèe gaꞌan,
sani̱ nej sí ni̱ka̱j ñuꞌunj nej barkû nânj ni̱ man nga ꞌngo̱ sa gùꞌnàj timón dânj ginikaj su̱n riñanj ni̱ huaꞌan dànèꞌ garanꞌ ruhuâ nej sôꞌ.
5 Ni̱ huê danj na̱nj hioꞌ ni̱ huin sa hua̱ lij doj riñan nneè kuꞌ,
sani̱ ga̱ꞌhue gi̱ꞌhia sañun nìko,
ni̱ huê danj na̱nj hua lij chrun giri ñaꞌaan sani̱ ga̱ꞌhue ga̱na̱huij ꞌngo̱ kïj ï ga̱ka̱ gi̱ꞌhia.
6 Ni̱ hioꞌ huin dàj rûnꞌ huin ñaꞌaan,
ni̱ huin dàj rûnꞌ huin ꞌngo̱ yumiguì kï̱j huaa.
Ni̱ nne ruhuâ nneè kuꞌ,
ni̱ giꞌhiaj yi̱ꞌij daran nneè kuꞌ,
ni̱ giꞌhia si gi̱ꞌhiaj nej guiì gakï̱nꞌïn ni̱ rayiꞌî dan ni̱ ga̱ka̱ ninj ruhuâ rúnâko na̱nj ánj.
7 Dadinꞌ daranꞌ nej yuku,
ni̱ nej yataj a ni̱ nej yukuáa,
ni̱ nej yuku màn ruhuâ nne ña̱ꞌa̱nj,
ni̱ gunùkuaj nej síi nagiꞌhiaj nìn nej sôꞌ daranꞌ nej yôꞌ;
8 sani̱ gàꞌ si ꞌngo̱ guiì naꞌhue gùnùkuaj na̱gi̱ꞌhiaj nìn hia ninj,
ni̱ huin ꞌngo̱ sa aꞌnanꞌ naꞌhue gùnùkuaj nej guiì na̱gi̱ꞌhiaj nìn ninj ni̱ ûta man nne giꞌhiaj gàhuìꞌ nej guiì riñanj na̱nj ánj.
9 Ni̱ ngà hioꞌ gaꞌmin hueꞌêꞌ riñan Ma̱ꞌan Señor huin Reꞌ Ñaꞌanj an,
ni̱ huê nga hioꞌ gaꞌmin kï̱ꞌ riñan nej guiì sani̱ nej guiì ni̱ dàj rûnꞌ hua Ma̱ꞌan Ñaꞌanj an hua ninj na̱nj ánj.
10 Ni̱ huê gè duꞌhuoꞌ gahui nuguanꞌ gatoꞌ si gi̱ꞌhiaj hueꞌê Ma̱ꞌan Ñaꞌanj an ngà nej guiì ni̱ huê gè duꞌhuoꞌ gahui nuguanꞌ kï̱j huaa.
Ni̱ si̱ ga̱ꞌhue gaj danj man di̱nï̂nj.
11 Ga̱ꞌhue ga̱hui̱ nne hua̱ tsìꞌi ni̱ ga̱ꞌhue ga̱hui̱ nne hua̱ hàìꞌi ruhuâ hiuꞌuj ñan aꞌnga nnee na̱nj nîꞌ.
12 Ga̱ꞌhue ga̱hui chruj aceituna raa̱ chrun îgu ni̱ ga̱ꞌhue ga̱hui chruj îgu raa̱ chrun uba na̱nj nîꞌ.
Huê danj ni̱ si̱ gaꞌhue ga̱hui̱ nne hua̱ nìꞌin ni̱ nne hua̱ tsìꞌi ruhuâ hiuꞌuj ñan aꞌnga nnee mánj.
Neꞌ yàtàꞌa ꞌnaꞌ sa chru̱n nï̀nꞌ ruhuôꞌ
13 Ahuin sí huin sí chru̱n hueꞌê ni̱ hueꞌê garânj daꞌngaꞌ ruhuâ sôꞌ siganï̂nj nej suj ràꞌaj.
Ni̱ ga̱na̱di̱gân sôꞌ si huin sôꞌ sí nìn giꞌhiaj ni̱ huin sôꞌ sí chru̱n hueꞌê ni̱ huê danj na̱nj nitaj si ra̱kïj sôꞌ nej na̱nj ánj.
14 Sani̱ si yìkòj nej suj ni̱ si sa naꞌan chre dan giꞌhiaj nej suj ni̱ màn nuguanꞌ gu̱nï̱nꞌ ngà nej guiì ruhuâ nimân nej suj,
ni̱ si̱ ganï̂n ruhuâ nej suj si ûta huin nej suj,
ni̱ si̱ gidigañuꞌunj nej suj riñan nuguan yàngàꞌa mánj;
15 dadinꞌ si giꞌhiaj nej suj dànanj ni̱ nùnj huin si chru̱n nï̀nꞌ ruhuâ nej suj,
sani̱ sê Ma̱ꞌan Ñaꞌanj an huin sa riki sa chru̱n nï̀nꞌ ruhuâ nej suj mánj,
dadinꞌ sa màn riñan hioꞌó nânj huin ni̱ sa giri ra̱ nej guiì huin,
ni̱ nânj huin sa garanꞌ ruhuâ sichre gi̱ꞌhiaj nej guiì na̱nj ánj.
16 Dadinꞌ ñan hua̱ nuguanꞌ yìkòj o ngà nuguanꞌ unïnꞌïn,
ni̱ garanꞌ ñuꞌunj nej guiì duguiꞌ ninj,
ni̱ ûta mân sa kï̱j huaa hiuj dânj.
17 Sani̱ nej guiì gahuin chru̱n nï̀nꞌ ruhuâ giꞌhiaj Ma̱ꞌan Ñaꞌanj an,
ni̱ nitaj si giꞌhiaj ninj gakï̱nꞌïn;
ni̱ nitaj si gunïnꞌ ninj ngà nej guiì,
ni̱ sàꞌ hua ruhuâ ninj,
ni̱ niꞌña̱nj hua si-nùguànꞌ ninj,
ni̱ ûta guruguñuꞌunj ninj nej guiì,
ni̱ ruguiꞌ si sàꞌ giꞌhiaj ninj,
ni̱ nitaj si na̱hia ninj,
ni̱ nitaj si gidigañuꞌunj ninj mánj.
18 Ni̱ nej guiì hua̱ dïnꞌïnj ruhuâ ni̱ nitaj si ganahuij ruhuâ ninj gu̱nï̱nꞌ ninj ngà nej guiì,
guendâ ruhuâ ninj ga̱ dïnꞌïnj ni̱ duguꞌnïnꞌ ninj gi̱ꞌhiaj ninj sa ni̱ka̱a na̱nj ánj.