Si̱ giꞌhiaj ni̱nï̱n nej duguiꞌ
2
Di̱nï̂nj ma̱ꞌanj,
nej suj guyumân ruhuâ niꞌin Ma̱ꞌan Señor Jesucristo Ma̱ꞌan sa ûta hueꞌê hua.
Ni̱ si̱ giꞌhiaj anêj nej suj ꞌngo̱ ni̱ aꞌngô nej guiì mánj.
2 Dadinꞌ si gatûj ꞌngo̱ sí nu̱n seꞌej dë̂j raꞌa ñan naraꞌhuiꞌ nej suj ni̱ ûta sàꞌ hua siganꞌ sôꞌ ni̱ huê danj na̱nj gatûj ꞌngo̱ sí gànìki chre ni̱ nu̱n sôꞌ atsîj reꞌèe ñan màn nej suj,
3 ni̱ giꞌhiaj nej suj si sí ña̱ꞌa̱n doj huin sí huaꞌ sàꞌ siganꞌ dânj ni̱ gataj nej suj gu̱nïn sôꞌ:
“Ga̱ne sôꞌ ñan hua̱ hueꞌê doj nânj”,
ni̱ gataj nej suj gu̱nïn sí ga̱ni̱ki:
“Ga̱nikïnꞌ ga̱hia sôꞌ hiuj nânj,
nej si ga̱ne sôꞌ riñan hioꞌóo nan na̱nj ánj”,
4 hiôꞌ ni̱ sê si̱ giꞌhiaj ni̱nï̱n nej suj duguiꞌ nej suj,
ni̱ gahuin nej suj guesì ûta aꞌnanꞌ ganakaj guendâ ni̱ ûta aꞌnanꞌ ganï̂n ruhuâ nej suj ràꞌ saj ûnꞌ.
5 Gu̱nïn nej suj di̱nï̂nj ma̱ꞌan:
Sê ganagui Ma̱ꞌan Ñaꞌanj an nej guiì ga̱ni̱ki màn ruhuâ yumiguìi guendâ ga̱huin ninj guiì yi̱ruꞌhue ngà sa guyumân ruhuâ ninj,
ni̱ ga̱na̱huin ra̱ꞌa ninj ga̱ne ninj ñan ni̱ka̱j su̱n Ma̱ꞌan Ñaꞌanj an dadinꞌ gata si nàgàꞌhuij raꞌa nej guiì ꞌì ruhuaj ràꞌ saj ûnꞌ.
6 Sani̱ si̱ gi̱ꞌhiaj nej suj si gìrìꞌ nej guiì ranꞌ àko sinaꞌàj a mánj.
Ni̱ sê nda ninaj chre guruꞌhue nej sí yiruꞌhuee duꞌhue nej sí ranꞌ àko mínj,
ni̱ sê dànanj gunùkuaj nej sij gaꞌanj rë̱ꞌë̱j nej sij nej sí ranꞌ àko riñan nej sí ni̱ka̱j suun mínj.
7 Ni̱ sê nej sí yi̱ruꞌhue dânj huin sa gaꞌmin kï̱j rayiꞌî siyu̱gui Ma̱ꞌan Cristo,
ni̱ ngà siyu̱gui Ma̱ꞌan Cristo gachín nìꞌhiaj aꞌngô nej dinï̂nt rayiꞌî nej suj nga ga̱ꞌmin àko nej sôꞌ rayiꞌî nej suj ràꞌ saj ûnꞌ.
8 Dùgùnàj giꞌhiaj nej suj si yàngàꞌ hi̱a dagahuin nej suj nuguanꞌ ni̱ka̱j su̱n riñan daranꞌanj,
dàj rûnꞌ taj riñanj ñanj si-nùguànꞌ Ma̱ꞌan Ñaꞌanj an:
“Ni̱ ga̱ ꞌì ruhuâ nej suj niꞌin nej suj nej duguiꞌ nej suj dàj rûnꞌ ꞌì ruhuâ nej suj niꞌin nej suj ma̱ꞌan nej suj”,
ni̱ si dànanj giꞌhiaj nej suj ni dùgùnàj huaj;
9 sani̱ si giꞌhiaj anêj nej suj ꞌngo̱ ni̱ aꞌngô nej duguiꞌ nej suj,
ni̱ gakï̱nꞌïn huin sa giꞌhiaj nej suj,
ni̱ hua̱ hia ni̱ giꞌhiaj nej suj gakï̱nꞌïn dadinꞌ nitaj si gaꞌnï̂nj si-ley Ma̱ꞌan Ñaꞌanj an si gi̱ꞌhiaj nej suj dànanj ni̱ huin nej suj guiì nitaj si dagahuin si-ley Ma̱ꞌan Ñaꞌanj an na̱nj ánj.
10 Dadinꞌ ahuin na̱nj guiì dagahuin daꞌ hua daranꞌ si-ley Ma̱ꞌan Ñaꞌanj an,
sani̱ si giꞌhiaj ninj ꞌngo̱ rïn gakï̱nꞌïn huê danj ni̱ nitaj si dagahuin ninj daꞌ hua̱ daranꞌ ley gàꞌ mánj.
11 Dadinꞌ Ma̱ꞌan sa gataj:
“Si̱ ginikaj nika duguîꞌ”,
ni̱ huej huin sa gataj:
“Si̱ dagahuîꞌ mánj.”
Sani̱ hia̱j ni̱,
nùnj huin si nitaj si ni̱ka̱jt nika duguîꞌ,
sani̱ si dagahuîꞌ,
ni̱ gàꞌ nitaj si dagahuînꞌ si-ley Ma̱ꞌan Ñaꞌanj an mánj.
12 Huê dàj rûnꞌ gaꞌmin nej suj ni̱ huê danj ga̱da̱gahuin nej suj dadinꞌ ley gi̱ꞌhiaj giyiꞌnï̂nj riñan nej suj ni̱ huej huin sa ga̱na̱ka̱j guendâ dàj giꞌhiaj nej suj.
13 Dadinꞌ nitaj àmàn ga̱na̱nï̱n àko ruhuâ Ma̱ꞌan Ñaꞌanj an niꞌin nej guiì si nitaj si gananï̂n àko ruhuâ ninj niꞌin ninj nej duguiꞌ ninj,
huê danj ni̱ ûta gi̱ranꞌ sa̱ñu̱n ninj gi̱ꞌhiaj Ma̱ꞌan Ñaꞌanj an,
sani̱ ga̱na̱nï̱n àko ruhuâ Ma̱ꞌan Ñaꞌanj an ni̱ gi̱ꞌhia si ga̱chi̱n ninj riñan sañuun si gu̱ru̱gûñuꞌunj ninj aꞌngô nej duguiꞌ ninj na̱nj ánj.
Ni̱ si nitaj si guruguñuꞌunjꞌ nej duguît ni̱ nitaj si niꞌñanj si guyumân ruhuôꞌ
14 Ahuin gue̱nda̱ niꞌñanj si gataj da̱ꞌa̱j nej suj si guyumân ruhuâ nej suj niꞌin nej suj Ma̱ꞌan Ñaꞌanj an,
si nitaj si gaꞌhuiꞌ nej suj sa ga̱chin riñan aꞌngô nej guiì ranꞌ àko ràꞌaj di̱nï̂nj.
Ni̱ ga̱ꞌhue ga̱na̱ni̱n nej suj man guendâ guyumân ruhuâ nej suj na̱nj nîꞌ.
15 Ni̱ si hua̱ ꞌngo̱ dinï̂nt ni̱ si hua̱ ꞌngo̱ yuguet ni̱ nitaj atsîj i gi̱nun ninj ni̱ nitaj sa ya̱ ninj daꞌ gui,
16 ni̱ hua̱ ꞌngo̱ nej suj gataj gu̱nïn ninj:
“Ga̱ dïnꞌïnj ruhuâꞌ sòꞌ ni̱ na̱nꞌ dukuât,
ni̱ garán sòꞌ ma̱ꞌan daꞌnga ni̱ si̱ ganûn nuhuij sòꞌ ni̱ ya̱ sòꞌ nda gùnùmàn rikît”,
sani̱ si nitaj si gaꞌhuiꞌ nej suj sa garán ninj ma̱ꞌan ninj,
sa ya̱ ninj.
Ni̱ ahuin si niꞌñanj si ga̱ta̱j nej suj dànanj gu̱nïn nej guiì dânj ràꞌaj.
17 Huê danj ni̱ si guyumân ruhuâ nej suj sani̱ nitaj si gaꞌhuiꞌ nej suj sa ga̱chin riñan nej guiì ran àko ni̱ dàj rûnꞌ huin si gahuiꞌ sa guyumân ruhuâ nej suj huin na̱nj ánj.
18 Sani̱ ga̱ꞌhue ga̱ta̱j da̱ꞌa̱j nej suj:
Sòꞌ ni̱ guyumân ruhuâꞌ,
“sani̱ ñùnj ni̱ guruguñuꞌun nej guiì ranꞌ àko.”
Hia̱j ni̱ gi̱digân sòꞌ sa guyumân ruhuâꞌ ngà rayiꞌî nej sa nitaj si guruguñuꞌunj dan;
dadinꞌ ñùnj ni̱ ga̱ꞌhue gi̱digán sa guyumân ruhuâj ngà nej sa guruguñuꞌun nej guiì ranꞌ àko na̱nj ánj.
19 Sòꞌ ni̱ guyumân ruhuâ si hua̱ ꞌngo̱ rïn Ma̱ꞌan Ñaꞌanj an,
ni̱ dùgùnàj giꞌhiâꞌ;
Sani̱ huê danj na̱nj guyumân ruhuâ nej sa kï̱j ï,
ni̱ nda nagunanj ninj nga niꞌin ninj Ma̱ꞌan Ñaꞌanj an.
20 Sani̱ huînꞌ sí nitaj si niꞌin yàngàꞌ rûꞌhuaj,
ni̱ hua̱ na̱nj hua̱ ruhuâꞌ gi̱ni̱ꞌin,
dadinꞌ nùnj huin si guyumân ruhuâꞌ sani̱ si nitaj si guruguñuꞌunj nej guiì ranꞌ àko ni̱ nitaj nùnj gue̱nda̱ niꞌñanj sa guyumân ruhuâꞌ mánj.
21 Ni̱ sê guyumân ruhuâ sachij Abraham rej nêꞌ nuguanꞌ gataj Ma̱ꞌan Ñaꞌanj an ni̱ rayiꞌî dan ni̱ giꞌhiaj yu̱gui sôꞌ si-na ñaꞌanj an ni̱ riñan si-na ñaꞌanj dânj gutaꞌ sôꞌ daꞌní sôꞌ Isaac,
ni̱ giniꞌin yàngàꞌ Ma̱ꞌan Ñaꞌanj an si dagahuin sôꞌ ni̱ giꞌhiaj sôꞌ sa ni̱ka̱a ràꞌ saj ûnꞌ.
22 Nun niꞌînꞌ si sa guyumân ruhuâ sij ngà sa dagahuin sij ni̱ ni̱ka̱j duguiꞌ nùguànꞌàn ngue ni̱ dànanj ganahuin hueꞌê nï̀nꞌ sa guyumân ruhuâ sij dânj ràꞌ saj ûnꞌ.
23 Huê danj ni̱ gisîj nuguanꞌ gataj:
“Guyumân ruhuâ Abraham niꞌin sij Ma̱ꞌan Ñaꞌanj an,
ni̱ rayiꞌî dan ni̱ gataj Ma̱ꞌan Ñaꞌanj an si huin sij sí giꞌhiaj sa ni̱ka̱a.”
Ni̱ gataj Ma̱ꞌan Ñaꞌanj an si huin sij sí ni̱ka̱j duguiꞌ ngà Ma̱ꞌan.
24 Hia̱j,
ni̱ niꞌin nej suj si Ma̱ꞌan Ñaꞌanj an ni̱ nadiganj si nej guiì ni̱ huin ninj sa ni̱ka̱a rayiꞌî guendâ dagahuin ninj ngà guendâ guruguñuꞌunj ninj ahuin na̱nj sa ga̱chin riñan aꞌngô nej guiì,
ni̱ sê man guendâ guyumân ruhuâ ninj ni̱ huin ninj sa ni̱ka̱a mánj.
25 Huê gè danj gahuin ngà Rahab,
siyànà guduꞌhuêj ma̱ꞌan.
Ni̱ guendâ ganahuin ràꞌa ni̱ gachrîj huij nej sôꞌ gaꞌanj ga̱na̱ka̱j guendâ dàj hua riñan hioꞌó dânj,
ni̱ giꞌhiaj Ma̱ꞌan Ñaꞌanj an si ga̱huin sa ni̱ka̱a rayiꞌî guendâ gi̱di̱ganj aꞌngô chrej e gaꞌanj nej sí dânj.
26 Dadinꞌ dàj rûn nneè kuꞌ ni̱ si nitaj si nne nanè nimûnꞌ nngaj ni̱ huin sa gahuiꞌi,
ni̱ huê danj ni̱ nùnj huin si guyumân ruhuôꞌ sani̱ si nitaj si guruguñuꞌunꞌ ahuin na̱nj sa ga̱chin riñan aꞌngô nej guiì ni̱ huînꞌ sa gahuiꞌi.