Ñânj kartâ huìj nânj huin gachrûn Apóstol
PEDRO
Gaꞌnḯn Pedro nuguanꞌ ni̱ꞌña̱nj an riñan nej dinï̂nt nìkoꞌ Ma̱ꞌan Ñaꞌanj an
1
Ñùnj huin Simón Pedro,
ni̱ huín sí gaꞌanj gi̱di̱gan si̱nï̱n ni̱ huín si-musû Ma̱ꞌan Jesucristo,
ni̱ ñanj nânj gaꞌnï̂n huaj riñan nej suj ûta hueꞌê guyumân ruhuâ dàj rûnꞌ guyumân ruhuâ nej ñûnj,
dadinꞌ Ma̱ꞌan Daꞌanj nêꞌ Jesucristo huin sa gi̱ꞌhiaj ga̱na̱ni̱nꞌ ni̱ Ma̱ꞌan huin sa giꞌhiaj sa ni̱ka̱a:
2 Ni̱ guendâ giniꞌin nej suj Ma̱ꞌan Ñaꞌanj an ni̱ giniꞌin nej suj Ma̱ꞌan Jesucristo,
ni̱ gahuin nìko su̱nu̱j u ni̱ sa hua̱ dïnꞌïnj ga̱na̱huin ra̱ꞌa nej suj.
Giꞌhiaj nej cristiano dàj rûnꞌ giꞌhiaj Ma̱ꞌan Señor Jesús
3 Ni̱ ûta nùkuaj Ma̱ꞌan Ñaꞌanj an,
ni̱ rikij daranꞌ sa niꞌñunꞌ guendâ ga̱ hueꞌê ga̱neꞌ dàj rûnꞌ garanꞌ ruhuâ Ma̱ꞌan,
ni̱ rikî Ma̱ꞌan daranꞌ nej nânj riñunꞌ daꞌnga ni̱ gaꞌhue da̱gahuin hueꞌêꞌ riñanj,
ni̱ guendâ giniꞌînꞌ Ma̱ꞌan Jesús ni̱ gakïn ñùnꞌ ni̱ ga̱ꞌhue ga̱neꞌ ñan nne Ma̱ꞌan nikaj sunj sun nìko xi,
4 ni̱ ûta nìko hua nej sa hua̱ riñan Ma̱ꞌan Ñaꞌanj an ni̱ rayiꞌî dan ni̱ gata si ri̱kij nej sa nìko hua̱ riñanj riñunꞌ,
ni̱ nej dânj huin sa guruguñuꞌunj ni̱ ga̱ꞌhue go̱ꞌ dàj rûnꞌ garanꞌ ruhuâ Ma̱ꞌan Ñaꞌanj an,
ni̱ gudunôꞌ nej gakï̱nꞌ màn ruhuâ yumiguì garanꞌ ruhuâ nneè kûꞌ;
5 rayiꞌî nej nânj ni̱ da̱gahuin nej suj riñan daranꞌ nej sa ga̱ra̱nꞌ ruhuâ Ma̱ꞌan Ñaꞌanj an ni̱ ûta hio gùyùmàn ruhuâ nej suj,
ni̱ dagahuin nej suj ni̱ duguꞌnïnꞌ nej suj ni̱ ga̱huin chru̱n nej suj doj daꞌ gui;
6 ni̱ riñan nej sa gahuin chru̱n nej suj,
ni̱ gùnùtàꞌ nej suj si gàꞌ chru̱n nej suj du̱gumîn nej suj ma̱ꞌan nej suj,
ni̱ si gàꞌ chru̱n nej suj du̱gumîn nej suj ma̱ꞌan nej suj,
ni̱ ga̱ nùkuaj ruhuâ nej suj,
ni̱ riñan sa hua̱ nùkuaj ruhuâ nej suj,
ni̱ gùnùtàꞌ nej suj guendâ dagahuin hueꞌê nej suj riñan Ma̱ꞌan Ñaꞌanj an;
7 ni̱ riñan sa dagahuin hueꞌê nej suj,
ni̱ gùnùtàꞌ nej suj sa ꞌì ruhuâ niꞌin nej duguiꞌ,
ni̱ riñan sa ꞌì ruhuâ niꞌin nej duguiꞌ,
ni̱ gùnùtàꞌ nej suj sa ꞌì ruhuâ niꞌin Ma̱ꞌan Ñaꞌanj an.
8 Ni̱ si ni̱ka̱j nej suj nej nânj,
ni̱ daꞌ gui ni̱ dànanj ga̱huin nìko doj nej nânj riñan nej suj ni̱ si̱ gahuin nej suj guiì rùmìin,
dadinꞌ dàñùn gùrùguìꞌ si ga̱huin nej suj guiì gi̱ꞌhiaj sa hua̱ hueꞌê,
guendâ giniꞌin nej suj Ma̱ꞌan Señor Jesucristo.
9 Sani̱ nej guiì nitaj si ni̱ka̱j nej nânj ni̱ huin ninj dàj rûnꞌ huin nej guiì hua̱ du̱chri;
dadinꞌ nitaj si giyigï̀n hueꞌê giniꞌhiaj ninj,
dadinꞌ giniꞌñûn ninj si gàꞌ ganaruhui nimân ninj ni̱ ginikaj Ma̱ꞌan Ñaꞌanj an nimân nìko rayiꞌî si-ga̱kïnꞌ ninj.
10 Di̱nï̂nj,
huê rayiꞌî dan ni̱ du̱guꞌnïnꞌ nej suj ni̱ ga̱ yìtï̀nj ruhuâ nej suj ngà sun gàꞌ chru̱n nej suj gi̱ꞌhiaj nej suj ni̱ sun gàꞌ ganagui nej suj;
dadinꞌ si dànanj gi̱ꞌhiaj nej suj ni̱ nitaj àmàn huaj ga̱na̱tu̱ nej suj mánj.
11 Dadinꞌ si huê dànanj gi̱ꞌhiaj nej suj ni̱ nitaj si ꞌì ga̱ꞌnï̱n Ma̱ꞌan Ñaꞌanj an ga̱tu̱ nej suj ñan ni̱ka̱j sun nìgànj Ma̱ꞌan Señor Jesucristo Ma̱ꞌan sa gi̱ꞌhiaj ga̱na̱ni̱nꞌ mánj.
12 Rayiꞌî dan,
ni̱ nìgànj dunanûnj ruhuâ nej suj rayiꞌî nej nânj,
nùnj huin si gàꞌ niꞌin nej suj,
ni̱ nùnj si gàꞌ hua̱ yìtï̀nj ruhuâ nej suj niꞌin nej suj nuguanꞌ yàngàꞌ hua̱ hia̱j.
13 Nga nï̀nꞌ hua nìꞌnàj,
ni̱ hua̱ nìhiàꞌ ni̱ña̱n ruhuâj,
du̱gunïn gàꞌìj ni̱ du̱naꞌngâj riñan nej suj daꞌnga ni̱ ganaꞌnï̂nj ñan nej suj;
14 dadinꞌ gàꞌ niꞌín si doj gané ni̱ gàhuìj,
dadinꞌ huê danj gàꞌ gataj Ma̱ꞌan Señor gunḯn.
15 Ni̱ ûta hiô du̱guꞌnḯn gi̱digân nej nânj riñan nej suj ni̱ neꞌ rùkù nga gahuí ni̱ ga̱na̱nun ruhuâ nej suj rayiꞌî nej nuguanꞌ gata gu̱nïn nej suj.
Nej sôꞌ giniꞌin dàj nìko ginikaj sun Ma̱ꞌan Cristo
16 Ni̱ nga gidigân nej ñûnj dàj nùkuaj Ma̱ꞌan Señor Jesucristo ni̱ nga ga̱ꞌna̱ꞌ ñûn Ma̱ꞌan,
ni̱ sê man ꞌngo̱ guentû giri rà nej ñûnj gahuin mánj,
dadinꞌ giniꞌin ri̱ña̱n nej ñûnj si ni̱ka̱j su̱n Ma̱ꞌan Señor riñan daranꞌanj.
17 Ni̱ nga ganahuin ra̱ꞌa nuguanꞌ ni̱ꞌña̱nj an ni̱ gaꞌmin hueꞌê Ma̱ꞌan Re Ñaꞌanj an rayiꞌij,
ni̱ nda neꞌ yàtàꞌa gaꞌmin Ma̱ꞌan Ñaꞌanj an ni̱ gata:
“Nânj huin Daꞌní ni̱ ûta ꞌì ruhuâj niꞌín Ma̱ꞌan,
ni̱ ûta gininj hueꞌê sa giꞌhia riñânj.”
18 Ni̱ gunïn nej ñûnj gaꞌmin Ma̱ꞌan sa gaꞌmin nda neꞌ yàtàꞌa,
nga nikïnꞌ nej ñûnj ngà Ma̱ꞌan ra kïj gèe.
19 Sani̱ huê danj na̱nj ni̱ka̱j nej ñûnj nuguanꞌ ga̱ta̱j dàj ga̱huin ni̱ huej huin nuguanꞌ yìtï̀nj huaa,
ni̱ dùgùnàj giꞌhiaj nej suj si ûta hueꞌê gananï̂n ra̱kïj nej suj ni̱ giꞌhiaj nej suj dàj rûnꞌ giꞌhiaj chrun ñaꞌan gudugùun dadinꞌ gudugùn ñaꞌan dânj ñan ru̱mi̱nꞌin,
nda gìyìgï̀n neꞌ gui,
ni̱ ga̱ꞌhue gùdùgun atïꞌ gahui neꞌ nìgànꞌan ruhuâ nimân nej suj;
20 gàꞌ si̱nï̱n ga̱ra̱n daꞌngaꞌ ruhuâ nej suj rayiꞌî nej nânj,
dadinꞌ gàꞌ si ꞌngo̱ nej nuguanꞌ ga̱ta̱j dàj gahuin ꞌna̱ꞌ riñan ñanj si-nùguànꞌ Ma̱ꞌan Ñaꞌanj an,
ni̱ si̱ gaꞌhue gànàtàꞌ ꞌngo̱ rïn síi dàj garânj daꞌngaꞌ ruhuâ sôꞌ rayiꞌî nuguanꞌ dânj mánj,
21 dadinꞌ gàꞌ si ꞌngo̱ nej sôꞌ gataj dàj ga̱huin,
nun gi̱ri̱ rà gàꞌ si ꞌngo̱ nej nuguanꞌ gaꞌmin nej sôꞌ,
ni̱ gaꞌmin nej sôꞌ nuguanꞌ gaꞌhuiꞌ Ma̱ꞌan Espíritu Santo ga̱ꞌmi̱n nej sôꞌ.