Du̱gumîn nej suj nej guiì riki Ma̱ꞌan Señor riñan nej suj
5
Gachín nìꞌhia riñan nej sôꞌ ni̱kï̱nꞌ nikaj ñuꞌunj riñan nej suj,
ni̱ huê danj na̱nj ñùnj ni̱ ni̱ka̱j ñuꞌûn ngà nej sôꞌ,
ni̱ giniꞌín dàj giranꞌ sa̱ñu̱n Ma̱ꞌan Cristo nga ganê riñan hioꞌó nânj,
sani̱ nga ga̱ꞌna̱ꞌ ñûn Ma̱ꞌan Cristo ni̱ gi̱ni̱ꞌín dàj nìko gi̱ni̱kaj su̱n Ma̱ꞌan na̱nj ánj.
2 Ga̱ ruhuâ nej suj,
du̱gumîn nej suj nej guiì riki Ma̱ꞌan Señor riñan nej suj;
sani̱ sê nda guesâ chre gu̱na̱nj gi̱tsî nej suj riñan ninj mánj;
ni̱ huê danj na̱nj si̱ gaꞌnḯn ñan nej suj man guendâ gi̱ꞌhiaj ga̱nan nej suj sanꞌanj an mánj,
ni̱ hio ga̱ ruhuâ nej suj ni̱ gu̱na̱nj gi̱tsi nej suj riñan Ma̱ꞌan Señor:
3 Ni̱ si̱ ganï̂n ruhuâ nej suj si siꞌhiaj nej suj huin nej guiì ri̱ña̱n nikaj ñuꞌunj nej suj mánj,
du̱guꞌnïnꞌ nej suj gùtàꞌ nej suj chrej e neꞌ ña̱an dàj dagahuin ninj na̱nj ánj.
4 Ni̱ Ma̱ꞌan Cristo huin Pastor riñan nej sí ni̱kï̱nꞌ dugumîn nej guiì,
ni̱ nga nànìkàj ñûn Ma̱ꞌan ga̱ꞌna̱j,
ni̱ ga̱na̱huin ra̱ꞌa nej suj ꞌngo̱ korona nitaj si huaj gìrë̀ꞌ ginun ahui nej suj gi̱ꞌhia.
5 Huê danj na̱nj nej suj silíj huin ña̱n dan,
ni̱ ga̱ꞌnï̱n nej suj si gi̱nikaj su̱n nej sôꞌ ni̱ka̱j ñuꞌunj riñan nej dinï̂nt nìkòꞌ rukû Ma̱ꞌan Jesús riñan nej suj,
ni̱ dagahuin nej suj riñan ꞌngo̱ ni̱ aꞌngô nej duguiꞌ nej suj,
ni̱ du̱guꞌnïnꞌ nej suj na̱gi̱ꞌhiaj ninaj nej suj ma̱ꞌan nej suj;
dadinꞌ:
Nitaj si garanꞌ ruhuâ Ma̱ꞌan Ñaꞌanj an niꞌin nej guiì ûta huin doj ruhuâ,
sani̱ gurugûñuꞌun rukû nej guiì giꞌhiaj si huin ninj guiì ninaj doj.
6 Ûta nùkuaj Ma̱ꞌan Ñaꞌanj an ni̱ ga̱ra̱n yina nej suj si gi̱nikaj su̱n Ma̱ꞌan riñan nej suj,
ni̱ nga gùyùmàn diû ga̱ranꞌ ruhuâ Ma̱ꞌan ni̱ gi̱ꞌhia si ga̱huin nej suj sí ga̱huin ña̱n doj;
7 gu̱du̱nâj nej suj daranꞌ sa huin staꞌu ruhuâ nej suj riñan Ma̱ꞌan Señor,
dadinꞌ chru̱n Ma̱ꞌan du̱guminj nej suj.
8 Daꞌngaꞌ hueꞌê gè gi̱ꞌhiaj nej suj,
ni̱ du̱gumîn hueꞌê nej suj ma̱ꞌan nej suj;
ni̱ gi̱nun ruhuâ nej suj si sa unïnꞌ ngà nej suj huin sa nàsàꞌa,
ni̱ giꞌhia dàj rûnꞌ giꞌhiaj sigeꞌej nga nagita ñanꞌ xuj dadinꞌ nda akuanꞌ yâꞌ xuj yuku gìrìꞌ xuj ruhuâ xuj,
ni̱ huê danj gani̱ka gaché nunj neꞌ rùkù nej suj ni̱ naꞌhuij ahuin goꞌngo̱ nej suj gìrìꞌij da̱gahuij;
9 ga̱ yìtï̀nj ruhuâ nej suj ni̱ gùyùmàn yìtï̀nj ruhuâ nej suj ni̱ si̱ gaꞌnï̂nj nej suj si gi̱ꞌhiaj ga̱nan sichre nej suj,
sa gi̱nun ruhuâ nej suj huin si nï̀nꞌ gàchràꞌ ruhuâ yumiguìi ni̱ huê dànanj giranꞌ sa̱ñu̱n nej dinḯn nej suj.
10 Ni̱ rayiꞌî Ma̱ꞌan Jesucristo ni̱ ganï̂n su̱nu̱j ruhuâ Ma̱ꞌan Ñaꞌanj an niꞌin nêꞌ,
ni̱ gakïn gu̱nꞌ ga̱neꞌ ñan nne nìgànj Ma̱ꞌan,
ni̱ neꞌ rùkù nga gisîj giranꞌ sàñùnꞌ do̱j,
ni̱ na̱gi̱ꞌhiaj ni̱ka̱ ma̱ꞌan ñùnꞌ,
ni̱ na̱gi̱ꞌhiaj yìtïn ruhuôꞌ,
ni̱ na̱gi̱ꞌhiaj nùkua ruhuôꞌ ni̱ gi̱ꞌhia si ga̱huin ran ruhuôꞌ.
11 Ni̱ sa nìko huin Ma̱ꞌan ni̱ huej huin sa ni̱ka̱j sun riñan daranꞌanj daꞌ gachín ꞌngo̱ sientu hioꞌo ni̱ daꞌ gachín ꞌngo̱ sientu hioꞌo.
Ni̱ huê danj huin rûꞌhuaj na̱nj ánj.
Nuguanꞌ ni̱ꞌña̱nj ganahuij
12 Ni̱ Silvano huin guruguñuꞌunj gachrûn ñanj nânj hua riñan nej suj,
dadinꞌ niꞌín si dagahuin hueꞌê sij riñan Ma̱ꞌan Ñaꞌanj an,
ni̱ gachrûnj do̱j nuguanꞌ nânj hua riñan nej suj,
ni̱ dugunïn gàꞌìj do̱j nej suj,
ni̱ ganatá si nânj huin sa sàꞌ staꞌu giꞌhiaj Ma̱ꞌan Ñaꞌanj an ngà nej suj,
ni̱ gàꞌ ganahuin ràꞌa nej suj si-su̱nu̱j Ma̱ꞌan Ñaꞌanj an na̱nj ánj.
13 Nej sôꞌ nìkòꞌ rukû Ma̱ꞌan Jesús màn Babilonia gaꞌnḯn nuguanꞌ niꞌñanj an huaj riñan nej suj,
ni̱ nej sôꞌ nânj ganagui Ma̱ꞌan Ñaꞌanj an dàj rûnꞌ ganaguij nej suj ni̱ huê danj na̱nj gaꞌnḯn daꞌnî Marcos nuguanꞌ ni̱ꞌña̱nj an huaj riñan nej suj.
14 Ni̱ gàꞌhuìꞌ nej suj nuguanꞌ ni̱ꞌña̱nj an riñan ꞌngo̱ ni̱ aꞌngô nej duguiꞌ nej suj,
ni̱ ga̱ ꞌì ruhuâ nej suj niꞌin nej suj nej sôꞌ ni̱ gi̱daꞌa nej suj raꞌa nej sôꞌ.
Ni̱ ga̱ dïnꞌïnj ruhuâ daranꞌ nej suj,
nìkòꞌ rukû Ma̱ꞌan Jesús.
Ni̱ huê danj huin rûꞌhuaj na̱nj ánj.