Sí giꞌhiaj sun hueꞌê si-su̱n Ma̱ꞌan Ñaꞌanj an
4
Ni̱ giranꞌ sa̱ñu̱n Ma̱ꞌan Cristo ngà nneè ku rayiꞌî si-ga̱kïnꞌ nêꞌ,
ni̱ huê danj na̱nj ga̱ ruhuâ nej suj gi̱ranꞌ sa̱ñu̱n nej suj rayiꞌij;
dadinꞌ nej guiì giranꞌ sa̱ñu̱n ngà nneè kú,
ni̱ nitaj si ganahuij ruhuâ ninj gi̱ꞌhiaj ninj gakï̱nꞌïn mánj,
2 do̱j nej gui ga̱ne ninj riñan hioꞌó nânj ni̱ nitaj si ganahuij ruhuâ ninj gi̱ꞌhiaj ninj gakï̱nꞌ garanꞌ ruhuâ nneè kú ninj,
dadinꞌ nej sí naꞌhuej ruhuâ da̱gahuin riñan Ma̱ꞌan Ñaꞌanj an ni̱ ûta huin ruhuâ nej sôꞌ gi̱ꞌhiaj nej sôꞌ ahuin na̱nj gakï̱nꞌ,
sani̱ sa ga̱na̱huij ruhuâ nej guiì guyumân ruhuâ niꞌin Ma̱ꞌan Ñaꞌanj an gi̱ꞌhiaj ninj huin nej sa garanꞌ ruhuâ Ma̱ꞌan Ñaꞌanj an.
3 Dadinꞌ nej gui gachin ni̱ giꞌhiaj nej suj nej sa ûta garanꞌ ruhuâ nej guiì nàsìnùnj un,
ni̱ ûta gahuin ruhuâ nej suj gi̱ngaj nej suj ngà ahuin na̱nj siyànà,
ûta gahuin ruhuâ nej suj gi̱ꞌhiaj nej suj ahuin na̱nj gakï̱nꞌ,
ni̱ ganahuij ruhuâ nej suj niꞌin nej suj sun àyìnï̀ïn,
gachîn yâ nej suj ni̱ gachîn goꞌo nej suj,
ni̱ garânj sun rëꞌ nej suj sa hua̱ riñan nej suj,
nga ginûn ña̱ꞌa̱nj nej suj riñan nej ñaꞌanj giꞌhiaj ra̱ꞌa nej síi ni̱ hua̱ hia ni̱ nun gi̱ni̱nj hueꞌê nej suj riñan Ma̱ꞌan Ñaꞌanj an mánj.
4 Àsìj nâ ni̱ gi̱ꞌhiaj nej suj dàj rûnꞌ hua nej gakï̱nꞌ guꞌñûn nej sôꞌ giꞌhiaj nej sôꞌ,
dadinꞌ man si ganahuij ruhuâ nej sôꞌ ranꞌ nej sôꞌ nej guiì;
sani̱ hia̱j ni̱ gahuin ña̱ꞌanj ruhuâ nej sôꞌ guendâ nitaj si gidaꞌa duguiꞌ nej suj ngà nej sôꞌ;
5 sani̱ nàgàꞌhuìꞌ nej sôꞌ guenda riñan Ma̱ꞌan Ñaꞌanj an dadinꞌ gàꞌ hua̱ yu̱gui Ma̱ꞌan guendâ na̱gi̱ꞌhiaj guenda ngà nej guiì hua nìꞌnàꞌa ni̱ ngà nej guiì gàꞌ gahuiꞌ.
6 Dadinꞌ si gunïn nej guiì nuguanꞌ giꞌhiaj gananin ninj,
ni̱ rayiꞌî dan ni̱ gutaꞌ nej sôꞌ gakï̱nꞌïn yichrá ninj ni̱ dagahuiꞌ nej sôꞌ ninj,
sani̱ hua̱ nìꞌnàꞌ nimân ninj riñan Ma̱ꞌan Ñaꞌanj an na̱nj ánj.
7 Sani̱ gàꞌ gahuin nìchrùnꞌ diû ga̱na̱huij daranꞌanj;
ni̱ daꞌngaꞌ hueꞌê ga̱ sa gi̱ꞌhiaj nej suj,
hueꞌê du̱gumîn nej suj ma̱ꞌan nej suj riñan gakï̱nꞌïn ni̱ si̱ gaꞌnïnꞌ ruhuâ nej suj guendâ ga̱ꞌmi̱n nej suj ngà Ma̱ꞌan Ñaꞌanj an mánj.
8 Sani̱ sa ña̱ꞌa̱n doj gi̱ꞌhiaj nej suj huin,
si ga̱ ꞌì staꞌu ruhuâ nej suj niꞌin nej suj nej dinḯn nej suj;
dadinꞌ sa ꞌì ruhuôꞌ dânj gi̱ꞌhiaj ni̱ ga̱ꞌhue gi̱nikoꞌ nimân nìko nga giꞌhiaj nej guiì gakï̱nꞌïn riñunꞌ na̱nj ánj.
9 Ga̱na̱huin ra̱ꞌa nej suj dukuâ nej suj ꞌngo̱ ni̱ aꞌngô nej dinḯn nej suj,
sani̱ si̱ gaꞌmin nej suj yiꞌî nej sôꞌ.
10 Dàj na̱nj hua ma̱ꞌan sun ganahuin ra̱ꞌa daꞌ goꞌngo̱ nej suj giꞌhiaj Ma̱ꞌan Ñaꞌanj an,
ni̱ huê danj na̱nj gu̱ru̱gûñuꞌunj nej suj aꞌngô nej duguiꞌ nej suj,
ni̱ hueꞌê ga̱ra̱n sun nej suj sun nìko ganahuin ra̱ꞌa nej suj ngà si-su̱nu̱j Ma̱ꞌan Ñaꞌanj an.
11 Si hua̱ ꞌngo̱ nej suj gaꞌmin,
ni̱ ga̱ꞌmi̱n nej suj dàj rûnꞌ taj si-nùguànꞌ Ma̱ꞌan Ñaꞌanj an;
ni̱ si hua̱ ꞌngo̱ nej suj gunânj gi̱tsi ahuin na̱nj sun riñan nej duguiꞌ ni̱ gu̱na̱nj gi̱tsi nej suj dàj nìko ma̱ꞌan riki Ma̱ꞌan Ñaꞌanj an si-guesaj riñan nej suj,
daꞌnga ni̱ ga̱ꞌmi̱n hueꞌê nej guiì rayiꞌî Maꞌan Ñaꞌanj an nga gu̱nu̱na̱ nej guiì rayiꞌî Ma̱ꞌan Jesucristo,
dadinꞌ huê yiꞌî Ma̱ꞌan Cristo huin sa ga̱ꞌmi̱n nej guiì ni̱ huê Ma̱ꞌan huin sa gi̱nikaj su̱n riñan daranꞌanj dàj daꞌ gachin ꞌngo̱ sientu hioꞌo ni̱ gachin ꞌngo̱ sientu hioꞌo.
Ni̱ huê danj huaj rûꞌhuaj na̱nj ánj.
Hua̱ ni̱ña̱n si gi̱ranꞌ sa̱ñu̱n nej guiì huin cristiano
12 ꞌÌ ruhuâj niꞌín nej suj na̱nj di̱nï̂nj,
ni̱ si̱ gahuin ña̱ꞌanj ruhuâ nej suj dadinꞌ dàñùn ga̱chi̱n nej suj riñan sañun chìꞌ xi dàj rûnꞌ gachîn agaꞌ sàꞌ xi riñan ñaꞌaan,
ni̱ si̱ gahuin ña̱ꞌanj ruhuâ nej suj si dànanj gi̱ranꞌ nej suj mánj.
13 Ga̱na̱huin nìhiàꞌ ruhuâ nej suj si giranꞌ sa̱ñu̱n nej suj dàj rûnꞌ giranꞌ sa̱ñu̱n Ma̱ꞌan Cristo,
ni̱ nga ga̱na̱di̱ganj Ma̱ꞌan ni̱ nga ga̱ꞌna̱ꞌ ga̱na̱ka nej suj nìkòꞌ rukuj ni̱ ûta ga̱na̱huin nìhiàꞌ ruhuâ nej suj nga gi̱ni̱ꞌin nej suj si nda raa̱n chre huaj nga ga̱na̱di̱ganj Ma̱ꞌan.
14 Ni̱ si gaꞌmin kï̱j nej sij riñan nej suj rayiꞌî Ma̱ꞌan Cristo,
ni̱ ga̱na̱huin nìhiàꞌ ruhuâ nej suj,
dadinꞌ ruhuaj ga̱ta si nne Ma̱ꞌan Espíritu Santo ngà nej suj.
Ni̱ yàngàꞌ hia,
ni̱ yiꞌî Ma̱ꞌan Ñaꞌanj an huin sa gaꞌmin kï̱j nej sij sani̱ ga̱ꞌmi̱n hueꞌê nej suj yiꞌî Ma̱ꞌan Ñaꞌanj an si gaꞌmin nej sij dànanj ngà nej suj na̱nj ánj.
15 Huê danj ni̱ si hua̱ da̱ꞌa̱j nej suj giranꞌ sa̱ñu̱n,
sani̱ sê rayiꞌî guendâ dagahuiꞌ nej suj,
ni̱ sê rayiꞌî guendâ giꞌhiaj tu̱ nej suj huin,
ni̱ sê rayiꞌî guendâ huin nej suj sí giꞌhiaj gakï̱nꞌïn huin;
ni̱ sê guendâ di̱gïj nej suj ma̱ꞌan nej suj ahuin na̱nj riki yiꞌnïnꞌ huin ni̱ si̱ giriñun ruhuâ nej suj mánj;
16 sani̱ si hua̱ da̱ꞌa̱j nej suj giranꞌ sa̱ñu̱n guendâ huin nej suj cristiano,
ni̱ si̱ giriꞌ nej suj sinàꞌaj a mánj,
sa gi̱ꞌhiaj nej suj huin si ga̱ꞌmi̱n hueꞌê nej suj yiꞌî Ma̱ꞌan Ñaꞌanj an.
17 Dadinꞌ gàꞌ gisîj diû si gàyìꞌì sañuun riñan nej guiì nìkòꞌ rukû Ma̱ꞌan Cristo daꞌnga ni̱ gaꞌhue ga̱na̱huin hueꞌê ninj;
ni̱ si gàꞌ si̱nï̱n gayiꞌij riñan nêꞌ nìkòꞌ rukû Ma̱ꞌan Cristo,
ni̱ dàj nìko gi̱ranꞌ sa̱ñu̱n nej guiì naꞌhuej da̱gahuin nuguanꞌ gi̱ꞌhiaj ga̱na̱ni̱n ninj ruhuâ nej suj ràꞌaj.
18 Ni̱ si ûta chìꞌ huaj ga̱na̱ni̱n nej guiì giꞌhiaj sa ni̱ka̱a,
ni̱ dàj gi̱ranꞌ nej guiì giꞌhiaj gakï̱nꞌïn ngà nej guiì ganinï̀nꞌ huaa ruhuâ nej suj ràꞌaj.
19 Huê danj ni̱ si dànanj garanꞌ ruhuâ Ma̱ꞌan Ñaꞌanj an si gi̱ranꞌ sa̱ñu̱n nej suj nìkòꞌ rukû Ma̱ꞌan,
ni̱ du̱guta su̱n nej suj ma̱ꞌan nimân nej suj riñan Ma̱ꞌan Ñaꞌanj an dadinꞌ Ma̱ꞌan huin sa hueꞌê dugumîn nej suj ni̱ huej huin sa giꞌhiaj nej suj,
huê danj ni̱ gi̱ꞌhiaj nej suj sa hua̱ hueꞌê na̱nj ánj.