Sa daꞌhui gi̱ꞌhiaj nej sí nne garan ra̱ꞌa
3
Huê danj na̱nj nej suj siyànà dan,
ni̱ da̱gahuin nej suj sa taj nika nej suj;
daꞌnga ni̱ si hua̱ da̱ꞌa̱j nej sôꞌ naꞌhuej gùyùmàn ruhuâ niꞌin si-nùguànꞌ Ma̱ꞌan Ñaꞌanj an,
ni̱ si̱ gaꞌmin nìko nej sôꞌ ni̱ gùyùmàn ruhuâ nej sôꞌ rayiꞌî guendâ dagahuin hueꞌê nej suj,
2 na̱di̱giꞌñûn nej suj dàj gi̱ꞌhiaj nej suj ni̱ gi̱nikaj chre̱j nej suj,
ni̱ si̱ giꞌhiaj nej suj gakï̱nꞌïn mánj.
3 Ni̱ si̱ nagiꞌhiaj staꞌu nej suj ma̱ꞌan nej suj,
ni̱ si̱ ganachrâj nej suj lasû chìꞌ xi ahui nej suj,
ni̱ si̱ garânj sun staꞌu nej suj agaꞌ oro ni̱ si̱ ginun nej suj atsîj sàꞌ xi mánj,
4 sa ña̱ꞌa̱n doj daꞌhui ga̱ sàꞌ huin ruhuâ nimân nej suj,
ngà nanè nimân nej suj,
ni̱ daꞌhui ga̱ gej ni̱ ga̱huin sa hua̱ nìin ni̱ sa hua̱ dïnꞌïnj,
dadinꞌ huê dan huin sa ûta garanꞌ ruhuâ Ma̱ꞌan Ñaꞌanj an.
5 Dadinꞌ huê dànanj daꞌngaꞌ hueꞌê gè nagiꞌhiaj nej siyànà gè gimân àsìj nâ,
dadinꞌ huê danj na̱nj gane ninj ganaꞌhuìj ninj Ma̱ꞌan Ñaꞌanj an,
ni̱ dagahuin ninj sa gataj nika ninj;
6 dàj rûnꞌ dagahuin Sara riñan Abraham,
rayiꞌî dan ni̱ gata “si-señoj” huin sôꞌ;
ni̱ Sara huin nni daꞌ goꞌngo̱ nej suj màn diû hia̱j,
ni̱ si dagahuin nej suj ni̱ huê danj na̱nj ginun yuꞌhuiꞌ ruhuâ nej suj ni̱ si̱ nitaj si giꞌhiaj nej suj gakï̱nꞌïn ni̱ si̱ guyuꞌhuiꞌ nej suj nga ga̱ta̱j ꞌngo̱ nej síi si gi̱ꞌhiaj yìꞌì sôꞌ nej suj mánj.
7 Nej suj sí nne nika dan,
ni̱ huê danj na̱nj gi̱ꞌhiaj nej suj,
ni̱ hueꞌê du̱gumîn nej suj nika nej suj,
ni̱ gi̱nikaj ni̱ꞌña̱nj nej suj ngà ninj dadinꞌ huin ninj dàj rûnꞌ huin ꞌngo̱ basû nìtï̀n chre,
ni̱ huê danj na̱nj ga̱na̱huin ra̱ꞌa ninj sunuj ri̱ki̱ Ma̱ꞌan Ñaꞌanj an riñan nej suj gui ga̱ꞌna̱ꞌ neꞌ ña̱an,
ni̱ si dànanj gi̱ꞌhiaj nej suj ni̱ gunïn Ma̱ꞌan nga ga̱ꞌmi̱n nej suj ngà Ma̱ꞌan na̱nj ánj.
Nej guiì giꞌhiaj sa hueꞌê ni̱ giranꞌ sa̱ñu̱n ninj
8 Aꞌngô sa daꞌhui nej suj gi̱ꞌhiaj nej suj,
huin si gu̱ña̱n gùyùmàn ruhuâ nej suj,
ni̱ ga̱na̱nï̱n àko ruhuâ nej suj niꞌin nej suj nej guiì,
ni̱ ga̱ ꞌì ruhuâ ni̱ ga̱ gu̱ña̱n ruhuâ nej suj,
ni̱ gu̱ru̱gûñuꞌunj nej suj,
ni̱ gi̱nikaj duguiꞌ nej suj ngà daranꞌ nej guiì;
9 ni̱ si hua̱ ꞌngo̱ guiì giꞌhiaj sa yìꞌì ngà nej suj ni̱ si̱ nanikàj nej suj gi̱ꞌhiaj nej suj sa yìꞌìi ngà guiì dânj mánj,
ni̱ si rikî ꞌngo̱ guiì sañuun riñan nej suj ni̱ si̱ gachîn nej suj si ga̱ꞌna̱ꞌ sañuun riñan guiì giꞌhiaj dánanj ngà nej suj mánj,
sa daꞌhui nej suj ga̱ta̱j nej suj huin si gi̱ꞌhiaj Ma̱ꞌan Ñaꞌanj an ga̱ꞌna̱ꞌ sa hua̱ hueꞌê riñan guiì dânj,
dadinꞌ gàꞌ niꞌin nej suj si gakḯn Ma̱ꞌan Ñaꞌanj an gaꞌnaꞌ nej suj guendâ ga̱na̱huin ra̱ꞌa nej suj sa hua̱ hueꞌê.
10 Dadinꞌ dàj rûnꞌ taj riñan ñanj si-nùguànꞌ Ma̱ꞌan Ñaꞌanj an:
Guiì ruhuâ ga̱ nìn ga̱ne ni̱ nun ga̱ra̱nꞌ ruhuâ ninj gi̱ranꞌ sa̱ñu̱n ninj,
ni̱ nun daꞌhui ninj ga̱ꞌmi̱n ninj nuguanꞌ kï̱j hua,
ni̱ si̱ gaꞌmin ninj nuguanꞌ gidigañuꞌunj;
11 ni̱ si̱ giꞌhiaj nej suj sa aꞌnanꞌan mánj,
du̱guꞌnïnꞌ nej suj gi̱ꞌhiaj nej suj sa hua̱ hueꞌê;
ni̱ du̱guꞌnïnꞌ nej suj ga̱ dïnꞌïnj riñan nej suj ngà ꞌngo̱ ni̱ aꞌngô nej guiì,
ni̱ huê chrej dan gi̱daꞌa nej suj dadinꞌ chrej dan huin sa hua̱ hueꞌê.
12 Dadinꞌ dugumîn Ma̱ꞌan Señor nej guiì giꞌhiaj sa ni̱ka̱a,
ni̱ ûta hueꞌê gananï̂n rakï nga gaꞌmin ninj nngaj,
sani̱ naꞌan ruhuâ Ma̱ꞌan Señor niꞌin nej guiì giꞌhiaj sa aꞌnanꞌan.
13 Hua̱ sí gi̱ꞌhiaj sa yìꞌì ngà nej suj si daranꞌ diû gi̱ꞌhiaj nej suj sa sàꞌa na̱nj nînꞌ.
14 Sani̱ si giranꞌ sa̱ñu̱n nej suj rayiꞌî sa sàꞌ giꞌhiaj nej suj,
ni̱ ga̱na̱huin nìhiàꞌ ruhuâ nej suj.
Ni̱ si̱ ganï̂n yìꞌì ruhuâ nej suj,
ni̱ si̱ ganï̂n yuꞌhuiꞌ ruhuâ nej suj rayiꞌî sa giꞌhiaj sí dan mánj,
15 gi̱nikaj chre̱j nej suj ngà Ma̱ꞌan Ñaꞌanj an ni̱ ngà Ma̱ꞌan Cristo ngà ruhuâ nimân nej suj,
ni̱ nìn gi̱ꞌhiaj nej suj ni̱ gi̱nikaj chre̱j nej suj ngà nej guiì,
ni̱ ga̱ yu̱gui nej suj daranꞌ diû guendâ du̱naꞌhuej nej suj rayiꞌî nuguanꞌ guyumân ruhuâ nej suj nga hua nej guiì gachín naꞌanj;
16 ni̱ si hua̱ guiì gaꞌmin yiꞌî nej suj ni̱ gataj ninj si huin nej suj guiì kï̱j huaa guendâ dagahuin nej suj riñan Ma̱ꞌan Cristo,
sani̱ hua̱ dïnꞌïnj ruhuâ daꞌngaꞌ nu̱n ruhuâ nimân nej suj dadinꞌ niꞌin nej suj si giꞌhiaj nej suj sa hua̱ hueꞌê,
huê danj ni̱ gànàrìꞌ nej guiì dânj sinaꞌàj a guendâ ganachinikaj ninj nuguanꞌ gidigañuꞌunj un rayiꞌî nej suj.
17 Dadinꞌ dànanj dùgùnàj huaj si gi̱ranꞌ sa̱ñu̱n nej suj,
si huê dan huin sa garanꞌ ruhuâ Ma̱ꞌan Ñaꞌanj an,
gàꞌ daꞌ si̱ gi̱ꞌhiaj nej suj gakï̱nꞌïn.
18 Dadinꞌ ꞌngo̱ rïn gahuiꞌ Ma̱ꞌan Cristo riñan nej gakï̱nꞌïn,
sani̱ nun gi̱ꞌhia gàꞌ si ꞌngo̱ gakï̱nꞌïn sani̱ gahuij rayiꞌî nej guiì giꞌhiaj gakï̱nꞌïn,
guendâ gi̱nika ga̱ꞌan ninj riñan Ma̱ꞌan Ñaꞌanj an,
ni̱ yàngàꞌ hia ni̱ gahuij ngà nneè ku sani̱ hua̱ nìꞌnàꞌ nanè nimanj;
19 ni̱ huê danj na̱nj gaꞌanj du̱yingaj Ma̱ꞌan Jesús,
riñan nanè nimân nej guiì màn ni̱nï̱nꞌ dukuâ gaꞌa si gàꞌ gunukua giꞌhiaj ga̱nanj riñan sichre,
20 nej nânj huin nanè nimân nej guiì nun ga̱ꞌhue̱j dagahuin riñan Ma̱ꞌan Ñaꞌanj an nga diû gane Noé,
ni̱ ûta nùkuaj ga ruhuâ Ma̱ꞌan Ñaꞌanj an ni̱ ganaꞌhu̱i si gànànìkàj ruhuâ nej guiì dânj rayiꞌî si-ga̱kïnꞌ ninj sani̱ nun gùyùmàn ruhuâ ninj,
sani̱ guyumân ruhuâ sachij Noé ni̱ rayiꞌî dan ni̱ ginûn huin sôꞌ giꞌhiaj yu̱gui sôꞌ barkû nìko xi,
sani̱ man tï̱nj nej guiì huin sa gananin riñan gumàn nìko xi gamanꞌ nga diû dânj.
21 Ni̱ nga gataꞌ nne nej guiì ni̱ gahuin ꞌngo̱ daꞌngaꞌa si gàꞌ gahuiꞌ ninj riñan gakï̱nꞌïn,
ni̱ gananin ninj giꞌhia dàj rûnꞌ gananin nej dùguìꞌ sachij Noé,
sani̱ nitaj si ganaruhui dḯn hua̱ nneè kú ninj giꞌhia mánj,
sa giꞌhia huin si nadiganj si hua̱ hueꞌê daꞌngaꞌ nu̱n ruhuâ nimân ninj,
sani̱ sa giꞌhiaj gananin nej guiì huin guendâ ganaꞌnï̂nj Ma̱ꞌan Jesucristo siganï̂nj nej nîman,
22 ni̱ nga gahui gaꞌan yàtàꞌa ni̱ nne raꞌa neꞌ huàꞌ Ma̱ꞌan Ñaꞌanj an;
ni̱ ni̱ka̱j sunj riñan nej ángel,
ni̱ ni̱ka̱j sunj riñan nej nanè kï̱j huaa ni̱ ni̱ka̱j sunj riñan nej sa nùkuaj.