2
Gi̱ꞌhiaj anêj nej suj daranꞌ sa yìꞌìi,
daranꞌ nuguanꞌ gidigañuꞌunj un,
ni̱ si̱ gidigañuꞌunj nej suj ngà sa giꞌhiaj nej suj,
ni̱ si ga yìkòj ruhuâ nej suj,
ni̱ gu̱du̱nâj nej suj daranꞌ nuguanꞌ hia̱a,
2 gi̱ꞌhiaj nej suj dàj rûnꞌ giꞌhiaj neꞌej hia̱j gaꞌnga nga ûta huin ruhuâj go̱ꞌoj si-tò nni,
huê danj ga̱huin ruhuâ nej suj niꞌin nej suj si-nùguànꞌ Ma̱ꞌan Ñaꞌanj an,
daꞌnga ni̱ gaꞌhue ga̱huin nùkuaj nej suj ni̱ ga̱ꞌhue ga̱na̱ni̱n nej suj gi̱ꞌhia,
3 ni̱ huê danj gi̱ꞌhiaj nej suj si gàꞌ garanꞌ ruhuâ nej suj guendâ gananï̂n àko ruhuâ Ma̱ꞌan Señor niꞌin nej suj.
Ma̱ꞌan Cristo huin hiëj nìꞌnàꞌa
4 Ga̱huin nìchrùnꞌ nej suj riñan Ma̱ꞌan Jesús,
dadinꞌ huej huin hiëj hua̱ nìꞌnàꞌa,
sani̱ gi̱ꞌhiaj ni̱nï̱n nej síi Ma̱ꞌan,
sani̱ riñan Ma̱ꞌan Ñaꞌanj an ni̱ huin ꞌngo̱ hiëj ûta du̱ꞌhue̱e ni̱ ganagui Ma̱ꞌan Ñaꞌanj an Ma̱ꞌan,
5 nej suj huin hiëj nìꞌnàꞌa,
ni̱ gi̱ꞌhiaj Ma̱ꞌan Ñaꞌanj an si ga̱huin nej suj ꞌngo̱ hueꞌ ñan ga̱ne Ma̱ꞌan Ñaꞌanj an ni̱ huin nej suj rej gèe ni̱ Ma̱ꞌan Jesucristo gu̱ru̱gûñuꞌunj ni̱ ga̱ꞌhue gàꞌhuìꞌ nej suj ofrenda riñan Ma̱ꞌan Ñaꞌanj an.
6 Dadinꞌ huê danj taj riñan ñanj si-nùguànꞌ Ma̱ꞌan Ñaꞌanj an:
Hia̱j rûꞌhuaj,
ni̱ guchrû ruhuâ yumanꞌ Sión ꞌngo̱ hiëj ña̱ꞌa̱n doj ni̱ huin ꞌngo̱ hiëj gingaj sikûj hueꞌe,
ni̱ huin ꞌngo̱ hiëj du̱ꞌhue̱e ni̱ huin ꞌngo̱ hiëj ganagui Ma̱ꞌan Ñaꞌanj an;
ni̱ guiì gùyùmàn ruhuâ niꞌin hiëj nânj ni̱ si̱ giriꞌ ninj sinàꞌàj a mánj.
7 Guendâ nej suj guyumân ruhuâ,
ni̱ huin ꞌngo̱ hiëj du̱ꞌhue̱e;
sani̱ guendâ nej guiì nitaj si guyumân ruhuâ ni̱ huin,
Hiëj giꞌhiaj anêj nej sí giꞌhiaj hueꞌe,
sani̱ huej huin hiëj nìko gane sikûj hueꞌe;
8 Ni̱ gisîj nuguanꞌ nânj:
Dadinꞌ huin hiëj gi̱ꞌhiaj chìꞌ ruhuâ nej guiì,
ni̱ huin huej gi̱ꞌhiaj ga̱na̱tu̱ ninj.
Dadinꞌ gahuin chìꞌ
ruhuâ ninj niꞌin ninj si-nùguànꞌ Ma̱ꞌan Ñaꞌanj an.
Ni̱ nun ga̱ꞌhue̱j ninj da̱gahuin ninj sa taj si-nùguànꞌ Ma̱ꞌan Ñaꞌanj an;
ni̱ hua̱ ni̱ña̱n si gi̱ranꞌ sa̱ñu̱n ninj guendâ naꞌhuej ninj da̱gahuin ninj.
Yumanꞌ huin yiñán Ma̱ꞌan Ñaꞌanj an
9 Sani̱ nej suj huin yiꞌnïnꞌ nej dùguìꞌ nej guiì ganagui Ma̱ꞌan Ñaꞌanj an,
ni̱ nej suj huin nej rej gunânj gi̱tsi riñan Ma̱ꞌan Rey,
ni̱ huin nej suj ꞌngo̱ país gèe,
ni̱ huin nej suj ꞌngo̱ yiꞌnïnꞌ nej guiì girânj Ma̱ꞌan Ñaꞌanj an ngà tun,
guendâ du̱yiꞌngaꞌ nej suj rayiꞌî sa hua̱ hueꞌê staꞌu giꞌhiaj Ma̱ꞌan Ñaꞌanj an,
dadinꞌ gahuin nej suj guiì giꞌhiaj gakï̱nꞌïn sani̱ ganari Ma̱ꞌan Ñaꞌanj an nej suj riñan gakï̱nꞌïn,
ni̱ giꞌhia si gìyìgï̀n riñan nej suj ni̱ gi̱ni̱ꞌin nej suj sa hueꞌê staꞌu giꞌhia;
10 àsìj nâ ni̱ sê yiꞌnïnꞌ nìkòꞌ rukû Ma̱ꞌan Ñaꞌanj an gahuin nej suj,
sani̱ hia̱j ni̱ rayiꞌî tun Ma̱ꞌan Jesús ni̱ huin nej suj yiꞌnïnꞌ nìkòꞌ rukû Ma̱ꞌan Ñaꞌanj an;
ni̱ aꞌngô diû ni̱ nun ga̱na̱nï̱n àko ruhuâ Ma̱ꞌan Ñaꞌanj an niꞌin nej suj,
sani̱ hia̱j ni̱ ngà tun Ma̱ꞌan Jesús ni̱ gananï̂n àko ruhuaj niꞌin nej suj na̱nj ánj.
Ga̱huin nej suj si-musû Ma̱ꞌan Ñaꞌanj an
11 ꞌÌ ruhuâj niꞌín nej suj di̱nï̂nj ni̱ ûta àko gachín nìꞌhia riñan nej suj ni̱ gi̱nun ruhuâ nej suj si huin nej suj sí ꞌna̱ꞌ aꞌngô país ni̱ huin nej suj sí gaché nun,
ni̱ si̱ dagahuin nej suj nej gakï̱nꞌ garanꞌ ruhuâ nneè kú nej suj dadinꞌ unïnꞌ nej gakï̱nꞌ dânj ngà ma̱ꞌan nimân nej suj.
12 Hueꞌê gi̱ꞌhiaj nej suj nga nikïnꞌ nej suj siganï̂nj nej sí nàsìnùnj un;
dadinꞌ nùnj huin si gaꞌmin nej sôꞌ rayiꞌî nej suj ni̱ gataj nej sôꞌ si huin nej suj sí aꞌnanꞌan,
sani̱ nga gi̱ni̱ꞌin nej sôꞌ si gi̱ꞌhiaj hueꞌê nej suj ni̱ ga̱ꞌmi̱n hueꞌê nej sôꞌ yiꞌî Ma̱ꞌan Ñaꞌanj an gui nga na̱gi̱ꞌhiaj Ma̱ꞌan guenda ngà daranꞌ nej guiì.
13 Rayiꞌî guendâ ga̱ꞌmi̱n hueꞌê nej guiì rayiꞌî Ma̱ꞌan Señor ni̱ da̱gahuin nej suj riñan nej síchìj ni̱ka̱j sun nìko ngà síchìj ni̱ka̱j sun hua̱ lij doj,
ni̱ huê danj na̱nj da̱gahuin nej suj riñan ꞌngo̱ rey,
ni̱ gi̱ꞌhiaj nej suj si sôꞌ huin sí ni̱ka̱j su̱n riñan daranꞌanj,
14 huê danj na̱nj da̱gahuin nej suj riñan nej sôꞌ ni̱ka̱j suun dadinꞌ huê nej sôꞌ nânj huin guneꞌ nej síchìj ni̱ka̱j su̱n nìko doj ni̱ nne nej sôꞌ guendâ gi̱ꞌhiaj nej sôꞌ kastîgu nej sí giꞌhiaj gakï̱nꞌïn ni̱ nne sôꞌ guendâ ga̱ꞌmi̱n hueꞌê sôꞌ yiꞌî nej sí giꞌhiaj hueꞌê.
15 Dadinꞌ garanꞌ ruhuâ Ma̱ꞌan Ñaꞌanj an:
Si da̱gahuin nej suj hiôꞌ ni̱ gi̱ꞌhiaj nej suj si ganarán nej sí nun niꞌin daꞌngaꞌ sa gaꞌmin duꞌhua nej sôꞌ na̱nj ánj.
16 Ni̱ huin nej suj sí giyiꞌnï̂nj riñan guendâ nitaj si giꞌhiaj nej suj gakï̱nꞌïn,
sani̱ sê dàj dïnꞌ na̱nj si giyiꞌnï̂nj riñan nej suj hiôꞌ ni̱ ga̱nï̱n ruhuâ nej suj si ga̱ꞌhue gi̱ꞌhiaj nej suj doj gakï̱nꞌïn mánj.
Gi̱ꞌhiaj nej suj sa hua̱ hueꞌê ni̱ giniꞌin nej guiì si huin nej suj guiì gunânj gi̱tsi riñan Ma̱ꞌan Ñaꞌanj an.
17 Gi̱ni̱kaj chre̱j nej suj riñan daranꞌ nej guiì,
ni̱ gà ꞌì ruhuâ nej suj niꞌin nej suj nej dinï̂nt.
Ni̱ si̱ giꞌhiaj nej suj gakï̱nꞌïn riñan Ma̱ꞌan Ñaꞌanj an.
Ni̱ gi̱ni̱kaj chre̱j nej suj riñan rey.
Giranꞌ sa̱ñu̱n Ma̱ꞌan Jesús ni̱ gidiganj si gi̱ranꞌ sa̱ñu̱nꞌ
18 Nej suj ꞌnï̱nj giꞌhiaj sun chre dan,
ni̱ da̱gahuin nej suj ni̱ gi̱nikaj chre̱j nej suj riñan si-yi̱ruꞌhue nej suj,
sani̱ sê man riñan nej sôꞌ sàꞌa ngà nej sôꞌ ûta hueꞌê gaꞌmin da̱gahuin nej suj mánj,
dadinꞌ hua̱ ni̱ña̱n si da̱gahuin nej suj riñan nej sôꞌ ûta ga̱ninï̀n hua nej na̱nj ánj.
19 Dadinꞌ nùnj huin si nitaj nùnj giꞌhiôꞌ,
sani̱ giranꞌ sa̱ñu̱nꞌ guendâ ruhuôꞌ da̱gahuînꞌ riñan Ma̱ꞌan Ñaꞌanj an ni̱ ga̱ nùkuaj ruhuôꞌ,
hiôꞌ ni̱ ga̱ranꞌ ruhuâ Ma̱ꞌan Ñaꞌanj an rayiꞌî sa gi̱ꞌhiôꞌ.
20 Ni̱ si garaꞌhui nej sôꞌ riñan nej suj rayiꞌî guendâ giꞌhiaj nej suj sa aꞌnanꞌan,
ni̱ ahuin gue̱nda̱ niꞌñanj si ga nùkuaj ruhuâ nej suj ràꞌaj.
Ni̱ si giꞌhiaj nej suj sa sàꞌa ni̱ giranꞌ sa̱ñu̱n nej suj ni̱ ga nùkuaj ruhuâ nej suj,
ni̱ nânj huin sa garanꞌ ruhuâ Ma̱ꞌan Ñaꞌanj an na̱nj ánj.
21 Ni̱ huê guenda nânj gakḯn Ma̱ꞌan Ñaꞌanj an gaꞌnaꞌ nej suj;
dadinꞌ huê danj na̱nj giranꞌ sa̱ñu̱n Ma̱ꞌan Cristo rayiꞌî nêꞌ,
ni̱ gàꞌ gutaꞌ Ma̱ꞌan chrej e neꞌ ña̱an,
ni̱ huê chrej dânj ga̱che̱ꞌ ni̱ gi̱nikôꞌ rukuj gu̱nꞌ na̱nj ánj;
22 ni̱ nun gi̱ꞌhiaj Ma̱ꞌan Cristo gakï̱nꞌïn,
ni̱ gàꞌ ꞌngo̱ nuguanꞌ gi̱di̱gañuꞌunj nun ga̱hui̱ ruhuâ duꞌhua Ma̱ꞌan Cristo mánj;
23 ni̱ nga gaꞌmin yìꞌì nej sí dânj riñanj,
ni̱ nun ga̱ꞌmi̱n yìꞌij riñan nej sôꞌ;
ni̱ nga giranꞌ sa̱ñunj giꞌhiaj nej sôꞌ ni̱ nun ga̱ta si nànìka gi̱ꞌhia sa yìꞌì ngà nej sôꞌ,
sa giꞌhia huin si ganataj rayiꞌî sa̱ñu̱n giranꞌanj dan riñan Ma̱ꞌan sa nne ganakaj guendâ ni̱ giꞌhia sa ni̱ka̱a;
24 ni̱ ngà nneè kú Ma̱ꞌan Jesús ginikaj gaꞌan si-ga̱kïnꞌ nêꞌ nga ginikoj riñan chrun,
huê danj ni̱ nga gaꞌnḯn nimûnꞌ gi̱nikôꞌ rukuj ni̱ nitaj gakï̱nꞌïn gi̱ꞌhiôꞌ dadinꞌ man sa ni̱ka̱a garanꞌ ruhuôꞌ giꞌhiôꞌ,
ni̱ giranꞌ yiꞌì Ma̱ꞌan Cristo ni̱ giꞌhia si ga̱na̱huînꞌ riñan yiꞌì àràꞌhueꞌ ñùnꞌ.
25 Dadinꞌ gahuin nej suj dàj rûnꞌ gahuin nej matsïj gaꞌanj nìꞌhià,
sani̱ hia̱j ni̱ gananikàj nej suj gaꞌnaꞌ nej suj riñan Ma̱ꞌan Cristo ni̱ Ma̱ꞌan huin sa ni̱kï̱nꞌ dugumîn ma̱ꞌan nimân nej suj.