Profeta gidigañuꞌunj un ni̱ maestrû gidigañuꞌunj un
2
Sani̱ gimân nej profeta gidigañuꞌunj un siganï̂nj nej Israelita àsìj nâ,
ni̱ huê danj na̱nj gimàn nej maestrû gidigañuꞌunj siganï̂nj nej suj,
ni̱ du̱guatûj huì nej sôꞌ ni̱ gidigân nej sôꞌ nuguanꞌ nitaj si ꞌna̱ꞌ riñan ñanj si-nùguànꞌ Ma̱ꞌan Ñaꞌanj an riñan nej suj ni̱ gu̱du̱rëꞌ nej sôꞌ nej suj,
ni̱ ga̱ta̱j nej sôꞌ si nun niꞌin nej sôꞌ Ma̱ꞌan Señor giꞌhiaj gananin nej sôꞌ,
sani̱ gi̱ꞌhiaj nej sôꞌ si ga̱ꞌna̱ꞌ sa̱ñu̱un riñan nej ma̱ꞌan nej sôꞌ nda raꞌñanj chre.
2 Ni̱ ûta gàꞌì nej guiì gàyìꞌì gi̱ꞌhiaj gakï̱nꞌïn yiꞌî nej nuguanꞌ gidigân nej sí dânj,
ni̱ rayiꞌî sa giꞌhiaj nej sôꞌ ni̱ gàyìꞌì nej guiì ni̱ ga̱ꞌmi̱n kï̱j ninj rayiꞌî chrej yàngàꞌa,
3 ni̱ ûta nànàꞌhuìꞌ nej sij dàj gi̱di̱gan nej sij nuguanꞌ gi̱di̱gañuꞌunj riñan nej suj guendâ ga̱ꞌne̱ nej sij si-sa̱nꞌa̱nj nej suj.
Sani̱ gàꞌ hua̱ yu̱gui sañuun ga̱ꞌnaj riñan nej sij,
dadinꞌ gàꞌ giriꞌ nìꞌhiaj nej sij ga̱ꞌa̱nj ni̱ꞌhia nej sij.
4 Dadinꞌ si nun gi̱nikaj Ma̱ꞌan Ñaꞌanj an nimân nìko ngà nej ángel giꞌhiaj gakï̱nꞌïn riñanj,
ni̱ gudugue gaꞌanj ninj ruhuâ rúnâko ni̱ guneꞌ ni̱nïnj ninj ruhuâ dukuâ gaꞌ hua̱ ru̱mi̱nꞌin,
ni̱ hiuj dânj ga̱ne ni̱nï̱nꞌ ninj nda gui ga̱na̱nikïnꞌ ninj riñan Ma̱ꞌan Ñaꞌanj an guendâ ganahuin guenda rayiꞌî si-ga̱kïnꞌ ninj;
5 sani̱ gàꞌ dânj ni̱ nun gi̱nikaj Ma̱ꞌan Ñaꞌanj an nimân nìko rayiꞌî nej guiì gimân nga diû gane sachij Noé,
ni̱ gataj sôꞌ si gi̱ꞌhiaj daꞌ goꞌngo̱ nej guiì dânj sa ni̱ka̱a sani̱ nun gùyùmàn ruhuâ ninj ni̱ rayiꞌî dan ni̱ giꞌhia si gamanꞌ gumàn hu̱e xi riñan ninj,
sani̱ gananin sachij Noé ngà aꞌngô chi̱j nej guiì,
6 ni̱ si dunahui ni̱ giꞌhia giranꞌ sa̱ñu̱n nej guiì gimân nej yumanꞌ snàꞌànj gùꞌnàj Sodoma ngà Gomorra,
ni̱ giꞌhia si gaka nguèj yumanꞌ dânj ni̱ man doj hiaj gunâj,
ni̱ nânj gahuin ꞌngo̱ daꞌngaꞌa guduna riñan nej guiì duguꞌnïnꞌ giꞌhiaj sa kï̱j huaa,
7 sani̱ dunanin Ma̱ꞌan Ñaꞌanj an Lot dadinꞌ gahuin sôꞌ sí giꞌhiaj sa ni̱ka̱a,
ni̱ ûta giri ruhuâ sôꞌ niꞌin sôꞌ nej sa aꞌnanꞌ giꞌhiaj nej sí ûta kï̱j hua dânj sani̱ nitaj àmàn guyumân ruhuâ nej sôꞌ sa gaꞌmin Lot.
8 Dadinꞌ gahuin Lot,
sí ni̱ka̱a ni̱ gane sôꞌ siganï̂nj nej sí nânj,
ni̱ daꞌ gui ni̱ gananï̂n ruhuâ sôꞌ ngà ma̱ꞌan nimân sôꞌ rayiꞌî nej sa kï̱j hua giniꞌin sôꞌ ni̱ gunïn sôꞌ giꞌhiaj nej sí nânj,
9 ni̱ niꞌin Ma̱ꞌan Señor dàj gi̱ꞌhia ga̱na̱ni̱n nej guiì ni̱ka̱j chre̱j riñanj nga duguaneꞌ sichre gakï̱nꞌïn riñan ninj,
ni̱ nuneꞌ chrunj nej guiì nitaj si giꞌhiaj sa ni̱ka̱a guendâ ga̱na̱huin ra̱ꞌa ninj kastîgu nga gùyùmàn gui ga̱na̱nikïnꞌ ninj riñan Ma̱ꞌan Ñaꞌanj an.
10 Ni̱ dànanj hua̱j doj gi̱ranꞌ sa̱ñu̱n nej guiì ûta ganahuij ruhuâ niꞌin nneè kú,
ni̱ ûta huin ruhuâ ninj gi̱ꞌhiaj ninj ahuin na̱nj gakï̱nꞌ,
ni̱ nagiꞌhiaj kï̱j ninj ma̱ꞌan ninj,
ni̱ giꞌhiaj ninaj ninj doj Ma̱ꞌan Señor aꞌnïnꞌ riñan ninj.
Guiì hu̱e huin ninj ni̱ nitaj si guyumân ruhuâ ninj,
ni̱ nitaj si yuꞌhuiꞌ ninj ga̱ꞌmi̱n ninj nuguanꞌ aꞌnanꞌan yiꞌî nej sôꞌ ni̱ka̱j sun nìko,
11 sani̱ nej ángel sàꞌa ni̱ nùkuaj ninj ni̱ ni̱ka̱j ninj sun nìko,
sani̱ gàꞌ danj ni̱ nun gìsìj ruhuâ ninj ga̱ta̱j ninj si ga̱ꞌna̱ꞌ sañuun riñan nej sôꞌ nitaj si dagahuin ni̱ ni̱ka̱j nej sôꞌ sun nìko sani̱ nun ga̱ra̱n ruhuâ ninj rayiꞌî nej sôꞌ nga nikï̂nꞌ ninj riñan Ma̱ꞌan Ñaꞌanj an mánj.
12 Sani̱ nej sí nânj,
ni̱ gaꞌmin aꞌnanꞌ nej sôꞌ rayiꞌî nej sa nun ga̱ra̱n daꞌngaꞌ ruhuâ nej sôꞌ,
ni̱ gahuin nej sôꞌ dàj rûnꞌ huin nej yuku naꞌhue ga̱ya̱ka̱j guendâ,
ni̱ gaꞌnga nej sôꞌ guendâ gi̱ni̱nj nej sôꞌ riñan gakï̱nꞌïn huê danj ni̱ gahuiꞌ nej sôꞌ,
ni̱ ma̱ꞌan nej sôꞌ gi̱ꞌhiaj ni̱ gaꞌanj ni̱ꞌhia nej sôꞌ huê danj ni̱ ganahuij nej sôꞌ.
13 Ni̱ ganahuin ra̱ꞌa nej sôꞌ sañuun rayiꞌî nej gakï̱nꞌ giꞌhiaj nej sôꞌ,
dadinꞌ sa giꞌhiaj nej sôꞌ huin si ûta ganahuin nìhiàꞌ ruhuâ nej sôꞌ ngà nej gakï̱nꞌ giꞌhiaj nej sôꞌ daꞌ gui.
Ni̱ nej nânj huin nej gakï̱nꞌ nagiꞌhiaj kï̱j nimân nej sôꞌ,
ni̱ nga nne nej sôꞌ yâ nej sôꞌ ngà nej suj,
ni̱ gananun ruhuâ nej sôꞌ niꞌin nej sôꞌ si-ga̱kïnꞌ nej sôꞌ ni̱ ganahuin nìhiàꞌ ruhuâ nej sôꞌ ngà sa giꞌhiaj nej sôꞌ.
14 Nga giniꞌin nej sôꞌ ꞌngo̱ siyànà nne nikaa ni̱ ûta huin ruhuâ nej sôꞌ ga̱to̱j nej sôꞌ ngà siyànà dânj,
ni̱ nitaj àmàn gaꞌnïnꞌ ruhuâ nej sôꞌ si gi̱ꞌhiaj nej sôꞌ gakï̱nꞌïn,
ni̱ ûta nikaj nej sôꞌ mâñan dàj gidigañuꞌunj nej sôꞌ nej guiì nitaj si ni̱kï̱nꞌ ran,
ni̱ guꞌñun nej sôꞌ ni̱ ûta huin ruhuâ nej sôꞌ si ga̱ doj rasu̱un riñan nej sôꞌ,
ni̱ guendâ giꞌhiaj nej sôꞌ dànanj ni̱ hua̱ ni̱ña̱n si ga̱ꞌna̱ꞌ sañuun riñan nej sôꞌ.
15 Ni̱ gudunâj nej sôꞌ chrej ni̱ka̱a,
ni̱ gudunâ nej sôꞌ chrej gaꞌanj nej sôꞌ ni̱ gidaꞌa nej sôꞌ si-chrej Balam huin daꞌní Beor gaꞌanj nej sôꞌ,
dadinꞌ ga ꞌì ruhuâ sôꞌ ga̱na̱huin ra̱ꞌa sôꞌ kastîgu rayiꞌî nej sa kï̱j hua giꞌhiaj sôꞌ,
16 ni̱ du̱gunïn gàꞌì ꞌngo̱ yuku ꞌmìnj in sôꞌ rayiꞌî sa kï̱j hua staꞌu giꞌhiaj sôꞌ;
ni̱ ꞌngo̱ yuku a̱ta rasu̱un huin yôꞌ,
ni̱ gaꞌmin yôꞌ dàj rûnꞌ gaꞌmin ꞌngo̱ síi,
ni̱ giꞌhiaj yôꞌ si gàꞌnï̀nꞌ ruhuâ sôꞌ rayiꞌî sa nitaj si niꞌñanj sa ganï̂n ruhuâ sôꞌ gi̱ꞌhiaj sôꞌ.
17 Ni̱ huin nej sôꞌ dàj rûnꞌ huin hiuꞌuj ñan nitaj si gahui nnee,
ni̱ huin nej sôꞌ dàj rûnꞌ huin nnga gata ra̱ꞌa nanè aꞌhuiꞌ nùkuaj xi;
ni̱ gàꞌ hua̱ yu̱gui ñan rùmìnꞌin nìko xi ga̱ne ni̱nï̱nꞌ nej sôꞌ.
18 Ni̱ ûta ganahuij ruhuâ nej sôꞌ ga̱ꞌmi̱n nej sôꞌ nuguanꞌ nàhia ni̱ nuguanꞌ nitaj si niꞌñanj an,
ni̱ ni̱ka̱j nej sôꞌ mâñan dàj gidigañuꞌunj nej sôꞌ ni̱ ûta huin ruhuâ nej sôꞌ gi̱ꞌhiaj nej sôꞌ ahuin na̱nj gakï̱nꞌ garanꞌ ruhuâ nneè kú nej sôꞌ ni̱ ûta duguachej nej sôꞌ ruhuâ nej guiì ganï̂n yàngàꞌ ruhuâ gu̱xu̱n ma̱ꞌan riñan nej guiì garanꞌ ruhuâ giꞌhiaj gakï̱nꞌïn.
19 Gataj nej sôꞌ si gùyùmàn ruhuâ nej guiì nuguanꞌ gaꞌmin nej sôꞌ ni̱ ga̱na̱ni̱n ninj,
sani̱ hua̱ na̱nj giꞌhiaj gè nej ma̱ꞌan nej sí dânj gakï̱nꞌïn.
Ni̱ si gi̱rë̱ꞌ ꞌngo̱ síi ni̱ hua̱ ni̱ña̱n si da̱gahuin sij riñan sí giꞌhiaj ga̱nan riñan sij.
20 Yàngàꞌ hia,
ni̱ si gàꞌ gudunâj nej sôꞌ nej gakï̱nꞌ hua̱ ruhuâ yumiguì nânj,
rayiꞌî guendâ giniꞌin nej sôꞌ Ma̱ꞌan Señor Jesucristo dadinꞌ huej huin sa giꞌhiaj gananin nej sôꞌ,
sani̱ guendâ guyumân ruhuâ nej sôꞌ sa gaꞌmin nej sí nânj ni̱ neꞌ rùkù ni̱ gininj ñûn nej sôꞌ riñan gakï̱nꞌ gàꞌ gudunâj nej sôꞌ,
hiôꞌ ni̱ nga nanikàj ñûn nej sôꞌ giꞌhiaj nej sôꞌ gakï̱nꞌïn ni̱ dànanj ganahuin nej sôꞌ sí kï̱j hua doj nga nï̀nꞌ gàchin gi̱niꞌin nej sôꞌ Ma̱ꞌan Jesucristo.
21 Dadinꞌ dànanj dùgùnàj huaj si nun gi̱ni̱ꞌin nej sôꞌ si-nùguànꞌ Ma̱ꞌan Ñaꞌanj an,
dadinꞌ neꞌ rùkù nga gàꞌ giniꞌin nej sôꞌ si-nùguànꞌ Ma̱ꞌan Ñaꞌanj an ni̱ giniꞌin nej sôꞌ ahuin sa ni̱ka̱ daꞌhui nej sôꞌ gi̱ꞌhiaj nej sôꞌ,
ni̱ nanikàj rùkù ñûn nej sôꞌ ni̱ gurûn nej sôꞌ nuguanꞌ ganahuin ra̱ꞌa nej sôꞌ.
22 Sani̱ giranꞌ nej sôꞌ dàj rûnꞌ taj guentû rán aꞌmin dàj giꞌhiaj nej síi:
“Ni̱ nanikàj ñûn yuhue yâ xuj sa guchrán xuj,
ni̱ nanikàj ñûn yaká gàꞌ duguane nej sij duriñun ñûn xuj ma̱ꞌan xuj riñan sigëꞌë.”