Ñânj kartâ nânj huin gachrûn Apóstol
JUDAS
Gaꞌnḯn Judas nuguanꞌ ni̱ꞌña̱nj an riñan nej dinï̂nt nìkoꞌ Ma̱ꞌan Ñaꞌanj an
1
Ñùnj huin Judas ni̱ dinï̂n huin Jacobo sôꞌ gùꞌnàj Santiago ni̱ huín si-musû Ma̱ꞌan Jesucristo,
ni̱ gaꞌnï̂n ñanj karta nan hua riñan daranꞌ nej suj gakḯn Ma̱ꞌan Ñaꞌanj an ni̱ ꞌì ruhuaj niꞌin nej suj ni̱ dugumîn Ma̱ꞌan Jesucristo nej suj:
2 Ni̱ Ma̱ꞌan Ñaꞌanj an gi̱ꞌhiaj ga̱huin nìko sa ga̱ dïnꞌïnj ruhuâ nej suj,
sa ga̱ ꞌì ruhuâ nej suj,
ni̱ ga̱ꞌhue gu̱ru̱gûñuꞌunj nej suj aꞌngô nej duguiꞌ nej suj.
Nuguanꞌ digañuꞌunj un ni̱ nej maestrû digân nuguanꞌ digaꞌñuꞌunj un
3 ꞌÌ ruhuâj niꞌín nej suj di̱nï̂n,
ni̱ ûta huin ruhuâj gàchrùnj ñanj karta gàꞌnï̀n gùchij riñan nej suj rayiꞌî si gàꞌ ga̱na̱ni̱n daranꞌ nêꞌ,
ni̱ ña̱ꞌa̱n huaj gachrûnj ñanj nânj riñan nej suj guendâ dunaꞌngâj si gi̱ꞌhiaj guesâ nej suj ni̱ ginun ña̱ꞌa̱n staꞌu ruhuâ nej suj ni̱ du̱naꞌhuej nej suj rayiꞌî nuguanꞌ ganahuin ra̱ꞌa nej suj dadinꞌ huê dânj guyumân ruhuâ nej dinï̂nt dugumîn Ma̱ꞌan riñan gakï̱nꞌïn.
4 Dadinꞌ gatûj huì da̱ꞌa̱j nej sí gidigañuꞌunj un siganï̂nj nej suj,
dadinꞌ huin nej sôꞌ sí gaꞌanj ni̱ꞌhia̱a,
ni̱ huin nej sôꞌ sí nitaj si guyumân ruhuâ niꞌin Ma̱ꞌan Ñaꞌanj an,
ni̱ naduna nej sôꞌ sa ganï̂n ruhuâ nej sôꞌ rayiꞌî sunuj ganahuin ra̱ꞌa nej sôꞌ giꞌhiaj Ma̱ꞌan Ñaꞌanj an,
ni̱ giꞌhiaj nej sôꞌ ahuin na̱nj gakï̱nꞌ garanꞌ ruhuâ nej sôꞌ,
ni̱ nitaj si dagahuin nej sôꞌ sun gaꞌnïnꞌ Ma̱ꞌan Ñaꞌanj an riñan nej sôꞌ sani̱ ꞌngo̱ rïn Ma̱ꞌan Ñaꞌanj an huin sa ni̱ka̱j sun riñan daranꞌanj ni̱ huê danj na̱nj nitaj si dagahuin nej sôꞌ riñan Ma̱ꞌan si-Seño nêꞌ Jesucristo mánj.
5 Sani̱ ruhuâj du̱nanûnj ruhuâ nej suj,
dadinꞌ gàꞌ gunïn nej suj ꞌngo̱ ñùn,
nga gisîj giꞌhiaj Ma̱ꞌan Señor gananin nej guiì riñan Faraón nne riñan hioꞌó Egipto,
ni̱ neꞌ rùkù ni̱ dunahui nej guiì nun gùyùmàn ruhuâ niꞌin Ma̱ꞌan.
6 Ni̱ huê danj na̱nj giꞌhia ngà nej ángel nun du̱gumîn sun ganahuin ra̱ꞌa ninj,
ni̱ gudunâj ninj ñan gaꞌhuiꞌ Ma̱ꞌan Ñaꞌanj an ga̱ne ninj,
ni̱ guneꞌ ni̱nïnj ninj dukuâ gaꞌ hua̱ ru̱mi̱nꞌin ni̱ hiuj dânj ga̱ne nìgànj ninj,
nda gùyùmàn aꞌngô rïn gui nìko xi nga na̱gi̱ꞌhiaj Ma̱ꞌan Ñaꞌanj an guenda ngà daran nej guiì hiôꞌ ni̱ ga̱na̱huij yumiguìi;
7 ni̱ huê dàj rûnꞌ giranꞌ nej ángel nânj huê danj giranꞌ nej guiì gimàn yumanꞌ snàꞌànj nìko gùꞌnàj Sodoma ngà Gomorra,
ni̱ aꞌngôꞌ nej yumanꞌ snàꞌànj hua lij doj màn ganikàj rukû nguèj yumanꞌ snàꞌànj nânj,
dadinꞌ giꞌhiaj ninj daranꞌ nej gakï̱nꞌ nun daꞌhui ninj gi̱ꞌhiaj ninj ngà nneè nàꞌàj ninj,
ni̱ nânj gahuin ꞌngo̱ daꞌngaꞌa guna riñan nêꞌ,
ni̱ giranꞌ sa̱ñu̱nꞌ nìgànj nej guiì giꞌhiaj gakï̱nꞌïn.
8 Ni̱ huê danj na̱nj gi̱ranꞌ sa̱ñu̱n nej sí ràyìꞌì gaꞌmînj,
dadinꞌ nagiꞌhiaj kï̱j nej sôꞌ nneè kú nej sôꞌ ni̱ nitaj si guyumân ruhuâ nej sôꞌ niꞌin nej sôꞌ Ma̱ꞌan Ñaꞌanj an ni̱ huê danj na̱nj gaꞌmin kï̱j nej sôꞌ riñan nej ángel.
9 Sani̱ nga gunïnꞌ arcángel Miguel ngà sa nàsàꞌa rayiꞌî nneè kú Moisés,
ni̱ nun gìsìj ruhuaj ga̱ta si ga̱huin kastîgu ni̱ ga̱ꞌna̱ꞌ sañun riñan sichre,
sa gata huin:
“Maꞌan Señor du̱gunïn gàꞌì sòꞌ na̱nj ánj.”
10 Sani̱ gaꞌmin kïj nej sí nânj ahuin na̱nj rayiꞌî sa nitaj si niꞌin nej sôꞌ;
ni̱ huê danj na̱nj gaꞌmin kï̱j nej sôꞌ rayiꞌî nej sa gàꞌ niꞌin nej sôꞌ,
sani̱ nagiꞌhiaj kïj nej sôꞌ ma̱ꞌan nej sôꞌ dàj rûnꞌ giꞌhiaj nej yuku ni̱ nitaj si gayakaj guendâ nej sôꞌ sa giꞌhiaj nej sôꞌ.
11 Ûta gi̱ranꞌ sa̱ñu̱n nej sí nânj,
dadinꞌ gidaꞌa nej sôꞌ si-chrej Kaín.
Ni̱ guendâ gaꞌnḯn ñan staꞌu nej sôꞌ sanꞌanj an huê danj ni̱ gaꞌanj ni̱ꞌhia̱ nej sôꞌ dàj rûnꞌ giranꞌ Balam,
ni̱ nun gùyùmàn ruhuâ nej sôꞌ dàj rûnꞌ nun gùyùmàn ruhuâ Coré ni̱ rayiꞌî dan ni̱ gaꞌanj ni̱ꞌhia̱ nej sôꞌ.
12 Ni̱ ûta gaꞌhuiꞌ yìꞌì nej guiì nânj nej suj nga huaj ninj si-gi̱ꞌña̱nj nej suj,
sani̱ nitaj si giriꞌ nàꞌàj ninj sa giꞌhiaj ninj ni̱ yâ ninj ngà nej suj guendâ ganachinj yinaꞌa riki ninj;
ni̱ huin ninj dàj rûnꞌ huin nnga nitaj si a̱ta gumàan,
dadinꞌ nga nitaj si a̱ta gumàan ni̱ gata ra̱ꞌa nanèe dànèꞌ garanꞌ ruhuaj;
ni̱ huin ninj dàj rûnꞌ nej chrun nitaj si gahiu chruj ra̱,
dadinꞌ gàꞌ gahuiꞌ ninj,
ni̱ gàꞌ ꞌngo̱ gaꞌanj ni̱ꞌhia̱ ninj.
13 Ni̱ dàj rûnꞌ hu̱e ganayumàn nne ña̱ꞌa̱nj huê danj hu̱e nej sij,
ni̱ dàj rûnꞌ gahui ata̱nꞌan giꞌhiaj nne ña̱ꞌa̱nj nga ganayumanj huê danj guruguiꞌ si-ga̱kïnꞌ nej sij sani̱ nitaj si giriꞌ nej sij sinàꞌàj a;
ni̱ huin nej sij dàj rûnꞌ huin atïꞌ gaꞌanj ni̱ꞌhia̱a,
ni̱ gàꞌ gaꞌanj ni̱ꞌhia̱ nìgànj nej sij ni̱ ga̱ne nej sij dukuâ gaꞌ ñan hua̱ ru̱mi̱nꞌ xi.
14 Ni̱ huê rayiꞌî nej sí nânj huin gaꞌmin Enoc sôꞌ gataj dàj ga̱huin,
ni̱ gahuin sôꞌ sí chi̱j i neꞌ rùkù sachij Adán,
ni̱ gataj sôꞌ:
“Giniꞌín gaꞌnaꞌ Ma̱ꞌan Señor ngà ûta gàꞌì mîn nej ángel,
15 guendâ na̱gi̱ꞌhia guenda ngà daranꞌ nej sí nun gùyùmàn ruhuâ niꞌin Ma̱ꞌan,
ni̱ ga̱na̱di̱ganj daranꞌ nej gakï̱nꞌ kï̱j staꞌu hua giꞌhiaj nej sôꞌ,
ni̱ ga̱na̱di̱ganj daranꞌ nej nuguanꞌ ꞌhuàj staꞌu gaꞌmin nej sôꞌ ngà Ma̱ꞌan.”
16 Ni̱ ûta gu̱rij nej sí nânj ga̱ꞌmi̱n nej sôꞌ yiꞌî nej duguiꞌ nej sôꞌ,
ni̱ huê danj na̱nj gu̱rij nej sôꞌ ga̱ra̱n ruhuâ nej sôꞌ rayiꞌî nej duguiꞌ nej sôꞌ riñan guesì,
ni̱ huê danj na̱nj ganahuij ruhuâ nej sôꞌ giꞌhiaj nej sôꞌ gakï̱nꞌ garanꞌ ruhuâ nneè kú nej sôꞌ,
ni̱ ûta nìhiàꞌ ruhuâ nej sôꞌ ga̱ꞌmi̱n nej sôꞌ ahuin na̱nj nuguanꞌ,
guendâ gi̱ꞌhiaj nej sôꞌ ganahuin nìhiàꞌ ruhuâ nej guiì ni̱ gìrìꞌ nej sôꞌ sa garanꞌ ruhuâ nej sôꞌ.
Dunaꞌnga riñan nej sôꞌ guyumân ruhuâ niꞌin Ma̱ꞌan Jesús
17 ꞌÌ ruhuâj niꞌín nej suj di̱nï̂nj,
ni̱ gànàꞌnï̀nj sàꞌ nej suj dàj gataj nej sôꞌ gaꞌanj gi̱di̱gán si̱nï̱n si-nùguànꞌ Ma̱ꞌan Ñaꞌanj an giꞌhiaj Ma̱ꞌan Señor Jesucristo;
18 ni̱ gataj nej sôꞌ:
“Si diû ꞌna̱ꞌ neꞌ ñàan ni̱ gaꞌnaꞌ nej sí ga̱ꞌmi̱n duku,
ni̱ gi̱ꞌhiaj nej sí dânj daranꞌ gakï̱nꞌ ganï̂n ruhuâ nneè kú nej sôꞌ.”
19 Nej sí nânj huin nej sí guchraꞌ da̱ꞌa̱j;
ni̱ ûta huin ruhuâ nej sôꞌ gi̱ꞌhiaj nej sôꞌ ahuin na̱nj gakï̱nꞌ,
sani̱ nitaj si nne si-Espíritu Ma̱ꞌan Ñaꞌanj an ngà nej sôꞌ gàꞌ mánj.
20 ꞌÌ ruhuâj niꞌín nej suj na̱nj di̱nï̂nj,
ni̱ du̱guꞌnïnꞌ nej suj gùyùmàn nìko ruhuâ nej suj doj niꞌin nej suj Ma̱ꞌan Ñaꞌanj an,
ni̱ gànàꞌhuìj nej suj si ri̱ki̱ Ma̱ꞌan Espíritu Santo nuguanꞌ rayiꞌî sa gachín nìꞌhiaj nej suj,
21 du̱gumîn nej suj ma̱ꞌan nej suj ni̱ du̱guꞌnïnꞌ nej suj da̱gahuin nej suj ni̱ ga̱ ꞌì ruhuâ Ma̱ꞌan Ñaꞌanj an niꞌin nej suj,
ni̱ gànàꞌhuìj nej suj si gu̱ru̱gûñuꞌunj Ma̱ꞌan Señor Jesucristo nej suj ni̱ gìrìꞌ nìꞌhiaj nej suj ga̱ne nìgànj nej suj.
22 Nej guiì naꞌhuej gùyùmàn ruhuâ ni̱ gi̱ꞌhiaj nej suj si gùyùmàn ruhuâ ninj.
23 Ni̱ gi̱ꞌhiaj nej suj si ga̱na̱ni̱n nej guiì gàꞌ huaj ga̱ꞌa̱nj riñan rúnâko;
ni̱ gu̱ru̱gûñuꞌunj nej suj nej guiì dânj sani̱ ga̱ gu̱dadû nej suj ma̱ꞌan nej suj,
dadinꞌ ga̱huin ni̱ gi̱ni̱nj nej suj riñan gakï̱nꞌ gininj nej guiì dânj.
Dunaꞌnga Judas si ga̱ꞌmi̱n hueꞌê nej sij riñan Ma̱ꞌan Ñaꞌanj an
24 Ni̱ ꞌngo̱ rïn Ma̱ꞌan Ñaꞌanj an huin sa ûta nùkuaj ni̱ ga̱ꞌhue ni̱ du̱guminj nej suj ni̱ si̱ gininj nej suj riñan gakï̱nꞌïn,
ni̱ nda nìhiàꞌ chre ga̱ ruhuâ nej suj nga gùchìꞌ nej suj riñan Ma̱ꞌan,
25 ni̱ ꞌngo̱ rïn Ma̱ꞌan huin Ñaꞌanj,
chru̱n nï̀nꞌ ruhuâ,
ni̱ huej huin sa gi̱ꞌhiaj ga̱na̱ni̱nꞌ,
ni̱ huej huin sa nìko,
ni̱ huej huin Ma̱ꞌan sa ni̱ka̱j su̱n riñan daranꞌanj,
ni̱ ni̱ka̱j sunj riñan daranꞌ nej guiì,
ni̱ huej huin sa nùkuaj nï̀nꞌ ruhuâ,
àsìj gui hia̱j ni̱ daranꞌ nej sientu hioꞌo.
Ni̱ huê danj huin rûꞌhuaj.