Ñânj kartâ huàꞌnï̀nj nânj huin gachrûn Apóstol
JUAN
Gaꞌnḯn Juan nuguanꞌ ni̱ꞌña̱nj an riñan nej dinï̂nt nìkoꞌ Ma̱ꞌan Ñaꞌanj an
1
Ñùnj huin ꞌngo̱ sí achij i ngà si-nùguànꞌ Ma̱ꞌan Ñaꞌanj an,
ni̱ gaꞌnï̂n ñanj karta nan hua riñan sòꞌ huînꞌ Gayo sí ꞌì ruhuâj ni̱ ꞌì yàngàꞌ ruhuâj niꞌín sòꞌ.
2 Ni̱ ꞌì ruhuâj niꞌín sòꞌ na̱nj di̱nï̂n,
ni̱ garanꞌ ruhuâj si gìrìꞌ guesâꞌ ngà daranꞌ sa giꞌhiâꞌ,
ni̱ huê danj na̱nj gu̱ru̱gûñuꞌunj Ma̱ꞌan Ñaꞌanj an sòꞌ ni̱ si̱ gaꞌnanꞌ ngà nneè kúꞌ,
dàj rûnꞌ hua guesâ ma̱ꞌan nimân.
3 Ûta ganahuin nìhiàꞌ ruhuâj dadinꞌ nga gaꞌnaꞌ nej dinï̂nt ni̱ gananï̂n nej sij rayiꞌîꞌ ni̱ gataj nej sij si dagahuin yàngàꞌ,
ni̱ dànèꞌ gahuin huaj ni̱ dagahuînꞌ gataj nej sij.
4 Nga gunḯn si dagahuin yàngàꞌ nej daꞌnî,
ni̱ nitaj ahuin aꞌngô sa ràyìꞌì ganahuin nìhiàꞌ staꞌu ruhuâj mánj.
Gaꞌmin hueꞌé rayiꞌî dinï̂nt Gayo dadinꞌ gaꞌhuiꞌ sij ñan gunâj nej dinï̂nt
5 ꞌÌ ruhuâj niꞌín sòꞌ di̱nï̂nj,
dadinꞌ dagahuin hueꞌêꞌ ni̱ guruguñuꞌunj ngà si-su̱nꞌ aꞌngô nej dinï̂nt,
ni̱ sa ña̱ꞌa̱n doj huin si gu̱ru̱gûñuꞌunj nej dinï̂nt ꞌna̱ꞌ gànꞌ doj.
6 Ni̱ ganataꞌ nej sôꞌ riñan nej dinï̂nt màn neꞌ dànanj si ꞌì yàngàꞌ ruhuâꞌ niꞌînꞌ nej dinï̂nt;
ni̱ dùgùnàj giꞌhiâꞌ si gi̱digânꞌ hueꞌêꞌ chrej ga̱ꞌa̱nj nej sij dadinꞌ huin nej sij sí gunânj gi̱tsi riñan Ma̱ꞌan Ñaꞌanj an,
daꞌnga ni̱ du̱guꞌnïnꞌ nej sij ga̱ꞌa̱nj nej sij ni̱ gànàtàꞌ nej sij riñan aꞌngô yumanꞌan si-nùguànꞌ Ma̱ꞌan Ñaꞌanj an.
7 Dadinꞌ guendâ ꞌì ruhuâ nej sôꞌ niꞌin nej sôꞌ Ma̱ꞌan Señor Jesús,
ni̱ rayiꞌî dan ni̱ gahui nej sôꞌ gaꞌanj gànàtàꞌ nej sôꞌ si-nùguànꞌ Ma̱ꞌan Ñaꞌanj an riñan nej guiì màn aꞌngô yumanꞌan,
ni̱ nitaj si ganahuin ra̱ꞌa nej sôꞌ nej rasu̱n gaꞌhuiꞌ nej guiì nàsìnùnj un mánj.
8 Ni̱ daꞌhui nêꞌ ga̱na̱huin ra̱ꞌa nêꞌ nej guiì giꞌhiaj dànanj,
ni̱ gu̱ru̱gûñuꞌunj nêꞌ ni̱ gi̱ꞌhiaj sun nùguànꞌàn nêꞌ ngà ninj rayiꞌî nuguanꞌ yàngàꞌa.
Ûta aꞌnanꞌ hua chrej gidigân Diótrefes
9 Gàꞌ gachrûnj ꞌngo̱ ñanj guchiꞌ riñan nej suj nìkòꞌ rukû Ma̱ꞌan Cristo;
sani̱ Diótrefes,
huin sí ûta garanꞌ ruhuâ gàꞌnï̀nꞌ riñan nej suj,
huê danj ni̱ nitaj si ganahuin ra̱ꞌa sôꞌ si-nùguànꞌ nej ñûnj.
10 Rayiꞌî dan ni̱,
asàꞌ guchí ñan màn nej suj ni̱ du̱nanûnj riñan sij rayiꞌî nej sa giꞌhiaj sij,
dadinꞌ ûta nìhiàꞌ ruhuâ sij ga̱ꞌmi̱n sij nuguanꞌ yìꞌì chre rayiꞌî nej ñûnj;
ni̱ sê man dan giꞌhiaj sij mánj,
aꞌngô sa giꞌhiaj sij huin si nitaj si ganahuin ra̱ꞌa sij nej dinï̂nt,
ni̱ nej sôꞌ ruhuâ ga̱na̱huin ra̱ꞌa nej dinï̂nt ni̱ nagiꞌhiaj ha̱i̱ sij si ga̱na̱huin ra̱ꞌa nej sôꞌ nej dinï̂nt,
ni̱ gàꞌ ꞌngo̱ giri sij nej sôꞌ siganï̂nj nej dinï̂nt nìkòꞌ rukû Ma̱ꞌan Cristo.
11 ꞌÌ ruhuaj niꞌín sòꞌ di̱nï̂nj,
ni̱ sa ga̱ta̱ gu̱nïnꞌ huin si si̱ gi̱ꞌhiáꞌ sa yìꞌì giꞌhiaj aꞌngô nej guiì mánj,
du̱guꞌnïnꞌ sòꞌ gi̱ꞌhiáꞌ sa sàꞌa.
Dadinꞌ guiì giꞌhiaj sa sàꞌa ni̱ huin ninj daꞌní Ma̱ꞌan Ñaꞌanj an;
sani̱ guiì giꞌhiaj sa yìꞌìi,
ni̱ hua̱ na̱nj nun gi̱ni̱ꞌin ninj Ma̱ꞌan Ñaꞌanj an mánj.
Ûta hueꞌê hua sa giꞌhiaj Demetrio
12 Daranꞌ nej guiì gaꞌmin hueꞌê rayiꞌî Demetrio,
ni̱ sa sàꞌ giꞌhiaj sij gidigân si gaꞌmin yàngàꞌ nej guiì rayiꞌî sij,
ni̱ huê danj na̱nj gaꞌmin hueꞌê nej ñûnj rayiꞌî sij,
ni̱ gàꞌ niꞌin nej suj si gaꞌmin nej ñûnj nuguanꞌ yàngàꞌa.
Nuguanꞌ ganahuij
13 Ni̱ ûta gàꞌì rayiꞌî nej sa huaj gàchrùnj riñanꞌ,
sani̱ nun ga̱ra̱nꞌ ruhuâj gàchrùnj riñan ñanj nan ngà tinta ni̱ ngà lapij seru mánj;
14 sani̱ gànàꞌhuì si râꞌñanj gànàrìꞌ duguîꞌ,
ni̱ ri̱ña̱n,
ri̱ña̱n ganarïsnuꞌunꞌ.
15 Ni̱ ga̱ sa hua̱ dïnꞌïnj riñant.
Ni̱ gaꞌnḯn nej dinï̂nt ni̱ka̱j duguiꞌ ngà nêꞌ nuguanꞌ ni̱ꞌña̱nj an huaj riñant.
Ni̱ nàgàꞌhuìꞌ nuguanꞌ ni̱ꞌña̱nj an riñan nej dinï̂nt ni̱ka̱j duguiꞌ ngà nêꞌ,
ni̱ nàgàꞌhuìꞌ nuguanꞌ ni̱ꞌña̱nj an riñan daꞌ goꞌngo̱ nej sij na̱nj ánj.