Ñânj kartâ huìj nânj huin gachrûn Apóstol
JUAN
Gaꞌnḯn Juan nuguanꞌ ni̱ꞌña̱nj an riñan nej dinï̂nt nìkoꞌ Ma̱ꞌan Ñaꞌanj an
1
Ñùnj huin ꞌngo̱ sí achij i ngà si-nùguànꞌ Ma̱ꞌan Ñaꞌanj an,
ni̱ gaꞌnï̂n huaj nuguanꞌ ni̱ꞌña̱nj an riñan nej suj nìkòꞌ rukû Ma̱ꞌan Jesús ni̱ huê danj na̱nj gaꞌnï̂n huaj nuguanꞌ ni̱ꞌña̱nj an riñan nej sôꞌ ri̱ña̱n gidigân nej suj,
dadinꞌ ꞌì yàngàꞌ ruhuâj niꞌín daranꞌ nej suj;
ni̱ sê ꞌngo̱ rḯn huin sa ꞌì ruhuâ niꞌin nej suj mánj,
dadinꞌ huê danj na̱nj ꞌì ruhuâ daranꞌ nej sôꞌ giniꞌin nuguanꞌ yàngàꞌa niꞌin nej sôꞌ nej suj,
2 ꞌì yàngàꞌ ruhuâ nej ñûnj niꞌin nej ñûnj nej suj dadinꞌ nne sa yàngàꞌ dânj ruhuâ nimân daranꞌ nêꞌ,
ni̱ nìgànj ga̱ sa yàngàꞌ dânj ruhuâ nimân nêꞌ:
3 Ni̱ si-su̱nu̱j Ma̱ꞌan Reꞌ Ñaꞌanj an ngà si-su̱nu̱j Ma̱ꞌan Jesucristo huin Daꞌní Ma̱ꞌan Ñaꞌanj an ga̱ riñan nej suj,
ni̱ gu̱ru̱gûñuꞌun ni̱ gi̱ꞌhia si ga̱ dïnꞌïnj ruhuâ nej suj,
ni̱ gi̱ꞌhia si ga̱ꞌmi̱n nej suj nuguanꞌ yàngàꞌa ni̱ gi̱ꞌhia si ga̱ ꞌì ruhuâ nej suj.
4 Ûta ganahuin nìhiàꞌ ruhuâj dadinꞌ ganariꞌí si hua̱ da̱ꞌa̱j nej sôꞌ ri̱ña̱n gidigânꞌ ni̱ dagahuin yàngàꞌ nej sôꞌ,
dàj rûnꞌ hua sun giyiꞌnïnꞌ riñan nêꞌ giꞌhiaj Ma̱ꞌan Reꞌ Ñaꞌanj an.
5 Hia̱j ni̱ ûta àko gachín nìꞌhia riñan nej suj,
gàꞌ huin yiñán Ma̱ꞌan Ñaꞌanj an,
sani̱ sê si̱ gachrûnj ꞌngo̱ nuguanꞌ nàkà gaꞌnïnꞌ su̱n riñan nej suj mánj,
nuguanꞌ gàꞌ ganahuin ra̱ꞌa si̱nï̱n nêꞌ huin,
huê danj ni̱ ga̱ ꞌì ruhuôꞌ niꞌînꞌ ꞌngo̱ ni̱ aꞌngô nej duguîꞌ.
6 Ni̱ si ꞌì ruhuôꞌ niꞌînꞌ nej duguîꞌ,
hiôꞌ ni̱ dagahuînꞌ riñan Ma̱ꞌan Ñaꞌanj an dàj rûnꞌ giyiꞌnïnꞌ suun riñunꞌ.
Ni̱ sun giyiꞌnïnꞌ riñunꞌ huin si ga̱ ꞌì ruhuôꞌ niꞌînꞌ nej duguîꞌ.
Sí gidigañuꞌunj
7 Dadinꞌ ûta gàꞌì nej sí gidigañuꞌunj un gahui ruhuâ yumiguìi,
ni̱ gataj nej sôꞌ si sê Ñaꞌanj an huin Ma̱ꞌan Jesucristo dadinꞌ man guiì huin.
Ni̱ nej sôꞌ gaꞌmin dànanj ni̱ gahuin nej sôꞌ sí gidigañuꞌunj un ni̱ gahuin nej sôꞌ sí gunïnꞌ ngà Ma̱ꞌan Cristo.
8 Ga̱ gu̱dadû nej suj ngà ma̱ꞌan nej suj,
hiôꞌ ni̱ si̱ gahuin chre sun giꞌhiaj nej ñûnj ngà nej suj,
daꞌnga ni̱ ga̱ꞌhue ga̱na̱huin ra̱ꞌa nej suj daranꞌ nej si-premiun nej suj.
9 Ahuin na̱nj guiì nadunâ sa gahuin chru̱n ninj,
ni̱ nitaj si ganikïnꞌ ran ninj ngà nuguanꞌ gidigân Ma̱ꞌan Cristo,
ni̱ nitaj si nne Ma̱ꞌan Ñaꞌanj an ngà ninj mánj,
ni̱ guiì ganikïnꞌ ran ngà nej sa gidigân Ma̱ꞌan Cristo ni̱ nne Ma̱ꞌan Reꞌ Ñaꞌanj an ni̱ nne Ma̱ꞌan Daꞌnin ngà ninj.
10 Ni̱ si hua̱ ꞌngo̱ sí gaꞌnaꞌ niꞌhiaj ñan nne nej suj,
ni̱ nitaj si guyumân ruhuâ sôꞌ dànanj,
ni̱ si̱ gaꞌnï̂nj nej suj dukuâ nej suj ga̱tu̱ sôꞌ,
ni̱ si̱ ganahuin ra̱ꞌa nej suj sôꞌ mánj.
11 Dadinꞌ nej guiì ganahuin ra̱ꞌa nej sí gaꞌmin dànanj,
ni̱ ganataꞌ si-ga̱kïnꞌ sí dânj yichrá ninj na̱nj ánj.
Gànàꞌhuì si gu̱ru̱gûñuꞌunj Ma̱ꞌan Ñaꞌanj an ni̱ gùchìj ñan màn nej suj
12 Ûta gàꞌì nej sa ràyìꞌì huaj gàchrùnj riñan nej suj,
sani̱ nun ga̱ra̱nꞌ ruhuâj gàchrùnj riñan ñanj ni̱ nun ga̱ra̱n ruhuâj ga̱ra̱n sûnj tinta mánj,
gànàꞌhuì gùchìj ñan màn nej suj ni̱ ri̱ña̱n,
ri̱ña̱n gàꞌmìn ngà nej suj,
daꞌnga ni̱ ganahuin nìhiàꞌ ruhuâ daranꞌ nêꞌ.
13 Nej guiì huin si-nùhuì Ma̱ꞌan Ñaꞌanj ñan nné hiuj nânj,
ni̱ gàꞌ ganagui Ma̱ꞌan Ñaꞌanj an ninj,
ni̱ gaꞌnḯn ninj nuguanꞌ ni̱ꞌña̱nj an huaj riñan nej suj.
Ni̱ huê danj huin rûꞌhuaj na̱nj ánj.