Gùyùmàn yìtï̀nj ruhuôꞌ ni̱ gu̱nu̱kuôꞌ gi̱ꞌhiaj ga̱nûnꞌ riñan nej sa duguane yumiguìi riñunꞌ
5
Daranꞌ guiì guyumân ruhuâ si Ma̱ꞌan Jesús huin Cristo,
ni̱ gàꞌ ganahuin nàkà ninj giꞌhiaj Ma̱ꞌan Ñaꞌanj an;
ni̱ dàj rûnꞌ giꞌhiaj guiì ꞌì ruhuâ niꞌin rej ꞌngo̱ sílìj i,
ni̱ huê danj na̱nj ꞌì ruhuâ ninj niꞌin ninj silíj dânj na̱nj ánj.
2 Huê danj ni̱ niꞌînꞌ si ꞌì ruhuôꞌ niꞌînꞌ nej guiì huin daꞌní Ma̱ꞌan Ñaꞌanj an,
nga ꞌì ruhuôꞌ niꞌînꞌ Ma̱ꞌan Ñaꞌanj an,
ni̱ dagahuînꞌ sun gaꞌnïnꞌ su̱n Ma̱ꞌan riñunꞌ.
3 Ni̱ si dagahuînꞌ sun gaꞌnïnꞌ Ma̱ꞌan Ñaꞌanj an riñunꞌ ni̱ ruhuaj ga̱ta si ꞌì ruhuôꞌ niꞌînꞌ Ma̱ꞌan Ñaꞌanj an;
ni̱ nitaj si chìꞌ huaj da̱gahuînꞌ sun gaꞌnïnj riñunꞌ mánj.
4 Dadinꞌ daranꞌ guiì gaꞌnga nàkà giꞌhiaj Ma̱ꞌan Ñaꞌanj an ni̱ gunùkuaj ninj giꞌhiaj ga̱nan ninj riñan gakï̱nꞌ màn ruhuâ yumiguìi nânj;
ni̱ guendâ guyumân ruhuôꞌ ni̱ rayiꞌî danj ni̱ gunùkuôꞌ giꞌhiaj ga̱nunꞌ riñan nej gakï̱nꞌ duguaneꞌ yumiguìi riñunꞌ.
5 Ahuin guiì gunùkuaj giꞌhiaj ga̱nan riñan nej sa duguaneꞌ yumiguìi ràꞌaj.
Guiì gunùkuaj giꞌhiaj ga̱nan riñan sa duguaneꞌ yumiguìi huin nej guiì guyumân ruhuâ niꞌin si Ma̱ꞌan Jesús huin daꞌní Ma̱ꞌan Ñaꞌanj an na̱nj ánj.
Sa ganataꞌ Ma̱ꞌan Espíritu Rayiꞌî Ma̱ꞌan Jesús
6 Ni̱ gaꞌnaꞌ Ma̱ꞌan Jesucristo ruhuâ yumiguì nânj ni̱ gataꞌ nnej ruhuâ nnee ni̱ huê danj na̱nj gañanj tun rayiꞌî si-ga̱kïnꞌ nej guiì;
sani̱ sê man si gataꞌ nnej mánj,
dadinꞌ gataꞌ nnej ruhuâ nnee ni̱ huê danj na̱nj gahuij ni̱ gañanj tun rayiꞌî si-ga̱kïnꞌ nej guiì.
Ni̱ Ma̱ꞌan Espíritu Santo huin sa gananï̂n rayiꞌî Ma̱ꞌan riñan nêꞌ;
dadinꞌ sa yàngàꞌa huin Ma̱ꞌan Espíritu Santo.
7 Dadinꞌ huàꞌnï̀nj ranꞌ ninj huin sa gananï̂n neꞌ yàtàꞌa dàj huaj:
Ma̱ꞌan Reꞌ Ñaꞌanj an,
ni̱ Ma̱ꞌan Jesucristo ni̱ Ma̱ꞌan Espíritu Santo;
Ni̱ ꞌngo̱ rïn Ma̱ꞌan Ñaꞌanj an huin nej huàꞌnï̀nj ranꞌ ninj.
8 Ni̱ huàꞌnï̀nj ninj huin sa gananï̂n riñan hioꞌóo rayiꞌî Ma̱ꞌan Jesucristo:
Ma̱ꞌan Espíritu,
nnee,
tun;
ni̱ gu̱ña̱n gananï̂n nej huàꞌnï̀nj nânj.
9 Ni̱ ganahuin ràꞌa nêꞌ nuguanꞌ gananï̂n nej síi;
sani̱ dànanj ûta nìko hua̱ nuguanꞌ gananï̂n Ma̱ꞌan Ñaꞌanj an rayiꞌî Ma̱ꞌan Jesús;
dadinꞌ huê dànanj gananï̂n Ma̱ꞌan Ñaꞌanj an rayiꞌî Daꞌnin Jesús.
10 Ni̱ guiì guyumân ruhuâ niꞌin rayiꞌî Ma̱ꞌan Jesús ni̱ huin ninj daꞌní Ma̱ꞌan Ñaꞌanj an,
ni̱ gàꞌ nun sàꞌ nuguanꞌ nânj ruhuâ nimân ninj;
ni̱ nej guiì nitaj si guyumân ruhuâ sa gataj Ma̱ꞌan Ñaꞌanj an,
ni̱ giꞌhiaj ninj si nuguanꞌ gidigañuꞌunj un huin nuguanꞌ gaꞌmin Ma̱ꞌan Ñaꞌanj an,
dadinꞌ nun gùyùmàn ruhuâ ninj niꞌin ninj nuguanꞌ gananï̂n Ma̱ꞌan Ñaꞌanj an rayiꞌî Daꞌnin Jesús mánj.
11 Ni̱ nuguanꞌ gataj Ma̱ꞌan Ñaꞌanj an huin:
Si Ma̱ꞌan gi̱ꞌhiaj ni̱ ganahuin nìꞌnòꞌ;
ni̱ si gùyùmàn ruhuôꞌ niꞌînꞌ Jesús huin Daꞌní Ma̱ꞌan ni̱ ga̱na̱huin nìꞌnòꞌ.
12 Nej guiì dagahuin sun guchruj su̱n Ma̱ꞌan Ñaꞌanj an riñan Daꞌnî Jesús,
ni̱ ga̱ nìꞌnàꞌ ninj;
sani̱ nej guiì nitaj si dagahuin sun guchruj su̱n Ma̱ꞌan Ñaꞌanj an riñan daꞌnî Jesús ni̱ si̱ ga nìꞌnàꞌ ninj mánj.
Giniꞌînꞌ rayiꞌî ñan ga̱ne nìgùnꞌ
13 Nej nuguanꞌ nânj gachrûnj riñan nej suj guyumân ruhuâ niꞌin Daꞌní Ma̱ꞌan Ñaꞌanj an,
daꞌnga ni̱ giniꞌin nej suj si gàꞌ ganahuin nìꞌnàꞌ nej suj ni̱ ga̱ne nìgànj nej suj.
Ni̱ ña̱ꞌa̱n huaj si gùyùmàn yìtï̀nj ruhuâ nej suj niꞌin nej suj Daꞌní Ma̱ꞌan Ñaꞌanj an.
14 Ni̱ hua̱ yìtï̀nj ruhuâ nej ñûnj niꞌin nej ñûnj Ma̱ꞌan Ñaꞌanj an,
ni̱ si gàchìnj nej ñûnj ꞌngo̱ rasu̱n garanꞌ ruhuaj ni̱ gu̱nïn ni̱ ri̱kij na̱nj ánj.
15 Ni̱ si niꞌin nej ñûnj si gunïn rayiꞌî ahuin na̱nj rasu̱n gachín nej ñûnj riñanj,
huê danj ni̱ gàꞌ niꞌin nej ñûnj si ri̱kij sa gachín nej ñûnj riñanj na̱nj ánj.
16 Ni̱ si hua̱ ꞌngo̱ nej suj giniꞌin giꞌhiaj dinḯn nej suj gakï̱nꞌ nitaj si huaj gahuiꞌ nimân sôꞌ,
ni̱ gàchìnj nìꞌhiaj nej suj riñan Ma̱ꞌan Ñaꞌanj an rayiꞌî sí dânj ni̱ gi̱nika nimân nìko rayiꞌî sôꞌ;
nan huin guendâ nej sôꞌ giꞌhiaj gakï̱nꞌ nitaj si huaj gàhuìꞌ nimân.
Dadinꞌ hua̱ gakï̱nꞌ gi̱ꞌhiaj gàhuìꞌ nimûnꞌ,
ni̱ rayiꞌî gakï̱nꞌ nânj ni̱ nitaj si ganaꞌngâj si gàchìnj nìꞌhiaj nej suj mánj.
17 Daranꞌ nej sa aꞌnanꞌan huin gakï̱nꞌïn;
sani̱ hua̱ gakï̱nꞌ ni̱ ga̱ꞌhue gi̱nikaj Ma̱ꞌan Ñaꞌanj an nimân rayiꞌij.
18 Sani̱ gàꞌ niꞌînꞌ si daranꞌ nej guiì gaꞌnga nàkà giꞌhiaj Ma̱ꞌan Ñaꞌanj an,
ni̱ nitaj si giꞌhiaj ninj gakï̱nꞌïn mánj,
dadinꞌ Ma̱ꞌan Jesús sa guruguiꞌ giꞌhiaj Ma̱ꞌan Ñaꞌanj an huin sa dugumîn ninj,
huê danj ni̱ nitaj si gaganꞌ raꞌa sichre ninj mánj.
19 Ni̱ gàꞌ niꞌînꞌ si huînꞌ Daꞌní Ma̱ꞌan Ñaꞌanj an,
ni̱ daranꞌ nej guiì màn ruhuâ yumiguì nânj ni̱ dagahuin ninj nej sa garanꞌ ruhuâ sichre ni̱ ni̱ka̱j sunj riñan ninj.
20 Sani̱ gàꞌ niꞌînꞌ si gaꞌnaꞌ Ma̱ꞌan Jesucristo huin Daꞌní Ma̱ꞌan Ñaꞌanj an,
ni̱ huej huin sa giꞌhiaj garânj daꞌngaꞌ ruhuôꞌ rayiꞌî Ma̱ꞌan Ñaꞌanj yàngàꞌa;
ni̱ ni̱ka̱j duguîꞌ ngà Ma̱ꞌan sa yàngàꞌa,
ni̱ huê danj na̱nj ni̱ka̱j duguîꞌ ngà Ma̱ꞌan Jesucristo huin Daꞌní Ma̱ꞌan Ñaꞌanj an.
Ni̱ nânj huin Ma̱ꞌan Ñaꞌanj an yàngàꞌa,
ni̱ Ma̱ꞌan huin sa gi̱ꞌhiaj ga̱na̱huin nìꞌnòꞌ.
21 Ga̱ gudadû nej suj ni̱ si̱ ginûn ña̱ꞌa̱nj nej suj riñan ñaꞌanj giꞌhiaj ra̱ꞌa nej síi,
man daꞌnînj lij.
Ni̱ huê danj huin rûꞌhuaj na̱nj ánj.