Si-Espíritu Ma̱ꞌan Ñaꞌanj an ni̱ si-espíritu sí unïnꞌ ngà Ma̱ꞌan Cristo
4
ꞌÌ ruhuâj niꞌín nej suj di̱nï̂nj,
rayiꞌî dan ni̱ gatâ si si̱ guyumân ruhuâ nej suj niꞌin nej suj daranꞌ nej sí gataj si gàꞌ ganahuin ràꞌa nej sôꞌ Espíritu Santo mánj,
sa gi̱ꞌhiaj nej suj huin si na̱di̱giꞌñûn nej suj si hia huin nej sôꞌ daꞌní Ma̱ꞌan Ñaꞌanj an;
dadinꞌ sa huaj huin si gahui ûta gàꞌì nej sí gataj si huin nej sôꞌ si-profeta Ma̱ꞌan Ñaꞌanj an ruhuâ yumiguì nânj sani̱ gahuin nej sôꞌ profeta gidigañuꞌunj na̱nj ánj.
2 Ga̱ꞌhue gi̱ni̱ꞌin nej suj si yàꞌngàꞌ ganahuin ràꞌa ꞌngo̱ guiì Espíritu Santo,
si ganakaj guendâ ninj ni̱ gataj ninj si yàꞌngàꞌ hia ni̱ síi gahuin Ma̱ꞌan Jesús nga gane ruhuâ yumiguì nânj,
ni̱ guiì gataj dànanj ni̱ huin ninj daꞌní Ma̱ꞌan Ñaꞌanj an na̱nj ánj.
3 Daranꞌ guiì gataj si sê síi gahuin Ma̱ꞌan Jesús,
ni̱ sê daꞌní Ma̱ꞌan Ñaꞌanj an huin ninj mánj;
ni̱ huin ninj guiì gunïnꞌ ngà Ma̱ꞌan Cristo,
ni̱ gàꞌ gunïn nej suj si ꞌna̱ꞌ nej sí dânj,
ni̱ gàꞌ gunïn nej suj si nne sôꞌ ruhuâ yumiguìi.
4 Daꞌní Ma̱ꞌan Ñaꞌanj an huin nej suj na̱nj daꞌní lij,
ni̱ rayiꞌî dan ni̱ giꞌhiaj ga̱nan nej suj riñan nej sí gidigañuꞌunj dânj;
dadinꞌ dànanj nìko hua sa nne ruhuâ nimân nej suj,
gàꞌ daꞌ sa nne ruhuâ yumiguìi nânj.
5 Nej sí nânj nikaj duguiꞌ ngà nej sí gi̱ꞌhiaj gakï̱nꞌïn;
ni̱ gaꞌmin nej sôꞌ sa garanꞌ ruhuâ nej sí nitaj si nìkòꞌ rukû Ma̱ꞌan Jesús,
ni̱ aranꞌ ruhuâ nej sí giꞌhiaj gakï̱nꞌïn sa gaꞌmin nej sôꞌ.
6 Sani̱ nêꞌ ni̱ huînꞌ daꞌní Ma̱ꞌan Ñaꞌanj an;
ni̱ niꞌînꞌ Ma̱ꞌan Ñaꞌanj an,
ni̱ gunïn Ma̱ꞌan sa gaꞌminꞌ;
sani̱ nej guiì nitaj si huin daꞌní Ma̱ꞌan Ñaꞌanj an,
ni̱ nitaj si gunïn ninj sa gaꞌmin Ma̱ꞌan mánj.
Ni̱ nânj huin ꞌngo̱ daꞌngaꞌa dàj ga̱ꞌhue gi̱ni̱ꞌînꞌ nej guiì huin daꞌní yàngàꞌ Ma̱ꞌan Ñaꞌanj an ni̱ dàj ga̱ꞌhue gi̱ni̱ꞌînꞌ nej guiì gidigañuꞌunj un na̱nj ánj.
Ñaꞌanj an huin sa ꞌì ruhuâ niꞌin ñùnꞌ
7 ꞌÌ ruhuâj niꞌín nej suj di̱nï̂nj,
ni̱ ga̱ ꞌì ruhuâ nêꞌ niꞌînꞌ ꞌngo̱ ni̱ aꞌngô nej dinï̂nt;
dadinꞌ Ma̱ꞌan Ñaꞌanj an gi̱ꞌhiaj ni̱ ga̱ꞌhue ga̱ ꞌì ruhuôꞌ niꞌînꞌ nej dinï̂nt.
Daranꞌ nej guiì ꞌì ruhuâ niꞌin nej dinḯn,
ni̱ gàꞌ gaꞌnga nàkà ninj giꞌhiaj Ma̱ꞌan Ñaꞌanj an,
ni̱ niꞌin ninj Ma̱ꞌan Ñaꞌanj an.
8 Ni̱ nej guiì nitaj si ꞌì ruhuâ niꞌin dinḯn,
ni̱ hua̱ na̱nj nun gi̱ni̱ꞌin ninj Ma̱ꞌan Ñaꞌanj an mánj;
Dadinꞌ Ma̱ꞌan Ñaꞌanj an huin sa ꞌì ruhuâ niꞌin ñùnꞌ na̱nj ánj.
9 Ni̱ gidigân Ma̱ꞌan Ñaꞌanj an si ꞌì ruhuaj niꞌin nêꞌ,
dadinꞌ hua̱ ꞌngo̱ rïn Daꞌnin sani̱ gaꞌnïn gaꞌnaꞌ daꞌnin ruhuâ yumiguì nânj,
ni̱ Ma̱ꞌan ôꞌ huin si gi̱ꞌhiaj ni̱ ga̱ꞌhue ga̱ nìꞌnàꞌ nêꞌ na̱nj ánj.
10 Dànanj huin ga̱ra̱n daꞌnga ruhuôꞌ rayiꞌî guendâ ꞌì ruhuâ Ma̱ꞌan Ñaꞌanj an niꞌin nêꞌ:
Ni̱ sê nêꞌ huin sa ga ꞌì si̱nï̱n ruhuâ niꞌin Ma̱ꞌan Ñaꞌanj an mánj,
Ma̱ꞌan Ñaꞌanj an huin sa ga ꞌì si̱nï̱n ruhuâ niꞌin nêꞌ,
rayiꞌî dan ni̱ gaꞌnïn gaꞌnaꞌ Daꞌnin guendâ ga̱huij rayiꞌî si-ga̱kï̂nt.
11 ꞌÌ ruhuâj niꞌín nej suj di̱nï̂nj,
ni̱ si huê dànanj ga ꞌì ruhuâ Ma̱ꞌan Ñaꞌanj an niꞌin nêꞌ,
ni̱ huê dànanj daꞌhuiꞌ nêꞌ ga̱ ꞌì ruhuâ nêꞌ niꞌin nêꞌ ꞌngo̱ ni̱ aꞌngô duguiꞌ nêꞌ.
12 Gàꞌ si ꞌngo̱ nej guiì nitaj àmàn giniꞌin riñan Ma̱ꞌan Ñaꞌanj an mánj.
Ni̱ si ꞌì ruhuâ nêꞌ niꞌînꞌ ꞌngo̱ ni̱ aꞌngô nej dinï̂nt,
hiôꞌ ni̱ nne Ma̱ꞌan Ñaꞌanj an ngà nêꞌ,
ni̱ sa ꞌì hua̱ riñan Ma̱ꞌan Ñaꞌanj an ni̱ gahuin nìko daꞌ gui riñan nêꞌ daꞌnga ni̱ gaꞌhue ga̱ ꞌì ruhuôꞌ niꞌîn nej dinï̂nt na̱nj ánj.
13 Ni̱ huê rayiꞌî nej nânj ni̱ niꞌînꞌ si nne Ma̱ꞌan Ñaꞌanj an ngòꞌ,
ni̱ nêꞌ ngà Ma̱ꞌan,
ni̱ rikij Ma̱ꞌan Espíritu Santo gaꞌnaꞌ gane ꞌngo̱ꞌ.
14 Ni̱ niꞌin nej ñûnj si gaꞌnḯn Ma̱ꞌan Reꞌ Ñaꞌanj an gaꞌnaꞌ Daꞌnin Jesús guendâ gi̱ꞌhia ga̱na̱ni̱n nej guiì màn ruhuâ yumiguìi ni̱ rayiꞌî dan ni̱ ganataꞌ nej ñûnj nuguanꞌ nânj riñan nej suj.
15 Daranꞌ nej guiì gananï̂n si Jesús huin Daꞌní Ma̱ꞌan Ñaꞌanj an,
ni̱ nne Ma̱ꞌan Ñaꞌanj an ngà ninj,
ni̱ nne ninj ngà Ma̱ꞌan Ñaꞌanj an.
16 Ni̱ giniꞌin nêꞌ ni̱ guyumân ruhuâ nêꞌ si ꞌì ruhuâ Ma̱ꞌan Ñaꞌanj an niꞌin nêꞌ.
Ni̱ Ma̱ꞌan Ñaꞌanj an huin sa ꞌì nï̀nꞌ ruhuâ;
ni̱ guiì duguꞌnïnꞌ ga ꞌì ruhuâ niꞌin nej dinḯn;
ni̱ nne ninj ngà Ma̱ꞌan Ñaꞌanj an,
ni̱ nne Ma̱ꞌan Ñaꞌanj an ngà ninj.
17 Ni̱ si giꞌhiôꞌ dànanj ni̱ guruguiꞌ si ꞌì ruhuôꞌ,
huê danj ni̱ nitaj si̱ giriñun ruhuôꞌ nga gùyùmàn guiì ga̱na̱nikïnꞌ riñan Ma̱ꞌan Ñaꞌanj an mánj;
dadinꞌ dàj rûnꞌ giꞌhiaj Ma̱ꞌan Jesucristo nga gane ruhuâ yumiguì nânj,
huê danj gi̱ꞌhiaj nêꞌ nga ga̱neꞌ ruhuâ yumiguì nânj.
18 Ni̱ si ꞌì ruhuôꞌ ni̱ huê danj ni̱ nitaj si yuꞌhuîꞌ mánj,
ni̱ si ꞌì yàngàꞌ ruhuôꞌ niꞌînꞌ nej dinï̂nt ni̱ ûta nìko ꞌì ruhuôꞌ,
huê danj ni̱ nitaj si yuꞌhuîꞌ mánj,
dadinꞌ si yuꞌhuîꞌ ni̱ nu̱n ruhuôꞌ ga̱na̱huin ro̱ꞌo kastîgu,
ni̱ guiì yuꞌhuiꞌ ni̱ nitaj si ꞌì yàngàꞌ ruhuâ ninj niꞌin ninj nej duguiꞌ ninj mánj.
19 Ni̱ ꞌì ruhuôꞌ niꞌînꞌ Ma̱ꞌan Jesús,
dadinꞌ gàꞌ si̱nïnj ga ꞌì ruhuaj niꞌin ñùnꞌ.
20 Ni̱ si hua̱ ꞌngo̱ guiì taj:
“ꞌÌ ruhuâj niꞌín Ma̱ꞌan Ñaꞌanj an”,
sani̱ gininj ꞌì nej dinḯn ninj riñan ninj,
ni̱ huin ninj guiì gidigañuꞌunj.
Ni̱ si nitaj si ꞌì ruhuâ ninj niꞌin ninj dinḯn ninj sa ri̱ña̱n niꞌin ninj.
Ni̱ dàj ga̱ꞌhue gi̱ꞌhiaj ninj ga̱ ꞌì ruhuâ ninj niꞌin ninj Ma̱ꞌan Ñaꞌanj an nga nitaj si niꞌin ninj Ma̱ꞌan ràꞌaj.
21 Ni̱ gàꞌ giyiꞌnïn sun nânj riñan nêꞌ giꞌhiaj Ma̱ꞌan Jesús:
Ni̱ guiì ꞌì ruhuâ niꞌin Ma̱ꞌan Ñaꞌanj an,
ni̱ huê danj ga̱ ꞌì ruhuâ ninj niꞌin ninj nej dinḯn ninj.