Nej daꞌní Ñaꞌanj an
3
Niꞌhiaj nej suj dàj nìko ꞌì ruhuâ Ma̱ꞌan Reꞌ Ñaꞌanj an niꞌin ñùnꞌ,
ni̱ ga̱ꞌhue ga̱ta̱j nej guiì si huînꞌ daꞌní Ma̱ꞌan Ñaꞌanj an;
sani̱ nitaj si niꞌin ninj ahuin sa huînꞌ mánj,
dadinꞌ nun niꞌin ninj Ma̱ꞌan Ñaꞌanj an mánj.
2 ꞌÌ ruhuâ nej ñûnj niꞌin nej ñûnj nej suj na̱nj di̱nï̂nj,
dadinꞌ hia̱j ni̱ huin nêꞌ daꞌní Ma̱ꞌan Ñaꞌanj an,
sani̱ hua̱ na̱nj nun ga̱huin yìtï̀nj dàj ga̱ nêꞌ mánj,
sani̱ gàꞌ niꞌînꞌ si nga ga̱ꞌna̱ꞌ ñûn Ma̱ꞌan Jesús,
ni̱ go̱ꞌ dàj rûnꞌ hua Ma̱ꞌan,
dadinꞌ gi̱ni̱ꞌînꞌ dàj hua Ma̱ꞌan.
3 Ni̱ daranꞌ nej guiì ganaꞌhuìj ni̱ nun ñan ninj Ma̱ꞌan Jesús,
ni̱ na̱gi̱ꞌhiaj sàꞌ ninj ma̱ꞌan ninj,
dadinꞌ Jesús huin sa sàꞌ nï̀nꞌïn.
4 Ni̱ daranꞌ nej guiì giꞌhiaj gakï̱nꞌïn,
ni̱ nitaj si dagahuin ninj sa taj si-ley Ma̱ꞌan Ñaꞌanj an mánj;
dadinꞌ sa ganahuij ruhuâ ninj giꞌhiaj ninj huin gakï̱nꞌïn huê danj ni̱ nitaj si dagahuin ninj si-ley Ma̱ꞌan Ñaꞌanj an mánj.
5 Ni̱ gaꞌnaꞌ Ma̱ꞌan Jesús ruhuâ yumiguì nânj guendâ ga̱ꞌne daranꞌ nej gakï̱nꞌ màn ruhuâ nimûnꞌ,
sani̱ nitaj gàꞌ si ꞌngo̱ gakï̱nꞌïn hua riñan Ma̱ꞌan Jesús mánj.
6 Ni̱ daranꞌ nej guiì hua̱ yìtï̀nj ruhuâ niꞌin Ma̱ꞌan Jesús,
ni̱ nitaj si giꞌhiaj ninj gakï̱nꞌïn mánj;
sani̱ daranꞌ nej guiì giꞌhiaj gakï̱nꞌïn ni̱ hua̱ na̱nj nun gi̱ni̱ꞌin ninj Ma̱ꞌan Jesús ni̱ hua̱ na̱nj nun niꞌin ninj Ma̱ꞌan mánj.
7 Niꞌhiaj nej suj ni̱ si̱ gidigañuꞌunj gàꞌ si ꞌngo̱ nej guiì nej suj man da̱ꞌninj lij;
ni̱ guiì giꞌhiaj sa ni̱ka̱a ni̱ huin ninj sa ni̱ka̱a,
dàj rûnꞌ huin Ma̱ꞌan Jesús sa ni̱ka̱a.
8 Ni̱ guiì giꞌhiaj gakï̱nꞌïn ni̱ huin ninj daꞌní sa nàsàꞌa;
dadinꞌ sa nàsàꞌa ni̱ giꞌhia gakï̱nꞌïn àsìj gui nga giꞌhiaj Ma̱ꞌan Ñaꞌanj an yumiguìi.
Ni̱ rayiꞌî dan gaꞌnaꞌ Ma̱ꞌan Jesús huin Daꞌní Ma̱ꞌan Ñaꞌanj an,
guendâ gu̱du̱rëꞌëj nej sa aꞌnanꞌ giꞌhiaj sichre.
9 Daranꞌ nej guiì gaꞌnga nàkà giꞌhiaj Ma̱ꞌan Ñaꞌanj an,
ni̱ nitaj si giꞌhiaj ninj gakï̱nꞌïn,
dadinꞌ giꞌhiaj ninj dàj rûnꞌ giꞌhiaj Ma̱ꞌan Ñaꞌanj an;
huê danj ni̱ nitaj si giꞌhiaj ninj gakï̱nꞌïn mánj,
dadinꞌ gàꞌ gaꞌnga nàkà ninj giꞌhiaj Ma̱ꞌan Ñaꞌanj an na̱nj ánj.
10 Huê dànanj gùrùguìꞌ gi̱ni̱ꞌînꞌ ahuin guiì huin daꞌní Ma̱ꞌan Ñaꞌanj an,
ni̱ gi̱ni̱ꞌînꞌ ahuin guiì huin daꞌní sa nàsàꞌa:
Dadinꞌ daranꞌ nej guiì nitaj si giꞌhiaj sa ni̱ka̱a,
ni̱ nitaj si ꞌì ruhuâ ninj niꞌin ninj dinḯn ninj,
hiôꞌ ni̱ sê daꞌní Ma̱ꞌan Ñaꞌanj an huin ninj mánj.
Ga̱ ꞌì ruhuôꞌ niꞌînꞌ ꞌngo̱ ni̱ aꞌngô nej duguîꞌ
11 Dadinꞌ huê nuguanꞌ nânj huin sa giyingaꞌ gunïn nej suj àsìj si̱nï̱ïn:
Ni̱ ña̱ꞌa̱n huaj si ga̱ ꞌì ruhuôꞌ niꞌînꞌ ꞌngo̱ ni̱ aꞌngôꞌ nej duguîꞌ.
12 Ni̱ si̱ gaꞌhue gi̱ꞌhiaj nêꞌ dàj rûnꞌ giꞌhiaj Kaín,
dadinꞌ sôꞌ ni̱ huin sôꞌ daꞌní sichre ni̱ rayiꞌî dan ni̱ dagahuiꞌ sôꞌ dinḯn sôꞌ.
Ni̱ ahuin ràyìꞌì dagahuiꞌ sôꞌ dinḯn sôꞌ ràꞌaj.
Dagahuiꞌ sij dadinꞌ gahuin sij sí kï̱j huaa sani̱ Abel ni̱ gahuin sôꞌ sí giꞌhiaj sa ni̱ka̱a na̱nj ánj.
13 Si̱ gahuin ña̱ꞌanj ruhuâ nej suj si gininj ꞌì nej suj riñan nej guiì nitaj si niꞌin Ma̱ꞌan Ñaꞌanj an mánj.
14 Niꞌînꞌ si gahuînꞌ sí gahuiꞌi giꞌhiaj gakï̱nꞌïn sani̱ gàꞌ ganahuin nìꞌnòꞌ giꞌhiaj Ma̱ꞌan Jesús,
dadinꞌ ꞌì ruhuôꞌ niꞌînꞌ nej dinï̂nt.
Ni̱ nej guiì nitaj si ꞌì ruhuâ niꞌin dinḯn ngà yuguej ni̱ hua̱ na̱nj gahuin ninj guiì gahuiꞌi giꞌhiaj gakï̱nꞌïn na̱nj ánj.
15 Daranꞌ nej guiì gininj ꞌì duguiꞌ riñan ni̱ huin ninj guiì dagahuiꞌ duguiꞌ;
ni̱ gàꞌ niꞌin nej suj si nej guiì dagahuiꞌ ni̱ si̱ gaꞌhue ga̱tu̱ ninj ga̱ne nìgànj ninj ñan nne Ma̱ꞌan Ñaꞌanj an mánj.
16 Ni̱ guendâ ꞌì ruhuâ Ma̱ꞌan Jesús niꞌin nêꞌ,
ni̱ rayiꞌî dan ni̱ gahuij rayiꞌî si-ga̱kïnꞌ;
ni̱ huê danj na̱nj ga̱ ruhuâ nêꞌ gàhuìꞌ rayiꞌî dinï̂nt.
17 Sani̱ guiì hua̱ yi̱ruꞌhue ruhuâ yumiguì nânj,
sani̱ niꞌin ninj sij hua̱ nej dinḯn ninj ni̱ hua̱ yuguej ninj ran àko,
ni̱ naꞌhuej ruhuâ nimân ninj gàꞌhuìꞌ ninj sa ga̱chin riñan nej duguiꞌ ninj sa ranꞌ àko,
hiôꞌ ni̱ nitaj si ꞌì ruhuâ ninj niꞌin ninj nej duguiꞌ ninj dàj rûnꞌ ꞌì ruhuâ Ma̱ꞌan Ñaꞌanj an mánj.
18 Riñan nej suj gaꞌmînj na̱nj da̱ꞌninj lij,
sani̱ sê man ngà nuguanꞌan ga̱ꞌmi̱n ni̱ ga̱to̱ꞌ:
ꞌÌ yàngàꞌ ruhuâj niꞌín sòꞌ na̱nj ánj,
sa ña̱ꞌa̱n huin si gi̱niꞌhioꞌ sa ga̱chin riñan aꞌngô nej dinï̂nt ranꞌ àko ni̱ gu̱ru̱gûñuꞌunj.
Hua̱ yìtï̀nj ruhuôꞌ si ga̱na̱ka̱j Ma̱ꞌan Ñaꞌanj an ñùnꞌ
19 Ni̱ si guruguñuꞌunꞌ nej duguîꞌ ranꞌ àko ni̱ yàngàꞌ ni̱ niꞌînꞌ si dagahuînꞌ,
hiôꞌ ni̱ ña̱ꞌa̱n huaj si na̱gi̱ꞌhiaj yìtï̀nꞌ nimûnꞌ riñan Ma̱ꞌan Jesús;
20 ni̱ si dugunïn gàꞌì nimûnꞌ ñùnꞌ rayiꞌî ꞌngo̱ gakï̱nꞌ giꞌhiôꞌ,
sani̱ gi̱nun ruhuôꞌ si Ma̱ꞌan Ñaꞌanj an ni̱ dànanj ûta nìko huaj gàꞌ daꞌ nimûnꞌ,
ni̱ niꞌin daranꞌ sa giꞌhiôꞌ na̱nj ánj.
21 Di̱nï̂nj,
gi̱nun ruhuâ nej suj ni̱ si nitaj si dugunïn gàꞌì nimûnꞌ ñùnꞌ,
ni̱ huê danj na̱nj si du̱gunïn gàꞌì Ma̱ꞌan Ñaꞌanj an ñùnꞌ mánj:
22 Ni̱ daranꞌ nej sa gàchìnꞌ riñan Ma̱ꞌan Jesús ni̱ ri̱kij riñunꞌ,
dadinꞌ dagahuînꞌ sun gaꞌnïnj riñunꞌ ni̱ huê danj na̱nj giꞌhiôꞌ nej sa garanꞌ ruhuâ Ma̱ꞌan na̱nj ánj.
23 Ni̱ nânj huin sun gaꞌnïnꞌ Ma̱ꞌan Ñaꞌanj an riñunꞌ:
Si gùyùmàn ruhuôꞌ niꞌînꞌ siyu̱gui Daꞌní Ma̱ꞌan Jesús,
ni̱ huê danj na̱nj ga̱ ꞌì ruhuôꞌ niꞌînꞌ ꞌngo̱ ni̱ aꞌngô nej dinï̂nt dàj rûnꞌ hua nuguanꞌ gaꞌnïnꞌ sunj riñunꞌ na̱nj ánj.
24 Ni̱ si dagahuînꞌ nuguanꞌ gaꞌnïnꞌ su̱n Ma̱ꞌan Ñaꞌanj an riñunꞌ,
ni̱ hua̱ yìtï̀nj ruhuôꞌ niꞌînꞌ Ma̱ꞌan,
ni̱ huê danj na̱nj nne Ma̱ꞌan ngòꞌ,
ni̱ niꞌînꞌ si nne Ma̱ꞌan Ñaꞌanj an ngòꞌ dadinꞌ gàꞌ gaꞌnïn ga̱ꞌna̱ꞌ Ma̱ꞌan Espíritu Santo nne ngòꞌ na̱nj ánj.